Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

“Nyɛ Juɛmi Mi Ko Pee Nyɛ Enyɔɔnyɔ”!

“Nyɛ Juɛmi Mi Ko Pee Nyɛ Enyɔɔnyɔ”!

‘Wa kpa nyɛ pɛɛ, nyɛmimɛ, nyɛ juɛmi mi ko pee nyɛ enyɔɔnyɔ.’ —2 TES. 2:1, 2.

1, 2. Mɛni heje nɛ nɔ sisimi pɔhe wawɛɛ mwɔnɛ ɔ, nɛ mɛni blɔhi a nɔ a guu kɛ sisiɔ nihi? (Moo hyɛ foni nɛ ngɛ nikasemi ɔ sisije ɔ.)

NƆ SISIMI kɛ lakpa yemi pɔhe ngɛ je nɛ wa ngɛ mi nɛ ɔ mi. E sɛ nɛ enɛ ɔ nɛ pee wɔ nyakpɛ. Baiblo ɔ de heii kaa Satan Abosiami he be kɛ nɔ sisimi, nɛ lɛ ji nɔ nɛ ngɛ je nɛ ɔ nɔ yee. (1 Tim. 2:14; 1 Yoh. 5:19) Akɛnɛ je yaya nɛ ɔ nyagbe ɔ su si ta heje ɔ, Satan mi mi fu wawɛɛ, ejakaa e le kaa “be bɔɔ kɛkɛ nɛ piɛ ha lɛ.” (Kpoj. 12:12) Enɛ ɔ he ɔ, wa ma nyɛ maa hyɛ blɔ kaa nihi nɛ Abosiami ngɛ mɛ kudɔe ɔ be anɔkuale yee kulaa.

2 Be komɛ ɔ, a tuɔ Yehowa sɔmɔli a he lakpa munyuhi ngɛ adafi fiami womihi a mi, TV, kɛ radiohi a nɔ. Munyuhi nɛ a ngmaa ngɛ adafi fiami womihi a mi, kɛ níhi nɛ a jeɔ ngɛ TV nɔ, kɛ níhi nɛ a kɛ fɔɔ Internet ɔ nɔ ɔ, gbɛɔ lakpa munyuhi kɛ fĩaa. Enɛ ɔ haa nɛ nihi a mi mi fuɔ Yehowa sɔmɔli, ejakaa a heɔ lakpa munyu nɛ ɔmɛ yeɔ nɛ́ a hla we mi.

3. Mɛni maa ye bua ye bua wɔ konɛ a ko sisi wɔ?

3 Bua jɔmi sane ji kaa wa ma nyɛ maa yu wa he ngɛ Satan lakpa munyu ɔmɛ a he. Baiblo ɔ hi kɛ ha “nɔ dlami,” enɛ ɔ he ɔ, Baiblo ɔ ma nyɛ maa ye bua wɔ konɛ Satan nɛ ko sisi wɔ. (2 Tim. 3:16) Paulo ngma munyu nɛ nyɛɛ se nɛ ɔ ya ha Kristofoli nɛ a hi Tesalonika ngɛ kaseli ɔmɛ a be ɔ mi ɔ. Nɔ́ nɛ e ngma a tsɔɔ kaa a sisi jamɛ a Kristofoli ɔmɛ a ti ni komɛ. E ngma ke: “Nyɛ juɛmi mi ko pee nyɛ enyɔɔnyɔ.” (2 Tes. 2:1, 2) Mɛni wa ma nyɛ maa kase ngɛ Paulo ga womi nɛ ɔ mi, nɛ kɛ waa kɛ ga womi nɛ ɔ ma tsu ní ha kɛɛ?

KƆKƆ BƆMIHI NƐ BA NGƐ BE NYA

4. Mɛni kɔkɔ Paulo bɔ Kristofoli nɛ a hi Tesalonika a ngɛ ‘Yehowa ligbi ɔ’ he, nɛ kɛ enɛ ɔ kɔɔ wɔ hu wa he ha kɛɛ?

4 Paulo wo ‘Yehowa ligbi ɔ’ nɔ ta ngɛ kekleekle sɛ  womi nɛ e ngma ya ha Kristofoli nɛ a hi Tesalonika a mi. E sume nɛ Yehowa ligbi ɔ nɛ ba ti e nyɛmimɛ ɔmɛ si tlukaa. Mohu ɔ, e wo mɛ he wami konɛ a pee a he “la bimɛ” nɛ a ‘hi hɛngmengmle, nɛ a hɛ mi nɛ ka si.’ (Kane 1 Tesalonikabi 5:1-6.) Mwɔnɛ ɔ, wɔ hu wa ngɛ be nɛ a ma kpata Babilon Ngua a, nɛ ji je ɔ lakpa jami blɔ nya tomi ɔ hɛ mi ɔ blɔ hyɛe. Babilon Ngua a hɛ mi kpatami ɔ ji nɔ́ nɛ maa je Yehowa ligbi ngua a sisi. Bua jɔmi sane ji kaa wa le bɔnɛ Yehowa ma plɛ kɛ tsu e yi mi tomi nɛ ɔ he ní ha. Jehanɛ se hu ɔ, wa nine suɔ ga womi kpakpahi a nɔ ngɛ asafo ɔ mi. Enɛ ɔ haa nɛ wa hɛ hii wa he nɔ. Ke wa buɔ kɔkɔ bɔmi nɛ ɔmɛ nɛ a kɛ haa wɔ daa a tue ɔ, enɛ ɔ maa wo wɔ he wami nɛ wa ‘juɛmi mi be wɔ enyɔɔnyɔ pee.’ —2 Tes. 2:2.

Paulo kɛ kɔkɔ bɔmi kpakpa ha Kristofoli ngɛ sɛ womihi nɛ e ngma a mi (Hyɛ kuku 4, 5)

5, 6. (a) Mɛni he munyu Paulo tu ngɛ sɛ womi enyɔne nɛ e ngma ya ha Tesalonikabi ɔmɛ ɔ mi? (b) Mɛni lɛ e be kɛe nɛ Mawu maa gu Yesu nɔ kɛ pee, nɛ mɛni sane e sa kaa wa bi wa he?

5 Paulo ngma sɛ womi enyɔne ya ha Kristofoli nɛ a hi Tesalonika a. Ngɛ sɛ womi nɛ ɔ mi ɔ, e ngma kaa amanehlu ngua ko maa ba. E tsɔɔ kaa Yesu maa da Mawu nane mi nɛ e kɛ ‘nihi nɛ li Mawu, kɛ ni nɛmɛ nɛ bui sane kpakpa a tue ɔ maa to ní.’ (2 Tes. 1:6-8) Ngɛ 2 Tesalonikabi yi 2 ɔ mi ɔ, Paulo tsɔɔ kaa asafo ɔ mi bi komɛ “hao” kaa Yehowa ligbi ɔ su si ta. (Kane 2 Tesalonikabi 2:1, 2.) Kristofoli nɛ a hi si ngɛ kaseli ɔmɛ a be ɔ mi ɔ li bɔnɛ Yehowa ma plɛ kɛ tsu e yi mi tomi ɔ he ní ha a kɛ pi si. Enɛ ɔ he ɔ, Paulo ngma ya ha mɛ ke: “Ní nɛ wa le ɔ, wa li kɛ pi si; fiɛɛmi nɛ waa fiɛɛɔ hu, fã kɛ fã kɛkɛ. Se ke nɔ́ nɛ hi kɛ pi si ɔ ba a, lɔɔ lɛɛ nɔ́ nɛ ji fã kɛ fã a maa laa.” (1 Kor. 13:9, 10) Se kɛ̃ ɔ, Kristofoli nɛ a hi si ngɛ kaseli ɔmɛ a be ɔ mi ɔ ma nyɛ maa ye Yehowa anɔkuale. Paulo, bɔfo Petro, kɛ ni kpahi nɛ a kɛ mumi ɔ pɔ mɛ nu ɔ bɔ mɛ kɔkɔ ngɛ níhi fuu a he. Ke a kɛ jamɛ a kɔkɔ bɔmi ɔmɛ tsu ní ɔ, a ma nyɛ maa ye Yehowa anɔkuale.

6 Paulo suɔ kaa e dla Kristofoli nɛ ɔmɛ a juɛmi, enɛ ɔ he ɔ, Mawu mumi ɔ ha nɛ e tsɔɔ mɛ níhi a nya kaa loko Yehowa ligbi ɔ maa ba a, nihi babauu ma kua hemi kɛ yemi ɔ, nɛ “dikalɔ ɔ” maa ba kekle. * Lɔɔ se ɔ, Nyɔmtsɛ Yesu ma “kpata”  nihi tsuo nɛ a sisi mɛ ɔ a hɛ mi. Paulo tsɔɔ nɔ́ heje nɛ a ma kpata a hɛ mi ɔ. E tsɔɔ kaa “a sume nɛ a ngɔ anɔkuale ɔ.” (2 Tes. 2:3, 8-10) E sa nɛ wa bi wa he ke: ‘Anɛ i suɔ anɔkuale ɔ niinɛ lo? Anɛ i kaseɔ Hwɔɔmi Mɔ ɔ kɛ womi kpahi nɛ a pee kɛ ha Mawu webi ngɛ je kɛ wɛ ɔ, konɛ ye níhi a sisi numi kɛ bɔnɛ asafo ɔ tsɔɔ níhi a sisi ha amlɔ nɛ ɔ nɛ kɔ lo?’

O KƐ HUƐMƐ KPAKPAHI NƐ BƆ

7, 8. (a) Mɛni haomihi Kristofoli nɛ a hi si ngɛ kaseli ɔmɛ a be ɔ mi ɔ kɛ kpe? (b) Mɛni lɛ ke Kristofono ko pee mwɔnɛ ɔ, e kɛ haomi maa kpe?

7 Hemi kɛ yemi kuali maa ngɔ a tsɔɔmihi kɛ hao Kristofoli. Ngɛ enɛ ɔ se hu ɔ, Kristofoli kɛ haomi kpahi hu maa kpe. Paulo ngma ya ha Timoteo kaa “sika suɔmi ji yayami tsuo sipoku.” Paulo tsɔɔ kaa ‘ni komɛ kɛ hɛdɔ ya di sika se, nɛ a ngmɛɛ a hemi kɛ yemi ɔ he. Nɔ́ nɛ je mi kɛ ba kɛkɛ ji tsui yemi babauu.’ (1 Tim. 6:10) Nɔ́ kpa hu nɛ maa hao Kristofoli ji ‘helo ɔ nítsumi ɔmɛ.’—Gal. 5:19-21.

8 Paulo bɔ Tesalonikabi ɔmɛ kɔkɔ ngɛ “lakpa bɔfohi” a he. Lakpa bɔfo nɛ ɔmɛ a ti ni komɛ “maa ye lakpa kɛ puɛ nyɛmimɛ ɔmɛ a tue kɛ ya nyɛɛ a se.” (2 Kor. 11:4, 13; Níts. 20:30) Pee se ɔ, Yesu je Efeso asafo ɔ yi, ejakaa a “ha we yayami peeli hɛ mi.” Efesobi ɔmɛ ‘ka nihi nɛ a tsɛɔ a he bɔfohi se pi bɔfohi ji mɛ ɔ, nɛ a na kaa lakpatsɛmɛ ji mɛ.’ (Kpoj. 2:2) Bua jɔmi sane ji kaa ngɛ sɛ womi enyɔne nɛ Paulo ngma ya ha Tesalonikabi ɔmɛ ɔ mi ɔ, e wo mɛ he wami ke: “Nyɛmimɛ, wa ngɛ nyɛ fãe ngɛ wa Nyɔmtsɛ Yesu biɛ mi ke nyɛɛ kɛ nihi nɛ tsu we ní, kɛ ni nɛmɛ nɛ bɛ a je mi saminya kaa bɔnɛ wa tsɔɔ nɛ ɔ kó bɔ.” Lɔɔ se ɔ, e wo Kristofoli nɛ a ‘sume kaa a ma tsu ní ɔ’ a ta. (2 Tes. 3:6, 10) Ke Paulo tsɔɔ kaa jamɛatsɛmɛ ɔmɛ po bɛ a je mi saminya a, lɛɛ mɛni wa ma de ngɛ hemi kɛ yemi kuali a he mɔ! Ngɛ anɔkuale mi ɔ, nihi nɛ a kɛ jamɛatsɛmɛ ɔmɛ bɔ ngɛ kaseli ɔmɛ a be ɔ mi ɔ kɛ haomi kpe. Mwɔnɛ ɔ hu ke nɔ ko kɛ nihi kaa jã bɔ ɔ, e kɛ haomi maa kpe.—Abɛ 13:20.

9. Mɛni heje nɛ e sa kaa waa hyɛ wa he ngɛ nihi nɛ a kɛ mɛ nitsɛmɛ a juɛmi tsɔɔ níhi a nya aloo a tuɔ munyu kɛ siɔ Yehowa blɔ nya tomi ɔ a he ɔ?

9 E be kɛe nɛ amanehlu ngua a ma fɛ, nɛ je yaya nɛ ɔ nyagbe hu maa ba. Enɛ ɔ he ɔ, e sa nɛ waa bu kɔkɔ bɔmi nɛ a kɛ ha ngɛ kaseli ɔmɛ a be ɔ mi ɔ tue wawɛɛ. E sɛ nɛ wa ha nɛ dloomi nɛ wa ná kɛ je Yehowa dɛ mi ɔ nɛ “pee yaka” konɛ neneene wami nɛ eko ɔ, wa ma ná ngɛ hiɔwe loo zugba a nɔ ɔ, nɛ ba bɔ wɔ. (2 Kor. 6:1) Ke nɔ ko yaa asafo mi kpehi nɛ e bɔɔ mɔde kaa e kɛ lɛ nitsɛ e juɛmi maa tsɔɔ Baiblo mi munyu ko nɛ asafo ɔ tsɔɔ we nya a sisi, aloo e tuɔ munyu kɛ siɔ asafo mi nikɔtɔmahi aloo Yehowa sɔmɔli kpahi ɔ, e sa nɛ waa hyɛ wa he ngɛ jamɛatsɛ ɔ he saminya.—2 Tes. 3:13-15.

‘NYƐƐ PƐTƐ NÍHI NƐ NYƐ KASE Ɔ HE’

10. Mɛni Paulo wo Kristofoli nɛ a hi Tesalonika a he wami kaa a pɛtɛ he?

10 Paulo wo e nyɛmimɛ nɛ a hi Tesalonika a he wami konɛ a “da si kpɛii” nɛ a kɛ níhi nɛ a kase ɔ nɛ tsu ní (Kane 2 Tesalonikabi 2:15.) Mɛni ji ‘níhi nɛ a kase ɔ’? Ní nɛ ɔmɛ ji Yesu tsɔɔmi ɔmɛ kɛ níhi nɛ Mawu ha nɛ Paulo kɛ ni kpahi ngma a. Pi lakpa jami mi tsɔɔmihi a he munyu nɛ e ngɛ tue. Paulo je nyɛmimɛ nɛ a ngɛ Korinto asafo ɔ mi ɔ a yi. E ngma ya ha mɛ ke: “Nyɛ kaiɔ ye ní peepee kɛ níhi nɛ i tsɔɔ nyɛ ɔ daa. Tsɔɔmihi nɛ i ná kɛ je nihi a dɛ, nɛ imi hu i ngɔ kɛ ha nyɛ ɔ, nyɛ pɛtɛ he.” (1 Kor. 11:2) Wa ma nyɛ ma he nihi nɛ a kɛ tsɔɔmi nɛ ɔmɛ haa wɔ ɔ maa ye, enɛ ɔ he ɔ, waa kɛ a tsɔɔmi ɔmɛ ma nyɛ ma tsu ní.

11. Kɛ ni komɛ nɛ a sisi mɛ ɔ pee a ní ha kɛɛ?

 11 Benɛ Paulo ngma sɛ womi kɛ ya ha Hebribi ɔmɛ ɔ, e tsɔɔ kaa Kristofono ko hemi kɛ yemi ma nyɛ ma puɛ nɛ e be Yehowa anɔkuale yee hu. E tsɔɔ kaa enɛ ɔ ma nyɛ maa ba ngɛ blɔ enyɔ a nɔ. (Kane Hebribi 2:1; 3:12.) Paulo tsɔɔ kaa ni komɛ ma nyɛ ma ‘gba kɛ je anɔkuale ɔ he,’ nɛ a ma ‘tsɔ Yehowa hɛ mi atua.’ Kaa nɔ hyɛmi nɔ́ ɔ, ke lɛ ko gba kɛ je e blɔ nɔ ɔ, sisije ɔ, e yɔsemi yee, se kɛ yaa kɛ yaa loko nihi yɔseɔ kaa e gba kɛ je e blɔ ɔ nɔ kulaa. Nɔ ko hu ma nyɛ maa je blɔ ma ha nɛ lɛ ko nɛ gba kɛ je e blɔ nɔ. Nɔ hyɛmi ní enyɔ nɛ ɔmɛ tsuo tsɔɔ kaa ke nɔ ko ngmɛ blɔ ɔ, nihi ma nyɛ maa sisi lɛ konɛ kã nɛ e ngɛ ngɛ anɔkuale ɔ mi ɔ mi nɛ gbɔjɔ.

12. Mɛni ji ní komɛ nɛ ma nyɛ ma puɛ huɛ bɔmi nɛ ngɛ waa kɛ Yehowa wa kpɛti ɔ?

12 Eko ɔ, jã ji bɔnɛ Tesalonikabi ɔmɛ a ti ni komɛ pee. Mwɔnɛ ɔ hu nɛɛ? Níhi fuu ngɛ nɛ puɛɔ wa be. Kaa nɔ hyɛmi nɔ́ ɔ, níhi nɛ nyɛɛ se nɛ ɔmɛ ma nyɛ maa puɛ wa be. Huɛ bɔmi hehi ngɛ Internet ɔ nɔ, sɛ gbi nɛ a ngmaa kɛ maneɔ nihi aloo a kaneɔ ngɛ mobile phone Internet ɔ nɔ, fiɛmi kɛ hɛja jemi. Ní nɛ ɔmɛ ma nyɛ ma je Kristofono ko juɛmi kɛ je anɔkuale ɔ nɔ, nɛ e ma nyɛ ma ha nɛ kã nɛ e ngɛ ɔ nya nɛ ba si. Mɛni ma nyɛ maa je mi kɛ ba? Nɔ́ nɛ ma nyɛ maa je mi kɛ ba ji kaa e be sɔlee kɛ je e tsui mi. Jehanɛ se hu ɔ, eko ɔ, e be deka náe kɛ kase Mawu Munyu ɔ, kɛ ya asafo mi kpehi, nɛ e be deka hu nae kɛ ya fiɛɛmi. Mɛni wa maa pee konɛ wa juɛmi mi nɛ ko pee wɔ enyɔɔnyɔ?

NƆ́ NƐ MA HA NƐ WA JUƐMI MI BE WƆ ENYƆƆNYƆ PEE

13. Kaa bɔnɛ Baiblo ɔ gba kɛ fɔ si ɔ, kɛ nihi fuu maa pee a ní ha kɛɛ, nɛ mɛni wa maa pee kɛ po wa hemi kɛ yemi ɔ he piɛ?

13 E sa nɛ wa kai kaa e be kɛe kulaa nɛ a ma kpata Satan je ɔ hɛ mi. Ke waa kɛ nihi nɛ he we yi kaa wa ngɛ “nyagbe ligbi ɔmɛ” a mi ɔ bɔɔ ɔ, a ma nyɛ ma puɛ wa juɛmi. Bɔfo Petro ngma kɛ kɔ be nɛ wa ngɛ mi nɛ ɔ he ke: “Nɔ he fɛu yeli komɛ maa ba, nɛ nɔ́ nɛ a we akɔnɔ de mɛ ke a pee ɔ, lɔɔ a maa pee. Kikɛmɛ a nimli nɛ ɔmɛ ma de ke, ‘E wo si kaa e maa kpale kɛ ba ekohu, pi jã lo? Jije e ngɛ? Ejakaa kɛ je benɛ wa nɛmɛ ɔmɛ gbo nɛ ɔ, bɔnɛ níhi ngɛ kɛ je benɛ a bɔ je ɔ, jã nɔuu nɛ a ngɛ nɛ ɔ nɛ.’” (2 Pet. 3:3, 4) Ke wa kaneɔ Baiblo ɔ daa ligbi nɛ wa kaseɔ ɔ, lɔɔ maa ye bua wɔ nɛ wa maa le kaa wa ngɛ “nyagbe ligbi ɔmɛ” a mi. Hemi kɛ yemi kuami nɛ Baiblo ɔ gba kɛ fɔ si kaa e maa ba a, je sisi kɛ je blema, nɛ e ngɛ nɔ yae kɛ ba si mwɔnɛ ɔ. Loloolo ɔ, “dikalɔ ɔ” ngɛ, nɛ e ngɛ si tee kɛ ngɛ Mawu sɔmɔli woe. Enɛ ɔ he ɔ, e sa nɛ e hi wa juɛmi mi be tsuaa be kaa Yehowa ligbi ɔ su si ta.—Zef. 1:7.

Ke wa dlaa wa he saminya loko wa yaa fiɛɛmi ɔ, lɔɔ yeɔ bua wɔ nɛ wa juɛmi mi pee we wɔ enyɔɔnyɔ (Hyɛ kuku 14, 15)

14. Ke waa kɛ wa he woɔ sɔmɔmi nítsumi ɔ mi vii ɔ, lɔɔ poɔ wa he piɛ ngɛ mɛni blɔ nɔ?

14 Nɔ́ kpa ko hu nɛ be hae nɛ wa juɛmi mi nɛ pee wɔ enyɔɔnyɔ ji, nɛ wa maa fiɛɛ Matsɛ Yemi ɔ he sane kpakpa a daa. Kristo Yesu fã e se nyɛɛli ɔmɛ kaa a ya je ma amɛ tsuo a mi ngɛ he tsuaa he nɛ a ya pee nihi kaseli, konɛ a tsɔɔ mɛ nɛ a ye níhi tsuo nɛ e fã ke a pee ɔ nɔ. Enɛ ɔ nɛ kaseli ɔmɛ maa pee ɔ maa po a he piɛ. (Mat. 28:19, 20) Loko wa maa bu Yesu fami ɔ tue ɔ, ja waa kɛ kã tsuɔ fiɛɛmi nítsumi ɔ. Anɛ o susu kaa Tesalonikabi ɔmɛ fiɛɛ kɛ ha nihi nɛ a tsɔɔ nihi ní eko kɛ eko kɛkɛ akɛnɛ a susu kaa e ji a blɔ nya nítsumi kaa a pee jã a heje lo? Mo kai munyu nɛ nyɛɛ se nɛ ɔ nɛ Paulo ngma ya ha mɛ ɔ. E ngma ke: “Nyɛ ko gbe Mumi Klɔuklɔu ɔ. Nyɛ kó ha gbali ɔmɛ a sɛ gbi nɛ pee nyɛ tai.” (1 Tes. 5:19, 20) Gbami munyuhi nɛ wa kaseɔ nɛ wa fiɛɛɔ kɛ haa nihi ɔ ngɛ bua jɔmi wawɛɛ nitsɛ!

15. Mɛni ji ní komɛ nɛ wa ma nyɛ ma susu a he ngɛ wa weku Mawu jami ɔ mi?

 15 Wɔ tsuo wa suɔ nɛ waa ye bua wa weku mi bimɛ nɛ a he nɛ be kɛ ha fiɛɛmi nítsumi ɔ. Nyɛmimɛ nyumuhi kɛ yihi fuu na kaa ke a kɛ be nɛ a kɛ peeɔ a weku Mawu jami ɔ eko kase blɔhi a nɔ nɛ a guu kɛ fiɛɛɔ ɔ, lɔɔ maa ye bua a weku ɔ saminya. Eko ɔ, nyɛ ma nyɛ maa kase bɔnɛ a kpaleɔ kɛ ya slaa nihi nɛ a ngɛ munyu ɔ he bua jɔmi ɔ ha. Ke a kpale kɛ ya slaa nɔ ko ɔ, mɛni he munyu a maa tu? Mɛni a ma nyɛ ma de wetsɛ ɔ nɛ́ lɔɔ ma ha nɛ e bua maa jɔ munyu ɔ he wawɛɛ? Mɛni be nɛ a ma nyɛ maa kpale kɛ ya slaa ni ɔmɛ? Wekuhi fuu hu kɛ a weku Mawu jami be ɔ eko kaseɔ níhi nɛ a maa kase ngɛ asafo mi kpehi a sisi ɔ. Anɛ nyɛ weku ɔ ma nyɛ maa pee jã lo? Ke o haa sanehi a heto ngɛ asafo mi kpehi a sisi ɔ, o hemi kɛ yemi ɔ mi maa wa, nɛ o juɛmi mi be mo enyɔɔnyɔ pee. (La 35:18) Niinɛ, ke wa peeɔ weku Mawu jami ɔ, lɔɔ be hae nɛ waa ka wa yi mi kɛ de nɔ ko aloo wa yi mi nɛ pee wɔ enyɔɔnyɔ.

16. Mɛni lɛ woɔ nihi nɛ a pɔ mɛ nuɔ he wami konɛ a juɛmi mi nɛ ko pee mɛ enyɔɔnyɔ?

16 Jehahi babauu ji nɛ ɔ, Yehowa ha nɛ e webi ngɛ Baiblo gbamihi a sisi nue wawɛɛ. Enɛ ɔ heje ɔ, wa ngɛ nɔ mi mami kaa hwɔɔ se ɔ, wa ma ná jɔɔmi nguahi. Nihi nɛ a pɔ mɛ nu ɔ ngɛ hɛ kɛ nɔ fɔmi kaa a ma ya piɛɛ Kristo he ngɛ hiɔwe! Ngɛ anɔkuale mi ɔ, enɛ ɔ woɔ mɛ he wami nɛ a juɛmi mi pee we mɛ enyɔɔnyɔ. Munyu nɛ nyɛɛ se nɛ ɔ nɛ Paulo ngma ya ha Tesalonikabi ɔmɛ ɔ kɔ nihi nɛ a pɔ mɛ nu nɛ a ngɛ mwɔnɛ ɔ a he. E ngma ke: “Se nyɛmimɛ nɛ Nyɔmtsɛ ɔ suɔ, e hia kaa waa na Mawu si daa ha nyɛ. Ejakaa kɛ je sisije lokoo ɔ, Mawu hla nyɛ, nɛ e he nyɛ yi wami kɛ gu mumi ɔ nɛ maa tsu nyɛ he ɔ, kɛ anɔkuale ɔ nɛ nyɛ he ye ɔ nɔ.”—2 Tes. 2:13.

17. Mɛni he wami lɛ munyu nɛ ngɛ 2 Tesalonikabi 3:1-5 ɔ woɔ wɔ?

17 E sa kaa nihi hu nɛ a ngɛ hɛ kɛ nɔ fɔmi kaa a ma ná neneene wami ngɛ zugba a nɔ ɔ nɛ a hyɛ nɛ hi konɛ a juɛmi mi nɛ ko pee mɛ enyɔɔnyɔ. Ke o ngɛ hɛ kɛ nɔ fɔmi kaa o maa hi zugba a nɔ ɔ, lɛɛ moo bu ga nɛ Paulo wo e nyɛmimɛ nɛ a pɔ mɛ nu nɛ a hi Tesalonika a tue. (Kane 2 Tesalonikabi 3:1-5.) E sa nɛ wa ti nɔ tsuaa nɔ bua nɛ jɔ munyu nɛ woɔ nɔ he wami nɛ ɔ he. Niinɛ, sɛ womihi nɛ Paulo ngma ya kɛ Tesalonikabi ɔmɛ bɔɔ wɔ kɔkɔ ngɛ ní komɛ a he. E tsɔɔ kaa e sɛ nɛ waa ka wa yi mi kɛ tsɔɔ Baiblo mi munyu ko nɛ asafo ɔ tsɔɔ we nya a sisi. Akɛnɛ nyagbe ɔ su si ta heje ɔ, wa bua jɔ kɔkɔ bɔmi nɛ ɔmɛ a he wawɛɛ.

^ kk. 6 Paulo de ngɛ Bɔfo Ɔmɛ A Nítsumi 20:29, 30 ɔ ke: “Nyɛ nitsɛmɛ nyɛ kpɛti hu nihi maa ye lakpa kɛ puɛ nyɛmimɛ ɔmɛ a tue kɛ ya nyɛɛ a se.” Pee se ɔ, e ba mi jã. Ni komɛ tsɔ a he kɛ je Kristofoli ɔmɛ a he nɛ a pee a he osɔfohi. Jeha 200 ngɛ Kristo gbenɔ ɔ se ɔ, “dikalɔ ɔ” nɛ ji, osɔfohi nɛ a ngɛ jamihi nɛ tsɛɔ a he ke Kristofoli ɔ a mi ɔ, je e he kpo heii.—Hyɛ Blɛfo gbi Hwɔɔmi Mɔ ɔ nɛ je kpo ngɛ February 1, 1990 ɔ, bafa 10-14.