Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

 YI NYƆNGMA KƐ ENUƆ

Blɔ Nɛ Da Nɛ Wa Maa Gu Nɔ Kɛ Ja Mawu

Blɔ Nɛ Da Nɛ Wa Maa Gu Nɔ Kɛ Ja Mawu

1. Mɛnɔ nɛ e sa nɛ e tsɔɔ wɔ blɔ nɛ da nɛ wa maa gu nɔ kɛ ja Mawu?

JAMIHI babauu deɔ ke a tsɔɔ Mawu he anɔkuale ɔ. Se e be nyɛe maa pee anɔkuale, ejakaa e slo níhi nɛ jami ɔmɛ tsuo deɔ ngɛ Mawu he, kɛ bɔ nɛ e sa nɛ wa ja lɛ ha a he. Kɛ wa ma plɛ kɛ le blɔ nɛ da nɛ wa maa gu nɔ kɛ ja Mawu kɛɛ? Yehowa pɛ lɛ ma nyɛ maa tsɔɔ wɔ bɔ nɛ e suɔ nɛ wa ja lɛ ha.

2. Kɛ o ma plɛ kɛ le blɔ nɛ da nɛ o maa gu nɔ kɛ ja Mawu kɛɛ?

2 Yehowa ha wɔ Baiblo ɔ, konɛ e ye bua wɔ nɛ waa na blɔ nɛ da nɛ wa maa gu nɔ kɛ ja lɛ. Lɔ ɔ he ɔ, moo kase Baiblo ɔ, nɛ Yehowa hu maa ye bua mo konɛ o ná he se, ejakaa e susuɔ o he wawɛɛ.Yesaya 48:17.

3. Mɛni Mawu suɔ nɛ waa pee?

3 Ni komɛ deɔ ke Mawu kplɛɛ jami ɔmɛ tsuo a nɔ, se pi jã nɛ Yesu tsɔɔ wɔ. Yesu de ke: “Pi nɔ tsuaa nɔ nɛ tsɛɔ mi ‘Nyɔmtsɛ, Nyɔmtsɛ’ ɔ ji nɔ nɛ maa sɛ hiɔwe matsɛ yemi ɔ mi; se mohu nɔ nɛ peeɔ Tsaatsɛ nɛ ngɛ hiɔwe ɔ suɔmi nya ní.” Enɛ ɔ he ɔ, e sa nɛ waa le Mawu suɔmi nya ní nɛ waa pee. E ji nɔ́ ko nɛ hɛdɔ ngɛ he, ejakaa Yesu tsɔɔ kaa nihi nɛ a pee we Mawu suɔmi nya ní ɔ ji yayami peeli, loo ‘nihi nɛ peeɔ níhi nɛ dɛ blɔ.’Mateo 7:21-23.

4. Mɛni Yesu de ngɛ Mawu suɔmi nya ní peemi he?

4 Yesu tsɔɔ kaa ke wa suɔ nɛ waa pee Mawu suɔmi nya ní ɔ, waa kɛ nyagbahi maa kpe. E de ke: “Nyɛɛ sɛ  agbo tokofii ɔ mi, ejakaa agbo nɛ kɛ nɔ yaa hɛ mi kpatami mi ɔ mi bli. Blɔ nɛ yaa lejɛ ɔ hu ngɛ gbajaa, nɛ nihi babauu nyɛɛɔ nɔ kɛ sɛɛ mi. Se agbo nɛ kɛ nɔ yaa wami mi ɔ ngɛ tokofii; blɔ ɔ hu hí, nɛ nihi bɔɔ pɛ lɛ naa blɔ ɔ.” (Mateo 7:13, 14) Blɔ tokofii, nɛ ji blɔ nɛ da nɛ e sa kaa waa gu nɔ kɛ ja Mawu ɔ kɛ nɔ yaa neneene wami mi. Blɔ gbajaa, nɛ ji blɔ yaya nɛ nihi guɔ nɔ kɛ jaa Mawu ɔ kɛ nɔ yaa gbenɔ mi. Se Yehowa sume nɛ nɔ ko nɔ ko nɛ gbo. Enɛ ɔ he ɔ, e ha nɔ tsuaa nɔ he blɔ kaa e kase e he ní.2 Petro 3:9.

BLƆ NƐ DA NƐ WA MAA GU NƆ KƐ JA MAWU

5. Kɛ o maa pee kɛɛ kɛ le anɔkuale Mawu jali?

5 Ni komɛ ngɛ nɛ a jaa Mawu ngɛ blɔ nɛ da nɔ, nɛ Yesu tsɔɔ kaa wa ma nyɛ ma yo mɛ. Wa ma nyɛ maa le mɛ ke wa kase níhi nɛ a heɔ yeɔ kɛ níhi nɛ a peeɔ ɔ he ní. Yesu de ke: “A ní peemi níhi nyɛɛ kɛ maa le mɛ.” E de hu ke: “Tso kpakpa a, yiblii kpakpa nɛ e woɔ.” (Mateo 7:16, 17) Enɛ ɔ tsɔɔ we kaa nihi nɛ a jaa Mawu ngɛ blɔ nɛ da nɔ ɔ tɔ̃ we. Se kɛ̃ ɔ, Mawu sɔmɔli bɔɔ mɔde be tsuaa be kaa a maa pee nɔ́ nɛ da. Jehanɛ ɔ, wa maa hyɛ níhi nɛ maa ye bua wɔ konɛ waa le anɔkuale Mawu jali.

6, 7. Mɛni he je nɛ anɔkuale Mawu jali ngɔɔ a tsɔɔmihi kɛ daa Baiblo ɔ nɔ ɔ? Mɛni wa ma nyɛ maa kase ngɛ Yesu nɔ hyɛmi nɔ́ ɔ mi?

6 E sa nɛ wa jami nɛ da Baiblo ɔ nɔ. Baiblo ɔ de ke: “Ngmami tsuaa ngmami ɔ, Mawu mumi ɔ lɛ ha nɛ nihi ngma; nɛ e hi kɛ ha ní tsɔɔmi, kɛ ha hɛ mi kami, kɛ ha nɔ dlami, kɛ tsɔsemi nɛ ma ha nɔ nɛ ba e je mi saminya. Kɛkɛ ɔ, Mawu tsɔlɔ ɔ maa hi kɛ pi si, nɛ e he maa su kɛ tsu ní kpakpa.” (2 Timoteo 3:16, 17) Bɔfo  Paulo ngma kɛ ha Kristofohi ke: “Benɛ wa ngɔ Mawu munyu ɔ ba ha nyɛ ɔ, nyɛ bu tue, nɛ nyɛ he lɛ atuu, pi kaa nɔmlɔ adesa sɛ gbi, se mohu kaa Mawu munyu kaa bɔ nɛ e ngɛ anɔkuale mi ɔ.” (1 Tesalonika Bi 2:13) Anɔkuale Mawu jali kɛ a tsɔɔmihi dɛ adesa juɛmi, kusumihi, loo ní kpahi a nɔ. Baiblo ɔ nɔ pɛ nɛ a kɛ a tsɔɔmihi daa.

7 Níhi tsuo nɛ Yesu tsɔɔ ɔ, Mawu Munyu ɔ mi e je. (Kane Yohane 17:17.) Behi fuu ngɛ nɛ Yesu tsɛ Ngmamihi a se. (Mateo 4:4, 7, 10) Anɔkuale Mawu jali kaseɔ Yesu, nɛ a hyɛɛ kaa nɔ́ tsuaa nɔ́ nɛ a maa tsɔɔ ɔ je Baiblo ɔ mi.

8. Mɛni Yesu de wɔ ngɛ Yehowa jami he?

8 Yehowa pɛ ji nɔ nɛ e sa kaa wa ja. La 83:18 (NW) de ke: “Mo nɛ o biɛ ji Yehowa a, mo lɛ o Nɔ Kuɔ Pe Kulaa ngɛ zugba a nɔ tsuo.” Yesu bɔ mɔde kaa e ma ha nɛ nihi nɛ a le nɔ nɛ anɔkuale Mawu ɔ ji tutuutu, nɛ e tsɔɔ nihi Mawu biɛ ɔ hulɔ. (Kane Yohane 17:6.) Yesu de ke: ‘Ja Yehowa o Mawu ɔ, nɛ o sɔmɔ lɛ pɛ.’ (Mateo 4:10) Enɛ ɔ he ɔ, Mawu sɔmɔli kaseɔ Yesu nɔ hyɛmi nɔ́ ɔ. Wa jaa Yehowa pɛ, waa kɛ e biɛ tsɛɛ lɛ, wa tsɔɔ nihi Mawu biɛ, nɛ wa tsɔɔ mɛ nɔ́ nɛ e maa pee ha wɔ.

9, 10. Mɛni wa ma nyɛ maa pee kɛ tsɔɔ kaa wa suɔ wa sibi?

9 E sa nɛ wa ná suɔmi nitsɛnitsɛ kɛ ha nihi. Yesu tsɔɔ e kaseli ɔmɛ kaa a suɔ a sibi. (Kane Yohane 13:35.) Ke wa je ma ekpaekpahi a mi jio, wa tuɔ gbi ekpaekpahi jio, sikatsɛmɛ ji wɔ jio, ohiatsɛmɛ ji wɔ jio ɔ, e sa nɛ waa suɔ wa sibi, nɛ waa pee kake. (Kolose Bi 3:14) Enɛ ɔ he ɔ, wa yɛ ta, nɛ wa gbi nɔmlɔ hulɔ. Baiblo ɔ de ke: “Slɔɔto titli nɛ ngɛ Mawu bimɛ, kɛ Abosiami bimɛ a kpɛti ji nɛ ɔ nɛ. Nɔ tsuaa nɔ nɛ pee we nɔ́  nɛ da, aloo nɔ nɛ sume e nyɛmi ɔ, pi Mawu bi ji lɛ.” Baiblo ɔ de hu ke: “Wa ko pee kaa bɔ nɛ Kain pee ɔ; ejakaa Abosiami mumi ngɛ e mi, nɛ e gbe lɛ nitsɛ e nyɛmi Habel.”1 Yohane 3:10-12; 4:20, 21.

10 Wa ngɔɔ wa be, wa he wami, kɛ wa he lo nya níhi kɛ yeɔ bua wa sibi, nɛ wa woɔ wa sibi he wami. (Hebri Bi 10:24, 25) Wa ‘peeɔ nihi tsuo kpakpa.’Galatia Bi 6:10.

11. Mɛni he je nɛ Yesu nɔ pɛ wa ma nyɛ maa gu kɛ sa Mawu hɛ mi ɔ?

11 E sa nɛ waa bu Yesu tue ejakaa lɛ pɛ nɛ wa ma nyɛ maa gu e nɔ kɛ sa Mawu hɛ mi. Baiblo ɔ de ke: “Lɛ nɔ kake too pɛ lɛ ma nyɛ ma he nimli a yi wami. E se ɔ, nɔ ko nɔ ko be je ɔ mi nɛ Mawu ha lɛ kikɛmɛ a he wami nɛ ma nyɛ he wa yi wami.” (Bɔfo Ɔmɛ A Ní Tsumi 4:12) Ngɛ Yi 5 ɔ mi ɔ, wa kase kaa Yehowa tsɔ Yesu nɛ e ngɔ e wami kɛ ha kaa kpɔmi nɔ́ konɛ e kɛ he adesahi nɛ a buɔ Mawu tue ɔ a yi wami. (Mateo 20:28) Yehowa hla Yesu kaa Matsɛ nɛ maa ye zugba a nɔ. Enɛ ɔ he nɛ Baiblo ɔ de ke, ja wa bu Yesu tue loko wa ma nyɛ maa hi si kɛ ya neneene ɔ nɛ.Kane Yohane 3:36.

12. Mɛni he je nɛ waa kɛ wa he wui ma kudɔmi sanehi a mi ɔ?

12 E sɛ nɛ waa ngɔ wa he kɛ wo ma kudɔmi sanehi a mi. Yesu kɛ e he wui ma kudɔmi sanehi a mi. Benɛ a ngɔ lɛ kɛ ya da Roma amlaalo Pilato hɛ mi ɔ, e de lɛ ke: “Ye matsɛ yemi ɔ, pi je nɛ ɔ mi nɔ́.” (Kane Yohane 18:36.) Wa fĩɔ Mawu Matsɛ Yemi ɔ se kaa bɔ nɛ Yesu pee ɔ. Enɛ ɔ he ɔ, ngɛ he tsuaa he nɛ wa ngɛ ɔ, waa kɛ wa he wui ma kudɔmi sanehi a mi. Se kɛ̃ ɔ, Baiblo ɔ fã wɔ kaa waa ba wa he si kɛ ha “ma nɔ yeli.” (Roma Bi 13:1) Ma tsuaa ma nɛ wa ngɛ mi ɔ, waa kɛ ma a mlaa tsuɔ ní. Se ke a wo mlaa ko nɛ teɔ si kɛ woɔ  Mawu mlaa a, wa peeɔ wa ní kaa Yesu kaseli ɔmɛ. A de ke: “E sa kaa waa bu Mawu mohu tue, se pi nimli.”Bɔfo Ɔmɛ A Ní Tsumi 5:29; Marko 12:17.

13. Mɛni wa deɔ nihi ngɛ Mawu Matsɛ Yemi ɔ he?

13 Wa he ye kaa Mawu Matsɛ Yemi ɔ pɛ nɛ ma nyɛ ma je nyagbahi nɛ ngɛ je ɔ mi ɔ kɛ je. Yesu de ke a maa fiɛɛ ‘sane kpakpa nɛ kɔɔ Matsɛ Yemi ɔ he’ ɔ ngɛ je ɔ mi tsuo. (Kane Mateo 24:14.) Adesa nɔ yemi ko be nɛ ma nyɛ maa pee nɔ́ nɛ Mawu Matsɛ Yemi ɔ maa pee ha wɔ ɔ. (La 146:3) Yesu tsɔɔ kaa ke wa ngɛ sɔlee ɔ, e sa nɛ waa sɔle ngɛ Mawu Matsɛ Yemi ɔ he. E tsɔɔ kaa wa ma nyɛ ma de ke: “O Matsɛ yemi ɔ nɛ ba; a pee nɔ́ nɛ o suɔ ngɛ zugba a nɔ kaa bɔ nɛ a peeɔ ngɛ hiɔwe ɔ.” (Mateo 6:10) Baiblo ɔ tsɔɔ kaa Mawu Matsɛ Yemi ɔ ma kpata je nɛ ɔ mi matsɛ yemi ɔmɛ tsuo a hɛ mi nɛ Mawu nɔ́ ɔ “maa hi si kɛ maa ya neneene.”Daniel 2:44.

14. Mɛnɔmɛ nɛ o he ye kaa a ngɛ Mawu jae ngɛ blɔ nɛ da nɔ?

14 Amlɔ nɛ ɔ nɛ o ba le ní nɛ ɔmɛ ɔ, mo bi o he ke: ‘Mɛnɔmɛ nɛ a kɛ a tsɔɔmihi daa Baiblo ɔ nɔ? Mɛnɔmɛ nɛ a tsɔɔ nihi Mawu biɛ? Mɛnɔmɛ nɛ a suɔ a sibi wawɛɛ, nɛ a heɔ yeɔ hu kaa Mawu tsɔ Yesu konɛ e ba he wa yi wami? Mɛnɔmɛ nɛ a kɛ a he wui ma kudɔmi sanehi a mi? Mɛnɔmɛ nɛ a fiɛɛɔ kaa Mawu Matsɛ Yemi ɔ pɛ nɛ ma nyɛ ma je wa nyagba amɛ kɛ je?’ Mɛ ji Yehowa Odasefohi.Yesaya 43:10-12.

MƐNI O MAA PEE?

15. Mɛni e sa nɛ waa pee konɛ Mawu nɛ kplɛɛ wa jami ɔ nɔ?

15 E hi kaa o he ye kaa Mawu ngɛ, se lɔ ɔ pɛ pi. Ejakaa mumi yayami ɔmɛ po he ye kaa Mawu ngɛ, se a pee we Mawu suɔmi nya ní. (Yakobo 2:19) Ke wa suɔ  nɛ Mawu nɛ kplɛɛ wa jami nɔ ɔ, pi kaa wa ma he ye kaa e ngɛ kɛkɛ. E sa nɛ waa pee nɔ́ tsuaa nɔ́ nɛ e ma de wɔ ɔ.

16. Mɛni he je nɛ e sa nɛ wa kua lakpa jami ɔ?

16 Jehanɛ hu ɔ, loko Mawu maa kplɛɛ wa jami nɔ ɔ, ja wa kua lakpa jami. Gbalɔ Yesaya ngma ke: ‘Nyɛɛ je e mi, nyɛɛ pee nyɛ he klɔuklɔu.’ (Yesaya 52:11; 2 Korinto Bi 6:17) Enɛ ɔ he nɛ e sa nɛ wa kua nɔ́ tsuaa nɔ́ nɛ kɛ lakpa jami ngɛ tsakpa a nɛ.

17, 18. Mɛni ji “Babilon Kpetekpleenyɛ” ɔ, nɛ mɛni he je nɛ e sa nɛ o je mi oya a?

17 Mɛni ji lakpa jami? E ji jami fɛɛ ko nɛ e tsɔɔmi ɔmɛ teɔ si kɛ woɔ Mawu Munyu ɔ. Baiblo ɔ tsɛɛ lakpa jamihi tsuo ke “Babilon Kpetekpleenyɛ.” (Kpojemi 17:5) Mɛni he je? Ngɛ Noa be ɔ mi ngɛ Nyu Kpekpemi ɔ se ɔ, lakpa jamihi fuu je sisi ngɛ blema Babilon ma a mi. Bɔɔbɔɔbɔɔ ɔ, a tsɔɔmi ɔmɛ tsuo gbɛ fĩa zugba a nɔ. Kaa nɔ hyɛmi nɔ́ ɔ, Babilon bi ɔmɛ ja mawuhi etɛ nɛ a bla kɛ pee kake. Mwɔnɛ ɔ hu ɔ, jamihi fuu tsɔɔ kaa Mawu ji Triniti, se Baiblo ɔ tsɔɔ heii kaa anɔkuale Mawu kake pɛ lɛ ngɛ. A tsɛɛ lɛ ke Yehowa, nɛ e Bi ji Yesu. (Yohane 17:3) Jehanɛ hu ɔ, Babilon bi ɔmɛ he ye kaa ke nɔmlɔ gbo ɔ, e ya tsaa e si himi ɔ nɔ ngɛ he ko, nɛ a ma nyɛ ma pii lɛ ngɛ la mi. Se tsɔɔmi nɛ ɔ pi anɔkuale.—Hyɛ Nyagbe Ningmahi 14, 17, kɛ 18.

18 Mawu de kɛ fɔ si kaa e ma kpata lakpa jamihi tsuo a hɛ mi. (Kpojemi 18:8) Anɛ o na nɔ́ he je nɛ e sa kaa o je lakpa jami mi oya a lo? Yehowa Mawu suɔ nɛ o pee jã loko e kpɛ se tsɔ.Kpojemi 18:4.

Ke o piɛɛ Yehowa we bi a he kɛ sɔmɔ lɛ ɔ, o ma ná nyɛmimɛ ayɔhi abɔ ngɛ je kɛ wɛ

19. Ke o mwɔ o yi mi kpɔ kaa o ma ja Yehowa a, kɛ e maa ye bua mo ha kɛɛ?

19 Ke o mwɔ o yi mi kpɔ kaa o maa je lakpa jami mi  konɛ o ja Yehowa a, eko ɔ, o huɛmɛ kɛ o weku li komɛ be mo sisi nue, nɛ a maa te si kɛ wo mo. Se Yehowa maa ye bua mo. O ma ba piɛɛ nyɛmimɛ ayɔhi abɔ nɛ a pee kaa weku agbo ngɛ je kɛ wɛ ɔ a he, a ma je suɔmi kpo kɛ tsɔɔ mo, nɛ o ma ná hɛ nɔ kami kaa o maa hi si kɛ ya neneene ngɛ Mawu je ehe ɔ mi. (Marko 10:28-30) Eko ɔ, o huɛmɛ loo o weku li nɛ a maa te si kɛ wo mo ɔ ma ba kase Baiblo ɔ pee se, nɛ a ma ja Yehowa.

20. Mɛni he je nɛ e sa nɛ o ja Mawu ngɛ blɔ nɛ da nɔ ɔ?

20 E be kɛe kulaa, Mawu ma kpata yayami peeli tsuo a hɛ mi, nɛ e Matsɛ Yemi ɔ maa ye zugba a tsuo nɔ. (2 Petro 3:9, 13) E maa pee bua jɔmi be! Nɔ tsuaa nɔ ma ja Yehowa kaa bɔ nɛ Yehowa suɔ nɛ waa pee ɔ. Enɛ ɔ he ɔ, amlɔ nɛ ɔ ji be nɛ e sa nɛ o mwɔ o yi mi kpɔ kaa o ma ja Mawu ngɛ blɔ nɛ da nɔ.