Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  September 2015

Anɛ O He Nile Haa Nɛ O Peeɔ Nɔ́ Nɛ Da Lo?

Anɛ O He Nile Haa Nɛ O Peeɔ Nɔ́ Nɛ Da Lo?

“Nɔ́ nɛ i ngɛ mo fae ke o pee nɛ ɔ ma ha nɛ waa suɔ wa sibi kɛ tsui nɛ mi tsɔ; wa he nile be wɔ fɔ bue.”1 TIMOTEO 1:5.

LAHI: 22, 48

1, 2. Mɛnɔ ha wɔ he nile, nɛ mɛni he je e sa kaa wa bua nɛ jɔ kaa wa ngɛ he nile ɔ?

YEHOWA MAWU bɔ adesahi nɛ e ha mɛ he blɔ konɛ mɛ nitsɛmɛ a mwɔ a yi mi kpɔ ngɛ níhi a he. Bɔ nɛ pee nɛ wa nyɛ nɛ waa pee juɛmi nɛ da a, Yehowa ha wɔ nɔ́ ko konɛ lɔ ɔ nɛ kudɔ wɔ. A tsɛɛ jamɛ a nɔ́ ɔ ke he nile. Lɔ ɔ lɛ haa nɛ wa leɔ nɔ́ nɛ da kɛ nɔ́ nɛ dɛ ɔ nɛ. Ke waa kɛ wa he nile tsu ní ngɛ blɔ nɛ da nɔ ɔ, e ma nyɛ maa ye bua wɔ konɛ waa pee nɔ́ nɛ da, nɛ waa yu wa he ngɛ ní yayahi a he. He nile nɛ Yehowa ha wɔ ɔ ji odase yemi nɛ tsɔɔ kaa e suɔ wɔ, nɛ e suɔ kaa e hi ha wɔ.

2 Mwɔnɛ ɔ, ni komɛ peeɔ nɔ́ nɛ da, nɛ a sume nɔ́ yaya kulaa, pohu a kase we Baiblo sisi tomi mlaahi. (Kane Roma Bi 2:14, 15.) Mɛni he je? Ejakaa a ngɛ he nile. He nile haa nɛ nihi fuu yuɔ a he ngɛ ní yayahi a he. Kaa nɔ ko nɔ ko be he nile ɔ, mo susu bɔ nɛ je ɔ mi si himi ko pee ha a he nɛ o hyɛ! Jinɛ wa ko nu ní yayahi a he pe bɔ nɛ wa ngɛ nue amlɔ nɛ ɔ. Wa bua jɔ kaa Yehowa ha wɔ he nile!

Ke wa tsɔse wa he nile saminya a, kɛ lɔ ɔ ma plɛ kɛ ye bua wɔ ha kɛɛ ke e he hia kaa waa mwɔ wa yi mi kpɔ?

3. Kɛ wa he nile ma plɛ kɛ ye bua wɔ ngɛ asafo ɔ mi ha kɛɛ?

3 Nihi susuu we kaa e he hia nɛ a tsɔse a he nile. Se Yehowa  we bi lɛɛ a suɔ kaa a he nile ɔ nɛ tsu ní saminya, ejakaa lɔ ɔ ma nyɛ maa ye bua mɛ konɛ kake peemi nɛ hi asafo ɔ mi. Wa suɔ nɛ wa he nile ɔ nɛ kai wɔ Baiblo sisi tomi mlaahi nɛ kɔɔ kpakpa kɛ yayami kɛ nɔ́ nɛ da kɛ nɔ́ nɛ dɛ he. Se loko wa ma nyɛ ma tsɔse wa he nile ɔ, e sa nɛ waa pee babauu pe Baiblo ɔ nɛ wa maa kase kɛkɛ. E sa nɛ waa suɔ Mawu mlaa amɛ, nɛ wa ná hemi kɛ yemi kaa ke waa kɛ tsu ní ɔ, e maa hi ha wɔ. Paulo ngma ke: “Nɔ́ nɛ i ngɛ mo fae ke o pee nɛ ɔ ma ha nɛ waa suɔ wa sibi kɛ tsui nɛ mi tsɔ; wa he nile be wɔ fɔ bue.” (1 Timoteo 1:5) Ke wa tsɔseɔ wa he nile ɔ, nɛ wa buɔ nɔ́ nɛ e deɔ wɔ ɔ tue ɔ, suɔmi nɛ wa ngɛ ha Yehowa kɛ hemi kɛ yemi nɛ wa ngɛ ngɛ e mi ɔ mi maa wa. Bɔ nɛ waa kɛ wa he nile ma tsu ní ha a maa tsɔɔ kaa huɛ bɔmi gbagbanii ngɛ waa kɛ Yehowa wa kpɛti, nɛ wa suɔ kaa wa maa sa e hɛ mi. Bɔ nɛ waa kɛ wa he nile tsuɔ ní ha a hu tsɔɔ nɔmlɔ tutuutu nɛ wa ji.

4. Mɛni wa ma nyɛ maa pee kɛ tsɔse wa he nile?

4 Se mɛni blɔ nɔ wa ma nyɛ maa gu kɛ tsɔse wa he nile ɔ? E he hia nɛ waa kase Baiblo ɔ daa, nɛ wa pue wa yi mi tɛ ngɛ níhi nɛ wa kaneɔ ɔ a he, nɛ wa kpa Yehowa pɛɛ nɛ e ye bua wɔ konɛ waa kɛ níhi nɛ wa kaseɔ ɔ nɛ tsu ní. Enɛ ɔ tsɔɔ kaa e sa nɛ waa pee babauu pe anɔkualehi kɛ mlaahi nɛ wa maa kase kɛ wo wa yi mi kɛkɛ. Ke wa ngɛ Baiblo ɔ kasee ɔ, oti nɛ e sa kaa wa kɛ ma wa hɛ mi ji, nɛ wa maa le Yehowa saminya. E sa nɛ waa le Nɔ nɛ e ji, kɛ níhi nɛ e suɔ kɛ níhi nɛ e sume. Ke wa ya nɔ nɛ wa kase Yehowa he ní ɔ, nyagbenyagbe ɔ, wa he nile ma ha nɛ waa kɛ oya yemi ma yɔse níhi nɛ da kɛ níhi nɛ dɛ ngɛ e hɛ mi. Ke wa tsɔseɔ wa he nile ɔ saminya a, lɔ ɔ ma ha nɛ wa ma susu níhi a he kaa bɔ nɛ Yehowa hu susuɔ níhi a he ɔ.

5. Mɛni he wa ma susu ngɛ munyu nɛ ɔ mi?

5 Se eko ɔ, wa ma bi wa he ke: Ke wa tsɔse wa he nile saminya a, kɛ lɔ ɔ ma plɛ kɛ ye bua wɔ ha kɛɛ ke e he hia kaa waa mwɔ wa yi mi kpɔ? Mɛni wa maa pee kɛ tsɔɔ kaa wa buɔ wa nyɛmimɛ Kristofohi a he nile? Nɛ kɛ wa he nile ma plɛ kɛ wo wɔ he wami ha kɛɛ konɛ waa pee nɔ́ nɛ da? Ní etɛ komɛ ngɛ nɛ ke wa maa mwɔ wa yi mi kpɔ ngɛ a he ɔ, wa maa hia he nile nɛ a tsɔse lɛ saminya. Ní nɛ ɔmɛ ji: (1) hiɔ tsami, (2) hɛja jemi, kɛ (3) wa fiɛɛmi ní tsumi ɔ. Nyɛ ha nɛ wa susu bɔ nɛ wa ma plɛ kɛ pee jã a he nɛ waa hyɛ.

O KƐ O JUƐMI NƐ TO NÍHI A HE

6. Mɛni juɛmi wa peeɔ ngɛ hiɔ tsami he?

6 Baiblo ɔ deɔ wɔ kaa waa yu wa he ngɛ níhi nɛ maa ye wɔ awi ɔ a he, nɛ waa kɛ wa juɛmi nɛ to níhi nɛ wa peeɔ ɔ a he. Ní nɛ ɔmɛ ekomɛ ji ní yemi kɛ ní numi. (Abɛ 23:20; 2 Korinto Bi 7:1) Ke waa kɛ Baiblo ga womihi tsuɔ ní ɔ, e ma nyɛ maa ye bua wɔ konɛ wa ná nɔmlɔ tso mi he wami kpakpa. Se kɛ̃ ɔ, wa nuu hiɔ, nɛ wa bwɔɔ. Mɛni juɛmi lɛ eko ɔ, e ma bi nɛ waa pee? Ngɛ ma komɛ a nɔ ɔ, ke nihi be he wami ɔ, a nyɛɔ peeɔ blɛfo tsopa kɛ zugba tsopa tsuo. Nyɛmimɛ komɛ pɔɔ sɛ womi ngmami kɛ ya haa  asafo ɔ ní tsumi kɔnihi konɛ a tsɔɔ mɛ hiɔ tsami blɔ nɔ tomi komɛ a mi. Nyɛmimɛ fuu pɔɔ bimi ke, “Anɛ e sa kaa Yehowa sɔmɔlɔ ko nɛ kplɛɛ hiɔ tsami blɔ nɔ tomi nɛ ɔ nɔ, aloo e sɛ nɛ e kplɛɛ nɔ?”

7. Mɛni ma nyɛ maa ye bua wɔ konɛ waa mwɔ wa yi mi kpɔ ngɛ muɔ kɛ ní tsumi he?

7 Asafo ɔ ní tsumi kɔni ɔ aloo asafo mi nikɔtɔma amɛ be he blɔ kaa a mwɔɔ yi mi kpɔ kɛ haa Kristofo no ko ngɛ hiɔ tsami blɔ nɔ tomihi a he, ke ji Kristofo no ɔ bi mɛ nɔ́ nɛ e sa kaa e pee po. (Galatia Bi 6:5) Se asafo mi nikɔtɔma amɛ kɛ Kristofo no ɔ ma nyɛ ma susu Yehowa juɛmi ngɛ sane ɔ he ɔ he, konɛ nɔ ɔ nɛ da lɔ ɔ nɔ kɛ mwɔ e yi mi kpɔ. Kaa nɔ hyɛmi nɔ́ ɔ, Mawu fã wɔ kaa waa yu wa he ngɛ muɔ he. (Bɔfo Ɔmɛ A Ní Tsumi 15:29) Fami nɛ ɔ tsɔɔ heii kaa e sɛ nɛ Kristofo no ko kplɛɛɔ hiɔ tsami blɔ nɔ tomihi nɛ a kɛ muɔ loo muɔ mi níhi titli eywiɛ ɔmɛ tsuɔ ní ngɛ mi ɔ nɔ. Fami nɛ ɔ po ma nyɛ ma kudɔ Kristofo no ko he nile ke e ngɛ juɛmi pee kaa e maa kplɛɛ tsopahi nɛ a kɛ muɔ mi ní nyafinyafihi pee ɔ eko nɔ aloo e be nɔ kplɛɛe. A jeɔ muɔ mi ní nyafinyafi nɛ ɔmɛ ngɛ muɔ mi ní titli eywiɛ ɔmɛ a mi. * (Hyɛ sisi ningma.) Ngɛ tsopa peemi blɔ fa mi ɔ, mɛni Baiblo ga womi kpa ko hu ma nyɛ maa ye bua wɔ konɛ waa mwɔ wa yi mi kpɔ ngɛ blɔ nɛ da nɔ?

8. Mɛni blɔ nɔ Filipi Bi 4:5 ɔ yeɔ bua wɔ nɛ wa peeɔ juɛmi nɛ nile ngɛ mi ngɛ hiɔ tsami mi?

8 Abɛ 14:15 ɔ de ke: “Kuasia heɔ nɔ́ tsuaa nɔ́ yeɔ. Ní lelɔ lɛɛ e le e nane nya hyɛmi.” Mwɔnɛ ɔ, e ma nyɛ maa ba kaa wa be hiɔ komɛ a nya tsaba lee. Enɛ ɔ he ɔ, e he hia nɛ waa hyɛ nɛ hi ngɛ tsopahi nɛ nihi deɔ ke e tsaa hiɔ ko kpahu wa nɛ kaa a kɛ tsa nɔ ko hyɛ ɔ a he. Paulo ngma ke: “Nyɛ ha nɛ nihi tsuo nɛ na kaa nyɛ nuɔ nɔ́ sisi.” (Filipi Bi 4:5, NW) Ke wa nuɔ nɔ́ sisi ɔ, lɔ ɔ maa ye bua wɔ nɛ waa kɛ wa juɛmi maa ma Yehowa jami nɔ mohu pe wa nɔmlɔ tso mi he wami nami nɔ. Ke nɔmlɔ tso mi he wami nami ji nɔ́ titli nɛ he hia wɔ ɔ, lɔ ɔ ma nyɛ ma ha nɛ wa fo wɔ pɛ wa nɔ́ mi. (Filipi Bi 2:4) Wa le kaa wa be nɔmlɔ tso mi he wami nɛ hi kɛ pi si náe ngɛ je nɛ ɔ mi. Enɛ ɔ he ɔ, moo bɔ mɔde nɛ o ngɔ Yehowa sɔmɔmi kɛ pee nɔ́ nɛ he hia mo wawɛɛ ngɛ o si himi.  Baiblo ɔ de ke: “Nyɛɛ bɔ mɔde nɛ nyɛɛ le níhi nɛ a he hia wawɛɛ ɔ, kɛkɛ ɔ, piami ko piami ko be nyɛ he sae, nɛ nyɛ be nihi a nane tɔ̃tɔ̃e kɛ yaa si Kristo ligbi ɔ.”Filipi Bi 1:10, NW.

Anɛ o bɔɔ mɔde kaa o maa nyɛ nihi a nɔ konɛ a kplɛɛ o susumihi a nɔ lo? (Hyɛ kuku 9)

9. Ke wa ngɛ juɛmi pee ngɛ hiɔ tsami he ɔ, mɛni blɔ nɔ Roma Bi 14:13, 19 ɔ maa ye bua wɔ ngɛ, nɛ mɛni lɛ ke wa pee ɔ, e ma nyɛ ma puɛ kake peemi nɛ ngɛ asafo ɔ mi ɔ?

9 Kristofo no nɛ e nuɔ nɔ́ sisi ɔ bɔɛ mɔde kaa e maa nyɛ nihi a nɔ konɛ a pee nɔ́ nɛ lɛɛ e susu kaa e hi pe kulaa. Ngɛ ma ko nɔ ɔ, nɔ ko kɛ e yo woɔ nihi he wami kaa a nu tsopahi nɛ niye ní he wami pɔtɛɛ komɛ ngɛ mi, konɛ a ye niye ní pɔtɛɛ komɛ hulɔ. A nyɛ nɛ a plɛ nyɛmimɛ komɛ a yi mi nɛ a pee jã, se ni komɛ lɛɛ a pee we jã. Benɛ tsopa a nɛ nyɛmimɛ ɔmɛ nu, kɛ niye ní nɛ a ye ɔ tsu we ní ɔ, a ti nihi fuu a mi mi fu. Nyumu ɔ kɛ e yo ɔ ngɛ he blɔ kaa a maa hla tsopa nɛ niye ní he wami pɔtɛɛ ko ngɛ mi nɛ mɛ nitsɛmɛ a maa nu, aloo niye ní pɔtɛɛ ko nɛ mɛ nitsɛmɛ a maa ye. Se anɛ sisi numi ngɛ he kaa a kɛ hiɔ tsami blɔ nɔ tomi ko ma puɛ kake peemi nɛ ngɛ asafo ɔ mi ɔ lo? Ngɛ blema Roma a, Kristo se nyɛɛli komɛ hɛɛ juɛmi ekpaekpa ngɛ niye ní kɛ gbijlɔ komɛ a yemi he. Mɛni ga Paulo wo mɛ? E de mɛ ke: “E peeɔ ni komɛ kaa ligbi ɔmɛ ekomɛ a he hia pe ekomɛ, be mi nɛ ni komɛ susuɔ kaa ligbi ɔmɛ tsuo sɔ. Nɔ tsuaa nɔ nɛ pee e juɛmi ngɛ nɔ́ nɛ ɔ he.” Nyɛ ha nɛ waa hyɛ nɛ e hi konɛ wa ko tɔ̃tɔ̃ nɔ ko nane.Kane Roma Bi 14:5, 13, 15, 19, 20.

Moo bɔ mɔde nɛ o ngɔ Yehowa sɔmɔmi kɛ pee nɔ́ nɛ he hia mo wawɛɛ ngɛ o si himi mi

10. Mɛni he je nɛ ke nihi mwɔ a yi mi kpɔ ngɛ mɛ nitsɛmɛ a sanehi a he ɔ, e sɛ kaa waa kojo mɛ ɔ? (Moo hyɛ foni nɛ ngɛ ní kasemi ɔ sisije ɔ.)

10 Be komɛ ɔ, eko ɔ, wa be yi mi kpɔ nɛ nyɛmi ko maa mwɔ ngɛ lɛ nitsɛ e sane ko he ɔ sisi nue. Ke e ba jã a, mɛni e sa kaa waa pee? E sɛ nɛ waa ye oya kɛ kojo lɛ, aloo waa nyɛ e nɔ kaa e tsake e juɛmi. Eko ɔ, e he maa hia nɛ e tsɔse e he nile ɔ bɔɔ, aloo eko ɔ, e he nile ɔ tsiɔ e nya ngɛ ní komɛ nɛ tɔmi ko be a he ɔ he. (1 Korinto Bi 8:11, 12) Aloo eko ɔ, wɔ nitsɛmɛ wa tsɔse we wa he nile ɔ saminya. Ke e ba ngɛ hiɔ tsami sanehi a blɔ fa mi ɔ, e he hia nɛ wa ti nɔ tsuaa nɔ nɛ mwɔ lɛ nitsɛ e yi mi kpɔ ngɛ níhi a he nɛ e kplɛɛ nɔ́ fɛɛ nɔ́ nɛ maa je mi kɛ ba a nɔ.

MO JE O HƐJA

11, 12. Mɛni blɔ nɔ Baiblo ɔ yeɔ bua wɔ kɛ hlaa hɛja jemi ngɛ?

11 Yehowa bɔ wɔ konɛ wa je wa hɛja, nɛ wa ná he se. Salomo ngma ke “muɔmi be ngɛ” nɛ “domi be ngɛ.” (Fiɛlɔ 3:4) Se pi hɛja jemi fɛɛ ko nɛ se nami ngɛ he, aloo e haa nɛ nɔ jɔɔ e he, aloo nɔ náa bua jɔmi. E sɛ nɛ wa puɛ be fuu ngɛ hɛja jemi he hulɔ. Mɛni blɔ nɔ wa he nile ma nyɛ maa ye bua wɔ konɛ waa kɛ níhi nɛ Yehowa suɔ nɛ je wa hɛja nɛ wa ná he se?

‘Ke i yaa pee nɔ́ yaya ko ɔ, anɛ ye he nile ɔ bɔɔ mi kɔkɔ lo?’

12 Baiblo ɔ bɔ kɔkɔ ngɛ “he lo ɔ nya ní” ɔmɛ a he. Ní nɛ ɔmɛ ekomɛ ji “gba puɛmi, mu ní tsumi, yahomi, amaga jami, kunya tsumi, ninyɛ, pɛ hlami, hunga jemi, mi mi la womi, ngmlaa kpami, mi gbami,nya hiɔmi, hɛkɔ, dã demi, fiɛmi yaya, kɛ ní yaya peemi fuu kaa níhi nɛ i tsi ta nɛ ɔ.” Paulo  ngma ke, “nihi nɛ peeɔ kikɛmɛ a ní nɛ ɔmɛ a nine be Mawu matsɛ yemi ɔ nɔ sue gblegbleegble.” (Galatia Bi 5:19-21) Enɛ ɔ he ɔ, wa ma nyɛ ma bi wa he ke: ‘Anɛ ye he nile haa nɛ i yuɔ ye he ngɛ fiɛmihi nɛ nɔ ma nyɛ maa plaa ngɛ mi, aloo koli simi ngɛ mi, aloo a fĩɔ ma kudɔmi ní peepeehi a se, aloo basabasa peemi ngɛ mi ɔ a he lo? Ke i ngɛ hlae nɛ ma hyɛ sini ko nɛ ajuama bɔmi he fonihi ngɛ mi, aloo e woɔ ajuama bɔmi, dã demi, kɛ mumi yayami kɛ ní tsumi ní peepeehi a mi he wami ɔ, anɛ ye he nile bɔɔ mi kɔkɔ lo?’

13. Kɛ ga womi nɛ ngɛ 1 Timoteo 4:8 kɛ Abɛ 13:20 ɔ maa ye bua wɔ ngɛ hɛja jemi mi ha kɛɛ?

13 Baiblo sisi tomi mlaahi ma nyɛ maa ye bua wɔ konɛ wa tsɔse wa he nile konɛ e kudɔ wɔ ngɛ hɛja jemi mi. Kaa nɔ hyɛmi nɔ́ ɔ, Baiblo ɔ tsɔɔ kaa “nɔmlɔ tso ɔ he mi kami ɔ, se nami bɔɔ kɛkɛ lɛ ngɛ he.” (1 Timoteo 4:8) Nihi fuu susu kaa ke a pɔɔ a he mi kami ɔ, a ma ná bua jɔmi kɛ nɔmlɔ tso mi he wami kpakpa. Se ke wa suɔ kaa wa maa piɛɛ ni komɛ a he kɛ ka wa he mi hu nɛɛ? Anɛ e sa kaa waa kɛ nɔ fɛɛ nɔ ko kɛkɛ nɛ pee lɔ ɔ lo? Abɛ 13:20 ɔ deɔ wɔ ke: “Nɔ nɛ kɛ ní leli nyɛɛɔ ɔ, e leɔ ní. Se nɔ nɛ kɛ kuasiahi bɔɔ ɔ, haomi lɛ baa e nɔ.” Atsinyɛ jemi ko be he kaa e he hia nɛ waa da wa he nile nɛ waa kɛ Baiblo ɔ tsɔse ɔ nɔ kɛ hla hɛja jemi nɛ waa kɛ wa he maa wo mi.

14. Mɛni blɔ nɔ weku ko ngɔ Roma Bi 14:2-4 ɔ kɛ tsu ní ngɛ?

14 Christian kɛ Daniela ngɛ biyihi enyɔ nɛ a yi jeha nyingmi enyɔ lolo. Christian de ke: “Wa susuɔ hɛja jemi he ngɛ wa gbɔkuɛ Weku Mawu Jami ɔ mi. Wa ma nya si kaa ní komɛ ngɛ nɛ ke wa pee kɛ je wa hɛja a, tɔmi ko be he, se ní komɛ hu ngɛ nɛ tɔmi ngɛ he. Mɛnɔ lɛ wa ma nyɛ ma de ke e ji huɛ kpakpa? Wa biyo ɔ kake tsɔɔ kaa ngɛ a sukuu ɔ, nihewi kɛ zangmawi komɛ nɛ a ji Odasefohi ɔ peeɔ ní komɛ nɛ e susuɔ kaa tɔmi ngɛ he. A ní peepee ha nɛ e peeɔ lɛ kaa lɛ hu e pee jã. Waa kɛ mɛ susu he, nɛ wa ha nɛ a le kaa wa ti nɔ fɛɛ nɔ ngɛ he nile, nɛ e sa kaa waa da wa he nile ɔ nɔ kɛ hla níhi nɛ wa maa pee kɛ nihi nɛ waa kɛ mɛ maa pee jamɛ a ní ɔmɛ.”Kane Roma Bi 14:2-4.

O he nile nɛ o kɛ Baiblo ɔ tsɔse ɔ ma nyɛ maa ye bua mo konɛ o yu o he ngɛ oslaahi a he (Hyɛ kuku 14)

15. Mɛni blɔ nɔ Mateo 6:33 ɔ ma nyɛ maa ye bua wɔ kɛ to hɛja jemi he blɔ nya?

 15 Be enyɛmɛ o puɛɔ ngɛ hɛja jemi he? Anɛ o ngɔɔ ní komɛ kaa asafo mi kpe yami, fiɛɛmi yami, kɛ Baiblo ɔ kasemi kɛ peeɔ nɔ́ titli ngɛ o si himi, aloo hɛja jemi? Mɛni ji nɔ́ nɛ he hia mo wawɛɛ? Yesu de ke: “Nyɛ hla Mawu matsɛ yemi ɔ, kɛ níhi nɛ da ngɛ e hɛ mi ɔ kekle, nɛ a kɛ ní nɛ ɔmɛ tsuo maa piɛɛ he ngɔ ha nyɛ.” (Mateo 6:33) Ke o ngɛ nɔ́ nɛ o kɛ o be maa pee ɔ he susue ɔ, anɛ o he nile haa nɛ o kaiɔ Yesu ga womi ɔ lo?

WA HE NILE WOƆ WƆ HE WAMI KAA WAA FIƐƐ

16. Kɛ wa he nile woɔ wɔ he wami nɛ wa fiɛɛɔ ha kɛɛ?

16 Ke wa tsɔse wa he nile saminya a, pi kɔkɔ pɛ nɛ e maa bɔ wɔ ngɛ ní yayahi a he, se mohu e maa wo wɔ he wami konɛ waa pee ní kpakpahi hulɔ. Níhi nɛ wa he nile maa wo wɔ he wami nɛ waa pee ɔ a kpɛti kake ji kaa e ma ha nɛ waa fiɛɛ ngɛ wehi a mi, kɛ be mi nɛ wa be fiɛɛmi tso mi. Jã lɛ Paulo pee. E ngma ke: ‘A ngɔ fĩ ye nɔ kaa ma fiɛɛ sane kpakpa a, ke i fiɛɛ we sane kpakpa a, musu tloo mi pɛ!’ (1 Korinto Bi 9:16) Ke wa kase Paulo ɔ, wa ma ná he nile kpakpa, nɛ wa maa le kaa wa ngɛ nɔ́ nɛ da pee. Ke wa fiɛɛɔ sane kpakpa a kɛ haa nihi ɔ, lɔ ɔ tsɔɔ kaa wa ngɛ mɛ ye buae konɛ a pee nɔ́ nɛ da. Paulo de ke: “Wa fiɛɛɔ Mawu sɛ gbi ɔ pãa ngɛ ma hɛ mi, nɛ wa bɔɔ mɔde kaa nihi nɛ a ná wa he juɛmi kpakpa ngɛ Mawu hɛ mi.”2 Korinto Bi 4:2.

17. Mɛni nyɛmiyo wayoo ko pee kɛ tsɔɔ kaa e bu e he nile nɛ e kɛ Baiblo ɔ tsɔse ɔ tue?

17 Benɛ Jacqueline ye jeha 16, e kase níhi nɛ wami ngɛ a mi a he ní ngɛ sukuu. Ligbi ko ɔ, a kase su tsakemi tsɔɔmi ɔ he ní. Jacqueline de ke: “Ye he nile ngmɛ mi blɔ nɛ ma ngɔ ye he kɛ wo ní kasemi ɔ mi wawɛɛ kaa bɔ nɛ i peeɔ daa a. I nyɛ we ma kplɛɛ su tsakemi tsɔɔmi ɔ nɔ. Enɛ ɔ he ɔ, i ya na tsɔɔlɔ ɔ, nɛ i tsɔɔ lɛ níhi a nya konɛ e le nɔ́ he je nɛ i kɛ ye he wui ní kasemi ɔ mi wawɛɛ ɔ. E pee mi nyakpɛ kaa e mi mi fu we, mohu ɔ, e ha mi he blɔ kaa ma tsɔɔ ye sukuu bi ɔmɛ kaa nɔ ko lɛ bɔ níhi.” Jacqueline bua jɔ kaa e bu e he nile nɛ e kɛ Baiblo ɔ tsɔse ɔ tue. Anɛ o he nile woɔ mo he wami nɛ o peeɔ nɔ́ nɛ da lo?

18. Mɛni he je nɛ wa suɔ nɛ wa ná he nile kpakpa nɛ ma ha waa pee nɔ́ nɛ da a?

18 Oti nɛ waa kɛ ma wa hɛ mi ji kaa waa kɛ Yehowa mlaahi kɛ e sisi tomi mlaahi ma tsu ní. Wa he nile ma nyɛ maa ye bua wɔ konɛ waa su oti nɛ ɔ he. Ke wa kaseɔ Mawu Munyu ɔ daa, nɛ wa pueɔ wa yi mi tɛ ngɛ he, nɛ waa kɛ níhi nɛ wa kaseɔ ɔ tsuɔ ní ɔ, lɔ ɔ tsɔɔ kaa wa ngɛ wa he nile ɔ tsɔsee. Kɛkɛ ɔ, nike ní nɛ se be nɛ ji he nile ɔ, ma ha nɛ wa maa pee nɔ́ nɛ da ngɛ wa si himi mi kaa Kristofohi!

^ kk. 7 Hyɛ “Sane Bimihi Nɛ Je Ní Kaneli A Ngɔ” nɛ je kpo ngɛ June 15, 2004 Blɛfo gbi Hwɔɔmi Mɔ ɔ ba fa 29-31 ɔ.