Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

 NÍ KASEMI 92

Wo Yali Ɔmɛ Na Yesu

Wo Yali Ɔmɛ Na Yesu

Benɛ Yesu je e he kpo kɛ tsɔɔ bɔfo ɔmɛ se ɔ, Petro pee e juɛmi kaa e ma ya gbe lo ngɛ Galilea Wo ɔ mi. Toma, Yakobo, Yohane kɛ kaseli kpa komɛ piɛɛ e he kɛ ho. Jamɛ a nyɔ ɔ mi tsuo ɔ, a gbi lo kake po.

Benɛ je na a, a na nyumu ko nɛ e daa si ngɛ wo ɔ nya. Nyumu ɔ wo e gbi nɔ, nɛ e bi mɛ ke: ‘Nyɛ gbe lo ɔ eko lo?’ A de lɛ ke: “Ohoo!” Nyumu ɔ de mɛ ke: “Nyɛ pue ya a ngɛ lɛ ɔ hiɔ nɔ.” Benɛ a pee jã a, lo fuu ba sɛ ya a mi, nɛ a nyɛ we nɛ a gbla ya a kɛ wo lɛ ɔ mi. Kɛkɛ nɛ Yohane na kaa Yesu lɛ daa si ɔ nɛ. E de ke: “Nyɔmtsɛ ɔ lɛ daa si ɔ nɛ!” Amlɔ nɔuu nɛ Petro tu kɛ sɛ nyu ɔ mi, nɛ e sle kɛ ya wo ɔ nya. Kaseli kpa amɛ lɛɛ a hlui lɛ ɔ kɛ ba wo ɔ nya.

Benɛ a ba su wo ɔ nya a, a na abolo kɛ lo ngɛ la nɔ. Yesu de mɛ ke a ngɔ lo nɛ a nu ɔ eko kɛ ba piɛɛ nɔ́ nɛ ngɛ la a nɔ ɔ he. Lɔ ɔ se ɔ, e de mɛ ke: ‘Nyɛ ba ye ní.’

 Benɛ a ye ní ɔ ta a, Yesu bi Petro ke: ‘O suɔ mi pe wo yami lo?’ Petro de lɛ ke: ‘Ee, Nyɔmtsɛ, mo nitsɛ o le kaa i suɔ mo.’ Yesu de lɛ ke: ‘Moo lɛ ye jijɔ bi ɔmɛ.’ Yesu kpale bi lɛ ke: ‘Petro, o suɔ mi lo?’ Petro de lɛ ke: ‘Nyɔmtsɛ, o le kaa i suɔ mo.’ Yesu de lɛ ke: ‘Hyɛ ye jijɔ tsɔwi ɔmɛ a nɔ.’ Yesu kpale bi jamɛ a sane ɔ si etɛne. Sane bimi ɔ ha nɛ Petro hao wawɛɛ. E de ke: ‘Nyɔmtsɛ, o le nɔ́ fɛɛ nɔ́. O le kaa i suɔ mo.’ Yesu de lɛ ke: ‘Moo lɛ ye jijɔ tsɔwi ɔmɛ.’ Lɔ ɔ se ɔ, e de Petro ke: “Yaa nɔ nɛ o nyɛɛ ye se.”

“[Yesu] de mɛ ke: ‘Nyɛ ba nyɛɛ ye se, nɛ ma pee nyɛ wo hɛli nɛ a hɛɛ nimli.’ Amlɔ nɔuu nɛ a je a ya amɛ a he, nɛ a nyɛɛ e se.”​​—Mateo 4:19, 20