Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  October 2015

Yeyeeye Peemi Ngɛ He Fɛɛ He!

Yeyeeye Peemi Ngɛ He Fɛɛ He!

“Jinɛ i yaa he niye ní, se akpɔɔnɔɔ pɛ nɛ i ya na—lɔ ɔ po he jua bɔ he si 10,000! E nɔ jena a, niye ní ta tsuapohi tsuo a mi.”—Paul, Zimbabwe.

“Ye huno tsɛ mi nɛ e de mi ke e kɛ mi be si hie hu. Kɛ ma plɛ kɛ da tsui yemi sane nɛ ɔ nya ha kɛɛ? Kɛ ye bimɛ ɔmɛ ma plɛ kɛ da si himi nɛ ɔ nya ha kɛɛ?”—Janet, United States.

“Ke i nu bɛ nɛ nya wa nɛ a kɛ bɔɔ ma bi kɔkɔ, kɛ oplɛmihi nɛ ngɛ fɛe ɔ he ɔ, i tuɔ fo kɛ ya laa ye he. Ke be pue mi saii po ɔ, ye he kpokpoɔ.”—Alona, Israel.

Be nɛ wa ngɛ mi nɛ ɔ ‘mi wa’ saminya. (2 Timoteo 3:1) Nihi fuu kɛ sika he nyagbahi, weku mi nyagbahi, ta hwumi, gbenɔ hiɔhi nɛ saa nɔ, kɛ oslaahi ngɛ kpee. Enɛ ɔ se ɔ, nihi fuu ngɛ mɛ nitsɛmɛ a nyagbahi. Eko ɔ, amlɔ nɛ ɔ, nɔ ko ngɛ e he bie ke: ‘Anɛ nɔ́ nɛ fu mi nɛ ɔ maa pee kansa lo?’ ‘Hwɔɔ se ɔ, kɛ je ɔ mi maa pee kɛɛ kɛ ha ye bibimɛ?’

Be komɛ ɔ, tɔmi be he kaa wa maa hao ngɛ nɔ́ ko he. Ke wa yaa ngma ka, aloo wa yaa da nihi a hɛ mi kɛ pee nɔ́ ko, aloo ke wa yaa hla ní tsumi ɔ, wa peeɔ yeyeeye bɔɔ. Yeyeeye peemi nɛ sa poɔ wa he piɛ ngɛ oslaa he. Se ke e po blɔ mi ɔ, e ma nyɛ maa ye wɔ awi. Níhi a mi hlami ko nɛ a pee ngɛ nihi 68,000 kɛ se a he ɔ tsɔɔ kaa ke nɔ ko peeɔ yeyeeye bɔɔ ko po be tsuaa be ɔ, lɔ ɔ ma nyɛ maa gbe lɛ mla. Yi mi tomi kpakpa he je nɛ Yesu bi ke: “Nyɛ ti mɛnɔ kɛ yeyeeye peemi ma nyɛ tsɔ e kami nya nine kpɔ mi kami kake?” Ngɛ anɔkuale mi ɔ, yeyeeye nɛ nɔ ko maa pee ɔ, be nyɛe maa tsɔ e wami nya. Enɛ ɔ he ɔ, Yesu de ke: “Nyɛ ko hao.” (Mateo 6:25, 27) Se wa ma nyɛ maa hi si nɛ wa be haoe lo?

Loko wa ma nyɛ maa pee jã a, ja waa kɛ nile nitsɛnitsɛ tsu ní, nɛ wa ná hemi kɛ yemi nɛ mi wa ngɛ Mawu mi, nɛ wa ná hɛ nɔ kami kpakpa. Ke waa kɛ haomi ko kpi amlɔ nɛ ɔ po ɔ, eko ɔ, waa kɛ eko maa kpe hwɔɔ se. Nyɛ ha nɛ waa hyɛ bɔ nɛ ní nɛ ɔmɛ ye bua Paul, Janet, kɛ Alona ha ngɛ haomihi nɛ a kɛ kpe ɔ mi.