Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Níhi Nɛ O Ma Nyɛ Maa Kase Ngɛ Baiblo ɔ Mi

 NÍ KASEMI 83

Yesu Ha Nihi Babauu Niye Ní

Yesu Ha Nihi Babauu Niye Ní

Benɛ e piɛ bɔɔ nɛ jeha 32 He Tsɔmi ɔ maa su ɔ, kaseli ɔmɛ je fiɛɛmi tso mi kɛ ba. Pɔ tɔ a he, enɛ ɔ he ɔ, Yesu ha nɛ a hi lɛ mi, nɛ mɛ tsuo a ho Betsaida ya konɛ a ya jɔɔ a he. Se benɛ lɛ ɔ su Betsaida wo ɔ nya a, Yesu na kaa nihi fuu nyɛɛ a se kɛ ba lejɛ ɔ. E ngɛ mi kaa Yesu suɔ kaa e kɛ e kaseli ɔmɛ maa jɔɔ a he mohu lɛɛ, se e je mi mi jɔmi kpo kɛ tsɔɔ ni ɔmɛ. E tsa hiɔtsɛmɛ ɔmɛ nɛ e bɔni ni ɔmɛ ní tsɔɔmi. Yesu tsɔɔ mɛ Mawu Matsɛ Yemi ɔ he ní ligbi ɔ tsuo. Benɛ e su gbɔkuɛ ɔ, e kaseli ɔmɛ ba e ngɔ nɛ a de lɛ ke: ‘Hwɔ ngɛ ni ɔmɛ yee. Moo wo mɛ blɔ konɛ a ya hla nɔ́ ko nɛ a ye.’

Yesu de mɛ ke: ‘E he hia we kaa a maa je. Nyɛ ha mɛ nɔ́ ko nɛ́ a ye.’ Kaseli ɔmɛ bi lɛ ke: ‘O suɔ nɛ wa ya he niye ní kɛ ba ha mɛ lo?’ Filipo nɛ ji bɔfo ɔmɛ a kpɛti nɔ kake de lɛ ke: ‘Ke wa hɛɛ sika fuu po, wa be nyɛe ma he abolo nɛ maa su nimli nɛ ɔmɛ a nya.’

Yesu bi mɛ ke: ‘Abolo enyɛmɛ wa ngɛ?’ Andrea ha heto ke: ‘Wa ngɛ abolo enuɔ kɛ lo enyɔ. E be mɛ sue kulaa.’ Yesu de mɛ ke: ‘Nyɛɛ ngɔ abolo ɔ kɛ lo ɔ kɛ ba.’ E de ni ɔmɛ ke a bua a he nya nyingmi enuɔɔnuɔ kɛ lafalafa, nɛ a hi si ngɛ nga a nɔ. Yesu ngɔ abolo ɔ kɛ lo ɔ, nɛ e hyɛ hiɔwe nɛ e sɔle. Lɔ ɔ se ɔ, e ngɔ niye ní ɔ kɛ ha e kaseli ɔmɛ, nɛ a gba ha ni ɔmɛ. Nyumuhi 5,000 kɛ yihi kɛ jokuɛwi nɛ a ngɛ lejɛ ɔ tsuo ye ní nɛ a tɔ. Pee se ɔ, kaseli ɔmɛ kukuɔ bibliwi nɛ piɛ ɔ, konɛ eko dã.  Bibliwi ɔmɛ hyi kusii 12 tɔ! Nyakpɛ nɔ́ nitsɛnitsɛ ji nɛ ɔ nɛ, aloo pi jã?

Ni ɔmɛ a nya kpɛ a he wawɛɛ, enɛ ɔ he ɔ, a pee a juɛmi kaa a maa wo Yesu matsɛ. Se Yesu le kaa e sui be nɛ Yehowa to kaa e ye matsɛ ɔ lolo. Enɛ ɔ he ɔ, e wo ni ɔmɛ blɔ, nɛ e de e kaseli ɔmɛ ke a ho Galilea Wo ɔ se ya. Kaseli ɔmɛ ya sɛ a lɛ ɔ mi, se Yesu lɛɛ e ho yoku ko nɔ ya. Mɛni he je? Ejakaa e suɔ nɛ e maa sɔle kɛ ha e Tsɛ ɔ. Ke Yesu be deka po ɔ, e hlaa be kɛ sɔleɔ.

“Nyɛ tsu ní, se pi ngɛ niye ní nɛ e puɛɔ nɛ nyɛ ma ná a he je, mohu ɔ, ngɛ niye ní nɛ e ngɛ daa nɛ e haa nɔ neneene wami nɛ́ nɔmlɔ Bi ɔ ma ha nyɛ ɔ he je.”​​—Yohane 6:27