Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  July 2014

 HƐ MI MUNYU | MƐNI HE JE NƐ HAOMIHI BAA NIMLI KPAKPAHI HU A NƆ Ɔ?

Mɛni He Je Haomihi Baa Nimli Kpakpahi A Nɔ ɔ?

Mɛni He Je Haomihi Baa Nimli Kpakpahi A Nɔ ɔ?

Akɛnɛ Yehowa Mawu * ji níhi tsuo a Bɔlɔ, nɛ e ngɛ he wami hu pe nɔ tsuaa nɔ he je ɔ, eko ɔ, nihi fuu ma pia lɛ ngɛ ní yayahi kɛ ní kpahi nɛ yaa nɔ ngɛ je ɔ mi ɔ he. Se mo susu níhi nɛ nyɛɛ se nɛ ɔ nɛ Baiblo ɔ de ngɛ anɔkuale Mawu ɔ he ɔ he nɛ o hyɛ:

  • ‘Nɔ́ tsuaa nɔ́ nɛ Yehowa peeɔ ɔ da.’La 145:17.

  • ‘Mawu da ngɛ blɔ tsuaa blɔ nɔ. Nyɛ Mawu ɔ yeɔ e siwo nɔ; yayami ko be e he; nɔ́ nɛ da, kɛ nɔ́ nɛ sa pɛ e peeɔ.’5 Mose 32:4.

  • ‘Yehowa mi mi jɔ, nɛ e naa mɔbɔ.’Yakobo 5:11.

Tsa pi Mawu nɛ e ngɔɔ haomihi kɛ baa nihi a nɔ. Se anɛ lɛ nɛ e woɔ nihi he wami nɛ a peeɔ ní yayahi lo? Dɛbi, pi lɛ. Ngmami ɔ de ke: “Ke a ka nɔ ko ɔ, e ko de ke Mawu lɛ ka lɛ.” Mɛni he je? Ejakaa “nɔ ko be nyɛe maa ka Mawu kaa e maa pee yayami lo. Pohu Mawu nitsɛ kɛ́ nɔ.” (Yakobo 1:13) Mawu wui nihi he wami kaa a pee nɔ́ yaya konɛ e kɛ ka mɛ. Jã kɛ̃ nɛ tsa pi Mawu nɛ e haa nɛ haomihi baa nihi a nɔ, nɛ pi lɛ hu nɛ e woɔ nihi he wami nɛ a peeɔ ní yayahi. Ke jã a, lɛɛ mɛnɔ nɛ e sa kaa wa pia ngɛ ní yayamihi nɛ baa nihi a nɔ ɔ he mɔ?

OSLAA

Baiblo ɔ tsɔɔ yi mi tomi he je nɛ adesahi naa nɔ́ ɔ. E de ke: ‘Haomi baa mɛ tsuo a nɔ tlukaa.’ (Fiɛlɔ 9:11) Ke oslaa ko ba a, he nɛ nɔ ko ngɛ ɔ lɛ maa tsɔɔ kaa oslaa a maa sa e he aloo e be e he sae. Maa pee jeha 2,000 ji nɛ ɔ, Yesu Kristo tu oslaa ko nɛ ba nimli 18 komɛ a nɔ ɔ he munyu. Mɔ ku pue nimli nɛ ɔmɛ a nɔ nɛ a gbo. (Luka 13:1-5) Tsa pi a ní peepee he je nɛ a gbo ngɛ. Mohu ɔ, oslaa nɛ ba a nɔ. Ngɛ January, jeha 2010 mi ɔ, zugba mimiɛ wawɛɛ ngɛ Haiti. Haiti ma nɔ yelɔ ɔ tsɔɔ kaa nimli 300,000 kɛ se sɔuu nɛ a gbo ngɛ oslaa nɛ ɔ mi. Nimli kpakpahi kɛ nimli yayahi tsuo gbo ngɛ oslaa nɛ ɔ mi. Hiɔ hu nuɔ nimli kpakpahi kɛ nimli yayamihi tsuo.

Mɛni he je nɛ Mawu pui nimli kpakpahi a he piɛ konɛ haomi nɛ ko ba a nɔ ɔ?

Eko ɔ, ni komɛ ma bi ke: ‘Anɛ Mawu be nyɛe maa tsi oslaa nɛ ɔmɛ a nya lo? Anɛ e be nyɛe maa po nimli kpakpahi a he piɛ ngɛ oslaa nɛ ɔmɛ a he lo?’ Ke Mawu pee nɔ́ ko kaa jã a, lɔ ɔ ma nyɛ maa tsɔɔ kaa loko haomi ko maa ba a, e le he nɔ́ ko momo. Mawu ngɛ he wami nɛ e ma nyɛ ma kɛ le hwɔɔ se sane. Se e sa nɛ wa bi wa he ke: Anɛ be tsuaa be nɛ Mawu ngɔɔ he wami nɛ e ngɛ nɛ e kɛ leɔ níhi nɛ maa ba hwɔɔ se ɔ kɛ tsuɔ ní lo?Yesaya 42:9.

Ngmami ɔ de ke: “Wa Mawu ɔ, hiɔwe e ngɛ; nɔ́ tsuaa nɔ́ nɛ e suɔ ɔ, lɔ ɔ e peeɔ.” (La 115:3) Yehowa peeɔ níhi nɛ e na kaa a he hia. Pi  nɔ́ tsuaa nɔ́ nɛ e peeɔ. Jã kɛ̃ nɛ e ji ngɛ níhi nɛ maa ba hwɔɔ se nɛ e suɔ kaa e le ɔ hu a blɔ fa mi. Kaa nɔ hyɛmi nɔ́ ɔ, benɛ ní yayami peemi hyi Sodom kɛ Gomora ma amɛ a mi tɔ ɔ, Mawu de Abraham ke: ‘I yaa lejɛ ɔ nɛ ma ya hyɛ kaa níhi nɛ i nu ngɛ a he ɔ, e ngɛ mi ja, loo e be mi.’ (1 Mose 18:20, 21) Be ko nɛ be ɔ, Yehowa je e hɛ ngɛ yayamihi nɛ a ngɛ pee ngɛ Sodom kɛ Gomora ma amɛ a mi ɔ he. Jã kɛ̃ nɛ ja Yehowa suɔ nɛ e le níhi nɛ maa ba hwɔɔ se loko e leɔ. (1 Mose 22:12) Enɛ ɔ tsɔɔ we kaa Mawu yi mluku aloo e gbɔjɔ. Akɛnɛ Mawu “hi kɛ pi si” he je ɔ, e daa e yi mi tomihi a nɔ kɛ leɔ níhi nɛ maa ba hwɔɔ se. E nyɛ we adesahi a nɔ kaa a pee nɔ́ ko. * (5 Mose 32:4) Lɛɛ, kɛ ba si amlɔ nɛ ɔ, mɛni wa ma de? Nɔ́ kɛkɛ nɛ wa ma nyɛ ma de ji, ja Mawu suɔ kaa e maa le nɔ́ ko nɛ maa ba hwɔɔ se loko e leɔ.

Mɛni he je nɛ Mawu ngmɛɛɔ blɔ nɛ a peeɔ nimli kpakpahi basabasa a?

ANƐ ADESAHI A NÍ PEEPEEHI LƐ NGƆƆ HAOMIHI KƐ BAA LO?

Adesahi hu piɛɛ he nɛ ní yayamihi ngɛ nɔ yae ngɛ je ɔ mi ɔ nɛ. Baiblo ɔ de ke: “Se nɔ tsuaa nɔ ɔ, lɛ nitsɛ e we akɔnɔ nɛ gblaa lɛ, nɛ́ sisiɔ lɛ ɔ nɛ kaa lɛ. Nɛ akɔnɔ ɔ, ke e ngɔ hɔ ɔ, e fɔɔ yayami, nɛ yayami hu ke e wa a, e fɔɔ gbenɔ.” (Yakobo 1:14, 15) Ke nɔ ko ná akɔnɔ yaya, nɛ lɔ ɔ gbla lɛ nɛ e ya pee yayami ɔ, e maa na e mi nɔ́. (Roma Bi 7:21-23) Yi nɔ sane tsɔɔ kaa adesahi pee yayami nguanguahi, nɛ enɛ ɔ ngɔ haomihi fuu kɛ ba. Jehanɛ se hu ɔ, yiwutsotsɛmɛ ma nyɛ ma puɛ nihi a tue konɛ a pee ní yayamihi.Abɛ 1:10-16.

Adesahi peeɔ yayami nguanguahi, nɛ enɛ ɔ ngɔɔ haomihi fuu kɛ baa

Anɛ e sa kaa Mawu nɛ tsi nihi a nya konɛ a ko pee ní yayamihi hu lo? Mo susu bɔ nɛ a bɔ adesa ha a he nɛ o hyɛ. Ngmami ɔ tsɔɔ kaa Mawu bɔ adesa kaa bɔ nɛ lɛ Mawu ɔ e ngɛ ɔ. Enɛ ɔ tsɔɔ kaa adesahi ma nyɛ ma je Mawu suhi kpo. (1 Mose 1:26) Mawu ha adesahi he blɔ kaa a peeɔ nɔ́ nɛ a suɔ. Enɛ ɔ he ɔ, ke a suɔ ɔ, a ma nyɛ maa ye Mawu anɔkuale konɛ a pee e suɔmi nya ní. (5 Mose 30:19, 20) Ke Mawu nyɛ nihi a nɔ kaa a pee nɔ́ ko ɔ, anɛ lɔ ɔ tsɔɔ we kaa e ngɛ he blɔ nɛ e kɛ ha mɛ kaa a pee nɔ́ nɛ a suɔ ɔ ngɔe ngɛ a dɛ lo? Ke e ba lɛ jã a, adesahi ma pee kaa klamahi. Klamahi lɛɛ, níhi nɛ a pee mɛ kaa a tsu ɔ, lɔ ɔ kɛkɛ a tsuɔ! Jã kɛ̃ nɛ e ji ngɛ sɛsɛɛ aloo Kismet hu he. Sɛsɛɛ tsɔɔ kaa a to níhi nɛ maa ba wa nɔ hwɔɔ se ɔ kɛ fɔ si momo loko a fɔ wɔ. Wa bua jɔ wawɛɛ kaa Mawu ha wɔ he blɔ konɛ waa pee níhi nɛ wa suɔ! Se enɛ ɔ tsɔɔ we kaa nɔ́ nɛ wa ngɛ nae ngɛ adesahi a ní peepeehi a he je ɔ maa hi si daa.

 ANƐ KARMA LƐ HA NƐ NIHI NGƐ NƆ́ NAE Ɔ LO?

Ke o bi Hindu no aloo Buddha no ko munyu nɛ ngɛ womi tɛtlɛɛ nɛ ɔ hɛ mi ɔ, e ngɛ heii kaa heto nɛ e ma ha mo ji: “Karma mlaa a he je nɛ haomihi baa nimli kpakpahi a nɔ ɔ nɛ. A tsɔɔ kaa ke nɔ ko pee nɔ́ ko, nɛ lɔ ɔ se e gbo nɛ a fɔ lɛ ekohu ɔ, e ba naa nɔ́ ngɛ jamɛ a nɔ́ ɔ nɛ e pee ɔ he je.” *

Ke o le nɔ́ nɛ Baiblo ɔ de kɛ kɔ gbenɔ he ɔ, lɔ ɔ maa ye bua mo konɛ o susu Karma mlaa a he saminya. Bɔlɔ ɔ de Adam ngɛ Eden abɔɔ ɔ mi ke: “Tso ɔmɛ nɛ ngɛ ngmɔ ɔ mi ɔ, o ma nyɛ maa ye eko tsuaa eko yiblii faa, ja tso ɔ nɛ haa nɔ leɔ kpakpa kɛ yayami ɔ pɛ. Koo ye jamɛ a tso ɔ yiblii; ligbi nɛ o maa ye eko ɔ, o ma gbo.” (1 Mose 2:16, 17) Kaa Adam gbo we Mawu nɔ tue ɔ, jinɛ e ko gbo we gblegbleegble. Mawu mlaa a nɔ nɛ Adam yi ɔ he je nɛ wa gboɔ ɔ nɛ. ‘Enɛ ɔ lɛ ha nɛ gbenɔ sã nimli tsuo’ nɛ a ngɛ mɛ fɔe ɔ nɛ. (Roma Bi 5:12) Lɔ ɔ he ɔ, wa ma nyɛ ma de kaa “yayami he hiɔwo ji gbenɔ.” (Roma Bi 6:23) Baiblo de hu ke: “Ke nɔ ko gbo ɔ, e kɛ yayami gba mi.” (Roma Bi 6:7) Ngɛ blɔ ko nɔ ɔ, ke nɔ ko gbo ɔ, a bui yayamihi nɛ e pee ɔ he akɔtaa hu.

Nimli ayɔhi abɔ susu kaa Karma lɛ ha nɛ adesahi ngɛ nɔ́ nae ɔ nɛ. Behi fuu ɔ, nihi nɛ a heɔ tsɔɔmi nɛ ɔ yeɔ ɔ, ke a ngɛ nɔ́ nae ɔ, e gba we a nya, nɛ ke a na kaa ni kpahi hu ngɛ nɔ́ nae ɔ, e si we mɛ kpu. Se anɔkuale sane ji kaa susumi nɛ ɔ ha we nɛ nihi nɛ a ná hɛ nɔ kami kaa haomihi nɛ a kɛ ngɛ kpee ɔ se maa po. Mohu ɔ, a he ye kaa nɔ́ pɛ nɛ ma ha nɛ a maa ye a he ji, nɛ a maa ba a je mi saminya, nɛ a ma ná nile klɛdɛɛ ko konɛ ke a gbo ɔ, a ko fɔ mɛ kɛ ba hu. Ngɛ anɔkuale mi ɔ, e slo susumi nɛ ɔmɛ kulaa ngɛ nɔ́ nɛ Baiblo ɔ tsɔɔ ɔ he. *

NƆ TITLI NƐ NGƆ HAOMI KƐ BA!

Anɛ o le kaa Satan Abosiami ji “nɔ nɛ yeɔ je nɛ ɔ nɔ matsɛ,” nɛ lɛ nɛ e haa nɛ nihi naa nɔ́ ɔ lo?Yohane 14:30

Tsa pi adesa ji nɔ titli nɛ ngɔ ní yayamihi kɛ ba. Sisije ɔ, Satan Abosiami ji Mawu bɔfo nɛ yeɔ anɔkuale, se ‘e hí si ngɛ anɔkuale ɔ mi.’ Enɛ ɔ he ɔ, e ngɔ yayami kɛ ba je ɔ mi. (Yohane 8:44) E ha nɛ adesahi tsɔ atua ngɛ Eden abɔɔ ɔ mi. (1 Mose 3:1-5) Yesu Kristo tsɛ lɛ ke “nɔ yayami” kɛ “nɔ nɛ yeɔ je nɛ ɔ nɔ matsɛ.” (Mateo 6:13; Yohane 14:30) Adesahi babauu ya nyɛɛ Satan se nɛ a kɛ Yehowa mlaa kpakpa amɛ tsu we ní. (1 Yohane 2:15, 16) Baiblo ɔ de ngɛ 1 Yohane 5:19 ɔ ke: “Je ɔ, Abosiami lɛ ngɛ nɔ yee.” Bɔfo yaya kpahi hu ngɛ nɛ a ya piɛɛ Satan he. Baiblo ɔ tsɔɔ kaa Satan kɛ e daimonio ɔmɛ ngɛ ‘nihi tsuo sisie ngɛ je ɔ mi.’ Enɛ ɔ ngɔ haomi nɛ mi wa kɛ ba “je ɔ” mi. (Kpojemi 12:9, 12) Enɛ ɔ he ɔ, Satan Abosiami ji nɔ titli nɛ e sa kaa a pia ngɛ haomihi nɛ ngɛ je ɔ mi ɔ a he.

E ngɛ heii kaa pi Mawu nɛ haa nɛ haomihi baa nihi a nɔ, nɛ e ha we nɛ nihi nɛ a na nɔ hulɔ. Mohu ɔ, e wo si kaa e ma je ní yayahi tsuo kɛ je. Wa ma susu lɔ ɔ he ngɛ munyu nɛ nyɛɛ se ɔ mi.

^ kk. 3 Baiblo ɔ ha nɛ wa na kaa Mawu biɛ ji Yehowa.

^ kk. 11 Ke o ngɛ hlae nɛ o le nɔ́ he je nɛ Mawu ngmɛ nɔ́ nami blɔ ɔ, hyɛ Mɛni Tutuutu Ji Baiblo ɔ Tsɔɔmi? womi ɔ yi 11 nɛ Yehowa Odasefohi pee ɔ.

^ kk. 16 Ke o ngɛ hlae nɛ o le he nɛ Karma mlaa je kɛ ba a, moo hyɛ womiyo nɛ ji, What Happens to Us When We Die? ɔ, ba fa 8-12 nɛ Yehowa Odasefohi pee ɔ.

^ kk. 18 Ke o ngɛ hlae nɛ o le nɔ́ nɛ Baiblo ɔ tsɔɔ ngɛ gbogboehi kɛ hɛ nɔ kami nɛ ngɛ kɛ ha mɛ ɔ he ɔ, hyɛ Mɛni Tutuutu Ji Baiblo ɔ Tsɔɔmi? ɔ yi 6 kɛ 7.