Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Níhi Nɛ O Ma Nyɛ Maa Kase Ngɛ Baiblo ɔ Mi

 NÍ KASEMI 70

Bɔfohi Fia Adafi Kaa A Fɔ Yesu

Bɔfohi Fia Adafi Kaa A Fɔ Yesu

Kaisare Ɔgɛsto nɛ́ e ye mahi nɛ ngɛ Roma Nɔ Yemi ɔ sisi ɔ wo mlaa kaa Yuda bi tsuo nɛ a ho a mahi a mi ya konɛ a ya ngma a biɛ. Enɛ ɔ he ɔ, Yosɛf kɛ Maria hia blɔ kɛ ho Bɛtlehɛm ya. Lejɛ ɔ lɛ Yosɛf weku li ɔmɛ ngɛ. Jamɛ a be ɔ mi ɔ, e piɛ bɔɔ nɛ Maria ma fɔ.

Benɛ a ya su Bɛtlehɛm ɔ, he ko be nɛ a maa hi, enɛ ɔ he ɔ, a ya hi lohwehi a tsu ko mi. Maria fɔ e binyumu Yesu ngɛ lejɛ ɔ. E ngɔ bo kɛ ha e he, nɛ e kɛ lɛ fɔ lohwehi a niye ní daka ko mi.

Jamɛ a be ɔ mi ɔ, to hyɛli komɛ ngɛ a tohi hyɛe ngɛ nga a nɔ ngɛ Bɛtlehɛm kasa nya. Si kake too ɔ, bɔfo ko ba da si ngɛ a hɛ mi, kɛkɛ nɛ Yehowa hɛ mi nyami ɔ kpɛ kɛ bɔle mɛ. To hyɛli ɔmɛ a tsui po, se bɔfo ɔ de mɛ ke: ‘Nyɛ ko ye gbeye. I ngɛ sane kpakpa ko nɛ ma de nyɛ. Mwɔnɛ ɔ, a fɔ Mesia a ngɛ Bɛtlehɛm.’ Jamɛ a  be ɔ mi nɔuu nɛ bɔfohi fuu je a he kpo ngɛ hiɔwe, nɛ a de ke: ‘Hɛ mi nyami ha Mawu ngɛ hiɔwe lokoo, nɛ tue mi jɔmi nɛ hi nihi nɛ a ngɛ zugba a nɔ a kpɛti.’ Kɛkɛ nɛ bɔfo ɔmɛ laa. Kɛ to hyɛli ɔmɛ pee a ní ha kɛɛ?

To hyɛli ɔmɛ de a he ke: ‘Nyɛ ha waa ho Bɛtlehɛm ya nɔuu.’ A ho Bɛtlehɛm ya amlɔ nɔuu, nɛ a ya na Yosɛf kɛ Maria kɛ bimwɔyo ɔ nɛ a fɔ ɔ ngɛ lohwehi a tsu ko mi.

Nihi fuu nu nɔ́ nɛ bɔfo ɔ de to hyɛli ɔmɛ ɔ he, nɛ e pee mɛ nyakpɛ. Maria susu munyu nɛ bɔfo ɔ tu ɔ he saminya, nɛ e hɛ ji nɔ. To hyɛli ɔmɛ kpale kɛ ya hyɛ a to ɔmɛ, nɛ a na Yehowa si ngɛ níhi nɛ a na, kɛ níhi nɛ a nu ɔ he.

“Mawu ngɔ nɛ i je kɛ ba, nɛ i ngɛ hiɛ ɔ. I bɛ ngɛ imi nitsɛ ye he wami nya, mohu ɔ, Mawu lɛ e tsɔ mi.”​​—Yohane 8:42