Janet de ke: “Ngɛ ye papaa gbenɔ se bɔɔ pɛ ɔ, ye huno de mi ke e na yo kpa. Be bɔɔ se ɔ, e mwɔɔ e níhi nɛ e je i kɛ lɛ wa bimɛ enyɔ ɔmɛ a he. Ligbi nɛ e maa je ɔ po e sɛ wɔ.” Janet ná ní tsumi, se e hiɔwo ɔ sui lɛ kɛ jokuɛ ɔmɛ a nɔ hyɛmi. Pi sika he nyagba pɛ nɛ e kɛ kpe ejakaa, e de ke, “blɔ nya ní tsumi ngua nɛ ba fɔ si ngɛ ye nɔ jamɛ a be ɔ mi ɔ ha nɛ i pee yeyeeye wawɛɛ. E dɔ mi kaa i nyɛ we nɛ ma hyɛ ye bimɛ ɔmɛ a nɔ kaa bɔ nɛ fɔli komɛ peeɔ ɔ. Amlɔ nɛ ɔ po ɔ, i haoɔ ngɛ bɔ nɛ nihi naa i kɛ ye bimɛ ɔmɛ ha a he. I li kaa nihi susuɔ kaa i piɛ he nɛ ye gba a puɛ ɔ lo.”

Janet

Sɔlemi ye bua Janet nɛ e nyɛ nɛ e ye e he nɔ, nɛ huɛ bɔmi nɛ ngɛ e kɛ Mawu a kpɛti ɔ mi wa. “Ke e su nyɔ mi nɛ je mi jɔ dii ɔ, jamɛ a be ɔ mi nɛ i haoɔ wawɛɛ. Ke i sɔle nɛ i kane Baiblo ɔ, i nyɛɛ nɛ i hwɔɔ mahe. Ngmami nɛ woɔ ye bua wawɛɛ ji, Filipi Bi 4:6, 7: ‘Nyɛ ko hao ngɛ nɔ́ ko nɔ́ ko he; se mohu nɔ́ tsuaa nɔ́ mi ɔ, nyɛɛ kɛ sɔlemi, kɛ pɛɛ kpami, kɛ sina nɛ wo nyɛ hiami ní ɔmɛ a ta ha Mawu. Nɛ Mawu he jɔmi nɛ pã adesa juɛmi tsuo ɔ maa bu nyɛ tsui, kɛ nyɛ juɛmi he.’ I sɔle nyɔnyɔɔnyɔ si abɔ, nɛ i na kaa Yehowa to ye tsui nɔ nine.”

Munyuhi nɛ woɔ nɔ bua nɛ Yesu tu ngɛ e Yoku ɔ Nɔ Fiɛɛmi ɔ mi ɔ kɔɔ nyagbahi slɔɔtohi nɛ waa kɛ ma nyɛ maa kpe ɔ he. Yesu de ke: “Loko nyɛ ma de ke nyɛ ngɛ nyɛ Tsɛ ɔ nɔ́ ko bie ɔ, lɛɛ e le níhi nɛ hia nyɛ ɔ momo.” (Mateo 6:8) Se kɛ̃ ɔ, e sa nɛ wa bi lɛ wa hiami níhi. Sɔlemi ji nɔ́ titli nɛ ma ha nɛ waa ‘hɛ wɔ kɛ su Mawu he.’ Kɛkɛ ɔ, ‘Mawu hu maa hɛ kɛ su wa he.’Yakobo 4:8.

Ngɛ anɔkuale mi ɔ, ke wa sɔle ngɛ wa nyagbahi a he ɔ, pi wa tsui pɛ nɛ nɔɔ wa mi. Yehowa “buɔ” nihi nɛ a kɛ hemi kɛ yemi sɔleɔ ɔ tue, nɛ e yeɔ bua mɛ. (La 65:2) Enɛ ɔ he nɛ Yesu de e se nyɛɛli kaa  a ‘sɔle daa, nɛ a kɔni mi kó wo nyu’ ɔ nɛ. (Luka 18:1) E sa nɛ waa ya nɔ nɛ wa bi Mawu blɔ tsɔɔmi kɛ e yemi kɛ buami, nɛ wa ná nɔ mi mami kaa e maa bu wɔ tue. E sɛ nɛ wa yi mi nɛ pee wɔ enyɔɔnyɔ kɔkɔɔkɔ ngɛ yemi kɛ buami nɛ Mawu kɛ ma ha wɔ ɔ he. Ke waa kɛ ga womi nɛ ji, “nyɛɛ sɔle be tsuaa be” ɔ tsuɔ ní ɔ, e tsɔɔ kaa wa ngɛ hemi kɛ yemi nɛ mi wa.1 Tesalonika Bi 5:17.

NƆ́ NƐ HEMI KƐ YEMI TSƆƆ NITSƐNITSƐ

Mɛni ji hemi kɛ yemi? Hemi kɛ yemi biɔ nɛ waa “le” Mawu saminya. (Yohane 17:3) Loko wa maa le Mawu ɔ, kekleekle ɔ, e sa nɛ waa kase Baiblo ɔ, konɛ waa le e susumihi ngɛ níhi a he. Ke o kase Baiblo ɔ, o maa na kaa Mawu naa wa ti nɔ tsuaa nɔ, nɛ e suɔ nɛ e ye bua wɔ. Se Mawu he ní nɛ wa maa kase ɔ pɛ pi. E sa nɛ waa kɛ lɛ nɛ ná huɛ bɔmi kpakpa hulɔ. Kaa bɔ nɛ o le ɔ, pi ligbi kake nɛ a kɛ peeɔ huɛ. Ke wa ya nɔ nɛ wa kase Mawu he ní, nɛ wa ‘pee e suɔmi nya ní,’ nɛ wa na bɔ nɛ e yeɔ bua wɔ ha a, lɔ ɔ ma ha nɛ wa hemi kɛ yemi ɔ “mi maa wa.” (2 Korinto Bi 10:15; Yohane 8:29) Kikɛmɛ a hemi kɛ yemi nɛ ɔ lɛ ha nɛ Janet nyɛ nɛ e ngɛ e haomi ɔmɛ a nya dae ɔ nɛ.

Janet de ke, “nɔ́ nɛ ha nɛ ye hemi kɛ yemi ɔ mi wa ji kaa i naa kaa Yehowa yeɔ bua mi ngɛ nɔ́ fɛɛ nɔ́ mi. Behi fuu ɔ, nihi bɔɔ mɔde kaa a maa sisi wɔ. Se ke wa sɔle ɔ, blɔ nɔ nɛ Yehowa guu kɛ yeɔ bua wɔ ɔ peeɔ mi nyakpɛ. Ke i ngɛ sɔlee ɔ, i kaiɔ níhi babauu nɛ Yehowa pee ha mi ɔ. Behi fuu ɔ, Yehowa yeɔ bua wɔ ngɛ be nɛ sa mi. Jehanɛ hu ɔ, e ha nɛ i ná nyɛmimɛ Kristofohi nɛ a suɔ mi. A yeɔ bua mi be fɛɛ be, nɛ a peeɔ nɔ hyɛmi nɔ́ kpakpa kɛ haa ye bimɛ ɔmɛ.” *

“I na nɔ́ he je nɛ Yehowa de ngɛ Malaki 2:16 ke: ‘I sume gba puɛmi’ ɔ. Ngɛ nɔ nɛ a je e he ɔ blɔ fa mi ɔ, nɔ́ ko be nɛ dɔɔ nɔ wawɛɛ kaa jã. Be babauu ji nɛ ɔ nɛ ye huno ɔ je ye he, se be komɛ ngɛ nɛ ye hɛ jaa, nɛ e peeɔ mi kaa se nami be ye he. Ke i nu he jã a, i bɔɔ mɔde kaa ma ye bua nɔ ko, nɛ jã peemi yeɔ bua imi nitsɛ hulɔ.” Akɛnɛ Janet ngɔ Baiblo mi ga womi kɛ tsu ní nɛ e tsɔ we e he kɛ ji nihi a he he je ɔ, lɔ ɔ ha we nɛ e hao tsɔ. *Abɛ 18:1.

‘Awusahi a tsɛ, kɛ yalɔyihi a he bulɔ ji Mawu.’La 68:5

Janet de ke: “Lemi nɛ i ba le kaa Mawu ji ‘awusahi a tsɛ, kɛ yalɔyihi a he bulɔ’ ɔ, ye bua mi wawɛɛ nitsɛ. Mawu be wɔ kuae kaa bɔ nɛ ye huno ɔ pee ɔ.” (La 68:5) Janet le kaa ‘Mawu kɛ nɔ́ yaya kɛ́ nɔ.’ Mohu ɔ, e haa wɔ nile “faa,” nɛ e haa wɔ “he wami kpetekpleenyɛ” nɛ e yeɔ bua wɔ ngɛ haomi behi a mi.Yakobo 1:5, 13; 2 Korinto Bi 4:7.

Se ke wa ngɛ haoe akɛnɛ wa wami ya je oslaa mi ɔ hu nɛɛ?

^ kk. 9 Ke o ngɛ hlae nɛ o le ní kpahi nɛ o ma nyɛ maa pee kɛ da yeyeeye peemi nya a, moo hyɛ July 2015 Awake! ɔ hɛ mi munyu nɛ e yi ji, “Are You in Control of Your Life?” ɔ ngɛ intanɛti ɔ nɔ ngɛ www.jw.org.