A je neneene Matsɛ ɔ yi, nɛ a wo e hɛ mi nyami kɛ ya neneene.’1 TIM. 1:17.

1, 2. (a) Mɛnɔ ji “neneene Matsɛ” ɔ, nɛ mɛni heje nɛ e da blɔ kaa a tsɛɛ lɛ jã a? (Moo hyɛ foni nɛ ngɛ nikasemi ɔ sisije ɔ.) (b) Mɛni heje nɛ wa suɔ kaa Yehowa nɛ ye wa nɔ ɔ?

MATSƐ SOBHUZA nɛ ji enyɔne ɔ ye Swaziland ma a nɔ maa pee jeha 61 sɔuu. Mwɔnɛ ɔ, nihi yi matsɛ be kɛkɛɛ jã. Eko ɔ, ke o susu jeha nɛ adesahi yeɔ loko a gboɔ ɔ he ɔ, o ma de ke Matsɛ Sobhuza nɛ ji enyɔne ɔ tsɛ yemi ɔ se kɛ wawɛɛ nitsɛ. Se matsɛ ko ngɛ nɛ lɛɛ e be gboe gblegbleegble. Ngɛ anɔkuale mi ɔ, Baiblo ɔ tsɛ lɛ ke, “neneene Matsɛ.” (1 Tim. 1:17) La polɔ ko tsɔɔ wɔ Je Mluku ɔ Matsɛ nɛ ɔ biɛ. E de ke: ‘Yehowa ji Matsɛ kɛ je neneene kɛ yaa neneene.’La 10:16.

2 Ke wa hyɛ jehahi abɔ nɛ Mawu kɛ ngɛ matsɛ yee ɔ, wa naa kaa e slo e nɔ yemi ɔ kulaa ngɛ adesahi a nɔ yemi he. Se bɔnɛ Yehowa plɛɔ kɛ yeɔ nɔ ɔ heje nɛ wa hɛɛ wɔ kɛ suu e he ɔ nɛ. Matsɛ ko nɛ e ye Israel ma a nɔ jeha 40 ɔ je Mawu yi nɛ e de ke: ‘Yehowa naa mɔbɔ; e mi mi hi. E muklii mi fu we mla, se e mɔbɔ nami ɔ mohu hiɛ babauu. Yehowa ngɔ e matsɛ sɛ ɔ kɛ ma si ngɛ hiɔwe, nɛ e ngɛ tsɛ yee ngɛ je ɔ tsuo nɔ.’ (La 103:8, 19) Yehowa ji wa Matsɛ kɛ wa hiɔwe Tsɛ nɛ ngɛ suɔmi hulɔ. Se ngɛ mɛni blɔ nɔ nɛ Yehowa ji wa Tsɛ? Kɛ je Eden atua tsɔmi ɔ se kɛ ma nɛ ɔ, mɛni blɔ nɔ Yehowa guu kɛ tsɔɔ kaa e ji Matsɛ? Sane bimi nɛ ɔmɛ a heto ɔ maa wo wɔ he wami konɛ waa hɛ wɔ kɛ su Yehowa he haa, nɛ wa ja lɛ kɛ wa tsui tsuo.

 NENEENE MATSƐ Ɔ TO WEKU KO SISI NGƐ JE KƐ WƐ

3. Mɛnɔ ji kekleekle nɔ nɛ Mawu bɔ? Mɛnɔmɛ hu nɛ Mawu bɔ kaa e “bimɛ”?

3 Yehowa bua maa jɔ wawɛɛ nitsɛ benɛ e bɔ e Bi kake ɔ! Mawu bui e Bi ɔ kaa nɔ ko nɛ se nami ko be e he. Mohu ɔ, e suɔ e Bi ɔ, nɛ e ha nɛ e piɛɛ e he kɛ bɔ bɔfo ayɔhi abɔ. Bɔfo nɛ ɔmɛ ye mluku. (Kol. 1:15-17) Baiblo ɔ tsɔɔ kaa bɔfo nɛ ɔmɛ kɛ bua jɔmi sɔmɔɔ Yehowa. A ji ‘e sɔmɔli nɛ a peeɔ e suɔmi nya ní.’ Yehowa wo a hɛ mi nyami nɛ e tsɛ mɛ ke e “bimɛ.” Bɔfo ɔmɛ piɛɛ Mawu weku mi bimɛ nɛ a ngɛ je kɛ wɛ ɔ a he.La 103:20-22; Hiob 38:7.

4. Mɛni blɔ nɔ nɛ adesahi ba piɛɛ Mawu weku nɛ ngɛ je kɛ wɛ ɔ he ngɛ?

4 Benɛ Yehowa bɔ hiɔwe kɛ zugba a ta a, e bli e weku nɛ ngɛ je kɛ wɛ ɔ mi. Benɛ Yehowa dla zugba a nɔ saminyayoo konɛ e nyɛ nɛ e baa wami yi ɔ, e bɔ Adam ngɛ e subai nɔ. (1 Mose 1:26-28) Enɛ ɔ he ɔ, e da blɔ kaa Yehowa nɛ ji Bɔlɔ ɔ maa hyɛ blɔ kaa Adam nɛ pee tue bumi kɛ ha lɛ. Akɛnɛ Yehowa ji Tsɛ heje ɔ, e je suɔmi kɛ mi mi himi mi nɛ e tsɔɔ e bimɛ níhi tsuo nɛ e sa kaa a pee. E kɛ blɔ tsɔɔmi nɛ ɔmɛ tsi we Adam nya kaa Adam nɛ ko pee níhi ngɛ e dɛhe.Kane 1 Mose 2:15-17.

5. Mɛni blɔ nya Mawu to konɛ adesahi nɛ a hyi zugba a nɔ?

5 Adesa nɔ yeli bui a sisi bimɛ, se Yehowa lɛɛ e kɛ e sɔmɔli hiɔ si saminya. E ngɛ hɛ kɛ nɔ fɔmi nɛ mi wa ngɛ e sɔmɔli a mi. Enɛ ɔ he ɔ, e kɛ blɔ nya nítsumihi woɔ a dɛ konɛ a tsu he ní. Kaa nɔ hyɛmi nɔ́ ɔ, e ha Adam he blɔ konɛ e hyɛ lohwehi nɛ e bɔ ɔ a nɔ. E ha Adam nítsumi kaa e wo lohwe ɔmɛ biɛ. Nítsumi nɛ ɔ he wa, se bua jɔmi ngɛ mi. (1 Mose 1:26; 2:19, 20) Mawu bɔɛ adesahi fuu si kake konɛ a hyi zugba a nɔ tɔ. Mohu ɔ, e bɔ yo nɛ ji Hawa kɛ ha Adam. Yo nɛ ɔ ji he piɛɛlɔ nɛ sa kɛ ha Adam. (1 Mose 2:21, 22) Lɔɔ se ɔ, e ha Adam kɛ e yo ɔ he blɔ konɛ a fɔ nɛ a hyi zugba a nɔ tsuo. Adam kɛ Hawa hi he ko nɛ tue mi jɔmi kɛ bua jɔmi ngɛ lejɛ ɔ. Jinɛ kɛ yaa kɛ yaa a, a ko pee zugba a tsuo Paradeiso. Kɛkɛ ɔ, adesahi kɛ bɔfohi tsuo nɛ a ngɛ Yehowa weku nɛ ngɛ je kɛ wɛ ɔ mi ɔ ko ja lɛ kɛ ya neneene. Hyɛ hɛ kɛ nɔ fɔmi nɛ ngɛ bua jɔmi nɛ Adam kɛ Hawa ko ná! Enɛ ɔ tsɔɔ kaa Yehowa ji Tsɛ nɛ ngɛ suɔmi wawɛɛ nitsɛ!

ATUA TSƆLI KOMƐ JE A HE KƐ JE MAWU NƆ YEMI Ɔ SISI

6. (a) Mɛni blɔ nɔ atua tsɔmi gu kɛ je sisi ngɛ Mawu weku ɔ mi? (b) Mɛni heje nɛ atua nɛ a tsɔ ɔ tsɔɔ we kaa Mawu nine nyɛ si ɔ?

6 Dɔmi sane ji kaa Adam kɛ Hawa sume kaa Yehowa nɛ ye a nɔ. Mohu ɔ, a ya nyɛɛ Satan se. Satan ji bɔfo ko nɛ e tsɔ Mawu hɛ mi atua. (1 Mose 3:1-6) Atua nɛ Adam kɛ Hawa ya piɛɛ Satan he nɛ a tsɔ ɔ ngɔ haomi kɛ gbenɔ kɛ ba a kɛ a bimɛ a nɔ. (1 Mose 3:16-19; Rom. 5:12) Mawu sɔmɔlɔ ko be zugba a nɔ nɛ e ye mluku hu. Anɛ enɛ ɔ tsɔɔ kaa Mawu nine nyɛ si lo? Anɛ lɔɔ tsɔɔ kaa Mawu yi e sɔmɔli nɛ a ngɛ zugba a nɔ ɔ a nɔ hu lo? Ohoo! Yehowa fiee Adam kɛ Hawa kɛ je Eden abɔɔ ɔ mi konɛ a ko kpale kɛ ya lejɛ ɔ hu, nɛ e ha nɛ Kerubhi ya bu abɔɔ ɔ he. (1 Mose 3:23, 24) Se Mawu tsɔɔ hu kaa e ji Tsɛ nɛ e ngɛ suɔmi. E ma nɔ mi kaa e yi mi nɛ e to kɛ ha adesahi kɛ hiɔwe bɔfohi nɛ a yeɔ anɔkuale ɔ maa ba mi. Yehowa wo si kaa nina ko ma ba kpata Satan hɛ mi, nɛ e ma je níhi nɛ Adam yayami ɔ ngɔ kɛ ba a tsuo kɛ je.Kane 1 Mose 3:15.

7, 8. (a) Ngɛ Noa be ɔ mi ɔ, kɛ níhi puɛ ngɛ je ɔ mi ha kɛɛ? (b) Mɛni Yehowa pee kɛ dla zugba a nɔ, nɛ mɛni e pee kɛ bu adesahi a he?

 7 Jeha lafa komɛ a se ɔ, ni komɛ mwɔ a yi mi kpɔ kaa a maa ye Yehowa anɔkuale. Nimli nɛ ɔmɛ a ti ni komɛ ji Habel kɛ Henok. Se adesahi babauu sume kaa Yehowa nɛ pee a Tsɛ kɛ a Matsɛ. Benɛ Noa be ɔ ke e suu ɔ, ‘basabasa ngɛ zugba a nɔ he tsuaa he.’ (1 Mose 6:11) Anɛ lɔɔ tsɔɔ kaa Mawu nyɛ we nɛ e kudɔ níhi nɛ yaa nɔ ngɛ zugba a nɔ ɔ hu lo? Mɛni ji nɔ́ nɛ Baiblo ɔ de?

8 Nyɛ ha nɛ wa susu Noa sane ɔ he nɛ waa hyɛ. Yehowa ha lɛ blɔ tsɔɔmi kaa e kpɛ daka ngua ko konɛ e kɛ he e kɛ e weku ɔ a yi wami. Jehanɛ se hu ɔ, Yehowa je suɔmi kpo kɛ ha adesahi tsuo. E fã Noa kaa e ‘fiɛɛ kɛ tsɔɔ mɛ konɛ a pee nɔ́ nɛ da.’ (2 Pet. 2:5) Atsinyɛ jemi ko be he kaa Noa fiɛɛ kɛ ha ni ɔmɛ kaa a tsake a tsui, nɛ e bɔ mɛ kɔkɔ ngɛ hɛ mi kpatami nɛ ma a he. Se Noa munyu ɔ be ngɛ a tue se. Noa kɛ e weku ɔ hi nimli yayami ɔmɛ a kpɛti jehahi babauu. Akɛnɛ Yehowa ji Tsɛ nɛ susuɔ e bimɛ a he heje ɔ, e bu Noa kɛ e yo ɔ, kɛ a bimɛ etɛ ɔmɛ, kɛ mɛ hu a yi ɔmɛ a he. Yehowa ngɔ Nyu Afua a kɛ kpata adesahi atua tsɔli ɔmɛ a hɛ mi nɛ bɔfo yiwutsotsɛmɛ ɔmɛ hu je zugba a nɔ. Yehowa ngɛ níhi kudɔe niinɛ.1 Mose 7:17-24.

Be tsuaa be ɔ, Yehowa ngɛ Matsɛ yee (Hyɛ kuku 6, 8, 10, 12, 17)

BƆNƐ YEHOWA YE MATSƐ HA NGƐ NYU AFUA A SE

9. Mɛni he blɔ Yehowa ha adesahi ngɛ Nyu Afua a se?

9 Eko ɔ, benɛ Noa kɛ e weku ɔ kple si kɛ je daka a mi ɔ, a na Yehowa si kaa e bu a he nɛ e hyɛ a nɔ. Amlɔ nɔuu nɛ Noa ma afɔle sami latɛ nɛ e sã afɔle ha Yehowa. Mawu jɔɔ Noa kɛ e weku ɔ, nɛ e de mɛ ke a ‘fɔ babauu nɛ a he nɛ hiɛ, nɛ a hyi je ɔ mi tsuo.’ (1 Mose 8:20–9:1) Adesahi ná he blɔ ekohu kaa a maa pee kake kɛ ja Yehowa konɛ a hyi zugba a nɔ.

10. (a) Ngɛ Nyu Afua a se ɔ, jije nihi tsɔ atua kɛ si Yehowa ngɛ, nɛ mɛni blɔ nɔ a gu kɛ pee jã? (b) Mɛni Yehowa pee konɛ e yi mi tomi nɛ ba mi?

10 Se Nyu Afua a je we mluku nɛ adesahi yi ɔ kɛ ji. Loloolo ɔ, adesahi hi je nɛ Satan kɛ daimonio ɔmɛ ngɛ nɔ yee ɔ mi. E kɛ we kulaa nɛ nihi kpale tsɔ Yehowa nɔ yemi nɛ suɔmi ngɛ mi ɔ hɛ mi atua. Kaa nɔ hyɛmi nɔ́ ɔ, Noa bibi Nimrod te si kɛ wo Yehowa nɔ yemi ɔ ngɛ blɔ kpa ko nɔ. A tu Nimrod he munyu kaa ‘detsɛ kpanaa nɛ te si kɛ wo Yehowa.’ E po ma nguahi kɛ ha e he. Ma ngua nɛ ɔmɛ a kpɛti kake ji Babel. E wo e he matsɛ ngɛ “Babilonia zugba a nɔ.” (1 Mose 10:8-12) Mɛni neneene Matsɛ ɔ pee matsɛ atua tsɔlɔ nɛ ɔ? Mɛni neneene Matsɛ ɔ pee kɛ tsi matsɛ atua tsɔlɔ ɔ nya konɛ e ha nɛ e yi mi nɛ e to kaa adesahi nɛ ‘hyi zugba’ a nɔ ɔ nɛ ba mi? Mawu futu ni ɔmɛ a gbi. Enɛ ɔ ha nɛ Nimrod yi mi tomi ɔ puɛ, nɛ adesahi “gbɛ fĩa je ɔ mi tsuo.” A ngɔ a lakpa mawu ɔmɛ kɛ ho hehi nɛ a ho ɔmɛ ya, nɛ jã kɛ̃ nɛ a kɛ adesahi a nɔ yemi blɔ nya tomihi hu ho.1 Mose 11:1-9.

11. Mɛni blɔ nɔ Yehowa gu kɛ ye e huɛ Abraham anɔkuale?

11 E ngɛ mi kaa nihi babauu ja lakpa mawuhi ngɛ Nyu Afua a se mohu lɛɛ, se anɔkualetsɛmɛ komɛ ya nɔ nɛ a wo Yehowa hɛ mi nyami. Nimli nɛ ɔmɛ a ti nɔ kake ji Abraham. Abraham bu Mawu tue nɛ e hia kɛ je Ur ma nɛ he jɔmi ngɛ mi ɔ mi kɛ ya hi bo tsuhi a mi jehahi babauu. (1 Mose 11:31; Heb. 11:8, 9) Benɛ Abraham ngɛ lalaalo woe kɛ ngɛ bee ɔ, behi fuu ɔ, matsɛmɛ nɛ a ngɛ mahi nɛ a po gbogbo wo a he ɔ bɔleɔ lɛ. Se Yehowa po Abraham kɛ e weku ɔ a he piɛ.  La polɔ ɔ tsɔɔ kaa Yehowa ji Tsɛ nɛ poɔ e webi a he piɛ. E de ke: ‘Mawu ngmɛ́ blɔ nɛ nɔ ko nɛ hao mɛ; a he ɔ, e je blɔ kã matsɛmɛ a hɛ mi.’ (La 105:13, 14) Akɛnɛ Yehowa yeɔ Abraham anɔkuale heje ɔ, e wo lɛ si ke: ‘Matsɛmɛ maa je o mi.’1 Mose 17:6; Yak. 2:23.

12. Mɛni blɔ nɔ Yehowa tsɔɔ kaa e ngɛ he wami ngɛ Egiptbi ɔmɛ a nɔ ngɛ, nɛ kɛ enɛ ɔ saa e webi ɔmɛ a he ha kɛɛ?

12 Mawu wo Abraham bi Isak, kɛ e bibi Yakob si kaa e maa jɔɔ mɛ nɛ a bimɛ maa pee matsɛmɛ. (1 Mose 26:3-5; 35:11) Se loko Yakob bimɛ ɔmɛ ma bɔni matsɛ yemi ɔ, a ya ye nyɔguɛ ngɛ Egipt. Anɛ enɛ ɔ tsɔɔ kaa Yehowa be hae nɛ e si womi ɔ nɛ ba mi lo? Aloo lɔɔ tsɔɔ kaa e yi zugba a nɔ matsɛ hu lo? Pi jã kulaa ji sane ɔ! Benɛ Yehowa be nɛ e to ɔ su ɔ, e tsɔɔ kaa e ngɛ he wami pe Farao nɔ builɔ ɔ. Israelbi ɔmɛ ná hemi kɛ yemi ngɛ Yehowa mi. Yehowa kpɔ̃ mɛ ngɛ blɔ nɛ ngɛ nyakpɛ nɔ kɛ gu Wo Tsu ɔ mi. E ngɛ heii kaa loloolo ɔ, Yehowa ji Je Mluku ɔ Matsɛ, kɛ Tsɛ nɛ susuɔ e bimɛ a he. E ngɔɔ e he wami kpetekpleenyɛ ɔ kɛ poɔ e webi a he piɛ.Kane 2 Mose 14:13, 14.

YEHOWA BƆNI ISRAEL NƆ MATSƐ YEMI

13, 14. (a) Mɛni Israelbi ɔmɛ de kɛ kɔ Yehowa matsɛ yemi ɔ he ngɛ la nɛ a la a mi? (b) Mɛni si Mawu wo David?

13 Benɛ Yehowa kpɔ̃ Israelbi ɔmɛ kɛ je Egipt ɔ, e kɛ we kulaa nɛ a la kunimi yemi la kɛ je Yehowa yi. A ngma la nɛ ɔ ngɛ 2 Mose yi 15 ɔ mi. A de ngɛ kuku 18 ɔ ke: ‘Yehowa maa ye matsɛ kɛ maa ya neneene.’ Ngɛ anɔkuale mi ɔ, Yehowa bɔni Israelbi ɔmɛ a nɔ Matsɛ yemi. (5 Mose 33:5) Se Israelbi ɔmɛ sume kaa Yehowa nɛ e ye a nɔ, ejakaa a nɛ lɛ kɛ a hɛngmɛ. Benɛ Mawu webi ɔmɛ je Egipt se maa pee jeha 400 ɔ, a de Mawu kaa a suɔ nɛ a ná adesa matsɛ kaa bɔnɛ e ji ngɛ mahi nɛ a jaa wɔ, nɛ a bɔle mɛ ɔ a blɔ fa mi ɔ. (1 Sam. 8:5) Ngɛ enɛ ɔ tsuo se ɔ, loloolo ɔ, Yehowa ji Matsɛ. Ngɛ anɔkuale mi ɔ, enɛ ɔ je kpo heii benɛ David ngɛ Israel ma a nɔ matsɛ yee ɔ.

14 David ngɔ somi daka a kɛ ho Yerusalem ya. Jamɛ a ligbi ɔ, Israelbi ɔmɛ nya, nɛ Levibi ɔmɛ hu la yi jemi lahi. A ngma la nɛ ɔ ngɛ 1 Kronika 16:31 ɔ. A la ke: ‘Nyɛ de je ma amɛ ke Yehowa bɔni  Matsɛ yemi.’ Eko ɔ, nɔ ko ma bi ke, ‘Ke Yehowa ji neneene Matsɛ ɔ, mɛni heje mɔ nɛ kpaako, e bɔni Matsɛ yemi ɔ?’ Ke Yehowa kɛ e he wami ɔ tsu ní aloo e hla nɔ ko kaa e da e nane mi kɛ tsu nɔ́ ko ɔ, lɔɔ tsɔɔ kaa e bɔni Matsɛ yemi. E he hia wawɛɛ kaa wa maa le blɔ nɔ nɛ Yehowa guu kɛ yeɔ Matsɛ ɔ. Loko David ma gbo ɔ, Yehowa wo lɛ si kaa lɛ David ɔ e matsɛ yemi ɔ maa hi si kɛ ya neneene. Yehowa de lɛ ke: “Ma tle nɔ ko si ngɛ o se, nɛ ji mo nitsɛ o mi mi bi; nɛ ma to e matsɛ yemi ɔ sisi.” (2 Sam. 7:12, 13) Si nɛ ɔ nɛ Yehowa wo David ɔ ba mi ngɛ David gbenɔ se maa pee jeha 1,000. Yehowa ha nɛ David nina ko ba ye matsɛ. Mɛnɔ ji nina nɛ ɔ, nɛ mɛni be e bɔni Matsɛ yemi?

YEHOWA TO MATSƐ EHE

15, 16. Mɛni be a pɔ Yesu nu kaa Matsɛ nɛ a wo e he si ɔ? Benɛ Yesu ngɛ zugba a nɔ ɔ, mɛni blɔ nya e to kɛ ha e nɔ yemi ɔ?

15 Ngɛ jeha 29 M.B. ɔ mi ɔ, Yohane Baptisilɔ ɔ bɔni fiɛɛmi ke “hiɔwe Matsɛ Yemi ɔ su si ta.” (Mat. 3:2) Benɛ Yohane baptisi Yesu ɔ, Yehowa pɔ Yesu nu kaa Mesia kɛ Mawu Matsɛ Yemi ɔ nya Matsɛ nɛ́ a wo e he si ɔ. Yehowa tsɔɔ kaa e ji Tsɛ nɛ ngɛ suɔmi. E de kɛ kɔ Yesu he ke: “Imi nitsɛ ye Bi nɛ i suɔ ji nɛ ɔ nɛ! Ee, i ngɛ e he bua jɔmi saminya.”Mat. 3:17.

16 Yesu wo e Tsɛ ɔ hɛ mi nyami ngɛ e sɔmɔmi nítsumi ɔ mi. (Yoh. 17:4) E pee enɛ ɔ kɛ gu Mawu Matsɛ Yemi ɔ nɛ e fiɛɛ kɛ tsɔɔ nihi ɔ nɔ. (Luka 4:43) E tsɔɔ e se nyɛɛli ɔmɛ kaa a sɔle konɛ jamɛ a Matsɛ Yemi ɔ nɛ ba. (Mat. 6:10) Akɛnɛ Yesu ji Matsɛ nɛ Yehowa hla lɛ heje ɔ, e de nihi nɛ a teɔ si kɛ woɔ lɛ ɔ ke: ‘Mawu Matsɛ Yemi ɔ ngɛ nyɛ kpɛti.’ (Luka 17:21) Pee se ɔ, Yesu kɛ e se nyɛɛli ɔmɛ ‘so matsɛ yemi he somi’ ko gbɔkuɛ nɛ́ e nɔ jena e ma gbo ɔ. Enɛ ɔ tsɔɔ kaa e kaseli anɔkualetsɛmɛ ɔmɛ a kpɛti ni komɛ maa piɛɛ e he kɛ ye matsɛ ngɛ Mawu Matsɛ Yemi ɔ mi.Kane Luka 22:28-30.

17. Mɛnɔmɛ a nɔ Yesu bɔni yemi kɛ je jeha 33 M.B. ɔ mi, se mɛni e sa kaa e mlɛ?

17 Mɛni be Yesu maa bɔni nɔ yemi kaa Mawu Matsɛ Yemi ɔ nya Matsɛ? E be nyɛe maa pee jã amlɔ nɔuu. Benɛ e kɛ e kaseli ɔmɛ so somi ɔ e nɔ jena piani ɔ, a gbe lɛ, nɛ e se nyɛɛli ɔmɛ gbɛ fĩa. (Yoh. 16:32) Se kaa bɔnɛ e ji ngɛ Israelbi ɔmɛ a be ɔ mi ɔ, loloolo ɔ, Yehowa ya nɔ nɛ e ye Matsɛ. Ngɛ ligbi etɛ ɔ nɔ ɔ, Yehowa tle e Bi ɔ si kɛ ba wami mi. Ngɛ Pentekoste jeha 33 M.B. ɔ mi ɔ, Yesu bɔni Kristofoli asafo ɔ nɔ yemi. (Kol. 1:13) Se loloolo ɔ, e sa nɛ Yesu nɛ ji “nina” nɛ a wo e he si ɔ, nɛ mlɛ kɛ ya si benɛ a kɛ zugba a tsuo maa wo e dɛ nɛ e ye nɔ. Yehowa de e Bi ɔ ke: “Hii si ngɛ ye hiɔ nɔ kɛ yaa si benɛ ma ngɔ o he nyɛli ɔmɛ kɛ pee nɔ́ nɛ o kɛ o nane maa nɔ.”La 110:1.

MO JA NENEENE MATSƐ Ɔ

18, 19. Mɛni a woɔ wɔ he wami kaa waa pee, nɛ mɛni wa maa kase ngɛ munyu nɛ nyɛɛ se ɔ mi?

18 Nihi ngɛ Yehowa nɔ yemi ɔ hɛ mi atua tsɔe ngɛ hiɔwe kɛ zugba a nɔ jeha akpehi abɔ ji nɛ ɔ. Se Yehowa kpa we Matsɛ yemi. Loloolo ɔ, e ngɛ nɔ yee kaa Matsɛ. Akɛnɛ Yehowa ji Tsɛ nɛ ngɛ suɔmi heje ɔ, e po Noa, Abraham, kɛ David a he piɛ, nɛ e hyɛ a nɔ. Anɛ enɛ ɔ be hae nɛ waa hɛ wɔ kɛ su e he, nɛ waa bu lɛ tue kaa wa Matsɛ lo?

19 Se eko ɔ, amlɔ nɛ ɔ, wa ma bi ke: Yehowa bɔni Matsɛ yemi ngɛ wa be nɛ ɔ mi ngɛ mɛni blɔ nɔ? Mɛni blɔ nɔ wa maa gu kɛ pee e sɔmɔli anɔkualetsɛmɛ konɛ waa pee e weku nɛ ngɛ je kɛ wɛ ɔ mi bimɛ nɛ a ye mluku? Ke wa sɔle kaa Mawu Matsɛ Yemi ɔ nɛ ba a, mɛni lɔɔ tsɔɔ? Wa ma susu sane bimi nɛ ɔmɛ a he ngɛ munyu nɛ nyɛɛ se ɔ mi.