Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  June 2014

“Ke O Maa Pee Nɔ́ Ko ɔ, Susu He Saminya”

“Ke O Maa Pee Nɔ́ Ko ɔ, Susu He Saminya”

BENƐ Yehowa we bi je Babilon kɛ yaa Yerusalem ngɛ jeha 537 loko a fɔ Kristo ɔ, Yehowa hɛngmɛ ngɛ a he. E de mɛ ke: “Nyɛɛ je gbɛjegbɛ kɛ ha ma a; nyɛ kukuɔ a nɔ tɛhi tsuo.” (Yes. 62:10) Mo susu bɔ nɛ Yuda bi ɔmɛ a kpɛti ni komɛ maa tsu nɔ́ nɛ ɔ ha a he nɛ o hyɛ. Eko ɔ, ni komɛ sɛ hlami nɛ a dla gbɛjegbɛ ɔ, nɛ a pue nɔ tɛ. E ngɛ heii kaa enɛ ɔ ha nɛ blɔ ɔ nɔ nyɛɛmi yi ha a nyɛmimɛ ɔmɛ.

Jã kɛ̃ nɛ wa peeɔ ke waa kɛ Mawu jami mi oti ko maa ma wa hɛ mi. Yehowa suɔ nɛ waa su otihi nɛ waa kɛ ma wa hɛ mi ɔ a he konɛ nɔ́ ko nɛ ko tsi wɔ blɔ. E Munyu de ke: “Ke o maa pee nɔ́ ko ɔ, susu he saminya. Ja o pee jã loko o blɔhi maa da mo.” (Abɛ 4:26) Ke jokuɛwi kɛ nikɔtɔmahi tsuo ngɔ Mawu ga womi nɛ ɔ kɛ tsu ní ɔ, a ma ná he se.

MOO PEE JUƐMI NƐ DA

Eko ɔ, o nuɔ nɛ nihi deɔ ke: ‘Yoyo nɛ ɔ lɛɛ, e juɛmi nya ba pe ha,’ aloo ‘Nyumuyo nɛ ɔ lɛɛ, e hɛ mi ngɛ ga.’ Nihewi kɛ zangmawi fuu ngɛ nɔmlɔ tso mi he wami, a juɛmi nya ba, nɛ a suɔ wawɛɛ kaa níhi a mi nɛ hi ha mɛ. Baiblo ɔ de ke: “Nihewi a hɛ mi nyami ji a he wami.” (Abɛ 20:29) Niheyo aloo yiheyo nɛ e kɛ e he wami kɛ e nile sɔmɔɔ Yehowa a ma nyɛ maa su Mawu jami mi otihi a he, nɛ lɔ ɔ ma ha nɛ e ma ná bua jɔmi nitsɛnitsɛ.

Kaa bɔ nɛ o le ɔ, ni komɛ hu ngɛ je ɔ mi nɛ a bua jɔ nile kɛ nyɛmi nɛ nihewi kɛ zangmawi ngɛ ɔ he wawɛɛ. Ke Odasefo no niheyo aloo zangmayo ko bɔɔ mɔde ngɛ sukuu ɔ, sukuu bi a ga wolɔ, aloo tsɔɔlɔ, aloo e nyɛmimɛ sukuu bimɛ ɔmɛ ma nyɛ maa nyɛ e nɔ nɛ́ e ya sukuu kɛ ya tsitsaa konɛ níhi a mi nɛ hi ha lɛ hwɔɔ se. Aloo eko ɔ, nihi maa wo  nyɛmimɛ nihewi kɛ yihewi nɛ a le bɔɔlu fiami aloo a le fo tumi ɔ he wami konɛ a ya a hɛ mi ngɛ jamɛ a ní ɔmɛ a peemi mi. Anɛ o kɛ si himi ko kaa jã kpe hyɛ, aloo o le nɔ ko nɛ e kɛ si himi ko kaa jã ngɛ kpee lo? Mɛni maa ye bua Kristofo no ko konɛ e mwɔ e yi mi kpɔ ngɛ nile mi?

Baiblo sisi tomi mlaahi ma nyɛ maa ye bua nɔ ko konɛ e nyɛ nɛ e nyɛɛ blɔ nɛ hi pe kulaa nɛ kɛ nɔ yaa wami mi ɔ nɔ. Fiɛlɔ 12:1 ɔ de ke: ‘Mo kai o Bɔlɔ Ngua a ngɛ o nihe mi.’ Ke jã a, lɛɛ mɛni blɔ nɔ o maa gu kɛ ‘kai o Bɔlɔ Ngua a,’ nɛ mɛni blɔ nɔ nihewi kɛ yihewi kpahi hu maa gu kɛ pee jã?

Nyɛ ha nɛ wa susu nɔ́ nɛ ba Eric * nɔ ɔ he nɛ waa hyɛ. E je West Africa, nɛ e suɔ bɔɔlu fiami. Benɛ Eric ke e yeɔ jeha 15 ɔ, e bɔni bɔɔlu fiami ha e ma a. Enɛ ɔ tsɔɔ kaa e ma ná he blɔ ya kase bɔɔlu fiami ngɛ Europe, nɛ eko ɔ, pee se ɔ, e ma ya fia bɔɔlu ha bɔɔlu fiami kuu nguanguahi nɛ a he biɛ ɔ. Se mɛni blɔ nɔ e ‘kai e Bɔlɔ Ngua a’ ngɛ? Mɛni o ma nyɛ maa kase ngɛ enɛ ɔ mi, nɛ mɛni nihewi kɛ zangmawi kpahi hu ma nyɛ maa kase ngɛ mi?

Benɛ Eric ngɛ sukuu yae ɔ, e kɛ Yehowa Odasefohi kase Baiblo ɔ. E kase kaa e Bɔlɔ ɔ ma ba je haomihi tsuo nɛ adesahi kɛ ngɛ kpee ɔ kɛ je. Eric ba na kaa se nami ngɛ he kaa e kɛ e be kɛ e he wami maa pee Mawu suɔmi nya ní. Enɛ ɔ ha nɛ Eric kpa bɔɔlu ɔ fiami, nɛ e ha nɛ a baptisi lɛ, nɛ e kɛ e he wo Mawu jami mi ní tsumihi a mi. Pee se ɔ, e ba pee asafo mi sɔmɔlɔ, nɛ lɔ ɔ se ɔ, e ya Baiblo Sukuu Kɛ Ha Nyumuhi Nɛ A Sɛ We Gba Si Himi Mi ɔ eko.

Kaa Eric tsa nɔ nɛ e fia bɔɔlu ɔ, jinɛ e ko he biɛ, nɛ e ko ná ní hulɔ. Se e kai Baiblo sisi tomi mlaa nɛ nyɛɛ se nɛ ɔ: “Niatsɛmɛ susuɔ kaa ke a ná ní ɔ, e haa mɛ bua jɔmi, kaa bɔ nɛ ke a fia gbogbo kɛ wo ma he nɛ ma mi bi ɔmɛ náa he jɔmi ɔ.” (Abɛ 18:11) Sika be nyɛe maa bu nɔ he. Nihi nɛ a di sika se vii ɔ, ‘nɔ́ kɛkɛ nɛ a ná ngɛ mi ji tsui yemi babauu.’1 Tim. 6:9, 10.

Bua jɔmi sane ji kaa nihewi kɛ yihewi fuu ná bua jɔmi nɛ a tsui nɔ a mi kaa a kɛ a he wo be tsuo sɔmɔmi ní tsumi ɔ mi. Eric de ke: “I piɛɛ nihi fuu nɛ a kɛ a be tsuo ngɛ Yehowa sɔmɔe ɔ a he. Jamɛatsɛmɛ ɔmɛ ji nihi nɛ a hi pe kulaa nɛ e sa kaa i kɛ mɛ nɛ bɔ. I naa Yehowa si kaa e tsɔɔ mi nɔ́ nɛ ke i pee ɔ, ma ná bua jɔmi nitsɛnitsɛ, nɛ ye tsui hu maa nɔ ye mi ngɛ si himi.”

Mo hu nɛɛ? Koo ngɔ je nɛ ɔ mi otihi kɛ ma o hɛ mi. Anɛ o ma nyɛ maa to o níhi a blɔ nya konɛ o nyɛ nɛ o sɔmɔ kaa blɔ gbalɔ lo?—Hyɛ daka nɛ e yi ji, “ I Ná He Se Pe Yunivɛsiti Nɛ I Ya a.

MO JE BLƆ TSIMI NÍHI NGƐ O BLƆ MI

Benɛ nyumu ko kɛ e yo ya slaa asafo ɔ ní tsumi he kɔni ɔ ngɛ United States ɔ, a na kaa nihi nɛ a ngɛ sɔmɔe ngɛ lejɛ ɔ ngɛ bua jɔmi wawɛɛ nitsɛ. Pee se ɔ, nyɛmiyo ɔ ngma ke: “Wa ní tsumi ha nɛ wa be deka.” Enɛ ɔ he ɔ, a ma a juɛmi nya si kaa a maa ngmɛɛ ní komɛ a he, konɛ a nyɛ nɛ a kɛ a be kɛ a he wami nɛ sɔmɔ Yehowa kɛ pi si.

Sisije ɔ, e ye ha mɛ kaa a maa pee tsakemihi ngɛ a si himi mi. Se ligbi ko ɔ, a susu daa ligbi ngmami ɔ he. Ngmami ɔ ji, Yohane 8:31. Yesu de ngɛ lejɛ ɔ ke: “Ke nyɛ pɛtɛ ye munyu ɔ he ɔ, lɛɛ nyɛ maa pee ye kaseli nitsɛnitsɛmɛ.” Enɛ ɔ ha nɛ a de a he ke: “Waa kɛ níhi ma nyɛ maa sã afɔle konɛ waa pee wa si himi kpokploo.” A jua we ngua nɛ a ngɛ ɔ kɛ ní kpa komɛ, nɛ a hia kɛ ho asafo ko nɛ hia fiɛɛli fuu ɔ mi ya. Amlɔ nɛ ɔ, a ji blɔ gbali. A yeɔ bua kɛ maa Matsɛ Yemi Asahi, nɛ a yeɔ bua ngɛ kpe nguahi a sisi hulɔ. Kɛ e peeɔ mɛ kɛɛ? A de ke: “Wa bua jɔ wawɛɛ kaa wa pee wa si himi kpokploo. Nɔ́ he je ji kaa waa kɛ ga nɛ Yehowa asafo ɔ woɔ wɔ ɔ tsuɔ ní.”

MOO YA O HƐ MI NGƐ MAWU JAMI MI

Salomo ngma ke: “Hyɛ o hɛ mi tɛɛ. Ko plɛ o yi kɛ ya hiɛ, loo hiɛ.” (Abɛ 4:25) Ke lɔle kudɔlɔ hɛɛ lɔle ɔ, e hyɛɛ e hɛ mi tɛɛ, nɛ e ha we nɛ nɔ́ ko nɛ je e juɛmi ngɛ blɔ ɔ nɔ. Jã kɛ̃ nɛ e sɛ kaa wɔ hu wa ha nɛ nɔ́ ko nɛ je wa juɛmi ngɛ Mawu jami mi otihi nɛ waa kɛ ma wa hɛ mi ɔ a nɔ.

Mɛni Mawu jami mi otihi o kɛ ma nyɛ maa ma o hɛ mi? O kɛ o he ma nyɛ maa wo be tsuo sɔmɔmi ní tsumi ɔ mi. Eko ɔ, asafo ko ngɛ nɛ a zugba  kpɔ ɔ kle, se a be fiɛɛli fuu. Ke o kɛ asafo ko kaa jã he kɛ we ɔ, o ma nyɛ ma ya ye bua jamɛ a asafo ɔ. Aloo eko ɔ, asafo ko ngɛ nɛ a ngɛ fiɛɛli babauu, se asafo mi nikɔtɔmahi kɛ asafo mi sɔmɔli enyɔ ko pɛ lɛ a ngɛ. Anɛ o ma nyɛ ma ya ye bua asafo ko kaa jã lo? Mɛni he je nɛ o kɛ kpokpa nɔ hyɛlɔ ɔ susuu we he konɛ o hyɛ keji o ma nyɛ ma ya ye bua lo? Ke o suɔ nɛ o ya sɔmɔ ngɛ he ko nɛ e kɛ ɔ, o ma nyɛ ma bi konɛ a tsɔɔ mo asafohi nɛ a hia yemi kɛ buami. *

Nyɛ ha nɛ wa susu Yesaya 62:10 he ekohu nɛ waa hyɛ. Eko ɔ, Yuda bi ɔmɛ a ti ni komɛ bɔ mɔde wawɛɛ nɛ a dla gbɛjegbɛ nɛ yaa Yerusalem ɔ nɔ konɛ e nɔ nyɛɛmi nɛ ko ye ha Mawu we bi ɔmɛ. Ke o ngɛ mɔde bɔe konɛ o su Mawu jami mi otihi a he ɔ, o kɔni mi nɛ ko wo nyu. Mawu maa ye bua mo konɛ o nyɛ nɛ o su jamɛ a oti ɔmɛ a he. Be tsuaa be ɔ, “ke o maa pee nɔ́ ko ɔ, susu he saminya.” Moo sɔle kɛ ha Yehowa konɛ e ha mo nile nɛ o kɛ tsu níhi nɛ maa tsi mo blɔ ɔ a he ní. Ke o pee jã a, nyagbenyagbe ɔ, o maa na kaa Yehowa maa ye bua mo.Abɛ 4:26.

^ kk. 8 A tsake biɛ ɔ.

^ kk. 18 Hyɛ Organized to Do Jehovah’s Will womi ɔ, ba fa 111-112.