Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Níhi Nɛ O Ma Nyɛ Maa Kase Ngɛ Baiblo ɔ Mi

 NÍ KASEMI 81

Yoku Nɔ Fiɛɛmi

Yoku Nɔ Fiɛɛmi

Benɛ Yesu hla bɔfo 12 ɔmɛ se ɔ, e kple si kɛ je yoku ɔ nɔ kɛ ya he ko nɛ nihi fuu bua a he nya ngɛ. Ni ɔmɛ je Galilea, Yudea, Tiro, Sidon, Siria, kɛ Yɔdan pa a se kɛ ba. A ngɔ hiɔtsɛmɛ kɛ nihi nɛ mumi yayamihi ngɛ mɛ haoe kɛ piɛɛ a he kɛ ba. Yesu tsa mɛ tsuo. Jehanɛ ɔ, e ya hi si ngɛ yoku ɔ he nɛ e bɔni munyu tumi. E tsɔɔ nɔ́ nɛ e sa kaa waa pee konɛ waa pee Mawu huɛmɛ. E sa nɛ wa yɔse kaa wa hia Yehowa ngɛ wa si himi mi, nɛ e sa kaa waa suɔ lɛ. Se ke wa sume ni kpahi ɔ, wa be nyɛe maa suɔ Mawu. E sa nɛ wa je mi mi himi kpo, nɛ waa kɛ nɔ fɛɛ nɔ nɛ hi si saminya; wa he nyɛli hu piɛɛ he.

Yesu de ke: ‘Pi o huɛmɛ pɛ nɛ e sa kaa o suɔ mɛ. E sa nɛ o suɔ o he nyɛli, nɛ o je o tsui mi nɛ o ngɔ nihi a tɔmihi kɛ pa mɛ. Ke o na kaa nɔ ko mi mi fu mo ɔ, moo ya nɛ o ya kpa lɛ pɛɛ nɔuu. O kɛ nihi nɛ hi si kaa bɔ nɛ o suɔ nɛ a kɛ mo nɛ hi si ɔ.’

 Yesu wo ni ɔmɛ ga kpakpa ngɛ he lo nya níhi a he. E de mɛ ke: ‘Yehowa huɛ nɛ wa maa pee ɔ he hia kulaa pe sika fuu nɛ wa ma ná. Nɔ ko ma nyɛ maa ju o sika, se nɔ ko be nyɛe maa ju huɛ bɔmi nɛ ngɛ o kɛ Yehowa nyɛ kpɛti ɔ. Mo kpa haomi ngɛ ní nɛ o maa ye, kɛ ní nɛ o maa nu, aloo tade nɛ o maa wo ɔ he. Hyɛ lohwe pɛlitsɛmɛ ɔmɛ ha. Mawu bɔɔ mɔde kaa e ma ha mɛ niye ní nɛ maa su mɛ. Ke o ngɛ haoe ɔ, lɔ ɔ be hae nɛ o ná ligbi kake kɛ piɛɛ o wami he. Mo kai kaa Yehowa le nɔ́ nɛ hia mo.’

Nimli babauu ɔ nui kaa nɔ ko tu munyu nɛ Yesu tu nɛ ɔ hyɛ. A jami nya dali ɔmɛ tsɔɔ we mɛ ní nɛ ɔmɛ. Mɛni he je nɛ Yesu le ní tsɔɔmi saminya a? Ejakaa nɔ́ fɛɛ nɔ́ nɛ e tsɔɔ ɔ je Yehowa ngɔ.

“Nyɛɛ ngɔ ye kuɛpã tso ɔ kɛ fɔ nyɛ nɔ nɛ nyɛɛ kase mi, ejakaa ye he jɔ, nɛ i baa ye he si kɛ jeɔ ye tsui mi, nɛ nyɛ he mi maa jɔ nyɛ.”​​—Mateo 11:29