Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  August 2014

Blɔhi A Nɔ Nɛ Yehowa Guɔ Kɛ Hɛɛ Lɛ Kɛ Suɔ Wa He

Blɔhi A Nɔ Nɛ Yehowa Guɔ Kɛ Hɛɛ Lɛ Kɛ Suɔ Wa He

“Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.”YAK. 4:8.

1. Mɛni adesahi suɔ nɛ a pee? Mɛnɔ nɛ e sa kaa wa ha nɛ huɛ bɔmi gbagbanii nɛ hi waa kɛ lɛ wa kpɛti pe kulaa?

ADESAHI suɔ nɛ a hɛ mɛ kɛ su a sibi a he. Ke ni komɛ “le a sibi wawɛɛ nɛ a suɔ a sibi ɔ, wa deɔ ke a su a sibi a he wawɛɛ.” Ke wa na kaa wa weku mi bimɛ suɔ wɔ, nɛ a peeɔ wa he akɔtaa, nɛ a nuɔ wɔ sisi ɔ, lɔ ɔ haa nɛ wa bua jɔɔ. Se nɔ nɛ e sa kaa wa ha nɛ huɛ bɔmi gbagbanii nɛ hi waa kɛ lɛ wa kpɛti pe kulaa ji, Yehowa nɛ ji wa Bɔlɔ ɔ.Fiɛlɔ 12:1.

2. Mɛni si Yehowa wo wɔ? Mɛni he je nɛ nihi fuu he we si womi nɛ ɔ yi ɔ?

2 Yehowa suɔ kaa waa kɛ lɛ nɛ bɔ huɛ. E wo wɔ si kaa ke ‘wa hɛ wɔ kɛ su e he ɔ,’ lɛ hu e maa ‘hɛ lɛ kɛ su wa he.’ (Yak. 4:8) E sa nɛ enɛ ɔ nɛ ha nɛ wa bua nɛ jɔ! Se nihi babauu he we yi kaa Mawu suɔ kaa e maa hɛ lɛ kɛ su a he. A susu kaa a sɛ ngɛ Mawu hɛ mi, nɛ a kɛ Mawu a kpɛti kɛ. Anɛ adesahi ma nyɛ maa hɛ mɛ kɛ su Mawu he lo?

3. Mɛni Ngmami ɔ de ngɛ Yehowa he?

3 Se Yehowa kɛ nɔ ‘tsuaa nɔ nɛ ngɛ e se blɔ hlae ɔ a kpɛti kɛ we.’ (Kane Bɔfo Ɔmɛ A Ní Tsumi 17:26, 27; La 145:18.) E ngɛ mi kaa wa yi mluku mohu lɛɛ, se Yehowa pee klaalo kaa e kɛ wɔ maa bɔ huɛ gbagbanii. (Yes. 41:8; 55:6) La  polɔ ɔ kɛ Yehowa bɔ huɛ, enɛ ɔ he ɔ, e de ke: ‘Mo pɛ lɛ o buɔ kue fami tue. O ngɔ adesahi tsuo maa ba, A gbaa nɔ tsuaa nɔ nɛ mo nitsɛ o hla lɛ, nɛ o ngɔ lɛ kɛ ba o we ɔ.’ (La 65:2, 4) Yuda Matsɛ Asa ná enɛ ɔ mi níhi a si kpami. Nyɛ ha nɛ wa susu bɔ nɛ e hɛ lɛ kɛ su Mawu he, nɛ Mawu hu hɛ lɛ kɛ su e he ɔ he nɛ waa hyɛ. *

MOO KASE NÍ KƐ JE NƆ́ NƐ ASA PEE Ɔ MI

4. Mɛni nɔ hyɛmi nɔ nɛ Matsɛ Asa pee kɛ ha Yuda bi ɔmɛ?

4 Matsɛ Asa kɛ kã ja Yehowa Mawu. Benɛ a wo lɛ matsɛ ɔ, jamɛ a be ɔ mi ɔ, yaholi kɛ wɔ jali hiɛ ngɛ ma a mi wawɛɛ nitsɛ. Se Asa bu Yehowa tue, nɛ e gu jamɛ a ní peepee yaya amɛ tsuo. (1 Ma. 15:9-13) Akɛnɛ Asa hɛ lɛ kɛ su Yehowa he, nɛ e ye Yehowa mlaa amɛ a nɔ he je ɔ, e nyɛ nɛ e de ma bi ɔmɛ kaa ‘a pee Yehowa, a nɛmɛ a Mawu ɔ suɔmi nya ní, nɛ a ye e tsɔɔmi ɔmɛ, kɛ e mlaa amɛ a nɔ.’ Enɛ ɔ he ɔ, Yehowa ha nɛ tue mi jɔmi hi ma a mi ngɛ Asa tsɛ yemi ɔ kekleekle jeha nyɔngma a mi. Asa le kaa Yehowa lɛ ha nɛ tue mi jɔmi ngɛ ma a mi ɔ nɛ. Enɛ ɔ he ɔ, e de Yuda bi ɔmɛ ke: ‘Zugba a fɔɔ si ha wɔ, ejakaa wa pee Yehowa, wa Mawu ɔ suɔmi nya ní. Yehowa ha wɔ he jɔmi, kɛ tue mi jɔmi ngɛ he tsuaa he kɛ bɔle si.’ (2 Kron. 14:1-7) Mɛni ba ngɛ lɔ ɔ se.

5. Mɛni si himi Asa kɛ kpe? Mɛni e pee kɛ tsɔɔ kaa e kɛ e hɛ fɔ Mawu nɔ, nɛ mɛni je mi kɛ ba?

5 Ngɔɔ lɛ kaa mo ji Matsɛ Asa, nɛ Etiopia nɔ ko nɛ a tsɛɛ lɛ Zera a nyɛɛ nyumuhi 1,000,000 kɛ ta zugba lɛhi 300 a hɛ mi kɛ ba tua o ma a. (2 Kron. 14:8-10) Ke o na ta buli babauu jã a, kɛ o maa pee o ni ha kɛɛ? O ta buli ɔmɛ a yibɔ ji 580,000 pɛ! He nyɛli ɔmɛ a he hiɛ kulaa pe o ta buli ɔmɛ. Anɛ o ma bi si ke, mɛni he je nɛ Mawu ngmɛ ta buli babauu kaa jã blɔ nɛ a ba tua o ma a lo? Anɛ o kɛ o hɛ maa fɔ nɔ́ nɛ mo nitsɛ o susu kaa o le ɔ nɔ lo? Aloo o kɛ o hɛ maa fɔ Yehowa nɔ konɛ e po nyɛ he piɛɛ? Asa tsɔɔ heii kaa huɛ bɔmi gbagbanii ngɛ e kɛ Yehowa a kpɛti, nɛ e he Yehowa ye kɛ pi si. Asa sɔle kɛ ha Yehowa ke: ‘Yehowa lee, mo nɛ o piɛɔ nihi nɛ a he wa, kɛ ni nɛmɛ nɛ a he wɛ tsuo a he! Yehowa, wa Mawu, moo piɛɛ wa he koo!’ Kɛ Yehowa ha Asa sɔlemi ɔ heto ha kɛɛ? ‘Yehowa ye Etiopia tabo ɔ nɔ kunimi.’ A ti nɔ kake ngmelu po yi e he.2 Kron. 14:11-13.

6. Mɛni wa ma nyɛ maa kase ngɛ Asa he?

6 Mɛni ha nɛ Asa ná hɛ kɛ nɔ fɔmi nɛ mi wa ngɛ Mawu mi kaa e maa po e he piɛ, nɛ e maa tsɔɔ lɛ blɔ ɔ? Baiblo ɔ tsɔɔ kaa ‘Asa pee Yehowa suɔmi nya ní,’ nɛ ‘e nyɛɛ Yehowa se kɛ pi si.’ (1 Ma. 15:11, 14) E sa nɛ wɔ hu waa pee Yehowa suɔmi nya ní kɛ pi si, konɛ waa hɛ wɔ kɛ su e he amlɔ nɛ ɔ, nɛ waa hi e kasa nya daa. Wa bua jɔ wawɛɛ kaa Yehowa suɔ kaa huɛ bɔmi kpakpa nɛ hi waa kɛ lɛ wa kpɛti. Nyɛ ha nɛ wa susu blɔ enyɔ komɛ a nɔ nɛ Mawu guu kɛ gblaa wɔ kɛ suɔ e he ɔ he nɛ waa hyɛ.

YEHOWA GUU KPƆMI NƆ́ Ɔ NƆ KƐ GBLAA WƆ KƐ SUƆ E HE

7. (a) Mɛni Yehowa pee konɛ e kɛ gbla wɔ kɛ su e he? (b) Mɛni ji blɔ titli nɛ Yehowa guɔ nɔ kɛ hɛɛ wɔ kɛ suɔ e he?

7 Zugba a nɛ Yehowa bɔ ha wɔ nɛ e nɔ ngɛ fɛu ɔ tsɔɔ kaa e suɔ wɔ. E tsɔɔ hu kaa e suɔ wɔ kɛ gu wa he nɛ e buɔ daa a nɔ. (Níts. 17:28; Kpoj. 4:11) Nɔ́ nɛ he hia pe kulaa a, Yehowa haa wɔ wa  mumi mi hiami níhi. (Luka 12:42) E wo wɔ si kaa ke wa sɔle kɛ ha lɛ ɔ, e maa bu tue. (1 Yoh. 5:14) Se kpɔmi nɔ́ ɔ ji blɔ titli nɛ Yehowa guu nɔ kɛ hɛɛ wɔ kɛ suɔ e he. (Kane 1 Yohane 4:9, 10, 19.) Yehowa tsɔ e “Bi kake” ɔ nɛ e ngɔ e wami kɛ ba sã afɔle ngɛ wa he konɛ e je wɔ kɛ je yayami kɛ gbenɔ dɛ mi.Yoh. 3:16.

8, 9. Mɛni Yesu tsuɔ kɛ fĩɔ Yehowa yi mi tomihi a se?

8 Yehowa to blɔ nya kaa nihi nɛ a gbo loko Kristo ba a hu nɛ a ná kpɔmi nɔ́ ɔ he se. Mɛni blɔ nɔ e gu kɛ pee jã? Benɛ Yehowa gba kɛ fɔ si kaa Yi Wami Helɔ ko maa ba a, ngɛ e hɛ mi ɔ, e ngɛ kaa nɔ́ nɛ jamɛ a Yi Wami Helɔ ɔ ba momo. E le kaa e yi mi nɛ e to ngɛ adesahi a he ɔ, maa ba mi kokooko. (1 Mose 3:15) Jeha lafa komɛ a se ɔ, bɔfo Paulo na Mawu si kaa e ‘gu Kristo Yesu nɔ kɛ ha nɛ wa ye wa he.’ Paulo de hu ke: ‘Mawu to e tsui si ha nimli tsuo, nɛ e ku e hɛ ngɔ fɔ a he yayami ɔmɛ a nɔ.’ (Rom. 3:21-26) Enɛ ɔ he ɔ, wa be nyɛe ma si Yesu nɛ waa hɛ wɔ kɛ su Mawu he kɔkɔɔkɔ!

9 Yesu nɔ pɛ nɛ nihi nɛ a baa a he si ɔ ma nyɛ maa gu kɛ hɛ mɛ kɛ su Yehowa he. Mɛni Ngmami ɔ de ngɛ enɛ ɔ he? Paulo ngma ke: “Se suɔmi kpetekpleenyɛ nɛ Mawu je kpo ji nɛ ɔ nɛ, kaa be nɛ wa ji yayami peeli ɔ, jamɛ a be ɔ Kristo ba gbo ngɛ wa he.” (Rom. 5:6-8) Suɔmi nɛ Mawu ngɛ kɛ ha wɔ ɔ he je nɛ e ha wɔ kpɔmi nɔ́ ɔ nɛ, se tsa pi kaa wa sa. Yesu de ke: ‘Nɔ ko nɔ ko be nyɛe maa ba ye ngɔ kaa ja Tsɛ ɔ nɛ tsɔ mi ɔ gbla lɛ kɛ ba ye ngɔ.’ Yesu de hu ke: “Nɔ ko nɔ ko yɛ Tsɛ ɔ ngɔ kaa ja e gu ye nɔ.” (Yoh. 6:44; 14:6) Yehowa guu e mumi klɔuklɔu ɔ kɛ Yesu nɔ kɛ gblaa nihi kɛ baa e ngɔ. E yeɔ bua mɛ konɛ huɛ bɔmi kpakpa nɛ hi e kɛ mɛ a kpɛti, nɛ́ a ná neneene wami. (Kane Yuda 20, 21.) Nyɛ ha nɛ wa susu blɔ kpa ko hu nɛ Yehowa guu nɔ kɛ hɛɛ wɔ kɛ suu e he ɔ he nɛ waa hyɛ.

YEHOWA GUU BAIBLO Ɔ NƆ KƐ GBLAA WƆ KƐ SUƆ E HE

10. Mɛni wa kaseɔ ngɛ Baiblo ɔ mi nɛ lɔ ɔ haa nɛ wa hɛɛ wɔ kɛ suu Mawu he?

10 Kɛ ba si amlɔ nɛ ɔ, wa susu Baiblo ngmamihi kakaaka 14 ngɛ Baiblo womi ekpaekpahi a mi ɔ he. Kaa tsa pi Baiblo ɔ he ɔ, jinɛ wa ko li kaa wa ma nyɛ maa hɛ wɔ kɛ su wa Bɔlɔ ɔ he. Ke pi Baiblo ɔ he ɔ, jinɛ wa ko li kaa wa ma nyɛ maa gu kpɔmi nɔ́ ɔ kɛ Yesu nɔ kɛ hɛ wɔ kɛ su Yehowa he gblee. Baiblo ɔ nɛ haa nɛ wa leɔ Yehowa su kpakpahi kɛ e yi mi nɛ e to ngɛ adesahi a he. Kaa nɔ hyɛmi nɔ́ ɔ, Yehowa tsɔɔ ngɛ 2 Mose 34:6, 7 ɔ kaa e ji ‘Mawu mɔbɔ nalɔ, kɛ dloolɔ, e mi mi fu we mla, nɛ e suɔmi kɛ anɔkuale yemi hiɛ babauu. E yeɔ e si womi nɔ kɛ haa nimli akpeakpe, nɛ e ngɔɔ a he yayami kɛ tɔmi ngɔ paa mɛ.’ Mɛnɔ nɛ e be lɛ hɛe kɛ su Mawu ko kaa kikɛ he? Yehowa le kaa ke wa kase e he ní fuu ngɛ Baiblo ɔ mi ɔ, wa maa le lɛ wawɛɛ, nɛ lɔ ɔ ma ha nɛ wa maa hɛ wɔ kɛ su e he.

11. Mɛni he je nɛ e sa nɛ waa bɔ mɔde nɛ waa kase Mawu su ɔmɛ a he ní ɔ? (Moo hyɛ foni nɛ ngɛ ni kasemi ɔ sisije ɔ.)

11 A tsɔɔ ngɛ nya blimi munyu nɛ ngɛ Draw Close to Jehovah womi ɔ mi ɔ ke: “Ke waa kɛ nɔ ko bɔ gbagbanii ɔ, wa leɔ lɛ saminya, nɛ wa bua jɔɔ bɔ nɛ e peeɔ e ní ha a he. Enɛ ɔ he ɔ, e he hia nɛ waa kase Mawu suhi nɛ a ngma kɛ wo Baiblo ɔ mi ɔ.” E sa nɛ wa bua nɛ jɔ wawɛɛ kaa Yehowa ha nɛ a ngma Baiblo ɔ kɛ ha wɔ konɛ ke wa kane ɔ, waa nu sisi!

12. Mɛni he je Yehowa ha nɛ adesahi ngma Baiblo ɔ?

12 Jinɛ Yehowa ma nyɛ ma ha nɛ hiɔwe  bɔfohi nɛ a ngma Baiblo ɔ. Bɔfo ɔmɛ nitsɛmɛ po a bua jɔ adesahi a he, nɛ a suɔ nɛ a le níhi nɛ yaa nɔ ngɛ adesahi a si himi mi. (1 Pet. 1:12) Atsinyɛ jemi ko be he kaa jinɛ a ko nyɛ ngma Mawu sɛ gbi ɔ kɛ ha wɔ. Se bɔfohi be kaa adesahi. E slo bɔ nɛ mɛɛ a nuɔ nɔ́ he ha, nɛ e slo bɔ nɛ adesahi hu nuɔ nɔ́ he ha. Mɛɛ a ye mluku, se adesahi lɛɛ a yi mluku. Enɛ ɔ he ɔ, níhi nɛ hia mɛ ɔ, pi lɔ ɔ nɛ hia adesahi. Yehowa le kaa bɔfo ɔmɛ be nyɛe maa ngma Baiblo ɔ kɛ ha wɔ nɛ waa nu sisi. Akɛnɛ Yehowa ha nɛ adesahi ngma Baiblo ɔ he je ɔ, ke wa kane ɔ, e sɛɛ wa tsui mi. Ke wa kane nɔ́ ko kɛ kɔ bɔ nɛ Baiblo ngmalɔ ko aloo nɔ ko nɛ a tu e he munyu ngɛ Baiblo ɔ mi ɔ hao, aloo e ye gbeye, aloo e tɔ̃, aloo nɔ́ yeyee ko pee lɛ, aloo e bua jɔ he ɔ, wa nuɔ sisi saminya. Kaa bɔ nɛ e ji ngɛ Eliya blɔ fa mi ɔ, Baiblo ngmali ɔmɛ tsuo hu ‘nimli adesahi ji mɛ kaa wɔ nɔuu.’Yak. 5:17.

Mɛni he je nɛ o bua jɔ bɔ nɛ Yehowa kɛ Yona kɛ Petro hi si ha a he? (Hyɛ kuku 13, 15)

13. Kɛ Yona sɔlemi ɔ ha nuɔ he ha kɛɛ?

13 Kaa nɔ hyɛmi nɔ́ ɔ, Mawu ngɔ ní tsumi nɛ he hia kɛ wo Yona dɛ, se Yona tu nya fo. Mawu ha nɛ Yona nitsɛ ngma bɔ nɛ e pee lɛ ha a kɛ fɔ si. Ke bɔfo ko nɛ ngma Yona sane nɛ ɔ, jinɛ e ko nyɛ we nɛ e ko tsɔɔ níhi a mi fitsofitso jã. E hi wawɛɛ kaa Yehowa ha nɛ Yona nitsɛ ngma e he sane, kɛ sɔlemi nɛ e sɔle ngɛ wo ɔ sisi kɛ ha Mawu ɔ kɛ fɔ si! Yona de ke: ‘Benɛ ye mumi ɔ ngɛ ye mi jee ɔ, i fa kue ha mo Yehowa ngɛ o we klɔuklɔu ɔ, nɛ o bu mi tue.’Yona 1:3, 10; 2:1-9.

14. Mɛni he je nɛ o ma nyɛ maa nu nɔ́ nɛ Yesaya ngma ngɛ lɛ nitsɛ e he ɔ sisi ɔ?

14 Mo susu nɔ́ nɛ Yehowa ha nɛ Yesaya ngma ngɛ lɛ nitsɛ e he ɔ hu he nɛ o hyɛ. Benɛ Yesaya na Mawu hɛ mi  nyami ɔ ngɛ nina ko mi ɔ, e yɔse kaa e ji yayami peelɔ. Enɛ ɔ he ɔ, e de ke: ‘Akuanyɛ! Ye yi ta pɛ! Ejakaa i na matsɛ ɔ nɛ ji Yehowa Tabohiatsɛ ɔ! Ye nya mi munyu he tsɔ we; nɛ nimli nɛ i ngɛ a kpɛti ɔ, mɛ hu a nya mi munyu he tsɔ we jã nɔuu!’ (Yes. 6:5) Bɔfo te nɛɛ ma de nɔ́ nɛ Yesaya de nɛ ɔ? Se Yesaya nyɛ nɛ e de jã, nɛ wa nu lɛ sisi, ejakaa e yi mluku kaa wɔ nɔuu.

15, 16. (a) Mɛni he je nɛ ke adesa ko hao aloo e ye gbeye ɔ, wa nuɔ lɛ sisi ɔ? Mo ha enɛ ɔ he nɔ hyɛmi níhi. (b) Mɛni maa ye bua wɔ konɛ wa nyɛ nɛ waa hɛ wɔ kɛ su Yehowa he haa?

15 Anɛ bɔfo ko ma nyɛ ma de ke ‘e sɛ,’ kaa bɔ nɛ Yakob de ɔ lo? Aloo bɔfo ko ma nyɛ ma de ke e ji ‘yayami peelɔ’ kaa bɔ nɛ Petro hu de ɔ lo? (1 Mose 32:10; Luka 5:8) Anɛ “sawale” ma nyɛ maa nu bɔfohi kaa bɔ nɛ sawale nu Yesu kaseli ɔmɛ ɔ lo? Anɛ nɔ ko ma nyɛ maa te si kɛ wo bɔfohi, nɛ lɔ ɔ ma bi nɛ ‘Mawu nɛ wo mɛ kã’ nɛ a kɛ fiɛɛ sane kpakpa a kaa bɔ nɛ e ji ngɛ Paulo kɛ ni kpahi a blɔ fa mi ɔ lo? (Yoh. 6:19; 1 Tes. 2:2) Ohoo, e be nyɛe maa ba jã ngɛ bɔfohi a blɔ fa mi, ejakaa a ye mluku nɛ a nɔ hu kuɔ pe adesahi. Se ke adesahi nɛ a yi mluku ɔ pee a ní jã a, wa nuɔ mɛ sisi, ejakaa wɔ hu wa ji adesahi. Ngɛ anɔkuale mi ɔ, ke wa ngɛ Mawu Munyu ɔ kanee ɔ, waa kɛ ‘nihi nɛ ngɛ nyae ɔ, nyaa, nɛ nihi nɛ ngɛ ya foe ɔ, waa kɛ mɛ foɔ.’Rom. 12:15.

16 Ke wa susu bɔ nɛ Yehowa kɛ e sɔmɔli anɔkualetsɛmɛ nɛ a hi si blema a hi si ha a he ɔ, lɔ ɔ ma ha nɛ wa maa le níhi fuu ngɛ Mawu he. E jeɔ suɔmi mi nɛ e hɛɛ lɛ kɛ suu adesahi nɛ a yi mluku ɔ a he, nɛ e toɔ e tsui si haa mɛ. Ke wa le Yehowa saminya, nɛ wa ná suɔmi nɛ mi wa ha lɛ ɔ, lɔ ɔ ma ha nɛ wa maa hɛ wɔ kɛ su e he haa.Kane La 25:14.

O KƐ MAWU NƐ BƆ GBAGBANII

17. (a) Mɛni ga womi kpakpa nɛ Azaria kɛ ha Asa? (b) Mɛni Asa pee nɛ tsɔɔ kaa e kɛ Azaria ga womi ɔ tsu we ní, nɛ mɛni je mi kɛ ba?

17 Benɛ Matsɛ Asa ye Etiopia ta buli ɔmɛ a nɔ kunimi ɔ, Mawu gbalɔ Azaria tu Asa kɛ Yuda bi ɔmɛ nile munyu ko. Azaria de mɛ ke: ‘Be abɔ nɛ nyɛ pɛtɛ Yehowa he nɛ ɔ, lɛ hu e kɛ nyɛ ngɛ. Ke nyɛ hla e se blɔ ɔ, e ma ha nɛ nyɛɛ na lɛ. Se ke nyɛ kpale ngɛ e se ɔ, lɛ hu e ma kua nyɛ.’ (2 Kron. 15:1, 2) Se pee se ɔ, Asa kɛ ga womi kpakpa nɛ ɔ tsu we ní. Benɛ Israel yiti je matsɛ yemi ɔ ba wo e he gbeye ɔ, Asa ya hla yemi kɛ buami se blɔ kɛ je Siria bi ɔmɛ a ngɔ. E hla we yemi kɛ buami kɛ ji Yehowa ngɔ kaa bɔ nɛ e pee be ko nɛ be ɔ. E ya hla yemi kɛ buami kɛ je wɔ jali mohu a ngɔ. E da blɔ kaa Yehowa de Asa ke: “O je kuasia. Lɔ ɔ he ɔ, kɛ je mwɔnɛ ɔ kɛ yaa a, ta maa nyɛɛ o se daa nɛ.” Jã ji bɔ nɛ e ba Asa nɔ. (2 Kron. 16:1-9) Mɛni wa ma nyɛ maa kase ngɛ munyu nɛ ɔ mi?

18, 19. (a) Ke wa ha nɛ blɔ ba waa kɛ Mawu wa kpɛti ɔ, mɛni e sa kaa waa pee? (b) Kɛ wa ma plɛ kɛ hɛ wɔ kɛ su Yehowa he ha kɛɛ?

18 E sɛ nɛ waa hɛ wɔ kɛ je Yehowa he kɔkɔɔkɔ. Ke wa ha nɛ blɔ ba waa kɛ Yehowa wa kpɛti ɔ, lɛɛ e sa nɛ waa pee kaa bɔ nɛ Hosea 12:6 de wɔ ɔ. E de ke: “Nyɛɛ kpale kɛ ba e ngɔ. Nyɛɛ suɔ lɛ anɔkuale mi, nɛ́ nyɛɛ ye dami sane. Nyɛɛ to nyɛ tsui si, nɛ́ nyɛɛ hyɛ nyɛ Mawu ɔ blɔ.” Ke wa susuɔ kpɔmi nɔ́ ɔ he, nɛ wa kaseɔ Baiblo ɔ saminya a, wa ma nyɛ maa hɛ wɔ kɛ su Yehowa he haa.Kane 5 Mose 13:4.

19 La polɔ ɔ ngma ke: “E hi kaa ma hɛ kɛ su Mawu he.” (La 73:28) Nyɛ ha nɛ wɔ tsuo waa kase ní ehehi ngɛ Yehowa he, konɛ wa ná suɔmi nɛ mi kuɔ kɛ ha lɛ. Ke wa hɛ wɔ kɛ su Yehowa he ɔ, lɛ hu e maa hɛ lɛ kɛ su wa he amlɔ nɛ ɔ, nɛ e maa hi wa kasa nya kɛ ya neneene!

^ kk. 3 Moo kane Asa he munyu nɛ ji, “There Exists a Reward for Your Activity,” nɛ je kpo ngɛ August 15, 2012 Blɛfo gbi Hwɔɔmi Mɔ ɔ mi ɔ.