Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  October 2013

 MOO HƐ MO KƐ SU MAWU HE

‘Yehowa Ngɔ Nyɛ He Yayami Ɔmɛ Ngɔ Pa Nyɛ’

‘Yehowa Ngɔ Nyɛ He Yayami Ɔmɛ Ngɔ Pa Nyɛ’

Britain yinɔ sane ngmalɔ ko nɛ a tsɛɛ lɛ ke Edward Herbert, nɛ e hi si maa pee jeha 400 nɛ be ɔ de ke: “Nɔ nɛ ngɔɛ nihi a tɔmihi kɛ pɛ mɛ ɔ, a kɛ lɛ hu e tɔmi be lɛ pae.” Munyu nɛ ɔ nɛ e tu ɔ tsɔɔ yi mi tomi kake heje nɛ e he hia kaa waa ngɔ nihi a tɔmihi kɛ pa mɛ ɔ. Lɔɔ ji kaa wɔ hu wa tɔ̃ɔ nihi a nɔ, nɛ e biɔ nɛ mɛ hu a ngɔ wa tɔmihi kɛ pa wɔ. (Mateo 7:12) Se wa ngɛ yi mi tomi kpa ko hu nɛ he hia pe kulaa nɛ lɔɔ heje ɔ, e sa kaa waa ngɔ nihi a tɔmihi kɛ pa mɛ. Mo kadi munyu nɛ bɔfo Paulo tu ngɛ Kolosebi 3:13 ɔ.—Kane.

Akɛnɛ wɔ kulaa wa yi mluku heje ɔ, be komɛ ɔ, wa ma nyɛ ma tɔ̃ nihi a nɔ, nɛ mɛ hu a ma nyɛ ma tɔ̃ wa nɔ. (Romabi 3:23) Mɛni wa ma nyɛ maa pee konɛ tue mi jɔmi nɛ hi waa kɛ wa nyɛmimɛ nɛ mɛ hu a yi mluku ɔ wa kpɛti? Mawu mumi ɔ ha nɛ Paulo wo wɔ ga kaa waa to wa tsui si ha wa nyɛmimɛ nɛ waa kɛ a tɔmihi nɛ pa mɛ. Paulo ngma ga womi nɛ ɔ maa pee jeha akpe enyɔ nɛ be ɔ. Ga womi nɛ ɔ he hia wɔ mwɔnɛ ɔ kaa bɔnɛ e hia ngɛ jamɛ a be ɔ mi ɔ. Nyɛ ha wa susu munyu nɛ Paulo ngma a he saminya nɛ waa hyɛ.

‘Nyɛɛ ya nɔ nɛ nyɛɛ na ha nyɛ sibi.’ Hela munyu nɛ a tsɔɔ sisi ke, ‘nyɛɛ ya nɔ nɛ nyɛɛ na ha nyɛ sibi’ ɔ tsɔɔ tsui si tomi. Níhi a mi hlami womi ko tsɔɔ kaa “ke nihi tɔ̃ Kristofoli a nɔ nɛ a mi mi fu po ɔ, a toɔ a tsui si nɛ a kɛ ni ɔmɛ a tɔmi paa mɛ.” Munyu nɛ ji, “ha nyɛ sibi” nɛ a kɛ tsu ni ɔ tsɔɔ kaa e sa nɛ waa to wa tsui si ha wa sibi. Nɛ tsɔɔ kaa ke wa kai kaa wɔ hu wa peeɔ níhi nɛ ma nyɛ maa wo wa nyɛmimɛ a mi mi la a, wa be hae nɛ níhi nɛ nihi peeɔ wɔ nɛ wa sume ɔ nɛ puɛ tue mi jɔmi nɛ ngɛ waa kɛ mɛ wa kpɛti ɔ. Nɛ ke ni kpahi tɔ̃ wa nɔ hu nɛɛ?

‘Nyɛɛ ya nɔ nɛ nyɛ kɛ pa nyɛ he.’ Ní lelɔ kpanaa ko tsɔɔ kaa Hela munyu nɛ a kɛ tsu ní kaa ‘nyɛɛ ya nɔ nɛ nyɛ kɛ pa nyɛ he ɔ’ “tsɔɔ we tɔmi nɛ a kɛ paa nɔ kɛkɛ, mohu ɔ, e tsɔɔ bɔnɛ e sa kaa nɔ ko nɛ e je e tsui mi nɛ e kɛ tɔmi nɛ pa ha.” Ní lelɔ kpa ko hu tsɔɔ kaa munyu nɛ ɔ ma nyɛ maa tsɔɔ kaa “e sa nɛ nɔ ko nɛ e je mi mi himi mi nɛ e pee nɔ ko kpakpa konɛ nɔ ɔ nɛ e ná he se.” ‘Ke nɔ ko kɛ wɔ ná sane’ po nɛ wa je wa tsui mi nɛ wa ngɔ e tɔmi ɔ kɛ pa lɛ ɔ, lɔɔ tsɔɔ kaa wa mi mi hi. Mɛni heje nɛ e sa kaa waa je wa tsui nɛ waa kɛ nihi a tɔmihi nɛ pa mɛ ɔ? Nɔ́ kake ji kaa wɔ hu wa ma nyɛ ma tɔ̃ nihi a nɔ, nɛ e ma bi kaa mɛ hu a ngɔ wa tɔmihi kɛ pa wɔ.

‘Kaa bɔnɛ Yehowa hu ngɔ nyɛ he yayami ngɔ pa nyɛ ɔ.’ Yi mi tomi titli heje nɛ e sa nɛ waa ngɔ nihi tɔmi kɛ pa mɛ ji kaa Yehowa Mawu ngɔɔ wa he yayamihi kɛ paa wɔ faa. (Micah 7:18) Mo susu kpakpa nɛ Yehowa peeɔ yayami peeli nɛ a tsake a tsui ɔ he nɛ o hyɛ. Yehowa pee we yayami, se wɔɔ lɛɛ wa peeɔ yayami. E ngɛ mi kaa Yehowa be yayami peeli a nɔ tɔ̃e gblegbleegble nɛ e ma bi nɛ a ngɔ e tɔmi kɛ pa lɛ mohu lɛɛ, se e jeɔ e tsui mi nɛ e ngɔɔ yayami peeli nɛ a pia a he ɔ a he yayamihi kɛ paa mɛ. Ngɛ anɔkuale mi ɔ, Yehowa ji nɔ nɛ ngɔɔ nihi a he yayami kɛ paa mɛ pe kulaa nɛ wa ma nyɛ maa kase lɛ!

Yehowa ji nɔ nɛ ngɔɔ nihi a he yayami kɛ paa mɛ pe kulaa nɛ wa ma nyɛ maa kase lɛ!

Yehowa mɔbɔ nami ɔ hɛɛ wɔ kɛ suɔ e he, nɛ lɔɔ haa nɛ wa kaseɔ lɛ. (Ephesians 4:32–5:1) E sa nɛ wa bi wa he ke, ‘Akɛnɛ Yehowa jeɔ mi mi jɔmi mi nɛ e kɛ ye he yayamihi paa mi heje ɔ, mɛni heje nɛ i ngɔɛ ye nyɛmimɛ nɛ a yi mluku kaa imi nɔuu ɔ a tɔmihi kɛ pɛ mɛ ɔ?’—Luke 17:3, 4.