Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  May 2013

Anɛ O Kɛ O Hɛ Maa Fɔ Mawu Nɔ Lo?

Anɛ O Kɛ O Hɛ Maa Fɔ Mawu Nɔ Lo?

MOO ngɔ lɛ kaa o ngɛ huɛ ko nɛ́ o suɔ e sane wawɛɛ, se e peeɔ nɔ́ ko nɛ o nui sisi. Nihi tuɔ munyu kɛ siɔ lɛ, a deɔ ke e hɛɛ juɛmi yaya, nɛ e yi mi wa. Anɛ mo hu o maa kplɛɛ nɔ amlɔ nɔuu kaa o huɛ ɔ ngɛ jã, aloo o maa nu o huɛ ɔ nya mi munyu loko o maa ma o juɛmi nya si? Ke o huɛ ɔ be lejɛ ɔ nɛ e ma je e nya a, anɛ o maa to o tsui si konɛ o tsɔɔ níhi a nya lo?

Loko o ma ha sane bimi nɛ ɔ heto ɔ, eko ɔ, o maa suɔ nɛ o le níhi fuu ngɛ o huɛ ɔ he. Eko ɔ, o ma bi o he ke, ‘Anɛ i le ye huɛ nɛ ɔ saminya lo, nɛ mɛni heje nɛ i suɔ e sane ɔ?’ Sisi numi ngɛ he. Se mo susu nɔ́ nɛ ɔ he nɛ o hyɛ: Anɛ wa be nyɛe maa ngɔ munyu nɛ ɔ kɛ to sane nɛ nihi biɔ kaa Mawu yi mi wa loo e yi mi wɛ ɔ he lo?

Eko ɔ, e maa ye kɛ ha mo kaa o maa nu ní komɛ nɛ Mawu pee ɔ a sisi, aloo e maa pee mo nyakpɛ kaa e ngmɛ blɔ nɛ ní komɛ ngɛ nɔ yae. Nihi fuu ma de mo ke Mawu yi mi wa, nɛ a maa wo mo he wami konɛ mo hu o susu kaa Mawu hɛɛ juɛmi yaya kaa bɔnɛ mɛ hu a susu ɔ. Anɛ o ma hla níhi a mi konɛ o le níhi fuu lo? Ja o le Mawu saminya loko o ma nyɛ ma ha sane bimi nɛ ɔ heto. Mo bi o he ke, ‘Mɛni ní kpakpahi nɛ Mawu pee ha mi?’

Ke o kɛ haomi kpeɔ ngɛ o si himi mi ɔ, eko ɔ, o ma de ke Mawu pee we nɔ́ kpakpa ko ha mo. Se mo susu he bɔɔ nɛ o hyɛ. Anɛ Mawu lɛ ha nɛ o kɛ haomihi kpeɔ ngɛ o si himi mi, aloo lɛ nɛ e peeɔ ní kpakpahi ha mo? Wa na kaa Satan ji “nɔ nɛ ngɛ je ɔ nɔ matsɛ yee,” se pi Yehowa. (Yohane 12:31) Enɛ ɔ he ɔ, Satan lɛ ha nɛ ní yayahi ngɛ nɔ yae nɛ nihi yi dami sane ngɛ je nɛ ɔ mi ɔ nɛ. Anɛ o kplɛɛ we nɔ kaa mluku nɛ wa yi kɛ níhi nɛ wa li wa he be nɛ a baa wa nɔ ɔ hu haa nɛ waa kɛ haomihi fuu kpeɔ lo?

Mɛni ní kpakpahi nɛ Mawu pee? Mo susu nɔ́ nɛ Baiblo ɔ de ɔ he nɛ o hyɛ. E de ke: Mawu ji “hiɔwe kɛ zugba bɔlɔ,” nɛ wa nɔmlɔtso ɔ nɛ e bɔ “ngɛ nyakpɛ” blɔ nɔ ɔ piɛɛ e nítsumi ɔmɛ a he; Yehowa ji ‘Mawu nɛ haa nɔ yi náa wami.’ (La 124:8; 139:14; Daniel 5:23) Mɛni enɛ ɔ tsɔɔ?

E tsɔɔ kaa wa Bɔlɔ ɔ lɛ haa nɛ wa hii wami mi. (Bɔfo Ɔmɛ A Nítsumi 17:28) E tsɔɔ kaa nike ní nɛ ji wami, níhi nɛ ngɛ fɛu nɛ a ngɛ je ɔ mi, suɔmi kɛ huɛ bɔmi, níhi a ngɔmi, bɔnɛ wa nyɛɔ taa níhi a he, nɛ wa nuɔ níhi a pɛmi, nɛ wa nuɔ níhi a he fu ha a, tsuo ji nike ní nɛ je Mawu ngɔ. (Yakobo 1:17) Anɛ o kplɛɛ we nɔ kaa ní nɛ ɔmɛ nɛ e ha wɔ ɔ tsɔɔ kaa e ji Huɛ nɛ e sa kaa waa suɔ e sane, nɛ waa kɛ wa hɛ nɛ fɔ e nɔ lo?

Ngɛ anɔkuale mi ɔ, eko ɔ, e maa ye ha mo kaa o kɛ o hɛ maa fɔ Mawu nɔ. Eko ɔ, o susu kaa o li lɛ saminya, nɛ enɛ ɔ he ɔ, o kɛ o hɛ be nyɛe maa fɔ e nɔ. Sisi numi ngɛ he. Wa be nyɛe maa tsɔɔ yi mi tomihi tsuo heje nɛ nihi deɔ ke Mawu yi mi wa a ngɛ munyu kpiti nɛ ɔ nɛ wa ngɛ he susue ɔ mi. Se anɛ e he hia we nɛ waa bɔ mɔde wawɛɛ nɛ waa le Mawu saminya lo? * Wa ngɛ nɔ mi mami kaa ke o pee jã a, o maa le anɔkuale nɛ kɔɔ Mawu he. Anɛ e yi mi wa lo? Pi jã ji sane ɔ kulaa. “Mawu ɔ, suɔmi ji lɛ.”—1 Yohane 4:8.

^ kk. 8 Kaa nɔ hyɛmi nɔ́ ɔ, o ma nyɛ maa le nɔ́ heje nɛ Mawu ngmɛ nɔ́ nami blɔ ɔ ngɛ Mɛni Tutuutu Ji Baiblo ɔ Tsɔɔmi? womi ɔ nɛ Yehowa Odasefoli pee ɔ yi 11 ɔ.