Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Mɛni Tutuutu Ji Baiblo ɔ Tsɔɔmi?

 MI TSƆƆMI MUNYUHI

Bɔ Nɛ Daniel Gbami ɔ Tu Mesia Bami ɔ He Munyu Kɛ Fɔ Si Ha

Bɔ Nɛ Daniel Gbami ɔ Tu Mesia Bami ɔ He Munyu Kɛ Fɔ Si Ha

GBALƆ Daniel hi si pe jeha 500 loko a fɔ Yesu. Se Yehowa de Daniel níhi nɛ ma ha nɛ a na be pɔtɛɛ nɛ a kɛ mumi klɔuklɔu maa pɔ Yesu nu, loo a maa hla lɛ kaa Mesia loo Kristo ɔ. A de Daniel ke: “Ná nɛ o le kaa kɛ je benɛ a ma fã ke a kpale ma  Yerusalem ekohu, kɛ yaa si benɛ Mesia a nɛ ji Hɛ Mi Nyɛɛlɔ ɔ maa ba a, otsi 7, kɛ otsi 62 maa be.”Daniel 9:25, NW.

Loko wa maa na be nɛ Mesia a maa ba a, ja wa le benɛ a je Mesia a bami be ɔ kanemi sisi kekle. Kaa bɔ nɛ gbami ɔ tsɔɔ ɔ, a je be ɔ kanemi sisi kɛ je ‘benɛ a fã ke a kpale ma Yerusalem ekohu ɔ.’ Mɛni be a ha ‘fãmi’ nɛ ɔ? Kaa bɔ nɛ Baiblo ngmalɔ Nehemia tsɔɔ nya a, a fã ke a kpale ya fia Yerusalem gbogbo ɔ ngɛ “Matsɛ Artaherhes matsɛ yemi ɔ we jeha 20 ɔ mi.” (Nehemia 2:1, 5-8, NW) Yi nɔ sane ngmali ma nɔ mi kaa, jeha 474 L.F.K. ji jeha mluku kake nɛ Artaherhes bɔni matsɛ yemi. Enɛ ɔ he je ɔ, e nɔ yemi ɔ jeha 20 ji jeha 455 L.F.K.  Amlɔ nɛ ɔ, wa na be nɛ Daniel gbami nɛ kɔɔ Mesia bami be ɔ kanemi he ɔ je sisi, nɛ ji jeha 455 L.F.K.

Daniel tsɔɔ be abɔ nɛ maa be loko ‘Mesia nɛ ji Hɛ Mi Nyɛɛlɔ ɔ’ maa ba. Gbami ɔ wo “otsi 7,” kɛ “otsi 62,” nɛ tsuo peeɔ otsi 69 ta. Be nɛ ɔ mi kɛmi ji enyɛmɛ? Baiblo sisi tsɔɔmihi fuu tsɔɔ kaa, pi ligbi kpaago nɛ peeɔ otsi nɛ a ngɛ tsɔɔe, se mohu jeha kpaago. Enɛ ɔ tsɔɔ kaa, otsi kake daa si ha jeha kpaago. Blema Yuda bi ɔmɛ le otsi nɛ a kɛ daa si ha jeha kpaago nɛ ɔ saminya. Kaa nɔ hyɛmi nɔ́ ɔ, daa jeha kpaago ɔ, a yeɔ Hejɔɔmi jeha. (2 Mose 23:10,11) Enɛ ɔ he je ɔ, otsi 69 ngɛ gbami ɔ mi ɔ tsɔɔ jeha kpaago totoe 69, loo jeha 483.

Nɔ́ nɛ piɛ wɔ peemi ji kaa wa maa bu akɔtaa. Ke wa kane jeha 483 kɛ je jeha 455 L.F.K. ɔ, e kɛ wɔ ma ba su jeha 29 K.F.S. Jeha nɛ ɔ mi tutuutu nɛ a baptisi Yesu, nɛ e ba plɛ Mesia a nɛ! * (Luka 3:1, 2, 21, 22) Anɛ bɔ nɛ Baiblo gbami nɛ ɔ ba mi ha a be nyakpɛ lo?

^ kk. 2 Kɛ je jeha 455 L.F.K. kɛ ya si jeha 1 L.F.K. peeɔ jeha 454. Nɛ kɛ je jeha 1  L.F.K. kɛ ya si jeha 1 K.F.S. hu peeɔ jeha kake. Nɛ kɛ je jeha 1 K.F.S. kɛ ya si jeha 29 K.F.S. peeɔ jeha 28. Ke wa bua jeha etɛ nɛ ɔmɛ ɔ, kulaa peeɔ jeha 483. A “gbe” Yesu ngɛ jeha 33 ɔ mi, nɛ ji otsi nyingmi kpaagone ɔ mi. (Daniel 9 :24, 26) Hyɛ Pay Attention to Daniel’s Prophecy! yi 11, kɛ Insight on the Scriptures, Kpo 2, ba fa 899 kɛ ya si ba fa 901. Yehowa Odasefohi ji nihi nɛ pee.