Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Níhi Nɛ O Ma Nyɛ Maa Kase Ngɛ Baiblo ɔ Mi

 NÍ KASEMI 95

Nɔ́ Ko Nyɛ We Nɛ E Tsi A Nya

Nɔ́ Ko Nyɛ We Nɛ E Tsi A Nya

Nyumu ko nɛ e nyɛ we nyɛɛmi hiɔ si ngɛ sɔlemi we ɔ sinya a nya daa ligbi. Piani ko ɔ, e na Petro kɛ Yohane nɛ a yaa sɔlemi we ɔ. E de mɛ ke: ‘I kpa nyɛ pɛɛ nɛ nyɛ ha mi nɔ́ ko.’ Petro de lɛ ke: ‘I ngɛ nɔ́ ko nɛ ma ha mo nɛ hi pe sika. Ngɛ Yesu biɛ mi ɔ, tee si nɛ o nyɛɛ!’ Kɛkɛ Petro ye bua nyumu ɔ nɛ e te si, nɛ e bɔni nyɛɛmi! Nɔ́ nɛ ɔ pee ni ɔmɛ nyakpɛ, nɛ a bua jɔ wawɛɛ, nɛ nihi fuu ba pee kaseli.

Se osɔfo ɔmɛ kɛ Saduki bi ɔmɛ a mi mi fu. A nu bɔfo ɔmɛ, nɛ a kɛ mɛ ya kojomi he, nɛ a bi mɛ ke: ‘Mɛnɔ ha nyɛ he blɔ kaa nyɛ tsa nyumu nɛ ɔ?’ Petro de mɛ ke: ‘Yesu Kristo, nɔ nɛ nyɛ gbe lɛ ɔ nɛ ha wɔ he blɔ.’ Jami hɛ mi nyɛɛli ɔmɛ kpa ngmlaa kɛ pue a nɔ ke: ‘Nyɛ kpa Yesu he munyu tumi!’ Se bɔfo ɔmɛ de mɛ ke: ‘E sa nɛ waa tu e he munyu. Wa be kpae.’

Benɛ a ngmɛɛ Petro kɛ Yohane he ɔ, oya nɔuu nɛ a ya de kaseli kpa amɛ nɔ́ nɛ ya nɔ ɔ. A pee kake kɛ sɔle, nɛ a de Yehowa ke: ‘Wa kpa mo pɛɛ nɛ o ha wɔ kã konɛ waa ya nɔ nɛ wa tsu o ní tsumi ɔ.’ Yehowa ha mɛ e mumi klɔuklɔu ɔ, nɛ a ya nɔ nɛ a fiɛɛ, nɛ a tsa nihi. Nihi babauu ba pee kaseli. Nɔ́ nɛ ɔ dɔ Saduki bi ɔmɛ wawɛɛ nɛ a nuu bɔfo ɔmɛ, nɛ a wo mɛ tsu. Se nyɔ ɔ mi ɔ, Yehowa tsɔ e bɔfo ko nɛ e ya bli sinya amɛ, nɛ e de bɔfo ɔmɛ ke: ‘Nyɛɛ kpale kɛ ho sɔlemi we ɔ ya nɛ nyɛ ya tsɔɔ nihi ní.’

E nɔ jena nɔuu ɔ, nihi nɛ a hyɛɔ nihi nɛ a wo mɛ tsu ɔ a nɔ ɔ de Sanhedri ɔ kɛ jami hɛ mi nyɛɛli ɔmɛ ke: ‘A ngmɛ sinya amɛ a mi, se ni ɔmɛ nɛ nyɛ wo mɛ tsu ɔ je! A ya ngɛ nihi ní tsɔɔe ngɛ sɔlemi we ɔ!’ A kpale nuu bɔfo ɔmɛ kɛ ba Sanhedri ɔ ekohu. Osɔfo nɔkɔtɔma a de mɛ ke: ‘Wa wo nyɛ  si ke nyɛ ko tu Yesu he munyu!’ Se Petro ha mɛ heto ke: “E sa kaa waa bu Mawu mohu tue, se pi nimli.”

Jami hɛ mi nyɛɛli ɔmɛ a mi mi fu wawɛɛ, nɛ a pee a juɛmi kaa a maa gbe bɔfo ɔmɛ. Se Farisi no ko nɛ a tsɛɛ lɛ ke Gamaliɛl ɔ te si nɛ e de mɛ ke: ‘Nyɛɛ hyɛ nɛ hi! Eko ɔ, Mawu piɛɛ nyumu nɛ ɔmɛ a he. Anɛ nyɛ suɔ kaa nyɛ maa te si kɛ wo Mawu lo?’ A bu Gamaliɛl ga womi ɔ tue. A fiaa bɔfo ɔmɛ kpa, nɛ a de mɛ ke a kpa fiɛɛmi, kɛkɛ nɛ a ngmɛɛ a he. Se lɔ ɔ ha we nɛ bɔfo ɔmɛ nɛ a kpa fiɛɛmi. A ya nɔ nɛ a fiɛɛ sane kpakpa a kɛ kã ngɛ sɔlemi we ɔ, kɛ wehi a mi.

“E sa kaa waa bu Mawu mohu tue, se pi nimli.”​​—Ní Tsumi 5:29