Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

 HƐ MI MUNYU | ANƐ WA HIA MAWU NGƐ WA SI HIMI MI LO?

Mɛni Heje Nɛ Nihi Biɔ Sane Nɛ ɔ?

Mɛni Heje Nɛ Nihi Biɔ Sane Nɛ ɔ?

Nihi nɛ a he we yi kaa Mawu ngɛ ɔ ngma ngɛ níhi a jua tsɛmi tso tɛtlɛɛ ko nɔ ke: “Nimli ayɔhi abɔ he we yi kaa Mawu ngɛ. Anɛ mo hu o he we yi kaa Mawu ngɛ lo?” Enɛ ɔ tsɔɔ kaa a susuɔ kaa a hia we Mawu ngɛ a si himi mi.

Nihi fuu hu deɔ ke a heɔ Mawu yeɔ. Se bɔnɛ a mwɔɔ a yi mi kpɔ ngɛ níhi a he ha a, ngɛ kaa nɔ́ nɛ a he we yi kaa Mawu ngɛ. Katoliki osɔfo nɔkɔtɔma ko nɛ a tsɛɛ lɛ ke Salvatore Fisichella a de kɛ kɔ e sɔlemi bimɛ ɔmɛ a he ke: “Mwɔnɛ ɔ, ke nihi na wɔ ɔ, eko ɔ, a be lee kaa wa ji Kristofoli, ejakaa wa baa wa je mi kaa bɔnɛ nihi nɛ a he we Kristo yi ɔ hu baa a je mi ɔ.”

Ni komɛ hu be deka kulaa nɛ a kɛ ma susu Mawu he. A susuɔ kaa Mawu kɛ mɛ a kpɛti kɛ tsɔ pe bɔnɛ a ma nyɛ maa su e he konɛ e ye bua mɛ. Eko ɔ, ja nihi kaa jã a kɛ haomi ko kpe pɛ loko a tsɛɔ Mawu. A buu Mawu kaa tsɔlɔ ko nɛ ke o suɔ kaa e pee nɔ́ ko ha mo ɔ, loko o tsɛɛ lɛ.

Ni komɛ nɛ se nami nɛ ngɛ jami mi tsɔɔmihi a he, aloo a kɛ níhi nɛ a tsɔɔ mɛ ngɛ a sɔlemihi a mi ɔ tsu we ní ngɛ a si himi mi. Kaa nɔ hyɛmi nɔ́ ɔ, Katoliki jami ɔ kɛ Baiblo ɔ tsuo tsɔɔ kaa ke nyumu kɛ yo sɛ we gba si himi mi ɔ, e sɛ nɛ a hi si kaa nɔ kɛ e yo. Se kɛ̃ ɔ, Katoliki bi nɛ a ngɛ Germany ɔ a kpɛti nihi fuu nɛ tɔmi ko ngɛ nyumu kɛ yo nɛ a sɛ we gba si himi mi, nɛ a hiɔ si kaa nɔ kɛ e yo ɔ he. (1 Korintobi 6:18; Hebribi 13:4) Ngɛ anɔkuale mi ɔ pi Katoliki bi pɛ nɛ a ní peepee kɛ a jami ɔ mi tsɔɔmi ɔ kɔ we. Jami kpahi fuu a nya dali hu deɔ kaa a jami ɔ mi bimɛ peeɔ a ní kaa nɔ́ nɛ “a he we yi kaa Mawu ngɛ.”

Nɔ hyɛmi ní nɛ ɔmɛ ha nɛ nihi bi sane nɛ nyɛɛ se nɛ ɔ: Anɛ wa hia Mawu ngɛ wa si himi mi niinɛ lo? Tsa pi mwɔnɛ ɔ nɛ sane nɛ ɔ je sisi. A tu kekleekle be nɛ sane nɛ ɔ je sisi ɔ he munyu ngɛ Baiblo ɔ sisije womi ɔmɛ a mi. Bɔnɛ pee nɛ waa na sane bimi nɛ ɔ heto ɔ, nyɛ ha nɛ wa susu sane kpahi nɛ a tu a he munyu ngɛ Baiblo ɔ mi womi nɛ ji Mose Kekleekle Womi ɔ mi ɔ he nɛ waa hyɛ.