Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  June 2014

Sane Bimihi Nɛ Je Ní Kaneli A Ngɔ

Sane Bimihi Nɛ Je Ní Kaneli A Ngɔ

Anɛ ke Kristofo no ko gbo ɔ, a ma nyɛ maa sã lɛ lo?

Ngmami ɔ tsɔɔ we kaa ke nɔ gbo nɛ a sã lɛ ɔ, tɔmi ngɛ he.

Baiblo ɔ tsɔɔ ni komɛ nɛ a gbo nɛ a sã a gbogboehi loo a wuhi. (Yosh. 7:25; 2 Kron. 34:4, 5) Eko ɔ, nihi ma susu kaa jamɛatsɛmɛ ɔmɛ a ní peepeehi a he je nɛ a sã mɛ ɔ nɛ. Se pi be tsuaa be nɛ e ngɛ jã.

Enɛ ɔ he nɔ hyɛmi nɔ́ ji Matsɛ Saul kɛ e binyumu etɛ ɔmɛ nɛ a gbo ɔ. Mɛ ni eywiɛ ɔmɛ tsuo gbo ngɛ ta nya. Jamɛ a be ɔ mi ɔ, a kɛ Filisti bi ɔmɛ ngɛ ta hwue. Saul binyumu ɔmɛ a kpɛti nɔ kake ji Yonatan. E ji David huɛ nɛ e fiɛ we e he kulaa. Benɛ Israel bi nɛ a ngɛ Yabesh Gilead ɔ nu kaa Saul kɛ e bimɛ ɔmɛ gbo ngɛ ta nya a, a ya muɔ a gbogboe ɔmɛ nɛ a sã, nɛ a pu a wu ɔmɛ. Pee se ɔ, David je jamɛ Israel bi ɔmɛ a yi ngɛ nɔ́ nɛ a pee ɔ he.1 Sam. 31:2, 8-13; 2 Sam. 2:4-6.

Ngmami ɔ tsɔɔ kaa a ma tle nihi nɛ a gbo ɔ si. Enɛ ɔ tsɔɔ kaa Mawu maa ngɔ kɛ ba wami mi ekohu. Ke nɔ ko gbo nɛ a sã lɛ jio, a pu lɛ jio, Yehowa ma nyɛ maa ngɔ jamɛatsɛ ɔ kɛ ba wami mi ekohu kɛ nɔmlɔ tso ehe. Enɛ ɔ he ɔ, benɛ Matsɛ Nebukadnezar fã kaa a sake Hebri bi anɔkualetsɛmɛ etɛ ɔmɛ kɛ wo flɔnɔɔ kɛ e mi la gegeege ɔ mi ɔ, a yi gbeye, ejakaa a le kaa ke a gbo ɔ, Mawu ma nyɛ ma tle mɛ si. (Dan. 3:16-18) Jã kɛ̃ nɛ e ji ngɛ Yehowa sɔmɔli anɔkualetsɛmɛ nɛ a gbo ngɛ Nazi tsu womi he ɔmɛ nɛ a sã mɛ ɔ hu a blɔ fa mi. Mawu sɔmɔli anɔkualetsɛmɛ fuu gbo ngɛ oplɛmihi kɛ ní kpahi a dɛ mi nɛ́ a nɛ a wuhi po. Se kɛ̃ ɔ, Mawu ma tle mɛ si.Kpoj. 20:13.

Pi nɔ nɛ e gbo ɔ nɔmlɔ tso kɛ e wuhi a nya nɛ Yehowa ma bua kɛ tle lɛ si. Wa na enɛ ɔ ngɛ Kristofohi nɛ a pɔ mɛ nu nɛ Mawu ma tle mɛ si kɛ ho hiɔwe ya a, a blɔ fa mi. Benɛ Yesu gbo ɔ, Mawu ha nɛ e ‘ba wami mi kaa mumi.’ Jã kɛ̃ nɛ ke a tle Kristofohi nɛ a pɔ mɛ nu ɔ si ɔ, a ma ha mɛ mumi mi nɔmlɔ tso. A kɛ a helo nya nɔmlɔ tso ɔ fã ko fã ko be hiɔwe yae.1 Pet. 3:18; 1 Kor. 15:42-53; 1 Yoh. 3:2.

Wa ngɛ hemi kɛ yemi kaa ngɛ bɔ nɛ a maa pee wa gbogboe ha tsuo se ɔ, Mawu ma tle wɔ si kaa bɔ nɛ e wo si ɔ. (Níts. 24:15) E ngɛ mi kaa eko ɔ, wa be bɔ nɛ Mawu plɛ kɛ tle nihi si blema, kɛ bɔ nɛ e ma plɛ kɛ tle nihi si hwɔɔ se ɔ sisi nue fitsofitso mohu lɛɛ, se kɛ̃ ɔ, wa ngɛ nɔ mi mami kaa Yehowa maa pee jã. E tle Yesu si kɛ “ma enɛ ɔ nɔ mi.”Níts. 17:31; Luka 24:2, 3.

E sa nɛ Kristofohi nɛ a susu bɔ nɛ nihi nɛ ngɛ he nɛ a ngɛ ɔ buɔ nɔ sami aloo nɔ pumi ha, kɛ mlaa nɛ kɔɔ nɔ sami aloo nɔ pumi he ɔ he loko a ma a juɛmi nya si. (2 Kor. 6:3, 4) Lɔ ɔ se ɔ, a maa sã nɔ ɔ jio, a maa pu lɛ jio, nɔ ɔ kɛ e weku li a sane ji lɔ ɔ nɛ.