Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

 NÍ KASEMI 90

Yesu Gbo Ngɛ Golgota

Yesu Gbo Ngɛ Golgota

Osɔfo nikɔtɔma amɛ ngɔ Yesu kɛ ho amlaalo ɔ we ɔ mi ya. Pilato bi mɛ ke: ‘Mɛni yayami nyumu nɛ ɔ pee?’ A de lɛ ke: ‘E ke matsɛ ji lɛ!’ Pilato bi Yesu ke: “Mo ji Yuda bi ɔmɛ a Matsɛ ɔ lo?” Yesu ha lɛ heto ke: “Pi hiɛ ɔ nɛ ye Matsɛ Yemi ɔ je.”

Kɛkɛ nɛ Pilato ha nɛ a ngɔ Yesu kɛ ya ha Hɛrode nɛ e yeɔ Galilea kpokpa a nɔ ɔ, konɛ e hyɛ kaa e maa na nɔ́ yaya ko ngɛ Yesu he lo. Hɛrode nɛ nɔ́ yaya ko ngɛ Yesu he, lɔ ɔ he ɔ, e ha nɛ a kpale lɛ kɛ ho Pilato ngɔ ya ekohu. Lɔ ɔ se ɔ, Pilato de ni ɔmɛ ke: ‘Hɛrode nɛ nɔ́ yaya ko ngɛ nyumu nɛ ɔ he, imi hu i nɛ nɔ́ ko ngɛ e he. Ma ngmɛɛ e he.’ Ni ɔmɛ kpa ngmlaa nɛ a de ke: ‘Moo gbe lɛ! Moo gbe lɛ!’ Ta buli fiaa Yesu kpa, a su lada kɛ pue e nɔ, nɛ a kongo lɛ. A ngɔ mio pɛɛ kɛ wo e yi, nɛ a ye e he fɛu ke: ‘Yuda bi a Matsɛ, mo he manye.’ Pilato kpale de ni ɔmɛ ke: ‘I nɛ nɔ́ yaya ko ngɛ nyumu nɛ ɔ he.’ Se a kpa ngmlaa ke: “Sɛu lɛ!” Enɛ ɔ he ɔ, Pilato ngmɛɛ e he ha mɛ konɛ a ya gbe lɛ.

A ngɔ Yesu kɛ ya he ko nɛ́ a tsɛɛ ke Golgota, nɛ a ka lɛ ngɛ tso nɔ, nɛ a wo tso ɔ nɔ kɛ ma si. Yesu sɔle ke: ‘Tsaatsɛ, moo ngɔ a he yayami kɛ pa mɛ, ejakaa a li nɔ́ nɛ a ngɛ pee.’ Nihi ye Yesu he fɛu, nɛ a de lɛ ke: ‘Ke Mawu Bi ji mo ɔ, mo kple si kɛ je tso ɔ nɔ! Mo he mo nitsɛ o yi wami.’

Jamɛ a be ɔ mi ɔ, a sɛu juli komɛ ngɛ Yesu kasa mi. A ti nɔ kake de Yesu ke: ‘Mo kai mi ngɛ o Matsɛ Yemi ɔ mi.’ Yesu wo lɛ si ke: “O maa piɛɛ ye he ngɛ Paradeiso.” Piani mi ɔ, diblii wo ngmlɛfia etɛ sɔuu ngɛ zugba a nɔ. Jamɛ a be ɔ mi ɔ, kaseli ɔmɛ a ti ni komɛ daa si ngɛ sɛumi tso ɔ he. Maria, nɛ ji Yesu mami hu piɛɛ a he. Yesu de Yohane ke e ngɔ lɛ kaa e mami ji Maria konɛ e hyɛ e nɔ.

Nyagbenyagbe ɔ, Yesu de ke: ‘E ba nyagbe!’ E ma e yi si, nɛ e wo e nyagbe mumi. Jamɛ a be ɔ mi nɔuu ɔ, zugba mimiɛ wawɛɛ. Bo nɛ po He Klɔuklɔu, kɛ He Klɔuklɔu Pe Kulaa a kpɛti  ngɛ sɔlemi we ɔ mi gba enyɔ. Ta bulɔ nɔkɔtɔma ko de ke: ‘Niinɛ, Mawu Bi ji nɛ ɔ nɛ.’

“Ngɛ bɔ nɛ Mawu si womi ɔmɛ hiɛ babauu ha tsuo se ɔ, kɛ gu e nɔ ɔ, a ba pee ‘ee.’”​​—2 Korinto Bi 1:20