Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  December 2013

 HƐ MI MUNYU | ANƐ WA HIA MAWU NGƐ WA SI HIMI MI LO?

Nɔ́ Heje Nɛ Wa Hia Mawu Ngɛ Wa Si Himi Mi

Nɔ́ Heje Nɛ Wa Hia Mawu Ngɛ Wa Si Himi Mi

Juɛmi he ní leli tsɔɔ kaa ja nihi tsu ní kpahi a he ní kɛ piɛɛ a helo nya hiami níhi a he loko a ma ná bua jɔmi nitsɛnitsɛ. Wa na kaa nihi suɔ nɛ a kɛ a he nɛ wo kuu komɛ a mi aloo a ja nɔ ko aloo nɔ́ ko nɛ e nɔ kuɔ pe mɛ. Bɔnɛ pee nɛ ni komɛ nɛ a nyɛ nɛ a pee jã heje ɔ, a ngɔɔ a he jɔɔmi behi kɛ kaseɔ adebɔ níhi a he ní, a kɛ tɛniɔ ní, a kɛ laa, nɛ a kɛ peeɔ ní kpahi. Se kɛ̃ ɔ, ní nɛ ɔmɛ a peemi ɔ ha we nɛ a kpɛti nihi babauu nɛ ná bua jɔmi nɛ a tsui hu nɛ nɔ a mi.

Mawu suɔ kaa adesahi nɛ a ná bua jɔmi amlɔ nɛ ɔ kɛ ya neneene

E pee we nihi nɛ a kaneɔ Baiblo ɔ nyakpɛ kaa adesahi suɔ nɛ a sɔmɔ nɔ́ ko nɛ nɔ kuɔ pe mɛ. Ejakaa a tsɔɔ ngɛ Mose Kekleekle Womi ɔ yihi nɛ sɛ hlami ɔmɛ a mi kaa benɛ Mawu bɔ Adam kɛ Hawa a, e kɛ mɛ sɛɛɔ ní daa. E ha nɛ huɛ bɔmi kpakpa hi e kɛ mɛ a kpɛti. (1 Mose 3:8-10) Mawu bɔɛ adesahi kaa mɛ nitsɛmɛ nɛ a ye a he nɔ; e he hia nɛ a kɛ a Bɔlɔ ɔ nɛ sɛɛ ní. Baiblo ɔ pɔɔ hiami nɔ́ nɛ ɔ he munyu tumi.

Kaa nɔ hyɛmi nɔ́ ɔ, Yesu de ke: “A gbaa nihi nɛ le kaa mumi mi ohiatsɛmɛ ji mɛ, ejakaa a nɔ́ ji hiɔwe matsɛ yemi ɔ nɛ.” (Mateo 5:3) Wa ma nyɛ maa da munyu nɛ ɔ nɛ Yesu tu ɔ nɔ nɛ wa de ke, loko wa ma ná bua jɔmi ngɛ si himi mi nɛ wa tsui hu maa nɔ wa mi ɔ, ja wa le Mawu. Mɛni blɔ nɔ wa maa gu kɛ pee jã? Yesu ha sane bimi nɛ ɔ heto. E de ke: “Pi abolo kɛkɛ nɛ haa nɔmlɔ yi naa wami, se mohu munyu tsuaa munyu nɛ jee Mawu nya a.” (Mateo 4:4) Mɛni blɔhi a nɔ Mawu munyu ɔ, aloo Mawu blɔ tsɔɔmihi nɛ ngɛ Baiblo ɔ mi ɔ ma nyɛ ma ha nɛ wa bua nɛ jɔ nɛ wa tsui hu nɛ nɔ wa mi ngɛ? Nyɛ ha nɛ wa susu blɔ etɛ a nɔ nɛ Mawu munyu ɔ haa nɛ wa náa bua jɔmi ngɛ ɔ he nɛ waa hyɛ.

Wa Hia Blɔ Tsɔɔmi Kpakpa

Mwɔnɛ ɔ, nihi fuu woɔ nihi ga ngɛ huɛ bɔmi, suɔmi, weku si himi, pɛ kpatami, bua jɔmi nami, kɛ nɔ́ nɛ ke nɔ ko pee nɛ e tsui maa nɔ e mi ngɛ si himi mi ɔ he. Se kɛ̃ ɔ, ngɛ Yehowa Mawu nɛ ji Bɔlɔ ɔ se ɔ, anɛ nɔ kpa ko ngɛ nɛ ma nyɛ maa wo adesahi ga kpakpa nɛ nu tso lo?

Baiblo ɔ ji womi nɛ kudɔɔ wa si himi kaa bɔnɛ klamahi a he womi ngɛ ɔ

 Nɔ́ hetomi nɔ́ ko ji nɛ ɔ nɛ: Ke o he klama ko kaa eko ɔ, foto pomi klama aloo computer a, o maa hyɛ blɔ kaa klama peelɔ ɔ nɛ ngɔ womi nɛ tsɔɔ bɔnɛ a kɛ klama a nɛ tsu ní ha a kɛ piɛɛ he. Baiblo ɔ ngɛ kaa jamɛ a womi ɔ. E ji womi nɛ Mawu nɛ ji adesahi a Bɔlɔ ɔ ngma kɛ ha wɔ konɛ waa hyɛ nɔ kɛ ba wa je mi. “Womi” nɛ ɔ tsɔɔ wɔ níhi nɛ e sa kaa waa pee kɛ bɔnɛ e sa kaa waa ba wa je mi ha.

Kaa bɔnɛ e ji ngɛ womi ko nɛ tsɔɔ bɔnɛ a kɛ klama ko nɛ tsu ní ha a blɔ fa mi ɔ, Baiblo ɔ hu haa nɛ wa leɔ níhi nɛ ke wa pee ɔ, a ma nyɛ maa ye wɔ awi. Nihi ma nyɛ maa wo wɔ ga slɔɔtoslɔɔtohi. Eko ɔ, e maa pee wɔ kaa a ga womi ɔmɛ hi, se o he we yi kaa ke waa kɛ blɔ tsɔɔmi nɛ je Bɔlɔ ɔ ngɔ ɔ tsu ní ɔ, wa ma ná he se lo?

‘Imi ji Yehowa, nyɛ Mawu ɔ nɛ. I suɔ kaa ma tsɔse nyɛ, nɛ ma tsɔɔ nyɛ bɔnɛ nyɛɛ ba nyɛ je mi ha, konɛ e hi ha nyɛ nitsɛmɛ. I ná nɛ nyɛ ye ye mlaa amɛ a nɔ! Jinɛ a maa gbaa nyɛ; nɛ nyɛ maa pee kaa pa nɛ nyu tɛ̃ mi gblegbleegble. Nyɛ maa ye kunimi nɔtonɔto kaa bɔnɛ oslɔke kuɔ kɛ pueɔ wo dɔ mi.’Yesaya 48:17, 18

Wa ma nyɛ maa na blɔ tsɔɔmi nɛ wa hia a ngɛ Baiblo ɔ mi

E ngɛ mi kaa Yehowa Mawu ngɔɔ blɔ tsɔɔmihi kɛ haa wɔ mohu lɛɛ, se e nyɛ we wa nɔ kaa wa kɛ tsu ní. Akɛnɛ Mawu suɔ wɔ nɛ e suɔ kaa e maa ye bua wɔ heje ɔ, e de wɔ ke: ‘Imi ji Yehowa, nyɛ Mawu ɔ nɛ. I suɔ kaa ma tsɔse nyɛ, nɛ ma tsɔɔ nyɛ bɔnɛ nyɛɛ ba nyɛ je mi ha, konɛ e hi ha nyɛ nitsɛmɛ. I ná nɛ nyɛ ye ye mlaa amɛ a nɔ! Jinɛ a maa gbaa nyɛ; nɛ nyɛ maa pee kaa pa nɛ nyu tɛ̃ mi gblegbleegble. Nyɛ maa ye kunimi nɔtonɔto kaa bɔnɛ oslɔke kuɔ kɛ pueɔ wo dɔ mi.’ (Yesaya 48:17, 18) Ngɛ e kpiti pomi mi ɔ, ke waa kɛ Mawu blɔ tsɔɔmihi tsu ní ɔ, e maa hi ha wɔ. Ke wa ma de ngɛ blɔ kpa ko nɔ ɔ, ja huɛ bɔmi kpakpa ngɛ waa kɛ Mawu wa kpɛti loko wa bua maa jɔ nɛ e maa hi ha wɔ.

Wa Hia Sane Bimihi Nɛ Haoɔ Wɔ ɔ, A Heto

E peeɔ ni komɛ kaa a hia we Mawu ngɛ a si himi mi, ejakaa níhi fuu yaa nɔ ngɛ a si himi mi nɛ a nui sisi. Kaa nɔ hyɛmi nɔ́ ɔ, eko ɔ, a ma bi ke: ‘Mɛni heje nɛ nimli kpakpahi naa nɔ́?’ ‘Mɛni heje nɛ loko a ma fɔ jokuɛ komɛ ɔ, a jeɔ kpa a?’ ‘Mɛni heje nɛ a yi dami sane ngɛ je ɔ mi ɔ?’ Ngɛ anɔkuale mi ɔ, sane bimi nɛ ɔmɛ a he hia wawɛɛ nitsɛ. Ke wa ná sane bimi nɛ ɔmɛ a heto ɔ, wa bua maa jɔ saminya. Ngɛ be mi nɛ eko ɔ, o kɛ oya yemi ma pia Mawu ngɛ haomi nɛ ɔmɛ a he ɔ, mo ha nɛ waa hyɛ nɔ́ nɛ Mawu Munyu ɔ nɛ ji Baiblo ɔ de ngɛ he.

Ngɛ Mose Kekleekle Womi ɔ yi etɛ ɔ mi ɔ, a de wɔ kaa Satan gu sinɔ ko nɔ kɛ sisi Adam kɛ Hawa nɛ a tɔ̃ Yehowa Mawu mlaa nɛ e wo mɛ kaa a ko ye tso ɔ nɛ haa nɔ leɔ kpakpa kɛ yayami ɔ yiblii ɔ nɔ. Satan de Hawa ke: ‘Nyɛ be gboe. Mawu de jã, ejakaa e le kaa ke nyɛ ye jamɛ a tso ɔ yiblii ɔ, nyɛ hɛngmɛ ma bli, nɛ nyɛ maa hi kaa lɛ Mawu ɔ nitsɛ; nyɛ maa le kpakpa kɛ yayami.’—1 Mose 2:16, 17; 3:4, 5.

Munyu nɛ ɔ nɛ Satan tu ɔ tsɔɔ kaa lakpatsɛ ji Mawu, nɛ blɔ nɔ nɛ e guɔ kɛ yeɔ adesahi a nɔ ɔ hu hí. Abosiami tsɔɔ kaa ke adesahi bu lɛ tue ɔ, e maa hi ha mɛ. Anɛ Yehowa kɛ oya yemi ma nyɛ ma tsu sane nɛ ɔ he ní lo? Yehowa ha nɛ be bɔɔ puemi, konɛ nihi nɛ a hyɛ keji nɔ́ nɛ Abosiami de ngɛ e he ɔ ngɛ mi aloo e be mi. Ngɛ blɔ ko nɔ ɔ, Mawu ha Satan kɛ nihi nɛ a fĩ e se ɔ blɔ konɛ a  tsɔɔ keji adesahi ma nyɛ maa hi si saminya ke Mawu yi bua mɛ.

Anɛ o susu kaa nɔ́ nɛ Satan de ɔ ngɛ mi aloo e be mi? Anɛ adesahi ma nyɛ maa hi si saminya, nɛ a ye mɛ nitsɛmɛ a he nɔ nɛ Mawu yemi kɛ buami be mi lo? Haomi nɛ nyɛɛ se nɛ ɔmɛ nɛ adesahi kɛ ngɛ kpee jeha lafahi abɔ ji nɛ ɔ, tsɔɔ heii kaa mɔde nɛ adesahi ngɛ bɔe kaa a ma kudɔ mɛ nitsɛmɛ a si himi ɔ yi manye. Nɔ́ nami, dami sane nɛ a yi, hiɔ, gbenɔ, awi yemi, nihi nɛ a bɛ a je mi saminya, ta hwumihi, kɛ nimli a hɛ mi nɛ a kpataa, kɛ yiwutso ní peepee kpahi. Baiblo ɔ tsɔɔ we kaa Mawu lɛ ha nɛ adesahi ngɛ nɔ́ nae, mohu ɔ, e de ke: “Ni komɛ ngɔɔ blɔ nya nɛ a ná a kɛ yeɔ a nyɛmimɛ awi.”—Fiɛlɔ 8:9.

Enɛ ɔ he ɔ, e ngɛ heii kaa e sa nɛ wa bi Mawu konɛ e tsɔɔ wɔ wa haomi ɔmɛ a nya tsaba. Mɛni Mawu maa pee?

Wa Hia Mawu Yemi Kɛ Buami

Kɛ je blema tɔɔ nɛ nihi suɔ nɛ a tu hiɔ, bwɔmi, kɛ gbenɔ nya fo. Enɛ ɔ he ɔ, a puɛɔ sika kɛ be babauu kɛ hlaa hiɔ, bwɔmi, kɛ gbenɔ nya tsaba, se nɔ́ ko ji mi kɛ bɛ. Ni komɛ nuɔ tsopa komɛ, aloo a kɛ a he woɔ mumi yayami kɛ nítsumi ní peepeehi a mi, aloo a kaa a he mi konɛ a ya nɔ nɛ a ná nɔmlɔtso mi he wami kpakpa. Se enɛ ɔ tsuo yɛ nya.

Mawu suɔ kaa e hi ha adesahi nɛ a ná bua jɔmi. Jã ji yi mi tomi nɛ e hɛɛ loko e bɔ adesahi. E hɛ ji e yi mi tomi ɔ nɔ. (1 Mose 1:27, 28; Yesaya 45:18) Yehowa Mawu ma nɔ mi kɛ ha wɔ kaa nɔ́ tsuaa nɔ́ nɛ e to e yi mi kaa e maa pee ɔ, e maa pee kokooko. (Yesaya 55:10, 11) Baiblo ɔ tsɔɔ kaa Mawu wo si kaa e maa ngɔ Paradeiso nɛ Adam kɛ Hawa laa lɛ ɔ kɛ ba ekohu. Ngɛ Baiblo ɔ nyagbe womi ɔ mi ɔ, a ngma ke: “Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.” (Kpojemi 21:4) Mɛni blɔ nɔ Mawu maa gu kɛ ha nɛ si himi nɛ ɔ nɛ ba mi, nɛ mɛni wa maa pee kɛ ná jamɛ a si himi ɔ he se?

Yesu Kristo nɛ ji Mawu Bi ɔ tsɔɔ e se nyɛɛli ɔmɛ kaa a sɔle konɛ nihi nɛ a pee Mawu suɔmi nya ní. Nihi fuu le jamɛ a sɔlemi ɔ, nɛ ni komɛ tĩɔ mi be tsuaa be. Ni komɛ tsɛɛ jamɛ a sɔlemi ɔ ke, Nyɔmtsɛ ɔ Sɔlemi ɔ. A sɔleɔ ke: “Wa Tsɛ nɛ ngɛ hiɔwe; O biɛ ɔ he nɛ tsɔ. O matsɛ yemi ɔ nɛ ba; a pee nɔ́ nɛ o suɔ ngɛ zugba a nɔ kaa bɔnɛ a peeɔ ngɛ hiɔwe ɔ.” (Mateo 6:9, 10) Niinɛ, Mawu Matsɛ Yemi ɔ nɔ pɛ nɛ Yehowa Mawu maa gu kɛ po haomihi tsuo nɛ adesahi a nɔ yemi ngɔ kɛ ba a se. Nɛ kaa bɔnɛ Mawu wo si ɔ, e maa ngɔ je ehe nɛ a yeɔ dami sane ngɛ mi ɔ kɛ ba. * (Daniel 2:44; 2 Petro 3:13) Mɛni e sa kaa wa pee konɛ wa ná si womi nɛ ɔ he se?

 Yesu Kristo tsɔɔ wɔ nɔ́ nɛ e sa kaa waa pee. E de ke: “Ke a ná le kaa mo ji anɔkuale Mawu ɔ, nɛ a le Yesu Kristo, nɔ nɛ o tsɔ ɔ, a ma ná neneene wami.” (Yohane 17:3) Niinɛ, ngɛ Mawu yemi kɛ buami nya a, wa nine ma nyɛ maa su neneene wami ngɛ je ehe ɔ mi ɔ nɔ. Eko ɔ, si womi nɛ ɔ ma ha nɛ o ma ná nɔ mi mami kaa wa hia Mawu ngɛ wa si himi mi.

Amlɔ Nɛ ɔ Ji Be Nɛ E Sa Kaa O Hla Mawu Se Blɔ

Jeha akpe enyɔ ji nɛ ɔ, bɔfo Paulo de Atenebi nɛ a ngɛ Areopago, aloo Mars Hill nɛ a suɔ nɛ a kase ní ɔ ke: “Ejakaa lɛ [Mawu] mohu lɛ e haa wɔ wami, kɛ mumi nɛ wa muɔ. Nɔ́ tsuaa nɔ́ nɛ hia wɔ ɔ, lɛ nɛ e haa wɔ. Ejakaa, ‘Mawu lɛ haa wa hii je mi, nɛ e haa wa yaa nɛ wa baa kaa adesahi.’ Kaa bɔnɛ nyɛ nitsɛmɛ nyɛ la poli ɔmɛ ekomɛ hu de ɔ, ‘Wɔ hu e bimɛ ji wɔ.’”—Bɔfo Ɔmɛ A Nítsumi 17:25, 28.

Nɔ́ nɛ Paulo de Atenebi ɔmɛ ɔ ji munyu anɔkuale. Wa Bɔlɔ ɔ lɛ haa wɔ kɔɔhiɔ nɛ wa muɔ, niye ní nɛ wa yeɔ, kɛ nyu nɛ wa nuɔ ɔ nɛ. Wa be nyɛe maa hi je mi ke Yehowa ha we wɔ ní kpakpa nɛ ɔmɛ tsuo. E ngɛ mi kaa ni komɛ susuu we Mawu he mohu lɛɛ, se mɛni heje nɛ Mawu yaa nɔ nɛ e haa nɔ tsuaa nɔ ní kpakpa nɛ ɔmɛ tsuo eko ɔ? Paulo de ke: “E pee jã, konɛ a hla lɛ Mawu ɔ, kaa alini ke a kpa kɛ ya kɛ ba a, a maa na lɛ lo. Pohu, niinɛ ɔ, Mawu kɛ wa ti nɔ tsuaa nɔ kpɛti kɛ we kulaa.”—Bɔfo Ɔmɛ A Nítsumi 17:27.

Anɛ o maa suɔ nɛ o le Mawu saminya lo? Anɛ o maa suɔ nɛ o le e yi mi tomihi, kɛ níhi nɛ ke o pee ɔ, e maa hi ha mo, nɛ o maa hi si kɛ ya neneene ɔ lo? Ke jã a, lɛɛ o kɛ nɔ nɛ ngɔ womi tɛtlɛɛ nɛ ɔ kɛ ha mo ɔ nɛ tu he munyu, aloo mo hla nihi nɛ a pee womi tɛtlɛɛ nɛ ɔ a se blɔ. A bua maa jɔ he kaa a maa ye bua mo.

^ kk. 20 Ke o ngɛ hlae nɛ o le bɔnɛ Matsɛ Yemi ɔ ma ha nɛ a pee Mawu suɔmi nya ní ha a he ní babauu ɔ, moo hyɛ womi nɛ ji, Mɛni Tutuutu Ji Baiblo ɔ Tsɔɔmi? nɛ Yehowa Odasefoli pee ɔ yi 8. O ma nyɛ maa gbla hu ngɛ www.jw.org.