Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

 HƐ MI MUNYU | NƆ YEMI NƐ YEƆ ANƆKUALE

Anɔkuale Nɛ A Yi ɔ Hyi Nɔ Yemi Mi Tɔ

Anɔkuale Nɛ A Yi ɔ Hyi Nɔ Yemi Mi Tɔ

A tsɔɔ anɔkuale nɛ a yi ngɛ nɔ yemi mi ɔ mi kaa e ji blɔ nya nɛ a kɛ tsuɔ ní ngɛ blɔ nɛ dɛ nɔ kɛ ha nɔ nitsɛ se nami. Anɔkuale nɛ a yi nɛ ɔ ngɛ kɛ je blema. Kaa nɔ hyɛmi nɔ́ ɔ, mlaahi nɛ ngɛ Baiblo ɔ mi ɔ eko tsɔɔ kaa a ko ngɔ nyɔ mi ní ngɛ kojomi mi. Enɛ ɔ tsɔɔ kaa nyɔ mi ní he mi he si pe jeha 3,500 kɛ se ji nɛ ɔ. (2 Mose 23:8) Ngɛ anɔkuale mi ɔ, pi nyɔ mi ní he mi pɛ nɛ tsɔɔ anɔkuale nɛ a yi. Be komɛ ngɛ nɛ ma nikɔtɔmahi nɛ a yi anɔkuale ɔ juɔ níhi, a kɛ blɔ nya nɛ a ngɛ ɔ ngɔɔ níhi nɛ a be he blɔ kaa a ngɔɔ, nɛ a juɔ ma a sika po. A nyɛɛ nɛ a ngɔɔ blɔ nya nɛ a ngɛ ɔ kɛ tsuɔ ní ngɛ blɔ nɛ dɛ nɔ konɛ a kɛ ye bua a huɛmɛ kɛ a wekuli.

E ngɛ mi kaa a yi anɔkuale ngɛ adesahi a blɔ nya tomihi a mi mohu lɛɛ, se anɔkuale nɛ a yi ngɛ nɔ yemi mi ɔ pɔ he wawɛɛ nitsɛ. Womi nɛ ji, Global Corruption Barometer nɛ ní tsumi he ko nɛ a tsɛɛ ke Transparency International ɔ pee ngɛ jeha 2013 ɔ mi ɔ bɔ amaniɛ kaa, nihi nɛ a yi anɔkuale kulaa a ji, ma kudɔmi kuuhi, polisihi, ma nikɔtɔmahi, mlaa woli, kɛ kojoli. Mo susu amaniɛ bɔmihi nɛ kɔɔ nyagba nɛ ɔ ekomɛ a he ɔ he nɛ o hyɛ.

  • AFRIKA: Ngɛ jeha 2013 ɔ mi ɔ, a tsɔɔ kaa ma nikɔtɔmahi maa pee 22,000 nɛ a ngɛ South Africa a yi anɔkuale.

  • AMERIKA WOYI JE: Ngɛ jeha 2012 ɔ mi ɔ, a wo nihi 25 tsu ngɛ Brazil akɛnɛ a ngɔ ma a sika kɛ ha ni kpahi konɛ a fĩ a ma kudɔmi kuu ɔ se ɔ he je. Nihi nɛ a wo mɛ tsuɔ a kpɛti nɔ kake ji ma nɔ yelɔ momo ɔ se yelɔ.

  • ASIA: Ngɛ jeha 1995 ɔ mi ɔ, tsuapo ko hule ngɛ Seoul ngɛ South Korea, nɛ e gbe nihi 502. Níhi a mi hlali yɔse kaa nihi nɛ a ma tsuapo ɔ ha ma nikɔtɔmahi nyɔ mi ní, lɔ ɔ he ɔ, a ngmɛ mɛ blɔ nɛ a kɛ níhi nɛ hí ma tsu ɔ, nɛ a kɛ tsu mami he mlaahi nɛ kɔɔ he piɛ pomi he ɔ tsu we ní.

  • EUROPA: Kuu nɛ ji European Commission Home Affairs ɔ nya dalɔ Cecilia Malmström ɔ de ke, “Bɔ nɛ anɔkuale nɛ a yi ngɛ Europa a ngɛ nɔ yae ha a ngɛ nyakpɛ.” E de hu ke, “Ma kudɔli nyɛ we nɛ a ye si nɛ a wo kaa a maa po anɔkuale nɛ a yi se kulaa a nɔ.”

Anɔkuale nɛ a yi ngɛ nɔ yemi mi ɔ he si wawɛɛ. Ní lelɔ ko nɛ a tsɛɛ lɛ ke Susan Rose-Ackerman, nɛ e kase bɔ nɛ a tsiɔ anɔkuale nɛ a yi nya a ngma kaa, loko a ma nyɛ ma tsu nyagba nɛ ɔ he ní ɔ, e he maa hia nɛ a pee “tsakemihi ngɛ bɔ nɛ nɔ yemi ɔ toɔ e ní tsumihi a he blɔ nya ha a he.” E ngɛ kaa nɔ́ nɛ wa be nɔ yemi ko náe nɛ yeɔ anɔkuale kɔkɔɔkɔ, se Baiblo ɔ ha nɛ wa na kaa nɔ yemi nɛ yeɔ anɔkuale maa ba.