Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Mɛni Baiblo ɔ Ma Nyɛ Maa Tsɔɔ Wɔ?

Nyagbe Ningma

Nyagbe Ningma

1 YEHOWA

Mawu biɛ ji Yehowa, nɛ e biɛ ɔ sisi ji “O Deɔ O Peeɔ.” Yehowa ji Mawu ope, nɛ lɛ nɛ e bɔ níhi tsuo. E ngɛ he wami nɛ e kɛ maa pee nɔ́ tsuaa nɔ́ nɛ e to e yi mi kaa e maa pee ɔ.

Ngɛ Hebri gbi mi ɔ, a kɛ ningma okadi eywiɛ lɛ ngma Mawu biɛ ɔ. Ngɛ Blɛfo gbi mi ɔ, jamɛ a ningma okadi ɔmɛ ji YHWH aloo JHVH. Mawu biɛ ɔ je kpo ngɛ blema Hebri Ngmami ɔ mi maa pee si 7,000 sɔuu. Ngɛ je ɔ mi tsuo ɔ, nihi tsɛɔ Mawu biɛ Yehowa a ngɛ blɔ slɔɔtohi a nɔ. A tsɛɛ biɛ ɔ kaa bɔ nɛ nihi le lɛ ngɛ a je gbi mi ɔ.

Yi 1, kk. 15

2 “MAWU MUMI Ɔ LƐ HA NƐ NIHI NGMA” BAIBLO Ɔ

Mawu ji Baiblo ɔ Ngmalɔ, se e gu nimli a nɔ kɛ ngma. Wa ma nyɛ ma kɛ to tsɛ ko nɛ e bwɔ, nɛ e de e bi ke e ngma sɛ womi ha lɛ ɔ he. Munyuhi nɛ ngɛ sɛ womi ɔ mi ɔ peeɔ tsɛ ɔ nɔ́. Mawu ngɔ e mumi klɔuklɔu ɔ kɛ kudɔ nihi nɛ a ngma níhi nɛ e suɔ kaa a ngma a. Mawu mumi ɔ ye bua mɛ ngɛ blɔ slɔɔtohi a nɔ nɛ a ngma Baiblo ɔ. Be komɛ ɔ, e guɔ nina, loo nlami nɔ kɛ tsɔɔ mɛ nɔ́ nɛ a ngma.

Yi 2, kk. 5

3 SISI TOMI MLAAHI

Sisi tomi mlaa ji Baiblo tsɔɔmi ko nɛ yeɔ bua wɔ nɛ wa nuɔ Baiblo mi munyu ko sisi. Kaa nɔ hyɛmi nɔ́ ɔ, sisi tomi mlaa nɛ ji, “huɛ yaya bɔmi puɛɔ je mi bami kpakpa” a tsɔɔ wɔ kaa nihi nɛ waa kɛ mɛ bɔɔ ɔ ma nyɛ maa ye bua wɔ nɛ wa ná su kpakpahi, aloo a ma nyɛ ma puɛ wa subai. (1 Korinto Bi 15:33) Jã kɛ̃ nɛ sisi tomi mlaa nɛ ji, “nɔ́ nɛ nɔmlɔ du ɔ, lɔ ɔ nɔuu e ma kpa” a tsɔɔ wɔ kaa wa be nyɛɛ maa tu ní yayahi nɛ maa je wa ní peepeehi a mi kɛ ba a nya fo.Galatia Bi 6:7.

Yi 2, kk. 12

  4 GBAMI

Gbami ji sɛ gbi ko nɛ je Mawu ngɔ. E ma nyɛ maa pee sɛ gbi ko nɛ tsɔɔ Mawu yi mi tomi ko, kojomi he sɛ gbi ko, fami ko, aloo tsɔɔmi ko nɛ kɔɔ je mi bami he ɔ mi. E ma nyɛ maa pee sɛ gbi ko nɛ kɔɔ nɔ́ ko nɛ maa ba hwɔɔ se he hulɔ. Baiblo ɔ mi gbamihi fuu ba mi momo.

Yi 2, kk. 13

5 GBAMIHI NƐ KƆƆ MESIA A HE

Baiblo gbamihi nɛ kɔɔ Mesia a he ɔ tsuo ba mi ngɛ Yesu blɔ fa mi. Hyɛ daka nɛ ji, “ Gbamihi Nɛ Kɔɔ Mesia a He.”

Yi 2, kk. 17, sisi ningma.

6 YEHOWA YI MI TOMI NGƐ ZUGBA A HE

Yehowa bɔ zugba a konɛ e pee paradeiso nɛ adesahi nɛ a suɔ lɛ ɔ nɛ a hi nɔ. E tsakee we e yi mi tomi ɔ. E be kɛe nɛ Mawu ma je ní yayahi tsuo kɛ je zugba a nɔ konɛ e we bi nɛ a hi nɔ kɛ ya neneene.

Yi 3, kk. 1

7 SATAN ABOSIAMI

Satan ji bɔfo nɛ e sɛ hlami tsɔ Mawu hɛ mi atua. Biɛ Satan ɔ sisi ji “Nɔ Nɛ Teɔ Si Kɛ Woɔ Nɔ.” A tsɛɛ lɛ jã ejakaa e teɔ si kɛ woɔ Yehowa. A tsɛɛ lɛ hu ke Abosiami, nɛ sisi ji “Nɔ He Guɛ Gbelɔ.” E ná biɛ nɛ ɔ ejakaa e tuɔ lakpa munyuhi kɛ siɔ Mawu, nɛ e sisiɔ nihi.

Yi 3, kk. 4

  8 BƆFOHI

Yehowa bɔ bɔfo ɔmɛ momoomo loko e bɔ zugba a. Hiɔwe ji he nɛ e bɔ mɛ kaa a hi. Bɔfo ɔmɛ a he hiɛ pe ayɔ lafa. (Daniel 7:10) Bɔfo ɔmɛ tsuo ngɛ biɛ, nɛ a ngɛ su slɔɔtohi. A yeɔ Mawu anɔkuale, nɛ a kplɛɛ we nɛ adesahi nɛ a ja mɛ. Bɔfo ɔmɛ ngɛ kuu slɔɔtohi a mi, nɛ a tsuɔ ní slɔɔtoslɔɔtohi. Bɔfo ɔmɛ ekomɛ sɔmɔɔ ngɛ Yehowa matsɛ sɛ ɔ hɛ mi, ekomɛ ngɔɔ sɛ gbi kɛ ba haa Mawu we bi ngɛ zugba a nɔ, ekomɛ poɔ Mawu sɔmɔli a he piɛ nɛ a tsɔɔ mɛ blɔ, ekomɛ kpataa Mawu he nyɛli a hɛ mi, nɛ ekomɛ hu yeɔ bua wɔ ngɛ fiɛɛmi ní tsumi ɔ mi. (La 34:7; Kpojemi 14:6; 22:8, 9) Hwɔɔ se ɔ, bɔfo ɔmɛ maa piɛɛ Yesu he kɛ maa hwu Harmagedon ta a.Kpojemi 16:14, 16; 19:14, 15.

Yi 3, kk. 5; Yi 10, kk. 1

9 YAYAMI

Yayami ji he numi, susumi, kɛ ní peepee fɛɛ ko nɛ kɛ Yehowa suɔmi nya ní kɔ we. Akɛnɛ yayami puɛɔ huɛ bɔmi nɛ ngɛ waa kɛ Mawu wa kpɛti he je ɔ, e ha wɔ mlaahi kɛ sisi tomi mlaahi nɛ maa ye bua wɔ konɛ wa ko je blɔ nɛ waa pee yayami. Sisije ɔ, níhi nɛ Yehowa bɔ ɔ tsuo hi kɛ pi si, se benɛ Adam kɛ Hawa je blɔ nɛ a gbo Yehowa nɔ tue ɔ, a pee yayami, nɛ lɔ ɔ ha nɛ a yi mluku hu. A ba bwɔ nɛ a gbo, nɛ akɛnɛ wa ná yayami kɛ je Adam ngɔ he je ɔ, wɔ hu wa bwɔɔ ɔ nɛ wa gboɔ.

Yi 3, kk. 7; Yi 5, kk. 3

10 HARMAGEDON

Harmagedon ji ta nɛ Mawu kɛ ma kpata Satan je ɔ hɛ mi. E maa gu ta nɛ ɔ nɔ kɛ je ní yayahi tsuo kɛ je je ɔ mi.

Yi 3, kk. 13; Yi 8, kk. 18

 11 MAWU MATSƐ YEMI Ɔ

Mawu Matsɛ Yemi ɔ ji nɔ yemi ko nɛ Yehowa to sisi ngɛ hiɔwe. Yesu Kristo lɛ e ngɛ Matsɛ yee ngɛ Matsɛ Yemi ɔ nya. Hwɔɔ se ɔ, Yehowa maa gu Matsɛ Yemi ɔ nɔ kɛ je ní yayahi tsuo kɛ je je ɔ mi. Mawu Matsɛ Yemi ɔ maa ye zugba a tsuo nɔ.

Yi 3, kk. 14

12 YESU KRISTO

Mawu bɔ Yesu loko e bɔ níhi tsuo. Yehowa tsɔ Yesu kɛ ba zugba a nɔ konɛ e ba gbo kɛ kpɔ̃ adesahi tsuo. Benɛ a gbe Yesu ɔ, Yehowa tle lɛ si. Yesu ji Mawu Matsɛ Yemi ɔ nya Matsɛ, nɛ amlɔ nɛ ɔ, e ngɛ tsɛ yee ngɛ hiɔwe.

Yi 4, kk. 2

13 GBAMI NƐ KƆƆ JEHA NYINGMI KPAAGO TOTOE KPAAGO Ɔ HE

Baiblo ɔ gba be nɛ Mesia a maa ba a kɛ fɔ si. Baiblo ɔ tsɔɔ kaa Mesia a maa ba ngɛ jeha 69 totoe kpaago nyagbe. A je jeha 69 totoe kpaago ɔ kanemi sisi kɛ je jeha 455 L.F.K., nɛ e ba nyagbe ngɛ jeha 29 K.F.S.

Kɛ wa plɛ kɛ le kaa jamɛ a be ɔ ba nyagbe ngɛ jeha 29 K.F.S. kɛɛ? Jeha 69 totoe kpaago ɔ je sisi benɛ Nehemia ya su Yerusalem ngɛ jeha 455 L.F.K. mi. Jamɛ a jeha a mi nɛ e bɔni ma a mami ekohu. (Daniel 9:25; Nehemia 2:1, 5-8) Jeha 69 totoe kpaago ɔ peeɔ jeha 483 (69 x 7). Ke wa kane jeha kakaaka 483 kɛ je jeha 455 L.F.K. ɔ, e kɛ wɔ ma ba su jeha 29 K.F.S. Jeha nɛ ɔ mi tutuutu nɛ a baptisi Yesu, nɛ e ba pee Mesia a nɛ!Luka 3:1, 2, 21, 22.

Jamɛ a gbami ɔ tsɔɔ kaa ke jeha 483 ba nyagbe ɔ, jeha kpaago kpa hu maa be. Se jeha kpaago ɔ kpɛti ɔ, a maa  gbe Mesia a, nɛ enɛ ɔ ba mi ngɛ jeha 33 K.F.S. Gbami ɔ hu tsɔɔ kaa ngɛ jeha kpaago ɔ nyagbe, nɛ ji jeha 36 K.F.S. ɔ, a ma bɔni Mawu Matsɛ Yemi ɔ he sane kpakpa a fiɛɛmi kɛ ha ma jeli tsuo, se pi Yuda bi ɔmɛ pɛ.Daniel 9:24-27.

Yi 4, kk. 7

 14 TRINITI TSƆƆMI Ɔ JI LAKPA TSƆƆMI

Baiblo ɔ tsɔɔ kaa Yehowa Mawu ji Bɔlɔ, nɛ e bɔ Yesu loko e bɔ ní kpahi. (Kolose Bi 1:15, 16) Pi Yesu ji Mawu Ope ɔ. E de we gblee kaa e kɛ Mawu sɔ. Ngɛ anɔkuale mi ɔ, Yesu nitsɛ de ke: ‘Tsɛ ɔ pe mi.’ (Yohane 14:28; 1 Korinto Bi 15:28) Se jami komɛ tsɔɔ Triniti tsɔɔmi ɔ. A tsɔɔ kaa Tsɛ ɔ, Bi ɔ, kɛ mumi klɔuklɔu ɔ lɛ a bla kɛ pee Mawu. Munyungu “Triniti” ɔ be Baiblo ɔ mi he ko he ko. E ji lakpa tsɔɔmi.

Mumi klɔuklɔu ɔ ji he wami nɛ Mawu kɛ tsuɔ ní. E ji e he wami nɛ a nɛ́ kɛ hɛngmɛ nɛ e kɛ tsuɔ e yi mi tomihi a he ní. Tsa pi nɔmlɔ ji mumi klɔuklɔu ɔ. Kaa nɔ hyɛmi nɔ́ ɔ, ngɛ kaseli ɔmɛ a be ɔ mi ɔ, ‘mumi klɔuklɔu ɔ ba Kristofo ɔmɛ a nɔ.’ Yehowa hu de ke: ‘Ma ngɔ ye mumi ɔ ngɔ wo nɔ tsuaa nɔ mi.’Bɔfo Ɔmɛ A Ní Tsumi 2:1-4, 17.

Yi 4, kk. 12; Yi 15, kk. 17

15 KLƆƆSU

Anɔkuale Kristofohi kɛ klɔɔsu tsu we ní ngɛ a jami mi. Mɛni he je?

  1.  Pi mwɔnɛ ɔ nɛ nihi kɛ klɔɔsu bɔni ní tsumi ngɛ lakpa jami mi. Blema a, a kɛ klɔɔsu tsuɔ ní ngɛ adebɔ níhi a jami, kɛ wɔ jami ní peepeehi kaa fɔmi kusumihi a mi. Kristofohi nɛ a hi si ngɛ jeha 300 ngɛ Kristo gbenɔ se ɔ mi ɔ kɛ klɔɔsu tsu we ní ngɛ a jami mi. Jeha komɛ a se ɔ, Roma Nɔ Yelɔ Constantine ngɔ klɔɔsu kɛ pee Kristofohi a jami ɔ kadimi nɔ́. E ngɔ klɔɔsu ɔ kɛ pee Kristofohi a jami ɔ he okadi bɔ nɛ pee nɛ nihi fuu nɛ a kplɛɛ jami ɔ nɔ. Se klɔɔsu kɛ Yesu Kristo be tsakpa ko. Womi nɛ ji New Catholic Encyclopedia a de ke: “A kɛ klɔɔsu bɔni ní tsumi loko Kristofohi a jami ba, nɛ a kɛ tsuɔ ní ngɛ kusumihi nɛ kɛ Kristofohi a jami be nɔ́ ko peemi mi.”

  2.  Yesu gbo we ngɛ klɔɔsu nɔ. Nɔ́ nɛ Hela munyunguhi nɛ a tsɔɔ sisi ke “klɔɔsu” ɔ tsɔɔ kɛkɛ ji “plai,” aloo “tso jãi,”  aloo “sima tso.” The Companion Bible ɔ de ke: “Munyu ko be Hela [Somi He ɔ] mi nɛ daa si ha tso enyɔ nɛ a bia mi.” Tso ngmelu kake nɛ nɔ́ ko nɔ́ ko bia we mi nɔ nɛ Yesu gbo ngɛ.

  3.  Yehowa sume nɛ waa gu fonihi loo jami mi okadihi a nɔ kɛ ja lɛ.2 Mose 20:4, 5; 1 Korinto Bi 10:14.

Yi 5, kk. 12

16 KAIMI Ɔ YEMI

Yesu fa e kaseli ɔmɛ kaa a Kai e gbenɔ ɔ. A yeɔ gbijlɔ nɛ ɔ daa jeha ngɛ Nisan 14 nɔ. Ligbi nɛ ɔ nɔ nɛ Israel bi ɔmɛ yeɔ Hetsɔmi gbijlɔ ɔ nɛ. A kɛ abolo kɛ wai nɛ daa si kɛ ha Yesu nɔmlɔ tso kɛ e muɔ ɔ beɔ ngɛ nɔ tsuaa nɔ nɛ ngɛ Kaimi ɔ sisi ɔ hɛ mi. Nihi nɛ a maa piɛɛ Yesu he kɛ ye Matsɛ ngɛ hiɔwe ɔ yeɔ abolo ɔ eko, nɛ a nuɔ wai ɔ hu eko. Nihi nɛ a ngɛ hɛ kɛ nɔ fɔmi kaa a maa hi si ngɛ zugba a nɔ kɛ maa ya neneene ɔ yaa Kaimi ɔ sisi, se a yi abolo ɔ, nɛ a nui wai ɔ hulɔ.

Yi 5, kk. 21

17 KLAA

Ngɛ Blɛfo gbi New World Translation ɔ mi ɔ, a kɛ munyungu nɛ ji “klaa” a da si ha (1) nɔmlɔ, (2) lohwe, (3) adesa wami loo lohwe wami. Nɔ hyɛmi ní komɛ ji nɛ ɔmɛ nɛ:

  • Adesa. “Ngɛ Noa be ɔ mi ɔ, . . . a baa nihi bɔɔ, nɛ ji klaa kpaanyɔ a yi kɛ gu nyu ɔ mi slɔkee.” (1 Petro 3:20, NW) Ngɛ hiɛ ɔ, “klaa kpaanyɔ” ɔ daa si ha Noa, e yo, e bimɛ etɛ ɔmɛ, kɛ mɛ hu a yihi.

  • Lohwe. “Mawu fa ke, ‘Nyu ɔ nɛ wo lo [“klaahi,” NW sisi níngma] slɔɔtoslɔɔtohi babauu, nɛ́ lohwe pɛlitsɛmɛ nɛ a hi tee ngɛ hiɔwe.’ Enɛ ɔ se ɔ, Mawu fa ke, ‘Lohwe [“klaa,” NW sisi níngma] slɔɔtoslɔɔtohi nɛ a ba zugba a nɔ: we mi  lohwehi kɛ pu mi lohwehi, lohwe agboagbohi kɛ lohwe wawihi.’ Nɛ e ba mi ja.”1 Mose 1:20, 24.

  • Adesa wami loo lohwe wami. Yehowa de Mose ke: “Nihi nɛ ngɛ hlae nɛ a tane o yi ɔ, [“a tane o klaa yi ɔ,” NW sisi ningma] mɛ tsuo a gbo.” (2 Mose 4:19) Benɛ Yesu ngɛ zugba a nɔ ɔ, e de ke: “Imi ji to hyɛlɔ kpakpa a nɛ. To hyɛlɔ kpakpa a ngɔɔ e wami [“klaa,” NW sisi ningma] ngɔ fɔɔ si ngɛ e to ɔmɛ a nane mi.”Yohane 10:11.

    Jehanɛ hu ɔ, ke nɔ ko kɛ e “klaa tsuo” ngɛ nɔ́ ko pee ɔ, e tsɔɔ kaa nɔ ɔ je e tsui mi nɛ e kɛ e he wami tsuo ngɛ nɔ́ ɔ pee. (Mateo 22:37; 5 Mose 6:5) Akɛnɛ adesa ji klaa he je ɔ, ke nɔ ko gbo ɔ, e ji klaa nɛ e gbo.

Yi 6, kk. 5; Yi 15, kk. 17

18 MUMI

Hebri kɛ Hela munyungu nɛ a tsɔɔ sisi ngɛ New World Translation ɔ mi kaa “mumi” ɔ ma nyɛ maa da si ha ní slɔɔtohi. Se be tsuaa be nɛ a kɛ ma tsu ní ɔ, a kɛ daa si ha nɔ́ ko nɛ a nɛ́ kɛ hɛngmɛ, kaa kɔɔhiɔ loo mumi nɛ adesahi kɛ lohwehi woɔ. A ma nyɛ ma kɛ da si ha mumi mi adebɔ níhi, kɛ mumi klɔuklɔu ɔ nɛ ji Mawu he wami nɛ e kɛ tsuɔ ní ɔ hulɔ. Baiblo ɔ tsɔɔ we kaa ke nɔmlɔ gbo ɔ, nɔ́ ko jeɔ e mi nɛ yaa nɔ hii si ngɛ he ko.2 Mose 35:21; La 104:29; Mateo 12:43; Luka 11:13.

Yi 6, kk. 5; Yi 15, kk. 17

19 GEHENA

Gehena ji biɛ nɛ a kɛ tsɛɛ dɔgba ko nɛ ngɛ Yerusalem kasa nya nɛ a sãa dwɔmi ngɛ mi. Nɔ́ ko be nɛ tsɔɔ kaa ngɛ Yesu be ɔ mi ɔ, a sã adesahi kɛ lohwehi hɛ ngmengmle ngɛ jamɛ a dɔgba a mi. Enɛ ɔ he ɔ, nɔ́ nɛ nihi deɔ kaa Gehena ji he ko nɛ a sãa nihi nɛ a gbo ngɛ kɛ yaa neneene ɔ pi anɔkuale. Benɛ Yesu de kaa a ma sake ni komɛ kɛ fɔ  Gehena a, e ngɛ tsɔɔe kaa a ma kpata a hɛ mi kɛ maa ya neneene.Mateo 5:22; 10:28, NW.

Yi 7, kk. 20

20 NYƆMTSƐ Ɔ SƆLEMI Ɔ

Yesu ngɔ sɔlemi nɛ ɔ kɛ tsɔɔ e kaseli ɔmɛ bɔ nɛ e sa kaa a sɔle ha. A tsɛɛ sɔlemi nɛ ɔ hu ke Wa Tsɛ Nɛ Ngɛ Hiɔwe ɔ, loo sɔlemi he nɔ hyɛmi nɔ́ ɔ. Kaa nɔ hyɛmi nɔ́ ɔ, Yesu tsɔɔ kaa waa sɔle kaa kikɛ nɛ ɔ:

  • “O biɛ ɔ he nɛ tsɔ”

    Wa sɔleɔ kaa Yehowa nɛ tsɔ e biɛ nɛ a wo he mu ɔ he. Jã nɛ Mawu maa pee ɔ ma ha nɛ nihi tsuo nɛ a ngɛ hiɔwe kɛ zugba a nɔ ɔ maa wo e biɛ ɔ hɛ mi nyami.

  • “O Matsɛ yemi ɔ nɛ ba”

    Wa sɔleɔ kaa Mawu matsɛ yemi ɔ nɛ ba kpata Satan je yaya nɛ ɔ hɛ mi, nɛ e ye je ɔ tsuo nɔ, nɛ e pee zugba a tsuo paradeiso.

  • “A pee nɔ́ nɛ o suɔ ngɛ zugba a nɔ”

    Wa sɔleɔ kaa yi mi nɛ Mawu to ngɛ zugba a he ɔ nɛ ba mi, konɛ adesahi nɛ a buɔ tue, nɛ a ye mluku ɔ nɛ a hi si kɛ ya neneene ngɛ Paradeiso mi kaa bɔ nɛ Yehowa to kɛ je sisije ɔ.

Yi 8, kk. 2

21 KPƆMI NƆ́ Ɔ

Yehowa to kpɔmi nɔ́ ɔ he blɔ nya konɛ e kɛ kpɔ adesahi kɛ je yayami kɛ gbenɔ mi. Akɛnɛ Adam puɛ huɛ bɔmi nɛ ngɛ e kɛ Mawu a kpɛti ɔ he je ɔ, kpɔmi nɔ́ ɔ he ba hia konɛ a kɛ dla adesahi kɛ Yehowa a kpɛti, nɛ a ye mluku ekohu. Mawu tsɔ Yesu kɛ ba zugba a nɔ konɛ e ba gbo ngɛ yayami peeli a he. Yesu gbo ha adesahi tsuo, enɛ ɔ he ɔ, wa ma nyɛ maa ye mluku, nɛ wa maa hi si kɛ maa ya neneene.

Yi 8, kk. 21; Yi 9, kk. 13

 22 MƐNI HE JE NƐ JEHA 1914 SA KADIMI Ɔ?

Gbami nɛ ngɛ Daniel yi 4 ɔ tsɔɔ kaa Mawu maa to e Matsɛ Yemi ɔ sisi ngɛ jeha 1914 mi.

Gbami ɔ: Yehowa ha nɛ Matsɛ Nebukadnezar nla nlami ko nɛ e ji gbami. Nlami ɔ kɔɔ tso ngua ko nɛ a hɛ kɛ fɔ si he. Ngɛ nlami ɔ mi ɔ, a ngɔ kpa nɛ a kɛ dade kɛ akɔblee pee kɛ fi tso kpoku ɔ konɛ e ko tsɛ̃ kɛ ya si “jeha kpaago” loo “be kpaago.” Se ngɛ lɔ ɔ se ɔ, tso ɔ ma tsɛ̃ ekohu.Daniel 4:1, 10-16.

Bɔ nɛ wa ma ná gbami nɛ ɔ he se ha: Tso ɔ daa si kɛ ha Mawu nɔ yemi ɔ. Jehahi babauu nɛ be ɔ, Yehowa gu matsɛmɛ nɛ a hi Yerusalem ɔ a nɔ kɛ ye Israel bi ɔmɛ a nɔ. (1 Kronika 29:23) Akɛnɛ Israel matsɛmɛ ɔmɛ yi Mawu anɔkuale he je ɔ, a nɔ yemi ɔ ba nyagbe. A kpata Yerusalem hɛ mi ngɛ jeha 607 L.F.K. mi. Jamɛ a be ɔ mi nɛ “jeha kpaago” ɔ je sisi. (2 Matsɛmɛ 25:1, 8-10; Ezekiel 21:25-27) Benɛ Yesu de ke, ‘Ma je li ɔmɛ maa naa Yerusalem nɔ kɛ maa su be nɛ ma je li ɔmɛ a be ɔ maa su’ ɔ, “jeha kpaago” ɔ he munyu nɛ e ngɛ tue ɔ nɛ. (Luka 21:24) Enɛ ɔ he je ɔ, be mi nɛ Yesu ngɛ zugba a nɔ ɔ, “jeha kpaago” ɔ bɛ nyagbe lolo. Yehowa wo si kaa ngɛ “jeha kpaago” ɔ nyagbe ɔ, e maa wo nɔ ko Matsɛ. Yesu ji Matsɛ nɛ Mawu maa wo ɔ nɛ, nɛ e maa jɔɔ Mawu we bi tsuo nɛ a ngɛ zugba a nɔ ɔ kɛ maa ya neneene.Luka 1:30-33.

“Jeha kpaago” loo “be kpaago” ɔ mi kɛmi: “Jeha kpaago” ɔ peeɔ jeha 2,520. Ke wa je jeha 2,520 kanemi sisi kɛ je jeha 607 L.F.K. ɔ, e kɛ wɔ ma ba su jeha 1914. Yehowa ngɔ Yesu kɛ pee Mawu Matsɛ Yemi ɔ nya Matsɛ ngɛ hiɔwe ngɛ jeha 1914 mi.

 Mɛni he je nɛ “jeha kpaago” loo “be kpaago” ɔ peeɔ jeha 2,520 ɔ? Baiblo ɔ tsɔɔ kaa jeha etɛ kɛ fa peeɔ ligbi 1,260. (Kpojemi 12:6, 14) Enɛ ɔ he ɔ, “jeha kpaago” peeɔ lɔ ɔ totoe enyɔ, aloo ligbi 2,520. Ngɛ Baiblo gbami nya a, ‘ligbi kake daa si ha jeha kake,’ enɛ ɔ he ɔ, ligbi 2,520 peeɔ jeha 2,520.4 Mose 14:34; Ezekiel 4:6.

Yi 8, kk. 23

23 BƆFO NƆKƆTƆMA MIKAEL

Baiblo ɔ tu “bɔfo nɔkɔtɔma” kake pɛ he munyu. E biɛ ji Mikael.Daniel 12:1; Yuda 9.

Mikael ji Mawu bɔfo anɔkualetsɛmɛ ɔmɛ a tabo ɔ Nyatsɛ. Kpojemi 12:7 de ke: “Bɔfo nguaa a nɛ a tsɛɛ lɛ Mikael ɔ, kɛ e bɔfo ɔmɛ ya tua sinɔ nguaa a, . . . kɛ lɛ hu e bɔfo ɔmɛ.” Kpojemi womi ɔ tsɔɔ kaa Yesu ji bɔfo anɔkualetsɛmɛ ɔmɛ a tabo ɔ Nyatsɛ, enɛ ɔ he ɔ, Yesu biɛ kpa ji Mikael.Kpojemi 19:14-16.

Yi 9, kk. 4

24 NYAGBE LIGBI ƆMƐ

Nyagbe ligbi ɔmɛ ji be nɛ ní pɔtɛɛ komɛ maa ya nɔ loko Mawu Matsɛ Yemi ɔ ma kpata Satan je ɔ hɛ mi. A kɛ munyungu kpahi kaa “je nɛ ɔ nyagbe be” kɛ ‘Nɔmlɔ Bi ɔ bami’ ɔ kaleɔ be nɛ ɔ ngɛ Baiblo ɔ mi. (Mateo 24:3, 27, 37) “Nyagbe ligbi ɔmɛ” je sisi benɛ Mawu Matsɛ Yemi ɔ bɔni nɔ yemi ngɛ hiɔwe ngɛ jeha 1914 mi ɔ, nɛ e maa ba nyagbe ke a kpata Satan je ɔ hɛ mi ngɛ Harmagedon ta a mi.2 Timoteo 3:1; 2 Petro 3:3.

Yi 9, kk. 5

 25 GBOGBOEHI A SI TEMI Ɔ

Mawu ma nyɛ ma ha nɛ nihi nɛ a gbo ɔ maa ba wami mi ekohu. Baiblo ɔ tsɔɔ kaa a tle nihi nɛɛ nɛ a gbo si kɛ ba wami mi ekohu. Eliya, Elisha, Yesu, Petro, kɛ Paulo tle gbogboehi si. Mawu lɛ ha mɛ he wami nɛ a nyɛ nɛ a pee jã a nɛ. Yehowa wo si kaa e ma tle ‘ni kpakpahi kɛ yayami peeli’ si kɛ ba wami mi ngɛ zugba a nɔ. (Bɔfo Ɔmɛ A Ní Tsumi 24:15) Baiblo ɔ de hu kaa a ma tle ni komɛ si kɛ ya hiɔwe. Enɛ ɔ maa ba mi ke Mawu tle nihi nɛ a pɔ mɛ nu ɔ si kɛ ya hiɔwe konɛ a ya piɛɛ Yesu he kɛ ye matsɛ ɔ.Yohane 5:28, 29; 11:25; Filipi Bi 3:11; Kpojemi 20:5, 6.

Yi 9, kk. 13

26 MUMI YAYAMI KƐ NÍ TSUMI

Ke nɔ ko kɛ daimoniohi bɔɔ tɛɛ, loo e kɛ mɛ bɔɔ kɛ guɔ wɔtsɛmɛ loo ní peeli a nɔ ɔ, lɔ ɔ tsɔɔ kaa e kɛ mumi yayamihi ngɛ ní tsue. Nihi nɛ a kɛ mumi yayamihi tsuɔ ní ɔ he ye kaa ke nɔ ko gbo ɔ, e peeɔ kpade. Daimonio ɔmɛ bɔɔ mɔde kaa a maa sisi nihi konɛ a gbo Mawu nɔ tue. Dodoe mi hyɛmi, klaami, kunya yemi, aze kpɛmi loo hiami tsuo ji daimoniohi kɛ ní tsumi. Womihi, womi tɛtlɛɛhi, sinihi, fonihi nɛ a kɛ fiaa kunya yemi he adafi, kɛ la komɛ po ha nɛ e pee kaa nɔ́ nɛ daimoniohi kɛ ní tsumi ji hɛja jemi nɔ́ ko nɛ yí nɔ awi. Ke nɔ ko kɛ e he woɔ ya peemi kusumi komɛ kaa, nyɔ fɔmi, ya nyɛmi, yi kpami, nɔ nɛ gbo ɔ jeha yemi, niye ní nɛ a fĩaa kɛ haa gbogboehi, kusumihi nɛ yo peeɔ ke e huno gbo, kɛ ní peepee kpahi kaa jã a mi ɔ, e ngɛ daimonio ɔmɛ a suɔmi nya ní pee. Behi fuu ɔ, nihi nɛ a kɛ daimoniohi bɔɔ ɔ kɛ tsopa yaya tsuɔ ní.Galatia Bi 5:20; Kpojemi 21:8.

Yi 10, kk. 10; Yi 16, kk. 4

 27 YEHOWA NƆ YEMI Ɔ

Yehowa ji Mawu Ope, nɛ lɛ nɛ e bɔ je ɔ kɛ e mi níhi tsuo. (Kpojemi 15:3) Enɛ ɔ he je ɔ, e Nɔ́ ji nɔ́ tsuaa nɔ́ nɛ ngɛ je ɔ mi ɔ. E ngɛ nɔ́ tsuaa nɔ́ nɔ he wami, nɛ lɛ nɛ e ngɛ he blɔ kaa e yeɔ e nibɔ níhi tsuo a nɔ. (La 24:1; Yesaya 40:21-23; Kpojemi 4:11) E wo mlaahi nɛ kudɔɔ nɔ́ tsuaa nɔ́ nɛ e bɔ ɔ. Yehowa nyɛɔ woɔ ni komɛ matsɛ kaa a ye ni komɛ a nɔ. Ke wa bu Yehowa tue ɔ, lɔ ɔ tsɔɔ kaa wa suɔ lɛ nɛ wa suɔ nɛ e ye wa nɔ.1 Kronika 29:11.

Yi 11, kk. 10

28 HƆ JEMI

Ke nɔ ko je blɔ nɛ e gbe jokuɛ nɛ a fɔ we lɛ lolo ɔ, e je hɔ. Ke nɔ ko hɛɛ hɔ nɛ oslaa ko ha nɛ hɔ ɔ puɛ, loo hiɔ ko ha nɛ mi ɔ sane ɔ, pi nɛ nɔ ɔ je hɔ. Ke hɔ nɔ yo ko mi mi pɛ ɔ, kɛ je jamɛ a ngmlɛfia a, hɔ ɔ peeɔ adesa.

Yi 13, kk. 5

29 MUƆ HAMI

E ji hiɔ tsami blɔ nɔ tomi nɛ a haa hiɔtsɛ ɔ muɔ, loo muɔ mi ní titli eywiɛ ɔmɛ eko. Muɔ mi ní titli eywiɛ ɔmɛ ji, red blood cells (wami yiblii tsutsu), white blood cells (wami yiblii futaa), platelets (wami yiblii tlalatlala), kɛ plasma (muɔ mi nyu).

Yi 13, kk. 13

 30 TSƆSEMI

Baiblo ɔ tsɔɔ we kaa “tsɔsemi” ji tue gblami kɛkɛ. Ke a tsɔse wɔ ɔ, a tsɔɔ wɔ ní, nɛ a dlaa wɔ. Yehowa wɛ nihi nɛ e tsɔseɔ mɛ ɔ yi mi. (Abɛ 4:1, 2) Yehowa pee tsɔsemi he nɔ hyɛmi nɔ́ nɛ se be kɛ ha fɔli. Akɛnɛ Yehowa tsɔseɔ wɔ ngɛ blɔ nɛ da nɔ he je ɔ, wa bua ma nyɛ maa jɔ tsɔsemi he. (Abɛ 12:1) Yehowa suɔ e we bi, lɔ ɔ he je nɛ e tsɔseɔ mɛ ɔ nɛ. Tsɔsemi nɛ ɔ dlaa e we bi a juɛmi, nɛ e yeɔ bua mɛ nɛ a peeɔ níhi nɛ sa e hɛ mi. Ke fɔli ngɛ a bimɛ tsɔsee ɔ, e sa nɛ a ye bua mɛ konɛ a le nɔ́ he je nɛ e sa nɛ a bu mɛ tue ɔ. E biɔ hu nɛ a ye bua mɛ nɛ a suɔ Yehowa, nɛ a bua nɛ jɔ Mawu Munyu ɔ he, nɛ a nu sisi tomi mlaahi nɛ ngɛ mi ɔmɛ a sisi saminya konɛ a kɛ tsu ní.

Yi 14, kk. 13

31 DAIMONIOHI

Daimonio ɔmɛ ji mumi mi bɔ níhi nɛ a he wa pe adesahi. Daimonio ɔmɛ ji bɔfo yiwutsotsɛmɛ. Bɔfo yiwutsotsɛmɛ nɛ ɔmɛ tsɔ Mawu hɛ mi atua nɛ a ba pee e hɛ nyɛli. (1 Mose 6:2; Yuda 6) A ya piɛɛ Satan atua tsɔlɔ ɔ he.5 Mose 32:17; Luka 8:30; Bɔfo Ɔmɛ A Ní Tsumi 16:16; Yakobo 2:19.

Yi 16, kk. 4