Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  February 2015

Yehowa Ngɛ Wa Je Kɛ Wɛ Fiɛɛmi Ní Tsumi ɔ Kudɔe

Yehowa Ngɛ Wa Je Kɛ Wɛ Fiɛɛmi Ní Tsumi ɔ Kudɔe

‘Imi ji Yehowa, nyɛ Mawu ɔ nɛ. I suɔ kaa ma tsɔse nyɛ, nɛ ma tsɔɔ nyɛ bɔ nɛ nyɛɛ ba nyɛ je mi ha, konɛ e hi ha nyɛ nitsɛmɛ.’—YESAYA 48:17.

1. Mɛni ha fiɛɛmi ní tsumi ɔ he wa ngɛ wa be nɛ ɔ mi?

JEHA 130 kɛ se ji nɛ ɔ nɛ Yehowa we bi bɔni sane kpakpa a fiɛɛmi, nɛ ngɛ be nɛ ɔ tsuo mi ɔ, a ná we fiɛɛmi ní tsumi ɔ gbɔjɔɔ. * (Hyɛ sisi ningma.) A ngɛ kaa Kristofohi nɛ a hi si ngɛ kaseli ɔmɛ a be ɔ mi ɔ nɔuu. A he pi, nɛ nihi fuu sume sɛ gbi nɛ a ngɛ fiɛɛe ɔ hulɔ. Ni komɛ po susu kaa a li womi mi. Pee se benɛ a fie Satan kɛ ba zugba a nɔ ɔ, a wa Yehowa we bi yi mi wawɛɛ. (Kpojemi 12:12) A ngɛ fiɛɛe kɛ je jamɛ a be ɔ mi hluu kɛ ba si ‘nyagbe ligbi nɛ ɔmɛ’ a mi nɛ ‘je mi wa’ nɛ ɔ.—2 Timoteo 3:1.

2. Mɛni yemi kɛ buami Yehowa kɛ ngɛ wɔ hae konɛ wa nyɛ nɛ waa fiɛɛ?

2 Yehowa ya nɔ nɛ e ngɛ e we bi ye buae. E ngɛ hlae nɛ a fiɛɛ sane kpakpa a kɛ kpa je ɔ mi tsuo, nɛ e be hae nɛ nɔ́ ko nɛ tsi mɛ blɔ. Yehowa je e we bi kɛ je lakpa jami he konɛ a nyɛ nɛ a ja lɛ kaa bɔ nɛ e ngɛ hlae ɔ. Jã pɛpɛɛpɛ nɛ  e pee ngɛ blema be ɔ mi benɛ e ha Israel bi ɔmɛ ye a he kɛ je Babilon ɔ. (Kpojemi 18:1-4) Níhi nɛ Yehowa tsɔɔ wɔ ɔ, wɔ nitsɛmɛ nɛ wa náa he se. E yeɔ bua wɔ konɛ waa kɛ wa nyɛmimɛ nɛ hi si ngɛ tue mi jɔmi mi, nɛ e tsɔseɔ wɔ konɛ waa tsɔɔ ni kpahi e he ní hulɔ. (Kane Yesaya 48:16-18.) E ngɛ mi kaa Yehowa yeɔ bua wɔ ngɛ wa fiɛɛmi ní tsumi ɔ mi mohu lɛɛ, se lɔ ɔ tsɔɔ we kaa be tsuaa be ɔ, e tsakeɔ níhi a hɛ mi ngɛ je ɔ mi konɛ wa ná fiɛɛmi ní tsumi ɔ gbɔjɔɔ. Se ngɛ anɔkuale mi ɔ, ní komɛ nɛ ya nɔ ngɛ je ɔ mi ɔ ha nɛ wa fiɛɛmi ní tsumi ɔ yi tsɔ. Se kɛ̃ ɔ, waa kɛ nyagbahi ngɛ kpee, nɛ Satan je ɔ hu ngɛ wɔ yi mi wae kɛ ba si piɔ. Ke pi Yehowa nɛ ngɛ wɔ ye buae ɔ, jinɛ wa ko nyɛ we fiɛɛmi.—Yesaya 41:13; 1 Yohane 5:19.

3. Mɛni blɔ nɔ Daniel gbami ɔ ba mi ngɛ?

3 Daniel gba kɛ fɔ si kaa ngɛ nyagbe ligbi ɔmɛ a mi ɔ, nihi fuu maa nu anɔkuale munyuhi nɛ ngɛ Baiblo ɔ mi ɔ sisi. Baiblo ɔ de ke: “Se mo Daniel, nga womi ɔ nya, nɛ o sɔu nya kɛ yaa si nyagbe be ɔ. Nihi maa hyɛ mi fitsofitso, nɛ anɔkuale nile maa hiɛ.” (Daniel 12:4, NW) Se loko e maa su “nyagbe be ɔ,” Yehowa ye bua e we bi nɛ a nu Baiblo ɔ mi tsɔɔmihi nɛ a he hia a sisi, nɛ a je a he kɛ je lakpa Kristofohi a tsɔɔmihi a he. Mwɔnɛ ɔ, Yehowa we bi ngɛ nihi Baiblo ɔ mi anɔkuale ɔ tsɔɔe ngɛ je kɛ wɛ. E ngɛ heii kaa Daniel gbami ɔ ba mi. Nihi nɛ e piɛ bɔɔ nɛ a yibɔ maa su ayɔ kpaanyɔ kase anɔkuale ɔ, nɛ a ngɛ ni kpahi hu tsɔɔe. Lɛɛ sane bimi ɔ ji, mɛni ji ní komɛ nɛ yeɔ bua Yehowa we bi nɛ a nyɛ ngɛ fiɛɛe ngɛ je ɔ mi tsuo?

BAIBLO SISI TSƆƆMI

4. Benɛ e ke e suu jeha 1900 ɔmɛ a mi ɔ, a tsɔɔ Baiblo ɔ sisi kɛ ya gbihi enyɛmɛ mi?

4 Mwɔnɛ ɔ, nihi fuu ngɛ Baiblo, enɛ ɔ he ɔ, wa nyɛɔ fiɛɛɔ sane kpakpa a kɛ tsɔɔ mɛ. Se be ko nɛ be ɔ, e be jã kulaa. Maa pee jeha lafahi abɔ nɛ be ɔ, osɔfohi nɛ a ngɛ jamihi nɛ a tsɛɛ a he ke Kristofohi ɔ a mi ɔ kplɛɛ we nɛ nihi kaneɔ Baiblo ɔ. A wa nihi nɛ a kaneɔ Baiblo ɔ yi mi, nɛ a gbe ni nɛmɛ nɛ a tsɔɔ Baiblo ɔ sisi ɔ a kpɛti ni komɛ. Se ngɛ jeha 1800 ɔmɛ a mi ɔ, kuu komɛ pee Baiblo mluku ɔ aloo Baiblo ɔ fã ko ngɛ gbihi maa pee 400 mi. Benɛ e ke e suu jeha 1900 ɔmɛ a mi ɔ, nihi fuu ngɛ Baiblo. E ngɛ mi kaa nihi fuu ngɛ Baiblo mohu lɛɛ, se a nui e mi tsɔɔmi ɔmɛ a sisi.

5. Mɛni Yehowa Odasefohi nyɛ tsu ngɛ Baiblo sisi tsɔɔmi blɔ fa mi?

5 Yehowa we bi le kaa e sa nɛ a ya nɛ a ya tsɔɔ nihi Baiblo ɔ mi tsɔɔmi ɔmɛ a sisi, nɛ a pee jã hulɔ. Sisije ɔ, a ngɔ Baiblo sisi tsɔɔmihi nɛ ngɛ momo ɔ kɛ tsɔɔ nihi ní, nɛ a ha nihi hu eko. Kɛ je jeha 1950 ɔ mi ɔ, a pee New World Translation of the Holy Scriptures ɔ aloo e fã ko ngɛ gbihi nɛ hiɛ pe 120 mi. Ngɛ jeha 2013 ɔ mi ɔ, a tsake Blɛfo gbi New World Translation Baiblo ɔ hɛ mi. Baiblo ehe nɛ ɔ sisi numi yi, nɛ e sisi tsɔɔmi kɛ ya gbi kpahi a mi hu yi. Ke waa kɛ Baiblo nɛ nihi ma nyɛ maa nu sisi tsu ní ɔ, wa ma nyɛ maa tsɔɔ nihi anɔkuale ɔ nɛ́ pɔ be wa he tɔe.

TUE MI JƆMI BE

6, 7. (a) Mɛni tahi a hwu ngɛ jeha 100 nɛ be ɔ mi? (b) Mɛni blɔ nɔ tue mi jɔmi nɛ ngɛ ma komɛ a nɔ ɔ ye bua wa fiɛɛmi ní tsumi ɔ ngɛ?

6 Ngɛ jeha 100 nɛ be ɔ mi ɔ, a hwu tahi fuu. Kekleekle je mi ta a kɛ je mi  ta enyɔne ɔ hu piɛɛ he. Nimli ayɔhi abɔ gu mi kɛ gbo. Lɛɛ, mɛni tsɔɔ kaa tue mi jɔmi ba, nɛ kɛ enɛ ɔ ye bua Yehowa we bi ha kɛɛ nɛ a nyɛ fiɛɛ? Ngɛ jeha 1942 ɔ mi benɛ je ma amɛ ngɛ je mi ta enyɔne ɔ hwue ɔ, Yehowa Odasefohi pee kpe ko. Jamɛ a be ɔ mi ɔ, Nathan Knorr ji a nya dalɔ. Ngɛ jamɛ a kpe ɔ sisi ɔ, Nathan Knorr tu munyu ko nɛ ngɛ bua jɔmi. E munyu ɔ yi ji, “Peace—Can It Last?” (Anɛ Tue Mi Jɔmi Ma Nyɛ Maa Hi Si Daa Lo?) Nyɛminyumu Knorr tsɔɔ gbami nɛ ngɛ Kpojemi yi 17 ɔ mi, nɛ e ma nɔ mi kaa Harmagedon ná we nɛ e ba lolo. Ke ta a ba nyagbe ɔ, tue mi jɔmi maa ba.—Kpojemi 17:3, 11.

7 Ngɛ anɔkuale mi ɔ, enɛ ɔ tsɔɔ we kaa ngɛ ta a se ɔ, tue mi jɔmi ba je ɔ mi tsuo. Ngɛ je mi ta enyɔne ɔ se ɔ, nihi ayɔhi abɔ gbo ngɛ ta slɔɔtoslɔɔtohi a mi. Se tue mi jɔmi ngɛ mahi fuu a mi, nɛ enɛ ɔ ha e yi ha Yehowa we bi kaa a maa fiɛɛ. Mɛni je enɛ ɔ mi kɛ ba? Benɛ a ngɛ je mi ta enyɔne ɔ hwue ɔ, Yehowa Odasefohi nɛ a ngɛ je ɔ mi jamɛ a be ɔ mi ɔ a yibɔ sui 110,000. Se mwɔnɛ ɔ, e piɛ bɔɔ nɛ a yibɔ maa su ayɔ kpaanyɔ! (Kane Yesaya 60:22.) Niinɛ, ngɛ tue mi jɔmi behi a mi ɔ, wa ma nyɛ maa fiɛɛ sane kpakpa a kɛ ha nihi fuu.

BLƆ HIAMI YI HU

8, 9. Mɛni ha blɔ hiami ba pee gbɔjɔɔ, nɛ kɛ enɛ ɔ yeɔ bua wɔ ngɛ wa fiɛɛmi ní tsumi ɔ mi ha kɛɛ?

8 Benɛ Yehowa we bi bɔni fiɛɛmi ngɛ United States ɔ, pɔ tɔɔ a he kɛ blɔ hiami. Ngɛ jeha 1900 ɔ mi ɔ, lɔlehi maa pee 8,000 pɛ nɛ ngɛ je ɔ mi, nɛ lɔle blɔ kpakpa ko hu be. Jamɛ a be ɔ mi ɔ, a bɔni Hwɔɔmi Mɔ ɔ peemi maa pee jeha 21. Se mwɔnɛ ɔ, lɔlehi nɛ ngɛ je ɔ mi ɔ hiɛ pe ayɔ akpe kake kɛ fã, nɛ lɔle blɔ kpakpahi hu ngɛ hehi fuu. Lɔlehi kɛ gbɛjegbɛhi nɛ a pee ɔ he je ɔ, wa ma nyɛ maa ya kɔpehi a mi nɛ wa ya fiɛɛ sane kpakpa a kɛ ha nihi ngɛ lejɛ ɔ. Se ke blɔ hiami yee ngɛ he nɛ wa ngɛ ɔ, nɛ e ma bi nɛ waa nyɛɛ blɔ gagaagahi po ɔ, wa bɔɔ mɔde kaa wa maa ya he tsuaa he nɛ nihi ngɛ konɛ wa ya fiɛɛ sane kpakpa a kɛ ha mɛ.—Mateo 28:19, 20.

Wa bɔɔ mɔde kaa wa maa ya he tsuaa he nɛ nihi ngɛ konɛ wa ya fiɛɛ sane kpakpa a kɛ ha mɛ

9 Wa guu blɔ kpahi hu a nɔ kɛ hiaa blɔ. Waa kɛ Baiblohi kɛ Baiblo kasemi womihi woɔ lɔle nguahi, melehi, kɛ tleehi a mi kɛ yaa mahi a nɔ. Enɛ ɔ haa waa kɛ womihi nyɛɔ maneɔ wa nyɛmimɛ nyumuhi kɛ yihi nɛ a ngɛ hehi tsitsatsitsa ngɛ be kpiti mi. Kpɔ mi nɔ hyɛli, kɛ Asafo ɔ Ní Tsumi Kɔni ɔ Ajla Toli, kɛ ma se sane kpakpa fiɛɛli, kɛ ni kpahi ngɔɔ kɔɔhiɔ mi lɛhi kɛ hiaa blɔ ya tuɔ munyuhi ngɛ kpehi a sisi, nɛ a ya yeɔ bua asafohi hulɔ. Blɔ Tsɔɔmi Ajla Toli ɔmɛ kɛ nyɛmimɛ kpahi nɛ a tsuɔ ní ngɛ asafo ɔ ní tsumi yi ɔ hu ngɔɔ kɔɔhiɔ mi lɛhi kɛ hiaa blɔ kɛ yaa mahi fuu a nɔ ya woɔ a nyɛmimɛ nyumuhi kɛ yihi he wami, nɛ a tsɔseɔ mɛ. Enɛ ɔ tsuo yeɔ bua Yehowa we bi nɛ kake peemi ngɛ a kpɛti.—La 133:1-3.

 GBI KƐ GBI SISI TSƆƆMI

10. Nihi enyɛmɛ nɛ a nu Blɛfo gbi ngɛ je kɛ wɛ?

10 Ngɛ kaseli ɔmɛ a be ɔ mi ɔ, nihi fuu nɛ a hi Roma Nɔ Yemi ɔ sisi ɔ tuɔ Hela gbi. Mwɔnɛ ɔ hu ɔ, nihi fuu nɛ a ngɛ je ɔ mi ɔ tuɔ Blɛfo gbi. Ngɛ anɔkuale mi ɔ, womi ko nɛ a tsɛɛ ke English as a Global Language ɔ tsɔɔ kaa ngɛ je ɔ mi tsuo ɔ, ke a hla nihi eywiɛ ɔ, a kpɛti nɔ kake nu Blɛfo gbi. Nihi fuu kase Blɛfo gbi, ejakaa lɔ ɔ ji nɔ́ nɛ a kɛ yeɔ jua ngɛ je kɛ wɛ, nɛ lɔ ɔ nɛ a kɛ tsuɔ ma kudɔmi sanehi, je mi si kpami, kɛ klamahi a he nile he ní.

11. Kɛ Blɛfo gbi ye bua Yehowa we bi ngɛ ní nɛ a ngɛ tsue ɔ mi ha kɛɛ?

11 Blɛfo gbi nɛ nihi tuɔ ngɛ je kɛ wɛ ɔ ha nɛ anɔkuale ɔ ngɛ gbɛe kɛ ngɛ fĩae. Be ko nɛ be ɔ, a ngmaa wa womi ɔmɛ ngɛ Blɛfo gbi pɛ mi. Nihi fuu nyɛɔ nɛ a kaneɔ, ejakaa nihi fuu tuɔ Blɛfo gbi ngɛ je kɛ wɛ. Jehanɛ se hu ɔ, Blɛfo gbi ji gbi nɛ a tuɔ ngɛ asafo ɔ ní tsumi yi ɔ. Nɛ a tsɔseɔ nyɛmimɛ nyumuhi kɛ yihi nɛ a nu Blɛfo gbi nɛ́ a jeɔ ma slɔɔtohi a nɔ ɔ ngɛ wa sukuuhi nɛ a peeɔ ngɛ Patterson, ngɛ New York ɔ.

Yehowa Odasefohi nɛ a ngɛ je kɛ wɛ ɔ nu “gbi nɛ he tsɔ” nɛ ji Baiblo ɔ mi anɔkuale ɔ sisi, nɛ lɔ ɔ peeɔ mɛ kake

12. Gbihi enyɛmɛ mi wa tsɔɔ wa womi ɔmɛ a sisi kɛ yaa, nɛ kɛ kɔmpiuta blɔ nya tomihi yeɔ bua wɔ ha kɛɛ?

12 Se e ji wa blɔ nya kaa waa fiɛɛ sane kpakpa a kɛ ha nihi ngɛ je ɔ mi tsuo. Enɛ ɔ he je nɛ wa tsɔɔ wa womi ɔmɛ a sisi kɛ yaa gbihi nɛ hiɛ pe 700 mi ɔ nɛ. Mɛni yeɔ bua wɔ nɛ wa nyɛɔ peeɔ jã? Kɔmpiutahi kɛ Kɔmpiuta blɔ nya tomihi kaa MEPS yeɔ bua wɔ nɛ wa nyɛɔ tsɔɔ wa womi ɔmɛ a sisi kɛ yaa gbi kpahi a mi. Enɛ ɔ ha nɛ Yehowa Odasefohi nɛ a ngɛ je kɛ wɛ ɔ nu “gbi nɛ he tsɔ” nɛ ji Baiblo ɔ mi anɔkuale ɔ sisi, nɛ lɔ ɔ peeɔ mɛ kake.—Kane Zefania 3:9.

MA MLAAHI YEƆ BUA WƆ

13, 14. Mɛni blɔ nɔ mlaahi kɛ kojomi hehi yeɔ bua wɔ ngɛ?

13 Roma mlaahi ye bua Kristofohi nɛ a hi si ngɛ kaseli ɔmɛ a be ɔ mi ɔ ngɛ blɔhi fuu a nɔ nɛ a nyɛ fiɛɛ. Mwɔnɛ ɔ hu ɔ, mlaahi nɛ a wo ngɛ mahi fuu a nɔ ɔ yeɔ bua wɔ nɛ wa nyɛɔ fiɛɛɔ. Kaa nɔ hyɛmi nɔ́ ɔ, mlaahi nɛ a wo ngɛ United States ɔ ha nihi he blɔ kaa a kɛ a he ma nyɛ maa wo jami saisaa nɛ a  suɔ mi, nɛ a ma nyɛ maa tu a hemi kɛ yemi ɔ he munyu kɛ tsɔɔ nihi, nɛ a ma nyɛ maa kpe kutuu hulɔ. Enɛ ɔ tsɔɔ kaa wa ngɛ he blɔ nɛ wa peeɔ kpehi, nɛ wa fiɛɛɔ ngɛ lejɛ ɔ. Enɛ ɔ hu tsɔɔ kaa nihi nɛ a ngɛ asafo ɔ ní tsumi yi ɔ ngɛ United States ɔ ma nyɛ maa hyɛ fiɛɛmi ní tsumi ɔ nɔ ngɛ je kɛ wɛ. Ngɛ anɔkuale mi ɔ, be komɛ ngɛ nɛ e he hia kaa wa fã he blɔ nɛ wa ngɛ kaa wa fiɛɛɔ sane kpakpa a he ngɛ kojomi he. (Filipi Bi 1:7, NW) Nɛ ke kojoli kɛ mlaa leli nɛ a ngɛ kojomi he nɛ ɔmɛ ɔ sume kaa a ma ha wɔ he blɔ nɛ waa fiɛɛ ɔ, waa kɛ sane ɔ yaa kojomi he nguanguahi, nɛ behi fuu ɔ, wa ya yeɔ nguɔ.

14 Ngɛ ma komɛ hu a nɔ ɔ, wa ya fãa he blɔ nɛ wa ngɛ kaa wa jaa Yehowa nɛ wa fiɛɛɔ ɔ he ngɛ kojomi hehi. Ke a bu wɔ fɔ ngɛ kojomi he nɛ ɔmɛ ɔ, waa kɛ wa sane ɔ yaa mahi a kpɛti kojomi hehi konɛ a hyɛ mi ha wɔ ekohu. Kaa nɔ hyɛmi nɔ́ ɔ, waa kɛ wa sanehi pɔɔ European Court of Human Rights ɔ yami. Benɛ June 2014 ke e suu ɔ, wa ye nguɔ 57 ngɛ Kojomi he nɛ ɔ. Mahi fuu nɛ a ngɛ Yuropa kɛ Kojomi he nɛ ɔ mlaahi tsuɔ ní. E ngɛ mi kaa ‘je mahi fuu nyɛɛ wɔ’ mohu lɛɛ, se mlaahi nɛ a wo ngɛ mahi fuu a nɔ ɔ, yeɔ bua wɔ nɛ wa jaa Yehowa ngɛ tue mi jɔmi mi.—Mateo 24:9.

NÍ KPAHI HU NƐ A PEE NƐ YEƆ BUA WƆ

Wa haa nihi Baiblo kasemi womihi ngɛ gbihi fuu a mi

15. Mɛni tsakemihi nɛ ba womihi a peemi mi, nɛ kɛ enɛ ɔ yeɔ bua wɔ ha kɛɛ?

15 Womi fiami klama hehi nɛ a pee ɔ hu yeɔ bua wɔ nɛ wa fiɛɛɔ sane kpakpa a kɛ tsɔɔ nihi fuu. Nihi kɛ womi fiami klama nɛ Johannes Gutenberg pee maa pee jeha 1450 ɔ mi ɔ, tsu ní jeha lafahi abɔ. Se maa pee jeha 200 ji  nɛ ɔ, nihi pee womi fiami klama ehehi. Womi fiami klama ehe nɛ ɔmɛ a he sɔɔ kɛ womi fiami, nɛ a haa nɛ fonihi kɛ ningma peeɔ fɛu saminya. Paper kɛ womihi a kpɛmi hu he jua wɛ hu. Kɛ tsakemi nɛ ɔmɛ saa wa womi ɔmɛ a he ha kɛɛ? Ngɛ jeha 1879 ɔ mi ɔ, a pee kekleekle Hwɔɔmi Mɔ ɔ ngɛ Blɛfo gbi mi pɛ. Fonihi be mi, nɛ a pee kakaaka 6,000 pɛ. Mwɔnɛ ɔ, a peeɔ Hwɔɔmi Mɔ ɔ ngɛ gbihi nɛ hiɛ pe 200 mi. Fonihi nɛ a ngɛ fɛu saminya ngɛ mi, nɛ eko tsuaa eko nɛ baa a hiɛ pe 50,000,000.

16. Mɛni ji ní komɛ nɛ a pee nɛ yeɔ bua wɔ nɛ wa nyɛɔ fiɛɛɔ ngɛ je kɛ wɛ? (Moo hyɛ foni nɛ ngɛ ní kasemi ɔ sisije ɔ.)

16 Níhi fuu nɛ a pee maa pee jeha 200 ji nɛ ɔ, yeɔ bua Yehowa we bi nɛ a nyɛɔ fiɛɛ sane kpakpa a. Wa tu tleehi, lɔlehi, kɛ kɔɔhiɔ mi lɛhi a he munyu momo. A pee baisiklehi, ní ngmami klamahi, hɛyuyuili a ní ngmami klamahi, tɛliglaf, tɛlifoo, foni pomi klamahi, klamahi nɛ a kɛ nuɔ munyuhi kɛ fɔɔ apawahi a nɔ, video pomi klamahi, hleediohi, tiivihi, sinihi, kɔmpiutahi, kɛ Intanɛti ɔ. E ngɛ mi kaa tsa pi Yehowa we bi nɛ a pee ní nɛ ɔmɛ mohu lɛɛ, se ní nɛ ɔmɛ yeɔ bua mɛ kɛ peeɔ Baiblo, kɛ Baiblo kasemi womi kpahi ngɛ gbihi fuu a mi, nɛ a nyɛ ngɛ fiɛɛe ngɛ je kɛ wɛ hulɔ. Kaa bɔ nɛ Baiblo ɔ gba kɛ fɔ si ɔ, enɛ ɔ tsɔɔ kaa ‘je ma amɛ ngɛ wɔ lɛe kaa bɔ nɛ binyɛ haa e bi nyɔ ɔ.’—Kane Yesaya 60:16.

Yehowa suɔ wɔ, nɛ e suɔ kaa waa piɛɛ e he kɛ tsu ní

17. (a) Mɛni Yehowa ngɛ pee ngɛ fiɛɛmi ní tsumi ɔ he? (b) Mɛni he je nɛ Yehowa suɔ nɛ waa piɛɛ e he kɛ tsu ní ɔ?

17 E ngɛ heii kaa Yehowa ngɛ wa fiɛɛmi ní tsumi ɔ kudɔe. Tsa pi kaa ke wa be ɔ, Yehowa be nyɛe ma tsu ní tsumi nɛ ɔ, se suɔmi nɛ e ngɛ kɛ ha wɔ ɔ he je nɛ e suɔ kaa waa piɛɛ e he kɛ tsu ní ɔ nɛ. Kɛ gu fiɛɛmi ní tsumi ɔ nɔ ɔ, wa tsɔɔ kaa wa suɔ Yehowa, nɛ wa suɔ ni kpahi hulɔ. (Marko 12:28-31; 1 Korinto Bi 3:9) Wa naa Yehowa si wawɛɛ kaa e ngɛ wɔ ye buae konɛ waa fiɛɛ ngɛ je ɔ mi tsuo. Enɛ ɔ he ɔ, nyɛ ha nɛ waa ngɔ he blɔ tsuaa he blɔ nɛ wa ma ná a kɛ fiɛɛ Yehowa kɛ e Matsɛ Yemi ɔ he sane kɛ tsɔɔ nihi!

^ kk. 1 Biɛ nɛ a kɛ le Yehowa we bi kɛ je maa pee jeha 1870 ɔ ji, Baiblo Kaseli. Ngɛ jeha 1931 ɔ mi ɔ, a ngɔ biɛ nɛ ji Yehowa Odasefohi kɛ fɔ a nɔ.—Yesaya 43:10.