Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Mɛni Baiblo ɔ Ma Nyɛ Maa Tsɔɔ Wɔ?

 YI ENYƆ

Baiblo ɔ Ji Womi Nɛ Je Mawu Ngɔ

Baiblo ɔ Ji Womi Nɛ Je Mawu Ngɔ

1, 2. Mɛni he je nɛ Baiblo ɔ ji nike ní nɛ se be nɛ je Mawu ngɔ ɔ?

KE O huɛ ko ke mo nɔ́ ko nɛ́ o hyɛ we blɔ ɔ, kɛ o peeɔ o ní ha kɛɛ? O jeɔ nɔ́ ɔ amlɔ nɔuu nɛ o hyɛɔ. O bua jɔɔ wawɛɛ kaa o huɛ ɔ susu o he, nɛ o naa lɛ si.

2 Baiblo ɔ ji nike ní nɛ je Mawu ngɔ. Wa be nyɛe maa na munyuhi nɛ ngɛ Baiblo ɔ mi ɔ ngɛ he kpa ko. Kaa nɔ hyɛmi nɔ́ ɔ, Baiblo ɔ tsɔɔ kaa Mawu bɔ hiɔwe, kɛ zugba, kɛ kekle nyumu kɛ yo ɔ. Sisi tomi mlaahi ngɛ Baiblo ɔ mi nɛ ma nyɛ maa ye bua wɔ ke waa kɛ nyagbahi ngɛ kpee. Baiblo ɔ tsɔɔ wɔ bɔ nɛ Mawu ma plɛ kɛ tsu e yi mi tomi he ní ha konɛ zugba a nɔ nɛ pee bua jɔmi. Baiblo ɔ ji nike ní nɛ se be!

3. Ke o ya nɔ nɛ o kase Baiblo ɔ, mɛni se o ma ná?

3 Be mi nɛ o ngɛ Baiblo ɔ kasee ɔ, o maa na kaa Mawu suɔ nɛ o pee e huɛ. Ke o ya nɔ nɛ o kase Mawu he ní ɔ, huɛ bɔmi nɛ ngɛ o kɛ lɛ nyɛ kpɛti ɔ mi maa wa wawɛɛ.

4. Mɛni o bua jɔ he ngɛ Baiblo ɔ he?

4 A tsɔɔ Baiblo ɔ sisi kɛ ya gbihi maa pee 2,600 mi, nɛ a pee ayɔ akpehi abɔ. Ngɛ je ɔ mi tsuo ɔ, nimli ayɔ akpehi abɔ ma nyɛ maa kane Baiblo ɔ ngɛ mɛ nitsɛmɛ a je gbi mi. Nɛ daa otsi ɔ, nimli ayɔ kake kɛ se a nine suɔ Baiblo ɔ eko nɔ! Niinɛ, womi ko be nɛ waa kɛ ma nyɛ maa to Baiblo ɔ he.

5. Mɛni he je nɛ wa ma nyɛ ma de ke “Mawu mumi ɔ lɛ ha nɛ nihi ngma” Baiblo ɔ?

 5 “Mawu mumi ɔ lɛ ha nɛ nihi ngma” Baiblo ɔ nɛ. (Kane 2 Timoteo 3:16.) Se ni komɛ ma bi ke, ‘Ke nimli lɛ a ngma Baiblo ɔ, lɛɛ mɛni he je mɔ nɛ wa deɔ ke Baiblo ɔ je Mawu ngɔ ɔ?’ Baiblo ɔ ha sane bimi nɛ ɔ heto ke: “Mumi klɔuklɔu lɛ baa nihi a nɔ nɛ a tuɔ munyu kɛ jeɔ Mawu ngɔ.” (2 Petro 1:21) E ngɛ kaa tsɛ nɛ e bwɔ nɛ e de e bi ke e ngma sɛ womi ha lɛ. Ke e bi ɔ ngma sɛ womi ɔ, sɛ womi ɔ peeɔ mɛnɔ nɔ́? E peeɔ tsɛ ɔ nɔ́, se pi bi ɔ nɔ́. Jã kɛ̃ nɛ Baiblo ɔ hu peeɔ Mawu nɔ́, se pi nimli nɛ e gu a nɔ kɛ ngma a a nɔ́. Mawu kudɔ mɛ nɛ a ngma e susumihi. Ngɛ anɔkuale mi ɔ, Baiblo ɔ ji “Mawu munyu.”1 Tesalonika Bi 2:13; hyɛ Nyagbe Ningma 2.

A pee New World Translation of the Holy Scriptures ɔ ngɛ gbihi fuu a mi

 BAIBLO Ɔ MI MUNYU ƆMƐ DA

6, 7. Mɛni he je nɛ wa ma nyɛ ma de ke Baiblo ɔ mi munyu ɔmɛ kɛ a he kpa gbi ɔ?

6 A kɛ jeha nɛ hiɛ pe 1,600 lɛ ngma Baiblo ɔ. Nihi nɛ a ngma Baiblo ɔ hi si ngɛ be slɔɔtoslɔɔtohi a mi. A ti ni komɛ ya sukuu saminya, nɛ ni komɛ hu yɛ sukuu tsɔ. Kaa nɔ hyɛmi nɔ́ ɔ, a ti nɔ kake ji dɔkita. A ti ni komɛ hu ji ngmɔ huli, wo hɛli, to hyɛli, gbali, kojoli, kɛ matsɛmɛ. E ngɛ mi kaa nimli slɔɔtoslɔɔtohi lɛ ngma Baiblo ɔ mohu lɛɛ, se nɔ́ nɛ mɛ tsuo a ngma a kɛ a he kpa gbi. Baiblo ɔ de we nɔ́ ko ngɛ he kake nɛ e ya deɔ nɔ́ muno ngɛ he kpa. *

7 Baiblo ɔ mi womi nɛ sɛ hlami ɔ tsɔɔ bɔ nɛ haomihi plɛ kɛ je sisi ngɛ je ɔ mi ha. Nɛ Baiblo ɔ mi nyagbe womi ɔ hu tsɔɔ bɔ nɛ Mawu ma plɛ kɛ po haomihi a se nɛ e maa pee zugba a paradeiso ha. Baiblo ɔ tu níhi nɛ ya nɔ ngɛ adesahi a yi nɔ sane mi jeha akpehi abɔ he munyu, nɛ e tsɔɔ kaa be tsuaa be ɔ, Mawu yi mi tomi baa mi.

8. Mo ha nɔ hyɛmi ní komɛ nɛ tsɔɔ kaa níhi nɛ Baiblo ɔ de ngɛ je mi si kpami he ɔ da.

8 A ngmɛ Baiblo ɔ konɛ nihi nɛ a hyɛ nɔ kɛ tsɔɔ je mi si kpami he ní ngɛ sukuu aloo sukuu bi nɛ a kɛ kase je mi si kpami he ní, se munyuhi nɛ Baiblo ɔ tu ngɛ je mi si kpami he ɔ da. Jã ji bɔ nɛ e sa nɛ waa hyɛ blɔ kaa womi nɛ je Mawu ngɔ ɔ maa hi. Kaa nɔ hyɛmi nɔ́ ɔ, ngɛ Mose Womi Nɛ Ji Etɛ ɔ mi ɔ, Mawu tsɔɔ Israel bi ɔmɛ nɔ́ nɛ e sa kaa a pee konɛ ke hiɔ nu nɔ ko ɔ, e ko sã nɔ kpa ko. A ngma nɔ́ nɛ ɔ kɛ wo Baiblo ɔ mi momoomo loko nihi  ba le bɔ nɛ muawahi plɛɔ kɛ woɔ nɔ hiɔ ha. Jehanɛ se hu ɔ, Baiblo ɔ tsɔɔ kaa zugba a kpla si nɛ nɔ́ ko hɛɛ we lɛ, nɛ e ji anɔkuale.Hiob 26:7.

9. Mɛni anɔkuale nɛ Baiblo ngmali ɔmɛ ye ɔ tsɔɔ?

9 Be fɛɛ be ɔ, níhi nɛ Baiblo ɔ deɔ ngɛ yi nɔ sane he ɔ da pɛpɛɛpɛ. Se níhi nɛ ngɛ yi nɔ sane he womihi fuu a mi ɔ dɛ kɛ pi si, ejakaa nihi nɛ a ngma a yi anɔkuale. Kaa nɔ hyɛmi nɔ́ ɔ, behi fuu ɔ, ke nihi ye a ma amɛ a nɔ kunimi ngɛ ta mi ɔ, a ngmɛ kɛ fɔɛ si. Se Baiblo ngmali ɔmɛ lɛɛ benɛ nihi ye Israel bi ɔmɛ a nɔ kunimi ɔ, a ngma kɛ fɔ si. A ngma yayamihi nɛ mɛ nitsɛmɛ a pee ɔ hu kɛ fɔ si. Kaa nɔ hyɛmi nɔ́ ɔ, ngɛ Mose Womi Nɛ Ji Eywiɛ ɔ mi ɔ, Mose ha nɛ wa na kaa e pee yayami nɛ hɛdɔ ngɛ he, nɛ Mawu gbla e tue. (4 Mose 20:2-12) Anɔkuale nɛ Baiblo ngmali ɔmɛ ye ɔ ha nɛ wa na kaa Baiblo ɔ je Mawu ngɔ. Enɛ ɔ tsɔɔ kaa wa ma nyɛ ma he Baiblo ɔ mi munyu ɔmɛ tsuo maa ye.

WOMI NƐ GA WOMI KPAKPAHI SƆUU LƐ NGƐ MI

10. Mɛni he je lɛ ga womi nɛ ngɛ Baiblo ɔ mi ɔ he hia wɔ mwɔnɛ ɔ?

10 Baiblo ɔ, “Mawu mumi ɔ lɛ ha nɛ nihi ngma; nɛ e hi kɛ ha ní tsɔɔmi, kɛ ha hɛ mi kami, kɛ ha nɔ dlami.” (2 Timoteo 3:16) Niinɛ, ga womihi nɛ ngɛ Baiblo ɔ mi ɔ he hia wɔ mwɔnɛ ɔ. Yehowa le wa bɔ su, enɛ ɔ he ɔ, e le bɔ nɛ wa susuɔ níhi a he ha kɛ bɔ nɛ e peeɔ wɔ ngɛ níhi a he ha. E le wɔ pe bɔ nɛ wa le wɔ nitsɛmɛ wa he, nɛ e suɔ kaa wa ná bua jɔmi. E le nɔ́ nɛ hi ha wɔ kɛ nɔ́ nɛ maa ye wɔ awi.

11, 12. (a) Mɛni ga kpakpahi nɛ Yesu wo wɔ ngɛ Mateo yi 5 kɛ ya si yi 7 ɔ? (b) Mɛni ji nɔ́ kpa ko hu nɛ wa ma nyɛ maa kase ngɛ Baiblo ɔ mi?

11 Ke wa kane Mateo yi 5 kɛ ya si yi 7 ɔ, wa maa na ga womi kpakpa komɛ nɛ Yesu kɛ ha wɔ. Ga womi nɛ ɔmɛ  tsɔɔ bɔ nɛ wa ma plɛ kɛ ná bua jɔmi, bɔ nɛ waa kɛ nihi maa hi si ha, bɔ nɛ wa maa sɔle ha, kɛ juɛmi nɛ e sa kaa waa hɛɛ ngɛ sika he. E ngɛ mi kaa e ngɔ ga womi nɛ ɔ kɛ ha jeha 2,000 sɔuu ji nɛ ɔ mohu, se e ma nyɛ maa ye bua wɔ mwɔnɛ ɔ.

12 Ngɛ Baiblo ɔ mi ɔ, Yehowa ha wɔ sisi tomi mlaahi nɛ maa ye bua wɔ konɛ bua jɔmi nɛ hi wa weku mi, nɛ waa pee ní tsuli kpakpahi, nɛ waa kɛ nihi nɛ hi si ngɛ tue mi jɔmi mi. Ngɛ nimli nɛ wa ji, aloo he nɛ wa ngɛ, aloo nyagbahi nɛ waa kɛ kpeɔ ɔ se ɔ, Baiblo sisi tomi mlaahi ma nyɛ maa ye bua wɔ be tsuaa be.Kane Yesaya 48:17; hyɛ Nyagbe Ningma 3.

O MA NYƐ MA HE BAIBLO GBAMIHI MAA YE

Yesaya nɛ lɛ hu e piɛɛ Baiblo ngmali ɔmɛ a he ɔ gba kɛ fɔ si kaa a ma kpata Babilon hɛ mi

13. Mɛni Yesaya gba kɛ fɔ si kaa e maa ba Babilon ma a nɔ?

13 Baiblo gbamihi fuu ba mi momo. Kaa nɔ hyɛmi nɔ́ ɔ, Yesaya gba kɛ fɔ si kaa a ma kpata Babilon hɛ mi. (Yesaya 13:19) E tsɔɔ blɔ pɔtɛɛ nɛ a maa gu nɔ kɛ kpata ma a hɛ mi. Agbo nguanguahi ngɛ ma a nya, nɛ pa hu bɔle ma a. Se Yesaya gba kɛ fɔ si kaa pa a maa fã, nɛ a ma bli a agbo ɔmɛ hu kɛ fɔ si. Nihi nɛ ma tua ma a kɛ ma mi bi ɔmɛ be ta hwue, se a nine maa su ma a nɔ. Yesaya gba kɛ fɔ si po kaa nyumu ko nɛ a tsɛɛ lɛ ke Sirus ma kpata Babilon hɛ mi.Kane Yesaya 44:27–45:2; hyɛ Nyagbe Ningma 4.

14, 15. Kɛ Yesaya gbami ɔ plɛ kɛ ba mi ha kɛɛ?

14 Benɛ a ngma gbami nɛ ɔ kɛ fɔ si jeha lafa enyɔ se ɔ, ta buli ya tua Babilon. Mɛnɔ lɛ nyɛɛ ta buli ɔmɛ a hɛ mi? Kaa bɔ nɛ gbami ɔ tsɔɔ ɔ, Sirus nɛ ji Persia matsɛ ɔ ji nɔ nɛ nyɛɛ a hɛ mi. Enɛ ɔ tsɔɔ kaa ní kpahi tsuo nɛ a gba kɛ fɔ si kɛ kɔ Babilon he ɔ maa ba mi.

15 Jamɛ a nyɔ ɔ mi nɛ a ma tua Babilon ma a, ma mi  bi ɔmɛ ngɛ ní yee nɛ a ngɛ ní nue. A susu kaa a ngɛ slɔkee, ejakaa a fia gbogbohi nɛ a ngɛ he wami kɛ wo ma a he, nɛ pa hu bɔle ma a. Sirus kɛ e ta buli ɔmɛ gba dɔ kɛ ha pa nɛ bɔle ma a, nɛ pa a fã. Nyu ɔ ba si bɔ nɛ sa, nɛ Persia ta buli ɔmɛ nyɛ nɛ a nyɛɛ mi. Se akɛnɛ gbogbo bɔle Babilon ma a he je ɔ, kɛ ta buli ɔmɛ ma plɛ kɛ sɛ ma a mi ha kɛɛ? Kaa bɔ nɛ gbami ɔ tsɔɔ ɔ, a bli ma a  agbo ɔmɛ kɛ fɔ si, enɛ ɔ he ɔ, ta buli ɔmɛ nyɛ nɛ a sɛ ma a mi nɛ a ngɔ ma a be mi nɛ a kɛ ma mi bi ɔmɛ hwui ta.

16. (a) Mɛni Yesaya gba kɛ kɔ Babilon he? (b) Kɛ wa plɛ kɛ le kaa Yesaya gbami ɔ ba mi ha kɛɛ?

16 Yesaya gba kɛ fɔ si kaa nyagbenyagbe ɔ, Babilon ma a maa pee ma doku. E ngma ke: “Nɔ ko nɔ ko be lejɛ ɔ hie hu.” (Yesaya 13:20) Anɛ gbami nɛ ɔ ba mi lo? Mwɔnɛ ɔ, ke o ngɛ hlae nɛ o le he nɛ Babilon hi ɔ, e hi Iraq ma ngua nɛ ji Baghdad ɔ woyi je. Kɛ je Baghdad kɛ ya lejɛ ɔ kɛmi maa pee si tomi 50. Amlɔ nɛ ɔ, e ji ma doku, nɔ ko be lejɛ ɔ. Yehowa ‘kpata Babilon hɛ mi pɛsɛpɛsɛ kaa ma nɛ a bɛɛ mi.’Yesaya 14:22, 23. *

Babilon ma doku ɔ

17. Mɛni he je nɛ waa kɛ wa hɛ ma nyɛ maa fɔ sihi tsuo nɛ Mawu wo ɔ nɔ ɔ?

17 Akɛnɛ Baiblo gbamihi fuu ba mi momo he je ɔ, wa ma nyɛ ma ná hemi kɛ yemi ngɛ nɔ́ nɛ Baiblo ɔ de ngɛ hwɔɔ se he ɔ mi. Wa ma nyɛ ma ná nɔ mi mami kaa si  nɛ Yehowa wo wɔ kaa e maa pee zugba a paradeiso ɔ maa ba mi. (Kane 4 Mose 23:19.) Niinɛ, wa ngɛ hɛ kɛ nɔ fɔmi kaa wa nine maa su ‘neneene wami nɛ Mawu nɛ yi lakpa a wo si kaa e ma ha wɔ benɛ a ná we nɛ a bɔ nɔ́ ko nɔ́ ko’ ɔ nɔ.Tito 1:2. *

BAIBLO Ɔ MA NYƐ MA TSAKE O SI HIMI

18. Mɛni Paulo de ngɛ “Mawu munyu” ɔ he?

18 Wa kase kɛ sɛ hlami kaa womi ko be nɛ waa kɛ ma nyɛ maa to Baiblo ɔ he. Munyuhi nɛ ngɛ mi ɔ kɛ a he kpa gbi. Munyuhi nɛ Baiblo ɔ tu ngɛ je mi si kpami loo yi nɔ sane he ɔ da. E woɔ wɔ ga kpakpa, nɛ gbamihi fuu ngɛ mi nɛ a ba mi momo. Se Baiblo ɔ nyɛɔ peeɔ nɔ́ kpa ko hulɔ. Bɔfo Paulo ngma ke: ‘Mawu munyu ɔ hɛ ngɛ, nɛ e ngɛ he wami.’ Mɛni lɔ ɔ tsɔɔ?Kane Hebri Bi 4:12.

19, 20. (a) Mɛni blɔ nɔ Baiblo ɔ maa gu kɛ ye bua mo konɛ o le bɔ nɛ o ngɛ ha tutuutu? (b) Mɛni o maa pee kɛ tsɔɔ kaa o bua jɔ Baiblo ɔ nɛ Mawu kɛ ha wɔ kaa nike ní ɔ he?

19 Baiblo ɔ ma nyɛ ma tsake o si himi. E ma nyɛ ma ha nɛ o le bɔ nɛ o ngɛ ha tutuutu. E ma nyɛ maa ye bua mo konɛ o le nɔ́ tutuutu nɛ ngɛ o tsui kɛ o juɛmi mi. Kaa nɔ hyɛmi nɔ́ ɔ, eko ɔ, wa susu kaa wa suɔ Mawu. Se ja waa kɛ níhi nɛ Baiblo ɔ de ɔ tsuɔ ní loko wa ma nyɛ ma de ke wa suɔ Mawu niinɛ.

20 Ngɛ anɔkuale mi ɔ, Baiblo ɔ ji womi nɛ je Mawu ngɔ. E suɔ nɛ o kane Baiblo ɔ, nɛ o kase, nɛ o bua nɛ jɔ he. O bua nɛ jɔ nike ní nɛ ɔ he, nɛ o ya nɔ nɛ o kase. Ke o pee jã a, o maa le yi mi nɛ Mawu to ngɛ adesahi a he ɔ. Wa ma susu yi mi nɛ Mawu to ngɛ adesahi a he ɔ he ngɛ yi nɛ nyɛɛ se ɔ mi.

^ kk. 6 Ni komɛ deɔ ke munyuhi nɛ ngɛ Baiblo ɔ mi ɔ kɛ a he kpa we gbi, se lɔ ɔ, pi anɔkuale. Hyɛ womi nɛ ji The Bible—God’s Word or Man’s? nɛ Yehowa Odasefohi pee ɔ yi 7.

^ kk. 16 Ke o suɔ kaa o maa kase Baiblo gbamihi fuu a he ní ɔ, o ma nyɛ maa hyɛ womiyo nɛ ji, A Book for All People nɛ Yehowa Odasefohi pee ɔ ba fa 27-29.

^ kk. 17 Babilon hɛ mi kpatami ɔ ji Baiblo mi gbamihi nɛ ba mi ɔ a kpɛti kake pɛ kɛkɛ. O ma nyɛ maa na gbamihi nɛ kɔɔ Yesu Kristo he ɔ ngɛ Nyagbe Ningma 5 ɔ mi.