“Ke nyɛ hu nyɛ na ní nɛ ɔmɛ tsuo ɔ, nyɛɛ le kaa Nɔmlɔ Bi ɔ su si ta; e ngɛ agbo ɔ nya haa kɛ ma.”MAT. 24:33.

1, 2. (a) Mɛni ma ha nɛ eko ɔ, wa hɛ maa je nɔ́ ko nɔ ɔ? (b) Mɛni wa le ngɛ Mawu Matsɛ Yemi ɔ he?

EKO Ɔ, o yɔse kaa ke nɔ́ ko ya nɔ ngɛ nihi a hɛ mi ɔ, e slo bɔnɛ a ti nɔ tsuaa nɔ bɔɔ he amaniɛ ha. Jã kɛ̃ nɛ ke nɔ ko be he wami nɛ dɔkita ya hyɛ lɛ ɔ, eko ɔ, pi nɔ́ tsuaa nɔ́ nɛ dɔkita a de ɔ nɛ e nyɛɔ kaiɔ. Aloo nɔ ko ngɛ nɛ eko ɔ, e safe aloo e hɛngmɛ nya glaasi ngɛ e kasa nya haa se e nɛ. Mɛni heje nɛ e baa jã a? Níhi a mi hlali tsɔɔ kaa ke wa ngɛ níhi fuu pee ngɛ be kake mi ɔ, e nyɛɔ baa jã. E ngɛ kaa nɔ́ nɛ nɔ ɔ hɛngmɛ yu. Enɛ ɔ tsɔɔ heii kaa wa kalegbɔ ɔ be nyɛe ma tsu níhi enyɔ a he ní ngɛ be kake mi.

2 Mwɔnɛ ɔ, nihi fuu a hɛngmɛ yu, enɛ ɔ he ɔ, a li níhi nɛ ngɛ nɔ yae ngɛ je ɔ mi. Eko ɔ, a maa kplɛɛ nɔ kaa kɛ je jeha 1914 kɛ ma nɛ ɔ, níhi nɛ ngɛ nɔ yae ngɛ je ɔ mi ɔ tsake wawɛɛ mohu lɛɛ, se a li nɔ́ nɛ tsakemi nɛ ɔmɛ tsɔɔ. Se akɛnɛ wɔɔ lɛɛ wa kaseɔ Baiblo ɔ heje ɔ, wa le kaa Mawu Matsɛ Yemi ɔ ba ngɛ jeha 1914 ɔ mi benɛ a wo Yesu Matsɛ ngɛ hiɔwe ɔ. Se Yehowa ha we sɔlemi nɛ ji, “O matsɛ yemi ɔ nɛ ba; a pee nɔ́ nɛ o suɔ ngɛ zugba a nɔ kaa bɔnɛ a peeɔ ngɛ hiɔwe ɔ” heto lolo. (Mat. 6:10) E ngɛ heii kaa Mawu ma ha sɔlemi nɛ ɔ heto kɛ pi si benɛ e ma kpata je yaya nɛ ɔ hɛ mi ɔ. Ja Mawu kpata je yaya nɛ ɔ  hɛ mi loko a ma nyɛ maa pee e suɔmi nya ní ngɛ zugba a nɔ kaa bɔnɛ a peeɔ ngɛ Hiɔwe ɔ.

3. Mɛni Baiblo ɔ nɛ wa kaseɔ ɔ ye bua wɔ nɛ wa le?

3 Akɛnɛ wa kaseɔ Baiblo ɔ be tsuaa be heje ɔ, wa na kaa gbamihi fuu ngɛ mi bae. Se e be jã kulaa ngɛ nihi fuu a blɔ fa mi! Akɛnɛ a dii si himi ɔ mi níhi a se be tsuaa be heje ɔ, a nɛ́ odase yemihi nɛ tsɔɔ kaa Kristo ngɛ nɔ yee kaa Matsɛ kɛ je jeha 1914, nɛ e be kɛe nɛ e kɛ Mawu kojomi maa ba nihi a nɔ. Se mo bi o he ke: Anɛ i heɔ yeɔ kaa ngɛ anɔkuale mi ɔ, nyagbe ɔ su si ta nɛ níhi nɛ ngɛ nɔ yae ɔ hu tsɔɔ jã niinɛ lo? Ke lingmi nɛ ɔ pɛ nɛ o ba pee Odasefono po ɔ, mɛni nɔ o kɛ o juɛmi maa? Ngɛ heto saisaa nɛ eko ɔ, wa ma ha a tsuo se ɔ, e sa nɛ wa susu yi mi tomihi etɛ a heje nɛ wa le kaa e be kɛe nɛ a maa pee Mawu suɔmi nya ní ngɛ zugba a nɔ kɛ pi si ɔ he nɛ waa hyɛ.

OKPƆNGƆ NƆ HILI ƆMƐ JE A HE KPO

4, 5. (a) Kɛ je jeha 1914 kɛ ma nɛ ɔ, mɛni Yesu ngɛ pee? (Moo hyɛ foni nɛ ngɛ nikasemi ɔ sisije ɔ.) (b) Okpɔngɔ nɔ hili etɛ ɔ peeɔ mɛni he okadi, nɛ mɛni blɔ nɔ jamɛ a gbami ɔ ngɛ mi bae ngɛ?

4 Ngɛ jeha 1914 ɔ mi ɔ, a wo Yesu Kristo Matsɛ. Kpojemi womi ɔ tu e he munyu kaa e hii si ngɛ okpɔngɔ hiɔ ko nɔ. Benɛ a wo lɛ Matsɛ ɔ, amlɔ nɔuu nɛ e hia ta wo Satan je yaya a. (Kane Kpojemi 6:1, 2.) Nɔ́ nɛ Kpojemi yi 6 de ɔ ha nɛ wa na kaa ke a to Mawu Matsɛ Yemi ɔ sisi ɔ, je ɔ mi si himi ma puɛ mlamlaamla. Ta, hwɔ, gbenɔ hiɔ, kɛ ní kpahi nɛ taneɔ nɔ yi maa ya nɔ ngɛ je ɔ mi. Okpɔngɔ nɔ hili etɛ nyɛɛ Yesu Kristo se. Okpɔngɔ nɔ hili nɛ ɔmɛ peeɔ haomihi nɛ maa ba a he okadi.Kpoj. 6:3-8.

5 Kaa bɔnɛ a gba kɛ fɔ si ɔ, ‘ta hwumi’ ha nɛ tue mi jɔmi be zugba a nɔ. E ngɛ mi kaa mahi babauu wo si kaa a maa pee kake kɛ tsu ní nɛ a maa di tue mi jɔmi se mohu lɛɛ, se e yɛ nya. Je Mi Ta Kekleekle ɔ lɛ je enɛ ɔ sisi. A hwu tahi fuu ngɛ lɔɔ se nɛ a kpata nihi babauu a hɛ mi ngɛ zugba a nɔ. Tue mi jɔmi ko tue mi jɔmi ko be zugba a nɔ hu. E ngɛ mi kaa mahi fuu ná sika babauu, nɛ adesahi a nile ngɛ klamahi a he ɔ hu ya hɛ mi kɛ je jeha 1914 kɛ ma nɛ ɔ mohu lɛɛ, se a nyɛ we nɛ a tsi hwɔ nya. Jã kɛ̃ nɛ a nyɛ we nɛ a ha nɛ adesahi nɛ a hi si slɔkee. Jehanɛ se hu ɔ, atsinyɛ jemi ko be he kaa gbenɔ hiɔhi, adebɔ mi oslaahi, kɛ ‘ní kpahi nɛ taneɔ nɔ yi’ ɔ, ngɛ nimli ayɔhi abɔ gbee. Ní nɛ ɔmɛ a he ngɛ gbeye wawɛɛ, nɛ a ngɛ bae nɔtonɔto nɛ a ngɛ nihi babauu a hɛ mi kpatae pe be ko nɛ be ngɛ adesahi a yinɔ sane mi. Anɛ o le nɔ́ nɛ enɛ ɔ tsɔɔ lo?

Okpɔngɔ nɔ hili ɔmɛ ya nɔ nɛ a ha nɛ je ɔ mi si himi mi wa wawɛɛ nitsɛ (Hyɛ kuku 4, 5)

6. Mɛnɔmɛ le kaa Baiblo gbamihi ngɛ mi bae, nɛ mɛni enɛ ɔ ha nɛ a peeɔ?

6 Je mi Ta Kekleekle ɔ nɛ a hwu ɔ kɛ aja nɛ ba je ɔ mi tsuo ɔ, ha nɛ nihi fuu hao. Se Kristofoli nɛ a pɔ mɛ nu ɔ hyɛ blɔ kaa Je Ma Amɛ A Be ɔ, aloo ‘ma jeli ɔmɛ a be ɔ’ maa ba nyagbe ngɛ jeha 1914 ɔ mi. (Luka 21:24) A li nɔ́ tutuutu nɛ maa ba ngɛ jamɛ a jeha a mi. Se kɛ̃ ɔ, a le kaa Mawu Matsɛ Yemi ɔ ma bɔni nɔ yemi ngɛ jamɛ a jeha a mi. Benɛ a nu Baiblo gbami ɔ sisi ɔ, a kɛ kã fiɛɛ kɛ ha nihi kaa Mawu nɔ yemi ɔ je sisi. A wa fiɛɛli nɛ ɔmɛ a ti nihi fuu yi mi. Yi mi nɛ a wa mɛ ɔ ha nɛ Baiblo gbami kpa ko hu ba mi. Jehahi fuu a se ɔ, nihi nɛ a teɔ si kɛ woɔ Matsɛ Yemi ɔ ‘wo mlaa yayahi’ kɛ si Matsɛ yemi sane kpakpa fiɛɛli ɔmɛ. A wa mɛ yi mi, a wo a ti ni komɛ tsu, nɛ a gbe a ti ni komɛ po.La 94:20; Kpoj. 12:15.

7. Mɛni heje nɛ nihi fuu li níhi nɛ ngɛ nɔ yae ngɛ je ɔ mi ɔ?

7 Ke wa ngɛ odase yemihi fuu nɛ tsɔɔ kaa Mawu Matsɛ Yemi ɔ bɔni nɔ yemi ngɛ hiɔwe ɔ, lɛɛ mɛni heje nɛ nihi li mɔ? Mɛni heje nɛ a li kaa níhi nɛ ngɛ nɔ yae  ngɛ je ɔ mi ɔ ji Baiblo gbamihi a mi bami kaa bɔnɛ Mawu webi ngɛ fiɛɛe jehahi babauu ji nɛ ɔ? Anɛ a je blɔ nɛ a ma a hɛ kɛ to nɔ lo? (2 Kor. 5:7) Anɛ a he nɛ a kɛ wo adesahi a sanehi a mi vii ɔ nɛ ha nɛ a li kaa Mawu ngɛ nɔ́ ko pee ɔ lo? (Mat. 24:37-39) Anɛ Satan sisi a ti ni komɛ lo? (2 Kor. 4:4) E biɔ hemi kɛ yemi kɛ níhi a se yomi loko wa maa le nɔ́ nɛ Mawu Matsɛ Yemi ɔ ngɛ pee. Wa bua jɔ wawɛɛ kaa wɔɔ lɛɛ wa le níhi tutuutu nɛ ngɛ nɔ yae ɔ!

NÍ YAYA PEEMI NGƐ NƆ YAE WAWƐƐ

8-10. (a) Mɛni blɔ nɔ gbami nɛ ngɛ 2 Timoteo 3:1-5 ɔ ngɛ mi bae ngɛ? (b) Mɛni heje nɛ wa ma nyɛ ma de ke ní yayami peemi ngɛ nɔ yae wawɛɛ ɔ?

8 Ní yaya peemi ngɛ nɔ yae wawɛɛ nitsɛ. Enɛ ɔ ji yi mi tomi enyɔne heje nɛ wa le kaa e be kɛe kulaa nɛ Mawu Matsɛ Yemi ɔ maa ye zugba a nɔ. Maa pee jeha lafa ji nɛ ɔ, wa na kaa gbami nɛ ngɛ 2 Timoteo 3:1-5 ɔ ngɛ mi bae wawɛɛ nitsɛ. Suhi nɛ Ngmami ɔ tsɔɔ kaa nihi ma je kpo ɔ ngɛ he pɔe nitsɛnitsɛ ngɛ je ɔ mi he tsuaa he. Anɛ o nɛ kaa gbami nɛ ɔ hu ngɛ mi bae wawɛɛ lo? Nyɛ ha nɛ wa susu nɔ hyɛmi ní komɛ a he nɛ waa hyɛ.Kane 2 Timoteo 3:1, 13.

9 Níhi nɛ peeɔ nihi nyakpɛ ngɛ jeha 1940 aloo jeha 1950 ɔ mi ɔ, mwɔnɛ ɔ, jamɛ a ní ɔmɛ pee we nihi nyakpɛ hu. A nyɛɔ peeɔ jamɛ a ní ɔmɛ faa ngɛ nítsumi hehi, hɛja jemihi, fiɛmihi, kɛ ní peepee kpahi a mi. Yiwutso kɛ je mi bami yaya ní peepeehi nɛ mi wa ngɛ nɔ yae ngɛ he tsuaa he. Nihi kɛ a sibi siɔ koli konɛ a le mɛ kaa a ji nihi nɛ a peeɔ basabasa, nɛ a je mi bami puɛ, nɛ a yi mi wa pe nɔ tsuaa nɔ. Ní komɛ nɛ ke a je ngɛ TV nɔ ngɛ jeha 1950 ɔmɛ a mi ɔ nɛ nɔ ko ma de ke e hí kulaa a, mwɔnɛ ɔ lɛɛ, lɔɔ ji nɔ nɛ wekuhi kɛ jeɔ a hɛja. Nihi fuu yɔse kaa nyumu kɛ nyumu kɛ yo kɛ yo nɛ a kɛ a sibi náa bɔmi ɔ a ní peepeehi pɔhe ngɛ hɛja jemihi a mi, nɛ a ngɛ nihi he wami woe konɛ a ngɔ a he kɛ wo mi. Wa bua jɔ wawɛɛ kaa wa le Mawu susumi ngɛ ní nɛ ɔmɛ a he!Kane Yuda 14, 15.

 10 Jehanɛ se hu ɔ, moo ngɔ bɔnɛ jokuɛwi baa a je mi ha be ko nɛ be ɔ kɛ to nɔ́ nɛ yaa nɔ mwɔnɛ ɔ he nɛ o hyɛ. Kaa nɔ hyɛmi nɔ́ ɔ, ngɛ jeha 1950 ɔmɛ a mi ɔ, ke fɔli na nɛ a bimɛ ngɛ sigaleti nue, aloo a ngɛ dã nɛ nya wa nue, aloo a ngɛ do basabasa ko doe ɔ, a tsɔseɔ mɛ. Se mwɔnɛ ɔ, wa pɔɔ amaniɛ bɔmihi nɛ haa nɛ nihi a nya mi jɔɔ numi. Amaniɛ bɔmi nɛ ɔmɛ ekomɛ ji: Jokuɛ ko nɛ e ye jeha 15 hia tu ngɔ wo sukuubi nɛ e kɛ mɛ ngɛ sukuu tsu kake mi ɔ a he. E gbe a kpɛti nihi 2 nɛ e plaa nihi 13. Jokuɛwi komɛ nɛ a ye kɛ je jeha 13 kɛ ya si 19 ɔ ya nu dã nɛ nya wa fuu nɛ a de. A ya gbe yoyo ko nɛ e ye jeha nɛɛ, nɛ a ya tua yoyo ɔ papaa kɛ yoyo ɔ nyɛmi ko. Amaniɛ bɔmi kpa ko hu nɛ ya nɔ ngɛ Asia ma ko mi ɔ tsɔɔ kaa ngɛ yiwutso níhi nɛ a pee ngɛ jeha nyɔngma nɛ be ɔ mi ɔ, nihewi kɛ yihewi ji nihi nɛ a pee jamɛ a ní ɔmɛ a mi fã. Ngɛ anɔkuale mi ɔ, ní yayami peemi ngɛ nɔ yae wawɛɛ nitsɛ, nɛ nɔ ko be nyɛe maa je he atsinyɛ?

11. Mɛni heje nɛ nihi fuu yɔse we kaa níhi ngɛ puɛe ngɛ je ɔ mi ɔ?

11 Bɔfo Petro de ngɛ blɔ nɛ da nɔ ke: “Nyagbe ligbi ɔmɛ a mi ɔ, nɔ he fɛu yeli komɛ maa ba, nɛ nɔ́ nɛ a we akɔnɔ de mɛ ke a pee ɔ, lɔɔ a maa pee. Kikɛmɛ a nimli nɛ ɔmɛ ma de ke, ‘E wo si kaa e maa kpale kɛ ba ekohu, pi jã lo? Jije e ngɛ? Ejakaa kɛ je benɛ wa nɛmɛ ɔmɛ gbo nɛ ɔ, bɔnɛ níhi ngɛ kɛ je benɛ a bɔ je ɔ, jã nɔuu nɛ a ngɛ nɛ ɔ nɛ.’” (2 Pet. 3:3, 4) Mɛni heje nɛ ni komɛ nɛ kaa níhi tsake ɔ? Nɔ́ heje ji kaa ke wa pɔɔ nɔ́ ko nami ɔ, waa kɛ wa juɛmi mɛ jamɛ a nɔ́ ɔ nɔ tsɔ hu. Ke wa huɛ ko nɛ nyu bi ngɛ waa kɛ lɛ wa kpɛti subai tsake tlukaa a, eko ɔ, e maa pee wɔ nyakpɛ. Se ke nihi a ní peepee ngɛ tsakee bɔɔbɔɔbɔɔ be kɛkɛɛ ɔ, eko ɔ, wa be he hɛ toe. Eko ɔ, nihi a ní peepee nɛ ngɛ tsakee bɔɔbɔɔbɔɔ ɔ be wɔ nyakpɛ pee mohu lɛɛ, se kɛ̃ ɔ, e sa kaa waa na kaa oslaa ngɛ he.

12, 13. (a) Mɛni heje nɛ e sɛ kaa níhi nɛ ngɛ nɔ yae ngɛ je ɔ mi ɔ nɛ wo wa kɔni mi nyu ɔ? (b) Mɛni maa ye bua wɔ konɛ wa nyɛ nɛ waa da níhi nɛ ngɛ nɔ yae ngɛ ‘nyagbe ligbi nɛ ɔmɛ’ a mi ɔ nya?

12 Bɔfo Paulo bɔ wɔ kɔkɔ kaa ngɛ “nyagbe ligbi ɔmɛ a mi ɔ, je mi maa wa.” (2 Tim. 3:1) Se wa ma nyɛ maa da nya, enɛ ɔ he ɔ, e he hia we nɛ waa tu nya fo. Ngɛ Yehowa, e mumi ɔ, kɛ Kristofoli asafo ɔ yemi kɛ buami nya a, wa ma nyɛ maa da níhi tsuo nɛ maa wo wa kɔni mi nyu loo níhi nɛ maa wo wa he gbeye ɔ a nya. Wa ma nyɛ maa ya nɔ maa ye Yehowa anɔkuale. Mawu ma ha wɔ “he wami kpetekpleenyɛ” konɛ wa nyɛ nɛ waa da haomihi a nya.2 Kor. 4:7-10.

13 E sa nɛ wa kadi kaa benɛ Paulo ngɛ nyagbe ligbi ɔmɛ a he munyu tue ɔ, e je e munyu ɔ sisi ke, “o hɛ nɛ hi nɔ kaa.” Jã nɛ e de ɔ tsɔɔ kaa gbami nɛ kɔɔ nyagbe ligbi ɔmɛ a he ɔ maa ba mi kokooko. Atsinyɛ jemi ko be he kaa níhi maa ya nɔ ma puɛ kulaa kɛ ya si benɛ Yehowa ma kpata je yaya nɛ ɔ hɛ mi. Yinɔ sane ngmali tsɔɔ kaa adesahi ngɛ je kɛ wɛ ɔ a je mi bami puɛ kulaa. Amlɔ nɛ ɔ, nihi ngɛ je kɛ wɛ ɔ a je mi bami puɛ kulaa pe be ko nɛ be ɔ. Eko ɔ, ní nɛ ɔmɛ nɛ ngɛ nɔ yae ɔ be nihi fuu a tsui nɔ puee mohu. Se wɔɔ lɛɛ e sa nɛ wa ná nɔ mi mami kaa níhi nɛ ngɛ nɔ yae kɛ je jeha 1914 kɛ ma nɛ ɔ tsɔɔ kaa e be kɛe nɛ Mawu Matsɛ Yemi ɔ ma je ní yayamihi tsuo kɛ je zugba a nɔ.

YINƆ NƐ Ɔ BE BEE

14-16. Mɛni ji yi mi tomi etɛne heje nɛ wa he ye kaa e be kɛe nɛ Mawu Matsɛ Yemi ɔ maa “ba” a?

14 Níhi nɛ ngɛ nɔ yae ngɛ Mawu webi a kpɛti ɔ hu ji yi mi tomi etɛne heje nɛ wa ngɛ nɔ mi mami kaa e be kɛe nɛ nyagbe  ɔ maa ba. Kaa nɔ hyɛmi nɔ́ ɔ, loko a maa to Mawu Matsɛ Yemi ɔ sisi ngɛ hiɔwe ɔ, anɔkualetsɛmɛ nɛ a pɔ mɛ nu ɔ kɛ kã ngɛ Mawu sɔmɔe momo. A hyɛ blɔ kaa ní komɛ maa ba ngɛ jeha 1914 ɔ mi. Benɛ jamɛ a ní ɔmɛ bɛ ɔ, kɛ a pee a ní ha kɛɛ? A ti nihi fuu ya nɔ ye Yehowa anɔkuale ngɛ kahi kɛ yi mi wamihi a mi. Nihi nɛ a pɔ mɛ nu nɛ ɔ a kpɛti nihi babauu ya nɔ nɛ a ye Yehowa anɔkuale jehahi fuu kɛ ya si benɛ a gbe a zugba a nɔ sɔmɔmi nítsumi ɔ nya.

15 Benɛ Yesu ngɛ níhi nɛ maa ya nɔ ngɛ je nɛ ɔ nyagbe ɔ mi ɔ he munyu tue ɔ, e gba kɛ fɔ si ke: “Yinɔ nɛ ɔ be bee, ja ní nɛ ɔmɛ tsuo ba mi lolo.” (Kane Mateo 24:33-35.) Wa nu sisi kaa “yinɔ nɛ ɔ” nɛ Yesu tu he munyu ɔ kɔɔ Kristofoli nɛ a pɔ mɛ nu ɔ a kuuhi enyɔ a he. Kekleekle kuu ɔ ngɛ je mi loko e su jeha 1914, nɛ a nu sisi kaa a wo Kristo Matsɛ ngɛ jamɛ a jeha a mi. A pɔ nihi nɛ a ngɛ kekleekle kuu nɛ ɔ mi ɔ a ti ni komɛ nu loko e su jeha 1914, nɛ a ti ni komɛ lɛɛ a pɔ mɛ nu ngɛ jamɛ a jeha a mi.Rom. 8:14-17.

16 Kuu enyɔne ɔ ji Kristofoli nɛ a pɔ mɛ nu nɛ a ba ná kekleekle kuu ɔ mi bimɛ ɔmɛ. Tsa pi kaa a ngɛ je mi benɛ kekleekle kuu ɔ mi bimɛ ɔmɛ hu ngɛ je mi ɔ kɛkɛ, se mohu Mawu kɛ mumi klɔuklɔu ɔ pɔ mɛ nu ngɛ jamɛ a be ɔ mi. Enɛ ɔ he ɔ, pi nihi nɛ a pɔ mɛ nu nɛ a ngɛ mwɔnɛ ɔ tsuo nɛ a piɛɛ “yinɔ nɛ ɔ” nɛ Yesu tu he munyu ɔ he. Mwɔnɛ ɔ, nihi nɛ a ngɛ kuu enyɔne ɔ mi ɔ a jehahi ya hɛ mi saii. Se kɛ̃ ɔ, nɔ́ nɛ Yesu de ngɛ Mateo 24:34 ɔ ha nɛ wa ngɛ nɔ mi mami kaa “yinɔ nɛ ɔ be bee” nɛ amanehlu ngua a maa je sisi. Enɛ ɔ hu ha nɛ wa ngɛ nɔ mi mami nɛ mi wa kaa e be kɛe kulaa nɛ Mawu Matsɛ Yemi ɔ maa kpata nimli yayami ɔmɛ a hɛ mi, nɛ e kɛ je ehe nɛ a peeɔ dami ní ngɛ mi ɔ maa ba.2 Pet. 3:13.

E BE KƐE NƐ KRISTO MAA GBE E KUNIMI YEMI Ɔ NYA

17. Ngɛ gbamihi nɛ wa susu a he ɔ nya a, mɛni o ma nyɛ ma de?

17 Mɛni wa ma nyɛ ma de ngɛ Baiblo gbamihi nɛ a ngɛ mi bae nɛ wa susu a he ɔ he? Kaa bɔnɛ Yesu de ɔ, wa li ligbi ɔ kɛ ngmlɛfia a tutuutu mohu. (Mat. 24:36; 25:13) Se kaa bɔnɛ Paulo de ɔ, wa ma nyɛ maa le “be nɔ́ nɛ mi nɛ wa ngɛ ɔ,” nɛ wa le hulɔ. (Kane Romabi 13:11.) Wa ngɛ nyagbe ligbi ɔmɛ a mi. Ke wa susuɔ Baiblo gbamihi, kɛ níhi nɛ Yehowa Mawu kɛ Yesu Kristo ngɛ pee ɔ he ɔ, wa ma nyɛ maa na kaa je nɛ ɔ nyagbe ɔ su si ta haa.

18. Mɛni maa ba nihi nɛ a sume nɛ Mawu Matsɛ Yemi ɔ nɛ ye a nɔ ɔ a nɔ?

18 E be kɛe kulaa nɛ Yesu Kristo nɛ ji okpɔngɔ futaa a Nɔ Hilɔ ɔ kɛ nihi tsuo nɛ a sume kaa e ye a nɔ ɔ maa to ní. A be nyɛe maa tu e nya fo. Jamɛ a be ɔ mi ɔ, nihi fuu kɛ sawale ma kpa ngmlaa ke: ‘Mɛnɔ ma nyɛ maa da nya?’ (Kpoj. 6:15-17) Se Kpojemi yi 7 ɔ ha sane bimi nɛ ɔ heto. Nihi nɛ a pɔ mɛ nu ɔ kɛ “nimli asafo” ɔ maa “da” nya, ejakaa Mawu kplɛɛ a nɔ. Lɔɔ se ɔ, to kpa amɛ a kpɛti “nimli asafo ɔ” ma ná yi baami kɛ gblee amanehlu ngua a mi.Kpoj. 7:9, 13-15.

19. Akɛnɛ o ngɛ nɔ mi mami wawɛɛ kaa e be kɛe nɛ nyagbe ɔ maa ba heje ɔ, mɛni o ngɛ blɔ hyɛe?

19 Ke wa yaa nɔ nɛ wa susuɔ Baiblo gbamihi nɛ a ngɛ mi bae ngɛ wa be nɛ ɔ mi ɔ a he ɔ, Satan je ɔ be nyɛe ma je wa juɛmi kɛ je Yehowa sɔmɔmi nɔ. Wa maa nu níhi nɛ ngɛ nɔ yae ngɛ je ɔ mi ɔ a sisi. E be kɛe nɛ Kristo ma kpata je yaya nɛ ɔ hɛ mi kulaa ngɛ Harmagedon ta a mi. (Kpoj. 19:11, 19-21) Ke a kpata je yaya nɛ ɔ hɛ mi ta a, moo hyɛ bɔnɛ wa bua maa jɔ wawɛɛ ha!Kpoj. 20:1-3, 6; 21:3, 4.