Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  August 2014

Anɛ O Nine Suɔ ‘Nya Mi Ngma Nɔ Ngɛ Be Nɛ Sa Mi’ Lo?

Anɛ O Nine Suɔ ‘Nya Mi Ngma Nɔ Ngɛ Be Nɛ Sa Mi’ Lo?

BE NƐ wa ngɛ mi nɛ ɔ mi wa wawɛɛ pe behi tsuo nɛ be ɔ. (2 Tim. 3:1-5) Daa ligbi ɔ, waa kɛ kahi kpeɔ nɛ ma nyɛ ma ha nɛ wa gbo Yehowa nɔ tue, aloo suɔmi nɛ wa ngɛ ha lɛ ɔ nɛ ba si. Yesu le kaa níhi a mi maa wa ngɛ wa be nɛ ɔ mi. Enɛ ɔ he ɔ, e wo e se nyɛɛli ɔmɛ si kaa e maa ye bua mɛ konɛ a nyɛ nɛ a da haomihi nɛ a kɛ maa kpe ɔ nya kɛ ya su nyagbe. (Mat. 24:3, 13; 28:20) Yesu hla tsɔlɔ anɔkualetsɛ ko konɛ e ha e se nyɛɛli ɔmɛ “a nya mi ngma ngɛ be nɛ sa mi.”Mat. 24:45, 46.

E hla tsɔlɔ anɔkualetsɛ nɛ ɔ ngɛ jeha 1919 ɔ mi. Kɛ je jamɛ a be ɔ mi kɛ ma nɛ ɔ, ‘tsɔli kpahi’ ayɔhi abɔ nɛ a tuɔ gbi slɔɔtoslɔɔtohi ba piɛɛ Mawu we bi a he. Tsɔlɔ anɔkualetsɛ ɔ ngɛ mɛ Mawu he ní tsɔɔe. (Mat. 24:14; Kpoj. 22:17) Se tsa pi Baiblo kasemi womihi nɛ a peeɔ ɔ tsuo nɛ ngɛ gbi tsuaa gbi mi. Nɛ tsa pi nɔ tsuaa nɔ nɛ e nine suɔ wa womihi a nɔ ngɛ Intanɛti ɔ hu nɔ. Kaa nɔ hyɛmi nɔ́ ɔ, nihi fuu nyɛ we nɛ a hyɛ video aloo níhi nɛ a peeɔ kɛ fɔɔ Intanɛti ɔ nɔ ngɛ jw.org ɔ. Anɛ enɛ ɔ tsɔɔ kaa nihi kaa jã a a nine sui niye ní nɛ ma ha nɛ a hemi kɛ yemi ɔ mi maa wa a nɔ lo? Bɔ nɛ pee nɛ wa nyɛ nɛ wa ha sane bimi nɛ ɔ heto ɔ, nyɛ ha wa susu sane bimi eywiɛ nɛ nyɛɛ se nɛ ɔ a he nɛ waa hyɛ.

 1. Mɛni ji nɔ́ titli nɛ a kɛ hooɔ niye ní nɛ Yehowa haa wɔ ɔ?

Benɛ Satan ka Yesu kaa e ha nɛ tɛ nɛ plɛ pee abolo ɔ, Yesu de lɛ ke: “Pi abolo kɛkɛ nɛ haa nɔmlɔ yi naa wami, se mohu munyu tsuaa munyu nɛ jee Mawu nya a.” (Mat. 4:3, 4) Yehowa nya mi munyu ɔmɛ ngɛ Baiblo ɔ mi. (2 Pet. 1:20, 21) Lɔ ɔ he ɔ, Baiblo ɔ ji nɔ́ titli nɛ a kɛ a hooɔ mumi niye ní ɔ nɛ.2 Tim. 3:16, 17.

Yehowa asafo ɔ pee New World Translation of the Holy Scriptures mluku ɔ, aloo e fã ko ngɛ gbihi nɛ hiɛ pe 120 mi. Daa jeha a, a peeɔ eko ngɛ gbi ekpahi a mi kɛ piɛɛ he. Ngɛ New World Translation Baiblo ɔ se ɔ, a pee Baiblo kpahi ayɔ akpehi abɔ ngɛ gbihi akpehi abɔ a mi. Ngɛ anɔkuale mi ɔ, enɛ ɔ tsɔɔ kaa Yehowa suɔ nɛ “nimli tsuo nɛ a le anɔkuale ɔ konɛ a he a yi wami.” (1 Tim. 2:3, 4) Akɛnɛ Yehowa le adesahi tsuo a tsui mi he je ɔ, wa ngɛ nɔ mi mami kaa e maa gbla nihi nɛ a le kaa “mumi ohiatsɛmɛ ji mɛ” ɔ kɛ ba e we asafo ɔ mi, konɛ e ha mɛ mumi niye ní.Heb. 4:13; Mat. 5:3, 6; Yoh. 6:44; 10:14.

2. Mɛni wa womi ɔmɛ hu tsuɔ ngɛ niye ní nɛ Yehowa haa wɔ ɔ mi?

Loko nɔ ko hemi kɛ yemi mi maa wa a, e biɔ nɛ e kane Baiblo ɔ nɛ e nu sisi, konɛ e kɛ tsu ní. (Yak. 1:22-25) Ngɛ kaseli ɔmɛ a be ɔ mi ɔ, Etiopia nyumu ko pee jã. Sane kpakpa fiɛɛlɔ Filipo nu nɛ nyumu nɛ ɔ ngɛ Mawu Munyu ɔ kanee. Filipo bi lɛ ke: ‘Nɔ́ nɛ o ngɛ kanee ɔ, anɛ o ngɛ sisi nue lo?’ Nyumu ɔ he nɔ ke: “Kɛ ma pee kɛɛ nɛ ma nu sisi kaa ja nɔ ko tsɔɔ mi?” (Níts. 8:26-31) Filipo ye bua nyumu ɔ nɛ e nu Mawu Munyu ɔ sisi. Nyumu ɔ bua jɔ nɔ́ nɛ e kase ɔ he wawɛɛ nitsɛ, nɛ e ha nɛ a baptisi lɛ. (Níts. 8:32-38) Jã kɛ̃ nɛ wa Baiblo kasemi womi ɔmɛ yeɔ bua wɔ nɛ wa nuɔ anɔkuale ɔ sisi fitsofitso. Womi nɛ ɔmɛ nɛ wa kaneɔ ɔ haa nɛ Baiblo ɔ mi anɔkuale ɔ sɛɛ wa tsui mi nɛ waa kɛ tsuɔ ní.Kol. 1:9, 10.

Tsɔlɔ anɔkualetsɛ ɔ guɔ wa womi ɔmɛ a nɔ kɛ haa wɔ mumi niye ní kpakpa nɛ wa yeɔ, kɛ nyu kpakpa hu nɛ wa nuɔ. (Yes. 65:13) Kaa nɔ hyɛmi nɔ́ ɔ, a peeɔ Hwɔɔmi Mɔ ɔ ngɛ gbihi nɛ hyɛ pe 210 mi. Hwɔɔmi Mɔ ɔ haa nɛ wa nuɔ gbamihi a sisi, e yeɔ bua wɔ nɛ wa nuɔ Baiblo mi anɔkualehi nɛ a mi kuɔ ɔ a sisi, nɛ e woɔ wɔ he wami nɛ waa kɛ Baiblo sisi tomi mlaahi tsuɔ ní. A pee Awake! womi tɛtlɛɛ ɔ hu ngɛ gbihi maa pee 100 mi. Womi tɛtlɛɛ nɛ ɔ yeɔ bua wɔ nɛ wa kaseɔ Yehowa adebɔ níhi nɛ a ngɛ fɛu ɔ a he ní, nɛ e tsɔɔ wɔ se nɛ wa ma ná ke waa kɛ Baiblo ga womihi tsuɔ ní. (Abɛ 3:21-23; Rom. 1:20) Tsɔlɔ anɔkualetsɛ ɔ, peeɔ Baiblo kasemi womihi ngɛ gbihi nɛ hiɛ pe 680 mi! Anɛ o kaneɔ Baiblo ɔ daa ligbi lo? Daa jeha a, a peeɔ womi tɛtlɛɛ kɛ Baiblo kasemi womi ehehi. Anɛ o kaneɔ womihi nɛ a peeɔ ngɛ o je gbi ɔ mi ɔ lo?

Yehowa asafo ɔ peeɔ munyu tumi he womihi hulɔ. A daa jamɛ a womi ɔmɛ a nɔ kɛ tuɔ munyu ngɛ asafo mi kpehi, kpɔ mi kpehi, kɛ kpokpa nɔ kpehi a sisi. Anɛ o bua jɔɔ munyuhi, dramahi, peemi kɛ tsɔɔ slɔɔtohi, kɛ munyu bimihi nɛ yaa nɔ ngɛ kpe nɛ ɔmɛ a sisi ɔ he lo? Ngɛ anɔkuale mi ɔ, Yehowa ngɛ wɔ mumi niye ní kpɛ̃kpɛ̃ɛkpɛ̃ hae!Yes. 25:6.

 3. Ke o be asafo ɔ womi ɔmɛ tsuo ngɛ o je gbi ɔ mi ɔ, anɛ mumi mi hwɔ maa gbe mo lo?

Ohoo, mumi mi hwɔ be mo gbee gblee. E sɛ nɛ e pee wɔ nyakpɛ kaa Yehowa we bi komɛ a nine suɔ mumi niye ní fuu nɔ pe a ti ni komɛ. Mɛni he je? Kaa nɔ hyɛmi nɔ́ ɔ, Yesu bɔfo ɔmɛ a nine su blɔ tsɔɔmihi fuu a nɔ pe kaseli kpa amɛ nɛ a hi si blema a. (Mar. 4:10; 9:35-37) Se ngɛ lɔ ɔ tsuo se po ɔ, mumi hwɔ gbi kaseli kpa amɛ. A nine su niye ní nɛ ma ha nɛ a hemi kɛ yemi ɔ mi maa wa a nɔ.Efe. 4:20-24; 1 Pet. 1:8.

Jehanɛ ɔ, e sa nɛ wa kadi kaa pi níhi tsuo nɛ Yesu de aloo e ba pee ɔ nɛ a ngma kɛ wo Sane Kpakpa amɛ a mi. Bɔfo Yohane ngma ke: “Yesu pee ní kpahi babauu nɛ ke a ngma lɛ tsuo kakaaka a, womihi nɛ a ko ná a, e peeɔ mi kaa a ko ná we a to he ngɛ je ɔ mi.” (Yoh. 21:25) E ngɛ mi kaa Yesu se nyɛɛli nɛ a hi si ngɛ kaseli ɔmɛ a be ɔ mi ɔ, le Yesu he sane fuu pe wɔ mohu lɛɛ, se lɔ ɔ tsɔɔ we kaa mumi hwɔ ngɛ wɔ yee. Yehowa ha nɛ wɔ hu wa le Yesu he ní bɔ nɛ sa konɛ wa nyɛ nɛ waa nyɛɛ e se.1 Pet. 2:21.

Mo susu sɛ womihi nɛ bɔfo ɔmɛ ngma kɛ ya ha asafohi ngɛ kaseli ɔmɛ a be ɔ mi ɔ he nɛ o hyɛ. Kɛ e hí kulaa a, Paulo sɛ womi ɔ kake piɛɛ we Baiblo womi ɔmɛ a he. (Kol. 4:16) Se anɛ lɔ ɔ tsɔɔ kaa mumi niye ní nɛ wa nine suɔ nɔ ɔ sui lo? Ohoo. Yehowa le níhi nɛ ke wa ná a, wa hemi kɛ yemi ɔ mi maa wa, nɛ e haa wɔ jamɛ a ní ɔmɛ.Mat. 6:8.

Yehowa le níhi nɛ ke wa ná a, wa hemi kɛ yemi ɔ mi maa wa, nɛ e haa wɔ jamɛ a ní ɔmɛ

Mwɔnɛ ɔ, Yehowa sɔmɔli komɛ ngɛ nɛ a nine suɔ mumi niye ní fuu nɔ pe Yehowa sɔmɔli kpa komɛ. Anɛ asafo womi ɔmɛ bɔɔ ko pɛ nɛ ngɛ o je gbi ɔ mi lo? Ke jã po ɔ, mo ná nɛ o le kaa Yehowa susuɔ o he. Moo kase womihi nɛ a pee ngɛ o je gbi ɔ mi ɔ. Ke e maa hi hu ɔ, yaa asafo mi kpehi nɛ a peeɔ ngɛ o je gbi ɔ mi. Mo ná nɔ mi mami kaa Yehowa maa ye bua mo konɛ o hemi kɛ yemi ɔ mi nɛ wa.La 1:2; Heb. 10:24, 25.

4. Ke o nine sui níhi nɛ ngɛ Intanɛti ɔ nɔ ngɛ jw.org ɔ nɔ ɔ, anɛ lɔ ɔ tsɔɔ kaa o hemi kɛ yemi ɔ mi be nyɛe maa wa lo?

Waa kɛ wa womi tɛtlɛɛ ɔmɛ, kɛ Baiblo kasemi womi kpahi fɔ Intanɛti ɔ nɔ ngɛ jw.org. Waa kɛ níhi nɛ yeɔ bua nihi kɛ a yihi, nihewi kɛ yihewi nɛ a yi jeha 20 lolo, kɛ jokuɛ tsɔwi hu fɔ Intanɛti ɔ nɔ ngɛ jw.org. Wekuhi ngɔɔ ní nɛ ɔmɛ kɛ peeɔ a Weku Mawu Jami nɛ a náa he se. Waa kɛ kpe klɛdɛɛhi nɛ a peeɔ, kɛ nihi nɛ a gbe Gilead Sukuu ɔ nya a he sanehi hu woɔ Intanɛti ɔ nɔ ngɛ jw.org. Waa kɛ daa jeha kpe nɛ asafo ɔ peeɔ ɔ, kɛ adebɔ mi oslaahi a he amaniɛ bɔmi hu woɔ nɔ. Jehanɛ se hu ɔ, ke Yehowa we bi kɛ ni komɛ ngɛ munyu ko yee ngɛ kojomi he ɔ, waa kɛ lɔ ɔ he amaniɛ bɔmi hu fɔɔ Intanɛti ɔ nɔ ngɛ jw.org. (1 Pet. 5:8, 9) Wa Intanɛti ɔ nɔ ní tsumi he ɔ hu yeɔ bua wɔ ngɛ wa fiɛɛmi ní tsumi ɔ mi wawɛɛ nitsɛ. E ha nɛ nihi nɛ a ngɛ mahi nɛ a tsi wa fiɛɛmi ní tsumi ɔ nya ngɛ a nɔ ɔ ngɛ sane kpakpa nue.

Se ke o nine suɔ níhi nɛ a kɛ fɔ Intanɛti ɔ nɔ ngɛ jw.org ɔ a nɔ jio, o nine sui nɔ jio, o hemi kɛ yemi ɔ mi ma nyɛ maa wa. Tsɔlɔ ɔ bɔɔ mɔde kaa e maa pee womihi fuu konɛ tsɔli kpa amɛ a ti nɔ tsuaa nɔ nɛ ná mumi mi niye ní fuu nɛ e ye. Enɛ ɔ he ɔ, ko susu kaa doo ɔ, e sa nɛ o he klama nɛ ma ha nɛ o nyɛ nɛ o ya Intanɛti ɔ nɔ ngɛ jw.org. Ke nyɛmi ko suɔ kaa e maa fia munyu kpiti ko ngɛ Intanɛti ɔ nɔ kɛ ha nihi nɛ a be Intanɛti ɔ eko ɔ, e ma nyɛ maa pee jã. Se wa hyɛ we blɔ kaa asafohi nɛ a pee jã.

Wa bua jɔ kaa Yesu ngɛ si nɛ e wo kaa e ma ha wɔ mumi niye ní ɔ nɔ yee. Wa ma nyɛ ma ná nɔ mi mami kaa kɛ je piɔ hluu kɛ ya si benɛ je yaya nɛ ɔ nyagbe ɔ maa ba a, Yehowa maa ya nɔ maa ha wɔ wa “nya mi ngma ngɛ be nɛ sa mi.”