Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  July 2015

 HƐ MI MUNYU | ANƐ NYAGBE Ɔ SU TA LO?

Anɛ Nyagbe ɔ Su Ta Lo?

Anɛ Nyagbe ɔ Su Ta Lo?

Anɛ Mawu ma ha adesahi nɛ a ya nɔ nɛ a ye a nyɛmimɛ a nɔ, nɛ a kɛ a hwɔɔ se si himi nɛ wo oslaa mi lo? Dɛbi, kaa bɔ nɛ wa na a, Mawu maa po nɔ́ nami kɛ yi mi wami nɛ ya nɔ jeha lafahi abɔ ji nɛ ɔ tsuo se. Adesahi kɛ zugba a Bɔlɔ ɔ suɔ nɛ o le kaa be nɛ e kɛ ma tsu ní nɛ ɔ su ta. Mɛni blɔ nɔ e gu kɛ je sane nɛ e he hia nɛ ɔ kpo?

Mo susu nɔ́ hetomi nɔ́ nɛ ɔ he nɛ o hyɛ: Ngɔɔ lɛ kaa o ngɛ hlae nɛ o hia blɔ kɛ ya he ko nɛ o li lejɛ ɔ. Eko ɔ, o maa sɛ hlami ma bi nihi nɛ a le lejɛ ɔ níhi nɛ ke o na ngɛ blɔ ɔ nɔ ɔ, e maa tsɔɔ kaa o ngɛ lejɛ ɔ sue. Lɔ ɔ ke o ngɛ blɔ ɔ nɔ kɛ yaa nɛ o na jamɛ a ni ɔmɛ ɔ, e ma ha o maa na kaa o ngɛ lejɛ ɔ sue. Jã kɛ̃ nɛ Mawu Munyu ɔ nɛ e kɛ ha wɔ ɔ tsɔɔ wɔ níhi nɛ maa ya nɔ ngɛ je ɔ mi. Ke wa na kaa jamɛ a ní nɛ ɔmɛ ngɛ nɔ yae ɔ, e haa nɛ wa naa kaa nyagbe ɔ su ta.

Baiblo ɔ tsɔɔ kaa je ɔ ma puɛ kulaa loko nyagbe ɔ maa ba. Níhi nɛ maa ya nɔ ngɛ je ɔ mi ngɛ jamɛ a be ɔ mi ɔ maa pee níhi nɛ a nɛ́ hiɛ. Mo susu níhi nɛ Mawu Munyu tsɔɔ kaa e maa ba a ekomɛ a he nɛ o hyɛ.

1. BASABASA PEEMI NƐ NGƐ NƆ YAE NGƐ JE Ɔ MI Gbami nɛ ngɛ Mateo yi 24 ɔ tu okadihi nɛ maa ya nɔ ngɛ zugba a nɔ ɔ he munyu. Jamɛ a okadi ɔmɛ ma kadi “nyagbe be” ɔ, nɛ e maa ya nɔ kɛ ya si “nyagbe ɔ maa ba.” (Kuku 3, 14) Okadi nɛ ɔmɛ ekomɛ ji tahi, hwɔ nɛ nya wa, zugba mimiɛmi ngɛ hehi slɔɔtohi, yayami nɛ maa pɔ he, suɔmi nɛ be, kɛ jami nya dali nɛ a maa sisi nihi. (Kuku 6-26) Ngɛ anɔkuale mi ɔ, pi mwɔnɛ ɔ nɛ ní nɛ ɔmɛ je sisi. Se bemi nɛ nyagbe ɔ ngɛ sue ɔ, ní nɛ ɔmɛ tsuo maa ya nɔ ngɛ be kake mi. Jamɛ a be ɔ mi nɔuu ɔ, okadihi etɛ nɛ nyɛɛ se nɛ ɔ nɛ peeɔ kɔkɔ bɔmi maa ya nɔ.

2. NIHI A SU Baiblo ɔ tsɔɔ kaa “nyagbe ligbi ɔmɛ” aloo je nɛ ɔ nyagbe be ɔ mi ɔ, nihi a su ma puɛ kulaa. Baiblo ɔ de ke: “Nihi ma hla kaa a ma fo mɛ nitsɛmɛ pɛ a nɔ mi; a maa pee a he sika suɔli, fiali, he woli, kɛ lilɛtsɛmɛ, nihi nɛ bui a fɔli, nihi nɛ li sina, kɛ nihi nɛ Mawu jami pi a he sane ko. Nihi maa pee a ní kaa nɔ́ nɛ pi adesahi kulaa ji mɛ, nihi nɛ mɔbɔ nami ko be a mi, nihi a biɛ puɛli, nihi nɛ peeɔ basabasa nɛ a li zo, awi yeli, kɛ nihi nɛ sume nɔ́ kpakpa. Nimli maa pee a he nɔ se blɔ tsɔɔli, nihi nɛ bui nɔ́, he nɔ woli, kɛ nihi nɛ suɔ je mi akɔnɔ pe bɔ nɛ a suɔ Mawu.” (2 Timoteo 3:1-4) Ngɛ anɔkuale mi ɔ, pi mwɔnɛ ɔ nɛ nɔ buimi je sisi, se nyagbe be ɔ mi lɛɛ e mi wa wawɛɛ, lɔ ɔ he ɔ, e da kaa Baiblo ɔ de ke je ɔ “mi maa wa.” Anɛ o yɔse kaa nihi ngɛ su yaya nɛ ɔmɛ kpo jee lo?

3. NIHI NGƐ ZUGBA A HƐ MI KPATAE Baiblo ɔ de ke, Mawu ma ‘kpata nihi nɛ a ngɛ zugba a hɛ mi kpatae ɔ a hɛ mi.’ (Kpojemi 11:18) Mɛni blɔ nɔ nɛ nihi ngɛ zugba a hɛ mi kpatae ngɛ? Baiblo ɔ tu níhi nɛ nihi nɛ a hi si ngɛ Noa be ɔ mi ɔ pee kɛ kpata zugba a hɛ mi ɔ he munyu. E de ke: “Nimli kpa amɛ lɛɛ a peeɔ yayami ngɛ Mawu hɛ mi, nɛ basabasa ngɛ je ɔ mi he tsuaa he. Kɛkɛ nɛ Mawu na kaa je ɔ puɛ.” Lɔ ɔ he ɔ, Mawu de ke: “I to kaa ma kpata nimli adesahi tsuo kulaa a hɛ mi.” (1 Mose 6:11-13) Anɛ o yɔse níhi fuu nɛ tsɔɔ kaa basabasa peemi pɔ he wawɛɛ ngɛ je ɔ mi ɔ lo? Jehanɛ hu, adesahi ya hɛ mi wawɛɛ ngɛ yayami peemi mi: A pee níhi nɛ a ma nyɛ kɛ puɛ zugba a, aloo a kɛ kpata adesahi nɛ a ngɛ zugba a nɔ ɔ tsuo a hɛ mi. A ngɛ ta hwumi níhi babauu nɛ a ma nyɛ kɛ pee jã. Adesahi ngɛ zugba a hɛ mi kpatae ngɛ blɔ kpa hu nɔ. Níhi nɛ haa nɛ wami hii zugba a nɔ kaa kɔɔhiɔ nɛ wa muɔ, lohwehi kɛ tsohi, kɛ wo ɔ hɛ mi ngɛ kpatae bɔɔbɔɔbɔɔ, akɛnɛ adesahi hyɛ we nɔ saminya a he je.

 Mo bi o he ke, ‘Maa pee jeha lafa kɛ se nɛ be nɛ ɔ, anɛ adesahi nyɛ nɛ a pee níhi nɛ a kɛ ma kpata mɛ nitsɛmɛ a hɛ mi lo?’ Se amlɔ nɛ ɔ, adesahi bua ta hwumi níhi nɛ a ngɛ gbeye nya, nɛ a kɛ ngɛ zugba a puɛe. Adesahi ya hɛ mi ngɛ klama he nile mi, se a nyɛ we nɛ a pee nɔ́ ko ngɛ ní yayahi nɛ jee mi kɛ ba a he. Se pi adesahi nɛ maa tsɔɔ loo ma kudɔ bɔ nɛ zugba a nɔ ma ji ha hwɔɔ se. Mawu be blɔ ngmɛe nɛ a kpata nɔ́ tsuaa nɔ́ nɛ ngɛ zugba a nɔ ɔ hɛ mi, e ma kpata nihi nɛ kpataa zugba a hɛ mi ɔ a hɛ mi. Mawu nitsɛ nɛ wo si nɛ ɔ!

4. JE KƐ WƐ FIƐƐMI NÍ TSUMI Nyagbe ɔ he okadi fa ko hu tsɔɔ kaa ní tsumi titli ko maa ya nɔ: ‘Sane kpakpa nɛ ɔ nɛ kɔɔ matsɛ yemi ɔ he ɔ, a maa fiɛɛ kɛ kpa je ɔ mi tsuo, bɔ nɛ pee nɛ je ma amɛ tsuo nɛ a nu; nɛ lɔ ɔ se loko nyagbe ɔ maa ba.’ (Mateo 24:14) Fiɛɛmi ní tsumi nɛ ɔ je kpa ngɛ nɔ́ nɛ jamihi fuu fiɛɛ jeha lafahi nɛ be ɔmɛ a mi ɔ. Ngɛ nyagbe ligbi ɔmɛ a mi ɔ, a maa fiɛɛ sɛ gbi titli ko, nɛ ji, ‘sane kpakpa nɛ kɔɔ matsɛ yemi ɔ he.’ Anɛ o le jami ko nɛ fiɛɛɔ jamɛ a sɛ gbi titli ɔ lo? Nɛ ke jami komɛ ke a fiɛɛɔ jamɛ a sɛ gbi ɔ po ɔ, anɛ a peeɔ jã ngɛ he nɛ a ngɛ ɔ pɛ, aloo a fiɛɛɔ sane kpakpa a ngɛ “je ɔ mi tsuo, bɔ nɛ pee nɛ je ma amɛ tsuo nɛ a nu” lo?

A ngɛ Mawu Matsɛ Yemi ɔ he sane kpakpa a fiɛɛɔ ngɛ gbihi babauu mi ngɛ je kɛ wɛ

Intanɛti ní tsumi he nɛ ji, www.jw.org ɔ gblaa juɛmi kɛ yaa “sane kpakpa nɛ kɔɔ matsɛ yemi ɔ he” ɔ nɔ titli. A pee Baiblo kasemi níhi nɛ tsɔɔ sɛ gbi nɛ ɔ mi ngɛ gbihi nɛ hiɛ pe 700 mi ngɛ intanɛti ní tsumi he nɛ ɔ nɔ. Anɛ o le blɔ kpa ko hu nɔ nɛ a guu kɛ haa nihi le ɔ Matsɛ Yemi ɔ he sane kpakpa a ngɛ je kɛ wɛ lo? Loko intanɛti maa ba a, a le Yehowa Odasefohi kaa a ji nihi nɛ fiɛɛɔ sane kpakpa a nɛ kɔɔ Mawu Matsɛ Yemi ɔ he. Kɛ je jeha 1939 kɛ ma nɛ ɔ, a ngma ngɛ Hwɔɔmi Mɔ ɔ eko tsuaa eko hɛ mi ke, “E Ngɛ Yehowa Matsɛ Yemi ɔ He Gɔgɔ Fiae.” Womi ko nɛ tuɔ jami he munyu ɔ tu Yehowa Odasefohi a fiɛɛmi ní tsumi ɔ he munyu ke, “jami ko jami ko kɛ mɛ sɔɛ ngɛ bɔ nɛ a kɛ kã fiɛɛɔ, kɛ he nɛ a tsu fiɛɛmi ní tsumi ɔ kɛ ya su ɔ blɔ fami.” Fiɛɛmi ní tsumi nɛ ɔ maa sane kpakpa nɛ ji kaa, e be kɛe nɛ Mawu Matsɛ Yemi ɔ ma ha “nyagbe ɔ maa ba” a nɔ mi.

BE NƐ SA KADIMI NGƐ JE Ɔ YI NƆ SANE MI

Anɛ o yɔse kaa okadihi loo níhi eywiɛ nɛ Baiblo ɔ gba kaa wa maa na ngɛ nyagbe ligbi ɔmɛ a mi ɔ ngɛ mi bae lo? Maa pee jeha lafa kɛ se ji nɛ ɔ, womi tɛtlɛɛ nɛ ɔ ha nihi nɛ a kaneɔ ɔ le níhi nɛ maa ba ngɛ je ɔ mi konɛ mɛ nitsɛmɛ a yɔse kaa nyagbe ɔ su ta. Ngɛ nɔ́ nɛ ngɛ nɔ yae ngɛ je ɔ mi  tsuo se ɔ, ni komɛ he we yi kaa je ɔ ma nyagbe, nɛ a deɔ ke nɔ tsuaa nɔ ma nyɛ maa ka e yi mi kɛ de nɔ́ nɛ e suɔ. A deɔ hu ke akɛnɛ klamahi a he nile nɛ ya hɛ mi ɔ ha nɛ blɔhi a nɔ nɛ nihi guɔ kɛ sɛɛɔ ní ɔ tsake he je nɛ nihi susu kaa je ɔ ngɛ puɛe kulaa a nɛ. Ngɛ nɔ́ nɛ nihi de nɛ ɔ tsuo se ɔ, odase yemi babauu ngɛ nɛ tsɔɔ kaa be nɛ wa ngɛ mi nɛ ɔ sa kadimi.

Ní leli komɛ susu kaa be ko maa ba nɛ tsakemi ngua komɛ maa ba zugba a nɔ. Kaa nɔ hyɛmi nɔ́ ɔ, ngɛ jeha 2014 ɔ mi ɔ, Jemi Si Kpami Kɛ He Piɛ Pomi Ajla Toli ngɔ kɔkɔ bɔmi kɛ ha Je Ma Amɛ A Kake Peemi He Piɛ Pomi Ajla Toli ɔmɛ ngɛ níhi nɛ e kɛ adesahi a wami maa wo oslaa mi ɔ he ngɛ womi nɛ ji, Bulletin of the Atomic Scientists ɔ mi. A de ke: “Wa to wa tsui si kɛ hla níhi a mi saminya, nɛ wa na kaa bɔ nɛ klama he nile ngɛ hɛ mi yae ha a ma nyɛ maa ngɔ oslaa ko kɛ ba nɛ e kpata adesahi tsuo a hɛ mi.” Nihi babauu he ye kaa wa ngɛ be nɛ sa kadimi ngɛ je ɔ yi nɔ sane mi. Womi nɛ o ngɛ kanee nɛ ɔ ngmali kɛ e kaneli a yi mi pee we mɛ enyɔɔnyɔ kaa wa ngɛ nyagbe ligbi ɔmɛ a mi nɛ nyagbe ɔ su ta. Se e sɛ nɛ waa ye hwɔɔ se gbeye, mohu ɔ, e sa nɛ wa bua nɛ jɔ ngɛ nɔ́ nɛ maa je mi kɛ ba a he. Mɛni he je? Ejakaa o ma nyɛ ma ná yi baami ngɛ nyagbe ligbi ɔ mi!