Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  October 2013

 HƐ MI MUNYU | MƐNI MUNYU NGƐ BAIBLO Ɔ MI?

Kɛ Wa Plɛ Kɛ Ba Je ɔ Mi Ha Kɛɛ?

Kɛ Wa Plɛ Kɛ Ba Je ɔ Mi Ha Kɛɛ?

Ngɛ e kpiti pomi mi ɔ, Baiblo ɔ mi womi nɛ ji Mose Kekleekle Womi ɔ tsɔɔ bɔnɛ je mluku ɔ plɛ kɛ ba ha. E de ke: ‘Sisije ɔ, Mawu bɔ hiɔwe kɛ zugba.’ (1 Mose 1:1) Benɛ Mawu bɔ tsohi kɛ lohwehi ta a, e bɔ Adam kɛ Hawa. E slo Adam kɛ Hawa ngɛ lohwehi a he, ejakaa adesahi lɛɛ a ma nyɛ ma je Mawu suhi kpo. A ma nyɛ maa hla nɔ́ nɛ mɛ nitsɛmɛ a suɔ kaa a maa pee hulɔ. Adam kɛ Hawa bu a ní peepee ɔ he akɔtaa. Kaa a bu blɔ tsɔɔmihi nɛ Mawu kɛ ha mɛ ɔ tue ɔ, jinɛ a kɛ a bimɛ ko hyi zugba a nɔ tɔ, nɛ a ko hi nɔ daa ngɛ tue mi jɔmi mi nɛ a maa ye mluku kaa bɔnɛ Mawu to e yi mi kɛ ha adesahi ɔ.

Se Mawu bɔfo ko ya sisi mɛ. A tsɛɛ bɔfo nɛ ɔ ke Satan. E biɛ ɔ sisi ji “Nɔ Nɛ Teɔ Si Kɛ Woɔ Nɔ.” Satan gu sinɔ ko nɔ kɛ sisi Hawa. E de Hawa kaa ke e je e he ngɛ Mawu he ɔ, e ma ná si himi kpakpa. Adam kɛ Hawa bu Satan tue nɛ a puɛ a kɛ a Bɔlɔ ɔ a kpɛti. Akɛnɛ Adam kɛ Hawa hla nɔ́ yaya heje ɔ, neneene wami bɔ mɛ. A ngɔ yayami, mluku nɛ a yi, kɛ gbenɔ kɛ sã wɔ tsuo. Wa ti nɔ ko be nyɛe maa tu gbenɔ nya fo.

Amlɔ nɔuu ɔ, Mawu tsɔɔ kaa e ma tsu si himi yaya nɛ ɔ he ní. E tsɔɔ kaa e ma ha Adam bimɛ he blɔ konɛ a ná neneene wami. Mawu gba kɛ fɔ si kaa nyagbenyagbe ɔ, “nina” ko ma ba kpata Satan hɛ mi, nɛ e ma ba po haomihi tsuo nɛ Satan, Adam, kɛ Hawa ngɔ kɛ ba a se. Nina a daa si kɛ ha nɔmlɔ titli ko. (1 Mose 3:15) Mɛnɔ ma ba pee “nina” nɛ ɔ? Kɛ yaa kɛ yaa a, wa maa na.

Se loko nina a maa ba a, Satan bɔ mɔde si abɔ kaa e ma puɛ yi mi tomi kpakpa nɛ Mawu hɛɛ ɔ. E kɛ we kulaa nɛ nimli yayahi a he ba hiɛ babauu. Mawu to e yi mi kaa e kɛ nyu afua ko ma kpata yayami peeli ɔmɛ a hɛ mi. Mawu de Noa nɛ e ji dalɔ ɔ kaa e kpɛ daka ngua ko konɛ e kɛ he e kɛ e weku ɔ a yi wami. Mawu de lɛ kaa e ngɔ lohwehi hu kɛ wo daka a mi konɛ mɛ hu a ná yi baami.

Jeha kake se benɛ Nyu Afua a je sisi ɔ, zugba a nɔ gbli, nɛ Noa kɛ e weku ɔ je kpo kɛ je daka a mi kɛ ba zugba nɛ nɔ tsɔ nɔ. Se kɛ̃ ɔ, “nina” a bɛ lolo.

A kɛ da ngmamihi nɛ a nyɛɛ se nɛ ɔ a nɔ: 1 Mose yi 1-11; Yuda 6, 14, 15; Kpojemi 12:9.