Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  April 2015

 SANEHI NƐ WA NÍ KANELI ƆMƐ BIƆ . . .

Anɛ Ista Ji Kristofohi A Gbijlɔ Niinɛ Lo?

Anɛ Ista Ji Kristofohi A Gbijlɔ Niinɛ Lo?

Womi nɛ ji, Encyclopædia Britannica a tu Ista he munyu ke, “e ji Kristofohi a gbijlɔ nɛ a kɛ kaiɔ Yesu Kristo Si Temi ɔ.” Se anɛ e ji Kristofohi a gbijlɔ lo?

Loko a ma ná nɔ mi mami kaa nɔ́ ko ji anɔkuale ɔ, ja a le nɔ́ ɔ he sane fitsofitso. Jã kɛ̃ nɛ wɔ hu loko wa ma ná nɔ mi mami kaa Ista ji Kristofohi a gbijlɔ ɔ, e he hia nɛ waa le Ista he sane fitsofitso.

Kekleekle ɔ, Yesu fã e se nyɛɛli ɔmɛ kaa a kai e gbenɔ ɔ, se pi e si temi. Bɔfo Paulo tsɛ gbijlɔ nɛ ɔ ke, “Nyɔmtsɛ niye ní ɔ.”1 Korinto Bi 11:20; Luka 22:19, 20.

Womi nɛ ji, Encyclopædia Britannica a de hu ke, “tsakpa ko be” Ista kusumihi kɛ Yesu si temi ɔ a kpɛti, “mohu ɔ, e je blema kusumihi a mi.” Kaa nɔ hyɛmi nɔ́ ɔ, womi nɛ ji, The Encyclopedia of Religion ɔ de ngɛ hlui kɛ alɔngɔ nɛ piɛɛ Ista kusumihi nɛ a yeɔ ngɛ mahi fuu a nɔ ɔ he ke: “Hlui daa si kɛ ha wami ehe nɛ e je kpo ngɛ gbenɔ (nɛ he wa) kaa hlui toto ɔ mi.” E de hu ke: “A le alɔngɔ kaa lohwe nɛ fɔɔ wawɛɛ, lɔ ɔ he ɔ, a kɛ alɔngɔ da si kɛ ha gbiɛ be.”

Ní lelɔ kpanaa nɛ a tsɛɛ lɛ ke Philippe Walter a tsɔɔ bɔ nɛ pee nɛ kusumi nɛ ɔmɛ ba piɛ Ista gbijlɔ ɔ he ɔ mi. E ngma ke, “akɛnɛ a bɔ mɔde kaa a ma ha nɛ wɔ jali ba plɛ Kristofohi” he je ɔ, a ngɔ gbijlɔ ko nɛ wɔ jali yeɔ ngɛ “fĩɛ be mi kɛ gbiɛ be mi ɔ kaa Yesu si temi ɔ he gbijlɔ.” Walter de hu ke, “Kristofohi a gbijlɔhi” nɛ a yeɔ ngɛ wɔ jali a gbijlɔ yemi behi a nɔ ɔ, ha nɛ nihi babauu ba plɛ Kristofohi.

Níhi nɛ a pee konɛ a kɛ ha nɛ nihi nɛ ba plɛ Kristofohi ɔ yɛ nɔ benɛ bɔfo ɔmɛ ngɛ wami mi, ejakaa bɔfo ɔmɛ pee kaa ‘blɔ tsimi’ ní kɛ ha wɔ jami. (2 Tesalonika Bi 2:7) Bɔfo Paulo kɛ kɔkɔ bɔmi ha kaa, ‘ke e je ɔ,’ nihi “maa ye lakpa kɛ puɛ nyɛmimɛ ɔmɛ a tue kɛ ya nyɛɛ a se.” (Bɔfo Ɔmɛ A Ní Tsumi 20:29, 30) Kɛ ma kaseli ɔmɛ a be ɔ nyagbe mi ɔ, bɔfo Yohane ngma kaa ni komɛ ngɛ Kristofo ɔmɛ ekomɛ sisie momo. (1 Yohane 2:18, 26) Lɔ ɔ bli blɔ nɛ wɔ jami kusumihi ba futu Kristofohi a jami ɔ.

“Nyɛɛ kɛ ni nɛmɛ nɛ he we yi ɔ kó bɔ.”2 Korinto Bi 6:14

Eko ɔ, ni komɛ ma susu kaa tɔmi ko be he kaa a ngmɛ blɔ nɛ Ista kusumihi ba futu Kristofohi a jami ɔ, ejakaa, e ha nɛ “wɔ jali ɔmɛ” nu nɔ́ nɛ Yesu si temi ɔ tsɔɔ ɔ sisi saminya. Se kaa Paulo ngɛ je mi ɔ, e be susumi nɛ ɔ nɔ kplɛɛe kɔkɔɔkɔ. E ngɛ mi kaa benɛ Paulo ngɛ blɔ hiae ngɛ mahi nɛ a ngɛ Roma nɔ yemi ɔ sisi ɔ mi ɔ, e na wɔ jami mi gbijlɔhi babauu mohu lɛɛ, se e kɛ e he wui mi konɛ e kɛ ha nɛ nihi nɛ a nu Yesu he sane ɔ sisi saminya. Mohu ɔ, e bɔ Kristofohi kɔkɔ ke: “Nyɛɛ kɛ ni nɛmɛ nɛ he we yi ɔ kó bɔ. Dami sane yemi kɛ mlaa tɔmi ɔ, mɛni kake peemi lɛ ngɛ a kpɛti? Aloo mɛni bɔmi lɛ ngɛ la kɛ diblii a kpɛti? Lɔ ɔ he ɔ, Nyɔmtsɛ ɔ ke, ‘Nyɛɛ je a kpɛti, nɛ nyɛ tsɔ nyɛ he kɛ je a he. Nyɛ ko ta nɔ́ ko nɛ he tsɔ we he.’”2 Korinto Bi 6:14, 17.

Mɛni wa na ngɛ nɔ́ kpiti nɛ wa susu he nɛ ɔ mi? E tsɔɔ heii kaa Ista pi Kristofohi a gbijlɔ.