Mɛni he je nɛ Yehowa ngɔ nyu kpekpemi kɛ kpata yayami peeli a hɛ mi blema a? Kɛ je blema tɔɔ ɔ, e he ba hia nɛ adesa nitsɛ nɛ mwɔ e yi mi kpɔ kaa e maa pee Mawu suɔmi nya ní, loo e be pee. Ni komɛ pee Mawu suɔmi nya ní, se ni komɛ lɛɛ a pee we Mawu suɔmi nya ní. Adam, kɛ Hawa, kɛ a bi Kain pee we Mawu suɔmi nya ní. Ni komɛ kaa Habɛl kɛ Noa lɛɛ a pee Mawu suɔmi nya ní. Ngɛ Noa be ɔ mi ɔ nihi fuu pee ní yayahi. Enɛ ɔ he ɔ, Yehowa kpata yayami peeli ɔmɛ tsuo a hɛ mi. Ngɛ fã nɛ ɔ mi ɔ, wa maa na kaa ke wa peeɔ Yehowa suɔmi nya ní ɔ, e naa, nɛ ke wa pee we e suɔmi nya ní hu e naa. Wa maa na hu kaa Yehowa be blɔ ngmɛe nɛ yayami peeli maa hi si daa.