Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  March 2014

Weku Mawu Jami—Anɛ O Ma Nyɛ Ma Ha Nɛ E Ngɔ Lo?

Weku Mawu Jami—Anɛ O Ma Nyɛ Ma Ha Nɛ E Ngɔ Lo?

Bitsɛ ko nɛ ngɛ Brazil ɔ de ke: “Ke wa ngɛ Weku Mawu Jami pee ɔ, behi fuu ɔ, e ngɔɔ hluu kaa ke i ha we nɛ wa kpa a, wa peeɔ kɛ ya siɔ nyɔ mi kpɛti.” Wekuyi ko nɛ e ngɛ Japan ɔ tsɔɔ kaa ke a ngɛ Weku Mawu Jami pee ɔ, e binyumuyo ko nɛ e ye jeha nyɔngma a sume kaa a kpa. Mɛni he je? Tsɛ ɔ de ke: “Ni kasemi ɔ ngɔɔ ha lɛ wawɛɛ.”

Ngɛ anɔkuale mi ɔ, pi jokuɛwi tsuo nɛ Weku Mawu Jami ngɔɔ ha mɛ. Mɛni he je? Tsɛ ko nɛ ngɛ Togo ɔ de ke: “E sɛ nɛ Yehowa jami nɛ ti nɔ.” Se ke a ha we nɛ bua jɔmi nɛ hi weku Mawu jami mi ɔ, e ma nyɛ maa ti nɔ. Wekuhi fuu yɔse kaa weku Mawu jami ma nyɛ maa pee “bua jɔmi” kaa bɔ nɛ Yesaya womi ɔ de ɔ.—Yes. 58:13, 14.

Tsɛmɛ nɛ a ji Kristofohi ɔ to he hɛ kaa loko a weku mi bimɛ ɔmɛ a bua maa jɔ weku Mawu jami he ɔ, ja a ha nɛ e ngɔ. Ralf nɛ e ngɛ biyihi etɛ kɛ binyumu kake ɔ tsɔɔ kaa a weku Mawu jami ɔ ngɛ kaa fiɛmi kɛ muɔ ní peemi ko, se pi ní kasemi; nɔ tsuaa nɔ ngɔɔ e he kɛ woɔ mi. Ngɛ anɔkuale mi ɔ, eko ɔ, be komɛ ngɛ nɛ e yee kaa fɔlɔ ko ma ha nɛ nɔ tsuaa nɔ bua nɛ jɔ ní kasemi ɔ he. Binyɛ ko de ke: “Pi be tsuaa be nɛ i nyɛɔ haa nɛ wa weku Mawu jami ngɔɔ.” Anɛ o ma nyɛ ma ha nɛ o weku Mawu jami ɔ nɛ ngɔ lo?

KOO PEE KPƐII, MO TSAKE NÍHI A HƐ MI

Tsɛ ko nɛ e ngɛ Germany, nɛ e ngɛ bimɛ enyɔ ɔ de ke: “E sɛ nɛ waa pee kpɛii.” Natalia nɛ e ji binyɛ, nɛ e ngɛ bimɛ enyɔ ɔ de ke: “Wa na kaa ke wa tsake níhi a hɛ mi ɔ, e yeɔ bua wa weku ɔ saminya.” Wekuhi fuu peeɔ níhi slɔɔtoslɔɔtohi ngɛ a weku Mawu jami ɔ mi. Cleiton ji tsɛ ko nɛ e ngɛ Brazil nɛ e ngɛ bimɛ enyɔ. Nɔ kake ye jeha 17 nɛ nɔ kake hu ye jeha 14. Cleiton de ke: “Weku mi  bimɛ ɔmɛ tsuo a bua jɔɔ ní kasemi ɔ he nɛ a kɛ a he woɔ mi.” Ke jeha nɛ ngɛ jokuɛwi ɔmɛ a kpɛti ɔ hiɛ ɔ, fɔli ma nyɛ ma susu mɛ tsuo a he konɛ a ha nɛ a ti nɔ tsuaa nɔ nɛ ná weku Mawu jami ɔ he se. Fɔli ɔmɛ ma nyɛ ma ha nɛ a kase ní slɔɔtoslɔɔtohi ngɛ a weku Mawu jami ɔ mi konɛ bimɛ ɔmɛ a ti nɔ tsuaa nɔ nɛ ná he se.

Mɛni weku komɛ peeɔ konɛ a nyɛ nɛ a pee ní slɔɔtoslɔɔtohi ngɛ a weku Mawu jami ɔ mi? Weku komɛ laa kɛ haa Yehowa kɛ jeɔ a weku Mawu jami ɔ sisi. Juan nɛ e je Mexico ɔ de ke: “Enɛ ɔ nɛ wa peeɔ ɔ dlaa wa juɛmi kɛ haa weku Mawu jami ɔ nɛ nɔ tsuaa nɔ bua jɔɔ kaa e kɛ e he maa wo mi.” E weku ɔ laa lahi nɛ kɔɔ ní nɛ a maa kase jamɛ a gbɔkuɛ ɔ he.

Sri Lanka

Wekuhi fuu peeɔ kake kɛ kaneɔ Baiblo ɔ. Ke ngmami nɛ a maa kane ɔ kɔɔ ni ekpaekpahi a he ɔ, weku mi bimɛ ɔmɛ a ti nɔ tsuaa nɔ kaneɔ munyu nɛ nihi nɛ a tu a he munyu ngɛ Baiblo ɔ mi ɔ a ti nɔ tsuaa nɔ tu ɔ. Tsɛ ko nɛ ngɛ Japan ɔ tsɔɔ kaa “sisije ɔ, jã peemi ye.” Se e binyumu enyɔ ɔmɛ a bua jɔ kaa a fɔli ɔmɛ kɛ mɛ peeɔ jã. Weku komɛ po lɛɛ a peeɔ níhi nɛ a kaneɔ ngɛ Baiblo ɔ mi ɔ he peemi kɛ tsɔɔ. Roger nɛ ji tsɛ ko nɛ ngɛ South Africa nɛ e ngɛ binyumuhi enyɔ ɔ de ke: “Jokuɛwi ɔmɛ naa ní komɛ ngɛ Baiblo ɔ mi nɛ wɔɔ wa nɛ.”

South Africa

Blɔ kpa hu nɛ wekuyihi ma nyɛ maa gu nɔ kɛ tsake níhi nɛ a peeɔ ngɛ a weku Mawu jami ɔ mi ɔ hɛ mi ji, nɛ a ma bla kɛ pee ní komɛ kaa Noa daka a henɔ, aloo Salomo sɔlemi we ɔ henɔ. E biɔ níhi a mi hlami loko weku mi bimɛ ma nyɛ maa pee jã, nɛ enɛ ɔ ma nyɛ ma ha nɛ a ná bua jɔmi. Kaa nɔ hyɛmi nɔ́ ɔ, ngɛ Asia a, jokuɛ yoyo ko nɛ e ye jeha enuɔ ɔ kɛ e fɔli kɛ e na bla nɛ a pee fiɛmi nɔ́ ko ngɛ a we asa a nɔ. Nɔ́ nɛ a pee ɔ tsɔɔ hehi nɛ bɔfo Paulo ya benɛ e ngɛ sɔmɔe kaa ma se sane kpakpa fiɛɛlɔ ɔ. Weku kpahi hu pee fiɛmi níhi nɛ kɔɔ níhi nɛ ngɛ 2 Mose ɔ mi ɔ he. Donald nɛ e ngɛ Togo nɛ e ye jeha 19 ɔ de ke: “Níhi a hɛ mi nɛ wa tsakeɔ ɔ ha nɛ wa weku Mawu jami ɔ ngɔɔ wawɛɛ pe daa a, nɛ e ha nɛ bua jɔmi hu ngɛ wa weku ɔ mi.” Anɛ o susu nɔ́ ko nɛ ke nyɛ pee ngɛ nyɛ weku Mawu jami ɔ mi ɔ, e ma ha nɛ e ngɔ ɔ he lo?

United States of America

E HE HIA NƐ O DLA O HE

E ngɛ mi kaa níhi a hɛ mi nɛ a tsakeɔ kɛ kpɛii nɛ a pee we ngɛ weku Mawu jami mi ɔ haa nɛ weku Mawu jami ngɔɔ mohu lɛɛ, se he dlami hu he hia. Be komɛ ɔ, pɔ tɔɔ jokuɛwi ɔmɛ a he, lɔ ɔ he ɔ, e sa nɛ tsɛmɛ nɛ a le níhi nɛ a bimɛ ɔmɛ a bua maa jɔ he. E sa nɛ a dla a he saminya hulɔ. Bitsɛ ko de ke: “Ke i dla ye he ɔ, lɔ ɔ haa nɛ weku mi bimɛ ɔmɛ tsuo náa weku Mawu jami ɔ he se saminya.” Tsɛ ko nɛ ngɛ Germany ɔ tsɔɔ kaa e sɛɛ hlami nɛ e deɔ e weku mi bimɛ ɔmɛ níhi nɛ a maa kase ngɛ otsihi nɛ maa ba a mi. Tsɛ ko nɛ ngɛ Benin nɛ e ngɛ bimɛ ekpa nɛ a ti nɔ ko yi jeha nyɔngma kɛ etɛ lolo ɔ tsɔɔ kaa ke e to blɔ nya kaa a maa hyɛ asafo ɔ video ɔ eko ɔ, e sɛɛ hlami nɛ e ngmaa sane bimihi nɛ a maa da nɔ kɛ susu he. Ngɛ anɔkuale mi ɔ, he dlami haa nɛ weku Mawu jami nuɔ tso.

Ke weku mi bimɛ ɔmɛ le níhi nɛ a ma susu he ɔ kɛ sɛ hlami ɔ, a nyɛɔ sɛɛɔ he ní ngɛ otsi ɔ mi, nɛ enɛ ɔ haa nɛ a kɛ bua jɔmi hyɛɛ ní kasemi ɔ blɔ. Nɛ ke a ha nɔ tsuaa nɔ ní tsumi ɔ, e maa na kaa hu e ngɛ blɔ nya ní tsumi ngɛ weku Mawu jami ɔ mi.

NYƐƐ PEE NYƐ WEKU MAWU JAMI Ɔ DAA

E yee ha wekuhi fuu kaa a maa pee a weku Mawu jami ɔ daa.

Tsɛmɛ fuu tsuɔ ní ngmlɛfiahi fuu konɛ a nyɛ nɛ a hyɛ a weku ɔmɛ a nɔ. Kaa nɔ hyɛmi nɔ́ ɔ, tsɛ ko nɛ e ngɛ Mexico ɔ jeɔ we mi kɛ yaa ní tsumi mɔtu ngmlɛ ekpa, nɛ e ba suu we mi gbɔkuɛ ngmlɛ kpaanyɔ. Jehanɛ se hu ɔ, ligbi komɛ ngɛ nɛ Mawu jami mi ní tsumi kpa komɛ ma ha nɛ wekuhi nɛ tsake be nɛ a kɛ peeɔ a Weku Mawu Jami ɔ.

Se e sa nɛ waa bɔ mɔde nɛ waa pee wa weku Mawu jami ɔ daa. Jokuɛ yoyo ko nɛ e ngɛ Togo nɛ e ye jeha 11 nɛ a tsɛɛ lɛ ke Loïs de ngɛ e weku ɔ he ke, “E ngɛ mi kaa be komɛ ngɛ nɛ ní komɛ haa wa kpɛɛ se kɛ jeɔ wa weku Mawu jami ɔ sisi mohu lɛɛ, se wa peeɔ daa.” O na nɔ́ he je nɛ weku komɛ peeɔ a weku Mawu jami ɔ mla ngɛ otsi ɔ mi ɔ lo? A peeɔ jã bɔ nɛ pee nɛ ke nɔ́ ko nɛ a hyɛ we blɔ ba po mi po ɔ, a nyɛ nɛ a pee be kpa ngɛ otsi ɔ mi.

Mɛni he je nɛ a tsɛɛ ní peemi nɛ ɔ ke “weku Mawu jami” ɔ? A tsɛɛ lɛ jã, ejakaa e piɛɛ jami nɛ wa jaa Yehowa a he. Ha nɛ o weku mi bimɛ ɔmɛ tsuo nɛ a ‘je Yehowa yi’ daa otsi. (Hos. 14:2) E ba mi kaa jamɛ a be ɔ maa pee bua jɔmi be kɛ ha weku mi bimɛ ɔmɛ tsuo, ejakaa ‘bua jɔmi nɛ Yehowa haa nɔ ɔ, nɛ woɔ nɔ he wami.’—Neh. 8:9, 10.