Munyuhi nɛ ngɛ fã nɛ ɔ mi ɔ kɔɔ Matsɛ Sɔɔl kɛ Matsɛ David a yi nɔ sane he. Níhi nɛ ya nɔ ɔ he maa pee jeha 80. Sisije ɔ, Sɔɔl baa e he si nɛ e yeɔ Mawu gbeye, se e kɛ we kulaa nɛ e tsake. E bui Yehowa blɔ tsɔɔmi tue hu. Yehowa kua Sɔɔl, nɛ pee se ɔ, e de Samuɛl ke e pɔ David nu konɛ e ye Israel bi ɔmɛ a nɔ matsɛ ngɛ Sɔɔl se. Enɛ ɔ ha nɛ Sɔɔl nyɛ David, nɛ e ka si abɔ kaa e maa gbe David. Se David pee we Sɔɔl yayami ko kɛ to nane mi. Sɔɔl binyumu ji Yonatan. Yonatan le kaa Yehowa suɔ nɛ David nɛ ye matsɛ, lɔ ɔ he ɔ, e fĩ David se. David tɔ̃ tɔmihi nɛ hɛdɔ ngɛ he, se e kplɛɛ tsɔsemi nɛ Yehowa kɛ ha lɛ ɔ nɔ. Ke o ji fɔlɔ ɔ, moo ye bua o bi ɔ konɛ e na kaa e he hia nɛ e fĩ Mawu blɔ nya tomi se be fɛɛ be.