Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Níhi Nɛ O Ma Nyɛ Maa Kase Ngɛ Baiblo ɔ Mi

 NÍ KASEMI 101

A Ngɔ Paulo Kɛ Ho Roma Ya

A Ngɔ Paulo Kɛ Ho Roma Ya

Paulo gbe blɔ etɛne nɛ e hia kɛ ya fiɛɛ sane kpakpa a nya ngɛ Yerusalɛm. A nu lɛ ngɛ lejɛ ɔ, nɛ a wo lɛ tsu. Nyɔ mi ɔ, e na nina ko. Yesu de lɛ ngɛ nina a mi ke: ‘O maa ya Roma, nɛ o ma ya fiɛɛ ngɛ lejɛ ɔ.’ A ngɔ Paulo kɛ je Yerusalɛm kɛ ho Kaisarea ya, nɛ a wo lɛ tsu jeha enyɔ ngɛ lejɛ ɔ. Benɛ Amlaalo Fɛsto ngɛ Paulo sane ɔ yee ɔ, Paulo de ke: ‘I suɔ nɛ Kaisare nɛ ye ye sane ɔ ngɛ Roma.’ Fɛsto de lɛ ke: ‘Ke o ke Kaisare ɔ nɛ ye o sane ɔ, lɛɛ Kaisare ngɔ o maa ya.’ A kɛ Paulo ya wo mele ko nɛ yaa Roma a mi. Nyɛmimɛ Kristofohi enyɔ piɛɛ e he. Mɛ ji Luka kɛ Aristako.

Benɛ a yaa ngɛ wo ɔ nɔ ɔ, kɔɔhiɔ ngua ko bɔni fiami. Kɔɔhiɔ ɔ fia wawɛɛ ligbi fuu. Nihi nɛ a ngɛ mele ɔ mi ɔ susu kaa a ma gbo. Se Paulo de mɛ ke: ‘Nyumuhi, bɔfo ko de mi ngɛ nlami mi ke: “Paulo koo ye gbeye. O ma ya su Roma, nɔ́ ko be nihi nɛ a ngɛ mele ɔ mi ɔ pee.” Nyɛ ná kã! Wa be gboe.’

Kɔɔhiɔ ɔ fia ligbi 14 sɔuu. Nyagbenyagbe ɔ, a na zugba kpɔ ko nɛ wo bɔle lɛ ngɛ a hɛ mi. A tsɛɛ jamɛ a zugba kpɔ ɔ ke Mɔlta. Mele ɔ ya si nɔ́ ko nɛ e ywia. Se nihi 276 nɛ a ngɛ mi ɔ tsuo ya su wo ɔ nya slɔkee. Ni komɛ sle, nɛ ni komɛ hu bu mele tso ɔmɛ nɛ a ku ɔ a nɔ kɛ ya su wo ɔ nya. Mɔlta ma a mi bi ɔmɛ hyɛ a nɔ, nɛ a slɛ la ha mɛ konɛ fiɛ nɛ ko ye mɛ.

Nyɔhiɔ etɛ se ɔ, ta buli ɔmɛ ngɔ Paulo kɛ ya wo mele kpa mi kɛ ho Roma ya. Benɛ e ya su ɔ, nyɛmimɛ ɔmɛ ya nya e he. Benɛ Paulo na mɛ ɔ, lɔ ɔ wo lɛ he wami, nɛ e na Yehowa si. Jinɛ e sa kaa Paulo ko hi tsu womi he, se a ngmɛ lɛ blɔ nɛ e hai tsu, nɛ ta bulɔ ko bu e he. E hi lejɛ ɔ jeha enyɔ. Ke nihi ba slaa lɛ ɔ, e fiɛɛɔ Mawu Matsɛ Yemi ɔ kɛ tsɔɔ mɛ, nɛ e tsɔɔ mɛ Yesu he ní. Paulo ngma womihi kɛ ya ha asafohi nɛ a ngɛ Asia Nyafii kɛ Yudea. Niinɛ, Yehowa gu Paulo nɔ nɛ e ha nɛ sane kpakpa a su ma je li ɔmɛ a ngɔ.

‘Ngɛ nɔ́ fɛɛ nɔ́ mi ɔ, wa tsɔɔ kaa Mawu sɔmɔli ji wɔ niinɛ. Wa fĩɔ si ngɛ níhi fuu a mi, amanehluhi a mi, fimi behi a mi, kɛ haomihi a mi kɛ tsɔɔ jã.’​​—2 Korinto Bi 6:4