Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Níhi Nɛ O Ma Nyɛ Maa Kase Ngɛ Baiblo ɔ Mi

 NÍ KASEMI 51

Tatsɛ Ko Kɛ Jokuɛ Yoyo Ko

Tatsɛ Ko Kɛ Jokuɛ Yoyo Ko

Siria ta buli ɔmɛ nu jokuɛ yoyo ko kɛ ho Siria ya. Jokuɛ yoyo nɛ ɔ ji Israel no. A nu lɛ kɛ je e weku li a he. Kɛ je Siria kɛ ya Israel kɛ wawɛɛ. A tsɛɛ Siria bi ɔmɛ a tatsɛ ɔ ke Naaman. Naaman ngɛ yo. Jokuɛ yoyo ɔ sɔmɔ Naaman yo ɔ. Nihi nɛ jokuɛ yoyo ɔ ngɛ a ngɔ ɔ ja we Yehowa, se lɛɛ e jaa Yehowa.

He womi nɔ hiɔ yaya ko pue Naaman nɔ, nɛ e yeɔ lɛ be fɛɛ be. Jokuɛ yoyo ɔ suɔ kaa e maa ye bua lɛ. E de Naaman yo ɔ ke: ‘I le nɔ ko nɛ e ma nyɛ ma ha nɛ o huno ɔ ma ná he wami. Yehowa gbalɔ ko ngɛ Israel nɛ a tsɛɛ lɛ ke Elisha. E ma nyɛ ma tsa o huno ɔ.’

Naaman yo ɔ de Naaman nɔ́ nɛ jokuɛ yoyo ɔ de lɛ ɔ. Naaman suɔ kaa e ná he wami, enɛ ɔ he ɔ, e ho Elisha we ɔ mi ya ngɛ Israel. Naaman susu kaa Elisha maa pee lɛ kaa bɔ nɛ a peeɔ nimli nguahi. Se Elisha nitsɛ kɛ Naaman tui munyu. E tsɔ e sɔmɔlɔ ko mohu konɛ e ya nya Naaman he. Elisha de  e sɔmɔlɔ ɔ konɛ e ya de Naaman ke: ‘Yaa nɛ o ya du si kpaago ngɛ Yɔdan Pa a mi. Ke o pee jã a, o hiɔ ɔ maa jɔ.’

Naaman mi mi fu wawɛɛ. E de ke: ‘I susu kaa gbalɔ nɛ ɔ ma tsɛ e Mawu ɔ biɛ, nɛ e maa fɔ̃ e nine kɛ ya kɛ ba nɛ e ma tsa mi. Mohu ɔ, e ngɛ mi dee ke ma ya du ngɛ Israel pa nɛ ɔ mi. Pahi nɛ ngɛ Siria a hi pe pahi nɛ ngɛ Israel ɔ. Ke jã lɛɛ ma ya du ngɛ Siria pa amɛ eko mi mɔ.’ Naaman mi mi fu, nɛ e je Elisha we ɔ mi.

Naaman sɔmɔli ɔmɛ ye bua lɛ konɛ e susu níhi a he saminya. A de lɛ ke: ‘Anɛ o sume kaa o maa pee nɔ́ fɛɛ nɔ́ nɛ ma ha nɛ o ma ná tsami lo? Nɔ́ nɛ gbalɔ ɔ ke o pee ɔ, tsa pi nɔ́ ko nɛ o be nyɛe maa pee. Moo lɛɛ moo pee kɛkɛ.’ Naaman bu e sɔmɔli ɔmɛ tue. E ya sɛ Yɔdan Pa a mi, nɛ e mu kɛ ya nyu ɔ sisi si kpaago. Benɛ Naaman mu kɛ ya nyu ɔ sisi si kpaagone ɔ nɛ e ke e jeɔ kpo ɔ, e ná tsami. E bua jɔ wawɛɛ, nɛ e kpale kɛ ho Elisha ngɔ ya konɛ e ya na lɛ si. Naaman de Elisha ke: ‘Piɔ lɛɛ i na kaa Yehowa ji anɔkuale Mawu ɔ nɛ.’ Benɛ Naaman kpale kɛ ho Siria ya nɛ jokuɛ yoyo ɔ nɛ je Israel ɔ na kaa Naaman ná tsami ɔ, kɛ o susu kaa jokuɛ yoyo ɔ maa nu he ha kɛɛ?

“O ha nɛ jokuɛwi kɛ bimwɔwi ngɛ o yi jee.”​​—Mateo 21:16