Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  August 2014

O Kɛ Mawu Munyu ɔ Nɛ Tsu Ní—Ejakaa E Hɛ Ngɛ!

O Kɛ Mawu Munyu ɔ Nɛ Tsu Ní—Ejakaa E Hɛ Ngɛ!

“Mawu munyu hɛ ngɛ, e ngɛ he wami.”HEB. 4:12.

1, 2. Mɛni ní tsumi Yehowa kɛ wo Mose dɛ, nɛ mɛni nɔ mi mami Yehowa ha lɛ?

NGƆƆ lɛ kaa o da Mawu we bi a nane mi, nɛ o kɛ nɔ yelɔ ko nɛ e nɔ kuɔ wawɛɛ yaa tu munyu. Kɛ o maa nu he ha kɛɛ? Eko ɔ, o maa ye gbeye, nɛ e maa pee mo kaa o kɛ nɔ yelɔ ɔ be nyɛe maa tu munyu. Ke e ba jã a, eko ɔ, o ma bi o he ke, kɛ ma ya tu munyu ɔ ha kɛɛ? Anɛ ma nyɛ ma tu munyu kɛ kã kaa nɔ ko nɛ daa si ngɛ Mawu nane mi lo?

2 Mose kɛ si himi ko kaa kikɛ ɔ kpe. E ji ‘nɔmlɔ nɛ he jɔ pe nimli adesahi tsuo nɛ a ngɛ zugba a nɔ ɔ.’ Yehowa tsɔ lɛ Farao ngɔ ngɛ Egipt konɛ e ya de lɛ nɛ e ngmɛɛ Israel bi ɔmɛ a he. (4 Mose 12:3) Farao ji nɔ ko nɛ e bui nɔ, nɛ e woɔ e he nɔ. (2 Mose 5:1, 2) Se kɛ̃ ɔ, Yehowa suɔ nɛ Mose nɛ ya de Farao konɛ e ngmɛɛ Israel bi nyɔguɛ ayɔhi abɔ nɛ a ngɛ lɛ sɔmɔe ɔ a he! Enɛ ɔ he ɔ, sisi numi ngɛ sane nɛ ɔ nɛ Mose bi Yehowa a he. E bi lɛ ke: “Mɛnɔ ji mi nɛ ma ya Farao ngɔ, nɛ ma ya je Israel bi ɔmɛ kɛ je Egipt ɔ?” Eko ɔ, Mose susu kaa ní tsumi nɛ Mawu kɛ wo e dɛ ɔ kle pe lɛ. Se Yehowa wo lɛ si kaa e maa piɛɛ e he. E de lɛ ke: “Ma piɛɛ o he.”2 Mose 3:9-12.

3, 4. (a) Mɛni ha nɛ Mose ye gbeye? (b) Mɛni ma nyɛ ma ha nɛ mo hu o maa ye gbeye?

3 Mɛni ha nɛ Mose ye gbeye ɔ? Mose susu kaa Farao be lɛ hee maa ye kaa Yehowa Mawu nɛ tsɔ lɛ. E susu hu kaa eko ɔ,  Israel bi ɔmɛ be lɛ hee maa ye kaa Yehowa lɛ hla lɛ kaa e nyɛɛ a hɛ mi kɛ je Egipt. Enɛ ɔ he ɔ, Mose de Yehowa ke: ‘A be mi hee maa ye, nɛ a be ye gbi hu tue bue; nɔ́ nɛ a ma de ji, “Yehowa je we e he si ha mo.”’2 Mose 3:15-18; 4:1.

4 Mo hu nɛɛ? Eko ɔ, o ya be nɔ yelɔ ngua ko hɛ mi dae gblegbleegble. Se ke e yee ha mo kaa o kɛ nihi maa sɛɛ Mawu kɛ e Matsɛ Yemi ɔ he ní hu nɛɛ? Wa ma nyɛ maa kase nɔ́ ko nɛ he hia wawɛɛ kɛ je nɔ́ nɛ Yehowa de Mose ɔ mi. Wa ma nyɛ maa kase nɔ́ ko hu ngɛ níhi nɛ ya nɔ ngɛ lɔ ɔ se ɔ mi.

“MƐNI LƐ NGƐ O DƐ MI Ɔ?”

5. Mɛni Yehowa ha nɛ tso nɛ ngɛ Mose dɛ mi ɔ pee? Mɛni he je nɛ enɛ ɔ wo Mose kã a? (Moo hyɛ foni nɛ ngɛ ni kasemi ɔ sisije ɔ.)

5 Benɛ Mose de Yehowa kaa e ngɛ gbeye yee kaa ni ɔmɛ be lɛ hee maa ye ɔ, Yehowa ye bua lɛ. Baiblo ɔ de ke: ‘Yehowa bi lɛ ke, “Mɛni lɛ ngɛ o dɛ mi ɔ?” Mose he nɔ ke, “Tso.” Yehowa de lɛ ke, “Sake ngɔ fɔ zugba!” Mose sake tso ɔ ngɔ fɔ zugba, nɛ tso ɔ plɛ pee sinɔ, nɛ Mose tu fo kɛ je he. Yehowa de Mose ke, “Hɛɛ mo kɛ ya nɛ o nu e hlemi.” Se benɛ Mose hɛ lɛ kɛ ya, nɛ e nu sinɔ ɔ, e plɛ pee tso ngɛ e dɛ mi. Yehowa de ke, “Enɛ ɔ maa tsɔɔ kaa Mawu je e he kpo tsɔɔ mo.”’ (2 Mose 4:2-5) Mawu ngɔ e he wami ɔ kɛ ha nɛ tso nɛ ngɛ Mose dɛ mi ɔ plɛ pee sinɔ! Enɛ ɔ ma ha nɛ nihi ma he Mose maa ye kaa Yehowa nɛ e tsɔ lɛ. Yehowa de Mose ke: “Moo hɛɛ o tso ɔ, nɛ lɔ ɔ ji nɔ́ nɛ o kɛ maa pee nyakpɛ ní ɔmɛ ɔ nɛ.” (2 Mose 4:17) Enɛ ɔ ma ha nɛ Mose ma ná kã kɛ ya da Farao hɛ mi konɛ e kɛ lɛ nɛ tu munyu nɛ e ngmɛɛ Israel bi ɔmɛ a he.2 Mose 4:29-31; 7:8-13.

6. (a) Ke wa ngɛ fiɛɛe ɔ, mɛni e sa kaa waa hɛɛ ngɛ wa dɛ, nɛ mɛni he je? (b) Ke a ke “Mawu munyu hɛ ngɛ” nɛ “e ngɛ he wami” ɔ, mɛni lɔ ɔ tsɔɔ?

6 Ke wa yaa fiɛɛ Mawu sɛ gbi ɔ kɛ ha nihi ɔ, mɛni nɛ wɔ hu wa hɛɛɔ ngɛ wa dɛ? Wa hɛɛɔ Baiblo ɔ, nɛ wa suɔ wawɛɛ kaa wa maa kane kɛ tsɔɔ nihi. Ni komɛ susu kaa Baiblo ɔ ji womi kpakpa ko kɛkɛ. Se pi womi kpakpa ko kɛkɛ ji Baiblo ɔ. E ji Mawu sɛ gbi. (2 Pet. 1:21) Baiblo ɔ tsɔɔ wɔ sihi nɛ Mawu wo, kɛ níhi nɛ Mawu Matsɛ Yemi ɔ ma ba pee. Bɔfo Paulo ngma ke: “Mawu munyu hɛ ngɛ, e ngɛ he wami.” (Kane Hebri Bi 4:12.) Ke a ke Mawu munyu ɔ hɛ ngɛ ɔ, mɛni lɔ ɔ tsɔɔ? E tsɔɔ kaa sihi tsuo nɛ Yehowa wo ɔ maa ba mi, ejakaa e ngɛ e si womi ɔmɛ a he ní tsue. (Yes. 46:10; 55:11) Ke nɔ ko ná le kaa sihi tsuo nɛ Yehowa wo ɔ maa ba mi kokooko ɔ, níhi nɛ e kaneɔ ngɛ Baiblo ɔ mi ɔ ma nyɛ ma ná e nɔ he wami.

7. Kɛ wa maa plɛ kɛ “tsɔɔ anɔkuale munyu ɔ saminya” ha kɛɛ?

7 Niinɛ, Yehowa ha wɔ e Munyu nɛ ji Baiblo ɔ. E Munyu nɛ ɔ hɛ ngɛ. Baiblo ɔ ma nyɛ maa ye bua wɔ konɛ wa ha nihi nɛ a le kaa sɛ gbi nɛ wa hɛɛ ɔ ji anɔkuale, nɛ e je Mawu ngɔ. Enɛ ɔ he je ɔ, benɛ Paulo ngɛ Timoteo tsɔsee ɔ, e wo lɛ he wami kaa ‘e tsɔɔ anɔkuale munyu ɔ saminya.’ (2 Tim. 2:15) Mɛni blɔ nɔ wa maa gu konɛ waa kɛ Paulo ga womi ɔ nɛ tsu ní? E sa nɛ waa hla ngmamihi nɛ sa, nɛ ke wa kane ɔ, e maa sɛ tue buli a tsui mi, konɛ wa wo wa gbi nɔ kɛ kane kɛ tsɔɔ mɛ. A pee dɛ womihi nɛ a je kpo ngɛ jeha 2013 ɔ mi ɔ konɛ a ye bua wɔ nɛ waa pee jã.

MOO KANE NGMAMI NƐ SA!

8. Mɛni sɔmɔmi ní tsumi nɔ hyɛlɔ ko de ngɛ dɛ womi ɔmɛ a he?

8 Wa ma nyɛ maa gu blɔ kake nɔ kɛ ha dɛ womi ɔmɛ eko tsuaa eko. Enɛ ɔ he ɔ, ke wa kase bɔ nɛ wa ma plɛ kɛ ha kake ɔ, wa ma nyɛ ma ha eko tsuaa eko. Anɛ dɛ womi ɔmɛ kɛ fiɛɛmi yeɔ lo? Sɔmɔmi ní tsumi nɔ hyɛlɔ ko nɛ ngɛ Hawaii, ngɛ U.S.A. ɔ, ngma ke: “Ke waa kɛ dɛ  womi ɔmɛ ngɛ fiɛɛe ngɛ wehi a mi kɛ hehi nɛ nihi ngɛ ɔ, e ngɔɔ wawɛɛ nitsɛ.” E yɔse kaa dɛ womi ɔmɛ kɛ fiɛɛmi yi. Mɛni he je? Ejakaa a ngma sane bimihi nɛ ngɛ dɛ womi ɔmɛ a hɛ mi ɔ a hetohi, konɛ nɔ ɔ nɛ hla kake. E sɛ nɛ nɔ ɔ nɛ hao kaa ke e ha heto ɔ, e heto ɔ be dae.

9, 10. (a) Mɛni blɔ nɔ wa dɛ womi ɔ haa nɛ waa kɛ Baiblo ɔ tsuɔ ní ngɛ? (b) Dɛ womi ɔmɛ a kpɛti te nɛɛ lɛ e kɛ ní tsumi ngɔɔ ha mo wawɛɛ, nɛ mɛni he je?

9 Ngɛ dɛ womi ɔ eko tsuaa eko nɔ ɔ, a tsɔɔ ngmamihi nɛ sa, nɛ wa ma nyɛ maa kane kɛ ha nihi. Kaa nɔ hyɛmi nɔ́ ɔ, ke o kɛ dɛ womi nɛ ji Anɛ Nɔ́ Nami Se Maa Po Ligbi Ko Lo? ɔ ma ha nɔ ko ɔ, mo bi sane nɛ ngɛ dɛ womi ɔ se ɔ. Nɔ ɔ ma nyɛ ma ha heto ke “ee,” “dɛbi,” aloo “eko ɔ.” Ngɛ heto saisaa nɛ nɔ ɔ ma ha tsuo se ɔ, mo bli dɛ womi ɔ mi nɛ o de lɛ ke, “Moo hyɛ nɔ́ nɛ Baiblo ɔ de.” Lɔ ɔ se ɔ, kane Kpojemi 21:3, 4 ɔ kɛ tsɔɔ nɔ ɔ.

10 Jã kɛ̃ nɛ ke o kɛ dɛ womi nɛ ji, Kɛ O Buu Baiblo ɔ Ha Kɛɛ? ɔ ngɛ ní tsue ɔ, nɔ ɔ ma nyɛ maa hla heto ɔmɛ eko tsuaa eko. Mo bli dɛ womi ɔ mi nɛ o de nɔ ɔ ke, “Baiblo ɔ tsɔɔ kaa ‘Ngmami tsuaa ngmami ɔ, Mawu mumi ɔ lɛ ha nɛ nihi ngma.’” O ma nyɛ ma de hu ke, “Ngɛ anɔkuale mi ɔ, ngmami nɛ ɔ de ní kpahi hulɔ.” Lɔ ɔ se ɔ, mo bli o Baiblo ɔ nɛ o kane 2 Timoteo 3:16, 17 ɔ kɛ tsɔɔ nɔ ɔ.

11, 12. (a) Mɛni lɛ ke o pee ɔ, o ma ná bua jɔmi ngɛ fiɛɛmi ní tsumi ɔ mi? (b) Mɛni blɔ nɔ waa kɛ dɛ womi ɔmɛ ma nyɛ ma tsu ní ke wa kpale kɛ ya slaa nihi?

11 Ke o na kaa nɔ ɔ bua jɔ munyu ɔ he ɔ, o kɛ lɛ ma nyɛ ma susu níhi fuu a he ngɛ dɛ womi ɔ mi. Ni ɔmɛ a bua jɔ munyu ɔ he jio, a bua jɔɛ he jio, o ma nyɛ maa kane Mawu Munyu ɔ kɛ tsɔɔ mɛ. Ke ngmami kake pɛ aloo enyɔ ko pɛ nɛ o nyɛ kane ha nɔ ɔ po ɔ, o bua maa jɔ. Pee se ɔ, o kɛ nɔ ɔ ma nyɛ ma ya tsa nyɛ ní sɛɛmi ɔ nɔ.

12 A ngma munyu nɛ ji, “Mo Susu He Nɛ O Hyɛ” ngɛ dɛ womi ɔmɛ eko tsuaa eko se. A tsɔɔ ngmamihi hu nɛ ke o kpale kɛ ya slaa nɔ ko nɛ o kɛ lɛ ma susu he ɔ ngɛ dɛ womi ɔ se. Ke o kɛ dɛ womi nɛ ji, Mɛni O Susu Kaa E Maa Ba Hwɔɔ Se? ɔ ha nɔ ko, nɛ lɔ ɔ se o kpale ya slaa lɛ ɔ, o ma nyɛ ma bi lɛ ke: “Mɛni blɔ nɔ Mawu maa gu kɛ pee je nɛ wa ngɛ mi nɛ ɔ ehe?” A tsɛ Mateo 6:9, 10 kɛ Daniel 2:44 ɔ se. Ke o kɛ dɛ womi nɛ ji, Anɛ Nihi Nɛ A Gbo ɔ Maa Ba Wami Mi Ekohu Niinɛ Lo? ɔ ha nɔ ko ɔ, o ma nyɛ ma bi lɛ ke:  “Mɛni he je nɛ wa bwɔɔ nɛ wa gboɔ ɔ?” A tsɛ 1 Mose 3:17-19 kɛ Roma Bi 5:12 ɔ se.

13. Moo tsɔɔ bɔ nɛ waa kɛ dɛ womi ɔmɛ maa je Baiblo mi ní kasemi sisi ha.

13 A pee dɛ womi nɛ ɔmɛ konɛ a ye bua wɔ nɛ waa kɛ nihi nɛ je Baiblo mi ní kasemi sisi. Nɔ ɔ ma nyɛ maa po QR kadimi nɔ́ ɔ * nɛ ngɛ dɛ womi ɔ se ɔ foto. Lɔ ɔ kɛ lɛ maa ya Intanɛti ɔ nɔ ngɛ jw.org. Níhi nɛ e maa na ngɛ Intanɛti ɔ nɔ ɔ maa wo lɛ he wami konɛ e ha nɛ Odasefohi kɛ lɛ nɛ kase Baiblo ɔ. A tu wa womiyo nɛ ji, Sane Kpakpa Nɛ Je Mawu Ngɔ! ɔ he munyu ngɛ dɛ womi nɛ ɔmɛ a mi. Kaa nɔ hyɛmi nɔ́ ɔ, dɛ womi nɛ ji, Mɛnɔ Tutuutu Nɛ E Ngɛ Je ɔ Kudɔe? ɔ tsɛ ní kasemi 5 nɛ ngɛ womiyo ɔ mi ɔ se. Dɛ womi nɛ ji, Mɛni Ji Nɔ́ Titli Nɛ Kɛ Bua Jɔmi Baa Weku Mi? ɔ hu tsɛ ní kasemi 9 ɔ se. A woɔ wɔ he wami kaa kekleekle ligbi nɛ wa ma ya na nɔ ko ngɛ we mi, aloo ke wa kpale kɛ ya slaa nɔ ko ɔ, waa kane Baiblo ɔ kɛ ha lɛ. Dɛ womi nɛ ɔmɛ maa ye bua wɔ konɛ waa pee jã. Ke wa pee jã a, waa kɛ nihi fuu ma nyɛ maa je Baiblo mi ní kasemi sisi. Mɛni ji blɔ kpa ko hu nɛ o ma nyɛ maa gu nɔ konɛ o kɛ Baiblo ɔ nɛ tsu ní saminya?

NYƐ SUSU NÍHI NƐ GBAA NIHI A NYA A HE

14, 15. Kɛ o ma plɛ kɛ kase Paulo kɛɛ ngɛ o fiɛɛmi ní tsumi ɔ mi?

14 Paulo suɔ kaa e maa le níhi nɛ haoɔ nihi. Enɛ ɔ he ɔ, e bɔɔ mɔde wawɛɛ konɛ e “nine nɛ su nihi babauu a nɔ.” (Kane 1 Korinto Bi 9:19-23.) Mɛni he je? Ejakaa e suɔ nɛ e ye bua “nihi” tsuo, Yuda bi jio, ni kpahi jio, konɛ a le anɔkuale ɔ nɛ́ a he a yi wami. (Níts. 20:21) Ke wa ngɛ wa he dlae konɛ wa ya fiɛɛ kɛ ha “nimli tsuo” ngɛ wa zugba kpɔ ɔ mi ɔ, kɛ wa ma plɛ kɛ kase Paulo kɛɛ?1 Tim. 2:3, 4.

15 Daa nyɔhi ɔ, a tsɔɔ wɔ bɔ nɛ wa maa fiɛɛ ha ngɛ Wa Matsɛ Yemi Sɔmɔmi ɔ mi. Moo bɔ mɔde nɛ o ngɔ jamɛ a ga womi ɔmɛ kɛ tsu ní. Se ke nihi nɛ a ngɛ o zugba kpɔ ɔ mi ɔ a bua jɔ ní kpahi a he hu nɛɛ? Mo susu níhi nɛ a bua jɔ he ɔ a he, nɛ o hla ngmamihi nɛ ma nyɛ maa ye bua mɛ. Kpɔ mi nɔ hyɛlɔ ko kɛ e yo tsɔɔ bɔ nɛ a kɛ Baiblo ɔ tsuɔ ní ngɛ a fiɛɛmi ní tsumi ɔ mi ha. A de ke: “Nihi fuu ngɛ nɛ ke wa ya ná mɛ ngɛ we mi nɛ wa ha nɛ a le kaa wa maa po wa munyu ɔ kpiti ɔ, a ngmɛɛ wɔ blɔ nɛ wa kaneɔ ngmami kake kɛ haa mɛ. Wa bliɔ Baiblo ɔ ngɛ wa dɛ mi loko wa suɔ a ngɔ. Ke wa fɔ mɛ pɛ kɛkɛ wa kane ngmami ɔ kɛ tsɔɔ mɛ.” Wa ma susu munyu komɛ nɛ nihi a bua jɔɔ he wawɛɛ ngɛ ma a mi, kɛ sane bimihi nɛ waa kɛ ma nyɛ ma tsu ní, kɛ ngmamihi nɛ wa ma nyɛ maa kane ɔ a he ngɛ kukuhi nɛ nyɛɛ se ɔ a mi. O kɛ ekomɛ ma nyɛ ma tsu ní ngɛ o zugba kpɔ ɔ mi.

Ke o ngɛ fiɛɛmi tso mi ɔ, anɛ o kɛ Baiblo ɔ, kɛ dɛ womi ɔmɛ tsuɔ ní saminya lo? (Hyɛ kuku 8-13)

16. Moo tsɔɔ bɔ nɛ o kɛ Yesaya 14:7 ɔ ma nyɛ ma tsu ní ngɛ fiɛɛmi mi ha.

16 Ke nihi peeɔ yi wu tso ní ngɛ he nɛ o ngɛ ɔ nɛ o kɛ nɔ ko kpe ngɛ fiɛɛmi mi ɔ, o ma nyɛ ma bi lɛ ke: “Ke o na nɛ a ngma ngɛ adafi fiami womi ko nɔ ke: ‘Amlɔ nɛ ɔ lɛɛ tue mi jɔmi ngɛ je ɔ mi he tsuaa he, nɛ nihi a bua jɔ’ ɔ, kɛ e maa pee mo ha kɛɛ? Baiblo ɔ de jã ngɛ Yesaya 14:7 ɔ. Baiblo ɔ tsɔɔ kaa Mawu wo si kaa e kɛ tue mi jɔmi maa ba je ɔ mi hwɔɔ se.” Lɔ ɔ se ɔ, moo kane ngmami kake nɛ kɔɔ jɔɔmi nɛ ɔmɛ a he ɔ, kɛ ha nɔ ɔ.

17. Mɛni blɔ nɔ o maa gu konɛ o kɛ Mateo 5:3 ɔ nɛ tsu ní ngɛ fiɛɛmi mi?

17 Anɛ e yee ha nyumuhi fuu nɛ a ngɛ he nɛ nyɛ ngɛ ɔ kaa a ma ná sika kɛ hyɛ a wekuhi lo? Ke jã a, lɛɛ ke o kɛ nɔ ko kpe ngɛ fiɛɛmi mi ɔ, o ma nyɛ ma bi lɛ ke: “Sika enyɛmɛ nɛ o susu kaa ke nyumu ko náa a, nɛ e ma nyɛ maa hyɛ e weku saminya, nɛ weku mi bimɛ ɔmɛ a bua maa jɔ?” Ke nɔ ɔ ha heto ta a, o ma nyɛ ma de lɛ ke: “Nyumuhi fuu náa  sika babauu pe jã, se kɛ̃ ɔ, a weku mi bimɛ ɔmɛ be bua jɔmi. Ke jã a, lɛɛ mɛni o susu kaa e ma ha nɛ weku mi bimɛ ma ná bua jɔmi mɔ?” Lɔ ɔ se ɔ, kane Mateo 5:3 ɔ kɛ ha nɔ ɔ, nɛ o de lɛ ke o suɔ kaa o kɛ lɛ ma ba kase Baiblo ɔ.

18. Mɛni blɔ nɔ wa maa gu konɛ waa kɛ Yeremia 29:11 ɔ nɛ wo nihi a bua?

18 Anɛ oslaa ko ba nihi nɛ a ngɛ o kpɔ ɔ mi ɔ a nɔ lingmi nɛ ɔ lo? Ke jã a, lɛɛ ke o kɛ nɔ ko kpe ngɛ fiɛɛmi mi ɔ, o ma nyɛ ma de lɛ ke: “I ba nɛ ma ba wo o bua. (Kane Yeremia 29:11.) Anɛ o le yi mi nɛ Mawu to ngɛ wa he lo? E to e yi mi kaa e ‘ma ha nɛ wa he mi nɛ jɔ wɔ, konɛ ní kpakpahi nɛ wa ngɛ blɔ hyɛe ɔ, wa nine nɛ su nɔ.’ Enɛ ɔ tsɔɔ kaa Mawu suɔ nɛ wa ná bua jɔmi. Se kɛ wa ma plɛ kɛ ná bua jɔmi nɛ ɔ kɛɛ?” Lɔ ɔ se ɔ, moo hla munyu nɛ sa ngɛ Sane Kpakpa womiyo ɔ mi konɛ o kɛ lɛ nɛ susu he.

19. Moo tsɔɔ bɔ nɛ o kɛ Kpojemi 14:6, 7 ɔ ma nyɛ maa ye bua nɔ ko nɛ e bua jɔ Mawu jami he ha.

19 Anɛ nihi a bua jɔ Mawu jami he ngɛ he nɛ o ngɛ ɔ lo? Ke jã lɛɛ, ke o ya na nɔ ko ngɛ fiɛɛmi mi ɔ, o ma nyɛ ma bi lɛ ke: “Ke Mawu bɔfo ko de mo ke o pee nɔ́ ko ɔ, anɛ o maa pee lo? (Kane Kpojemi 14:6, 7.) Bɔfo ɔ de ke e sa nɛ waa ‘ye Mawu gbeye.’ Mawu ɔ te nɛɛ? Bɔfo ɔ tsɔɔ kaa ‘Mawu ɔ nɛ bɔ hiɔwe kɛ zugba a.’ Kɛ a tsɛɛ jamɛ a Mawu ɔ ha kɛɛ?” Lɔ ɔ se ɔ, kane La 124:8 ɔ. A ngma ngɛ lejɛ ɔ ke: ‘Yehowa, hiɔwe kɛ zugba Bɔlɔ ɔ ji nɔ nɛ piɛɔ wa he.’ Ke o kane ta a, mo de lɛ ke o suɔ nɛ o maa ba ekohu konɛ o kɛ lɛ nɛ ba kase Yehowa Mawu he ní babauu.

20. (a) Mɛni blɔ nɔ o maa gu konɛ o ngɔ Abɛ 30:4 ɔ kɛ tsɔɔ nɔ ko Mawu biɛ? (b) Mɛni ngmami nɛ o kɛ tsu ní ngɛ fiɛɛmi mi hyɛ nɛ e wo yiblii?

20 Ke o kɛ niheyo aloo yiheyo ko kpe ngɛ fiɛɛmi mi ɔ, o ma nyɛ ma de lɛ ke: “Ma suɔ nɛ ma kane ngmami ko kɛ ha mo. Sane bimi ko nɛ he hia ngɛ ngmami ɔ mi. (Kane Abɛ 30:4.) Adesa ko be nyɛɛ maa pee níhi nɛ ngmami ɔ wo ta a. Enɛ ɔ he ɔ, ngmami nɛ ɔ kɔɔ wa Bɔlɔ ɔ he. * Anɛ o le Bɔlɔ ɔ biɛ lo? Ma suɔ nɛ ma tsɔɔ mo ngɛ Baiblo ɔ mi.”

HA NƐ NIHI NƐ A LE KAA MAWU MUNYU Ɔ NGƐ HE WAMI

21, 22. (a) Mɛni he je nɛ ke wa kane ngmami nɛ sa ha nɔ ko ɔ, e ma nyɛ ma tsake e si himi ɔ? (b) Mɛni o fia o pɛɛ si kaa o maa pee ke o ngɛ fiɛɛe kɛ ngɛ nihi tsɔɔe?

21 Ke o hlaa ngmamihi nɛ sa, nɛ o kaneɔ kɛ haa nihi ɔ, a bua jɔɔ he wawɛɛ. Kaa nɔ hyɛmi nɔ́ ɔ, ligbi ko ɔ, Odasefohi enyɔ komɛ nɛ a ngɛ Australia a, ya fia zangmayo ko sinya. A ti nɔ kake bi zangmayo ɔ ke, “Anɛ o le Mawu biɛ lo?” Lɔ ɔ se ɔ, e kane La 83:18 ɔ. Benɛ e kane ngmami ɔ ta a, zangmayo ɔ de ke: “Ye nya mi jɔ! Benɛ Odasefo bi ɔmɛ je ɔ, i wo lɔle kɛ ho womi juami he ko nɛ kɛ he nɛ wa ngɛ ɔ maa pee si tomi 35 ɔ ya. I ya hyɛ Baiblo sisi tsɔɔmi kpahi, kɛ munyunguhi a sisi tsɔɔmi womi ko mi kaa ma na Mawu biɛ ɔ ngɛ a mi lo. Benɛ i ba ná nɔ mi mami kaa Mawu biɛ ji Yehowa a, lejɛ ɔ nɛ i na kaa níhi fuu ngɛ nɛ i li.” E kɛ we kulaa nɛ e kɛ nyumu nɛ e maa gba a tsuo ba kase Baiblo ɔ, nɛ a baptisi mɛ.

22 Mawu Munyu ɔ ngɛ he wami, nɛ e tsakeɔ nihi a si himi. Ke nɔ ko kaneɔ Baiblo ɔ, hemi kɛ yemi nɛ e ngɛ ngɛ Yehowa si womi ɔmɛ a mi ɔ mi waa. Hemi kɛ yemi nɛ ɔ woɔ lɛ he wami nɛ e kɛ níhi nɛ e kaseɔ ɔ tsuɔ ní. (Kane 1 Tesalonika Bi 2:13.) Baiblo ɔ mi munyu ɔ ngɛ he wami kulaa pe wa nya mi munyu kɛkɛ. Enɛ ɔ he ɔ, e sa nɛ waa fia wa pɛɛ si kaa ke wa ngɛ fiɛɛe ha nihi ɔ, wa maa bɔ mɔde kaa waa kɛ Mawu Munyu ɔ ma tsu ní, ejakaa Mawu Munyu ɔ hɛ ngɛ!

^ kk. 13 QR kadimi nɔ́ ɔ ji Denso Wave Incorporated nɔ́ he so tomi nɔ́.

^ kk. 20 Hyɛ “Sane Bimihi Nɛ Je Ní Kaneli A Ngɔ,” nɛ ngɛ July 15, 1987 Blɛfo gbi Hwɔɔmi Mɔ ɔ ba fa 31 ɔ.