Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  January 2015

Nyɛ Ha Yehowa Nɛ Wo Nyɛ Gba Si Himi ɔ Mi He Wami Nɛ E Po He Piɛ

Nyɛ Ha Yehowa Nɛ Wo Nyɛ Gba Si Himi ɔ Mi He Wami Nɛ E Po He Piɛ

‘Ke pi Yehowa nɛ buɔ ma he ɔ, bulɔ fɔɔ nyɔ yaka gu kɛ buɔ ma he.’LA 127:1b.

1, 2. (a) Mɛni he je nɛ Israel bi 24,000 ya sui Si Womi Zugba a nɔ ɔ? (b) Mɛni he je nɛ munyu nɛ ɔ he hia wɔ ɔ?

BENƐ e piɛ bɔɔ nɛ Israel bi ɔmɛ ma ya su Si Womi Zugba a nɔ ɔ, a kpɛti nihi akpe nyɔngmahi abɔ “kɛ Moab yi ɔmɛ nɛ ngɛ lejɛ ɔ bɔni nyumu kɛ yo yakayaka fiɛmi fiɛmi.” Enɛ ɔ ha nɛ Israel bi 24,000 sɔuu gbo. Mo susu he nɛ o hyɛ! Israel bi nɛ ɔmɛ to a tsui si be kɛkɛɛ, nɛ jinɛ e be kɛe nɛ a maa su Si Womi Zugba a nɔ. Se aywilɛho sane ji kaa a ya nyɛ we nɛ a su, ejakaa a ngɔ a he kɛ wo je mi bami yaya mi.4 Mose 25:1-5, 9.

2 A ngma aywilɛho sane nɛ ɔ “kɛ ngɛ wɔ kɔkɔ bɔe, ejakaa be nɛ wa ngɛ mi nɛ ɔ kɛ nyagbe be ɔ kɛ we kulaa.” (1 Korinto Bi 10:6-11) Wa ngɛ “nyagbe ligbi ɔmɛ a mi,” nɛ waa kɛ je ehe ɔ he kɛ we. (2 Timoteo 3:1; 2 Petro 3:13) Se dɔmi sane ji kaa Yehowa sɔmɔli komɛ hyɛ we a he nɔ saminya, nɛ a kɛ a he ya wo ajuama bɔmi ní peepeehi a mi. Amlɔ nɛ ɔ, a ngɛ nɔ́ nɛ a du ɔ kpae, nɛ ke a tsakee we a tsui ɔ, he blɔ nɛ a ngɛ kaa a maa hi zugba a nɔ ngɛ Paradeiso mi ɔ ma bɔ mɛ.

3. Mɛni he je nɛ nɔ kɛ e yo hia Yehowa blɔ tsɔɔmi kɛ he bumi ɔ? (Moo hyɛ foni nɛ ngɛ ní kasemi ɔ sisije ɔ.)

 3 Hunomɛ kɛ yigbayihi hia Yehowa blɔ tsɔɔmi kɛ he bumi konɛ a gba si himi ɔ nɛ pee kpakpa, ejakaa ajuama bɔmi ní peepeehi hyi je ɔ tɔ. (Kane La 127:1.) Ngɛ munyu nɛ ɔ nɛ wa ngɛ kasee ɔ mi ɔ, wa ma susu bɔ nɛ nɔ kɛ e yo maa pee kɛ po a gba si himi ɔ he piɛ ha a he. E sa nɛ a po a tsui ɔ he piɛ, a hɛ mɛ kɛ su Mawu he, a wo nɔmlɔ su ehe ɔ, a je a tsui mi kɛ sɛɛ ní, nɛ́ a ha a sibi gba si himi blɔ nya nɔ́ ɔ.

POO O TSUI HE PIƐ

4. Mɛni he je nɛ Kristo se nyɛɛli komɛ ngɔ a he kɛ wo je mi bami yaya mi ɔ?

4 Mɛni ma nyɛ ma ha nɛ Kristofo no ko maa ngɔ e he kɛ wo ajuama bɔmi ní peepeehi a mi? E jeɔ sisi kɛ níhi nɛ waa kɛ wa hɛngmɛ hyɛɛ ɔ. Yesu de ke: “Nɔ tsuaa nɔ nɛ hyɛɛ yo, nɛ e he peeɔ lɛ akɔnɔ ɔ, e kɛ lɛ puɛ gba momo ngɛ e tsui mi.” (Mateo 5:27, 28; 2 Petro 2:14) Nihi fuu nɛ a ngɔ a he kɛ wo ajuama bɔmi ní peepeehi a mi ɔ hyɛ we a he nɔ saminya. A hyɛɔ bɔmi nami he fonihi, a kaneɔ bɔmi nami he womihi, aloo a hyɛɔ níhi nɛ sɛ kulaa ngɛ Intanɛti ɔ nɔ. Ni komɛ hu hyɛɔ sinihi, kɛ fiɛmihi, aloo tiivi nɔ ní peepeehi nɛ kɔɔ bɔmi nami he. Ni komɛ hu yaa disko, aloo a ya hyɛɔ nihi nɛ hɛɛ a he gu, aloo a yaa hehi nɛ a gbɔleɔ nɔ ngɛ blɔ nɛ tleɔ bɔmi nami akɔnɔ si ɔ nɔ.

5. Mɛni he je nɛ e sa kaa waa po wa tsui nɛ yi mluku ɔ he piɛ ɔ?

5 Ni komɛ ngɔɔ a he kɛ woɔ je mi bami yaya mi, ejakaa a suɔ nɛ nɔ ko nɛ e pi a huno loo a yo nɛ ná a he deka. Nihi nɛ a ngɛ je ɔ mi ɔ nyɛ we a he nɔ yemi tsɔ, nɛ a bua jɔɔ je mi bami yaya ní peepeehi tsuo a he. Jehanɛ hu ɔ, wa tsui nɛ yi mluku ɔ sisiɔ wɔ. Enɛ ɔ he ɔ, eko ɔ, e be yee kaa huno ko ma ná yo kpa ko he suɔmi, aloo yogbayo ko hu ma ná nyumu kpa ko he suɔmi. (Kane Yeremia 17:9, 10.) Yesu de ke: “Tsui mi nɛ susumi yayami nɛ ɔmɛ jeɔ: nɔmlɔ gbemi, gba puɛmi, ajuama bɔmi, jumi, lakpa odase yemi, kɛ nɔ biɛ puɛmi.”Mateo 15:19.

6, 7. (a) Ke akɔnɔ yaya sɛ wa tsui mi ɔ, mɛni ma nyɛ maa ba? (b) Mɛni wa maa pee konɛ wa ko tɔ̃ Yehowa nɔ?

6 Ke akɔnɔ yaya sɛ nihi enyɔ nɛ a ná a sibi a he bua jɔmi ɔ a tsui mi ɔ, a ma nyɛ ma bɔni níhi nɛ e sa kaa a kɛ mɛ nitsɛmɛ a hunomɛ loo a yihi pɛ nɛ sɛɛ ɔ sɛɛmi. E be kɛe kulaa nɛ a ma bɔni he blɔhi hlami konɛ a kɛ a sibi nɛ pɔ kpemi. Ke a kɛ a sibi kpe hu ɔ, a bua peeɔ a ní kaa nɔ́ nɛ a kpe tlukaa. Ke suɔmi nɛ a ngɛ ha a he ɔ mi ba wa a, e yee ha mɛ kaa a maa pee nɔ́ nɛ da. Ke huɛ bɔmi nɛ ngɛ a kpɛti ɔ mi ngɛ wae ɔ, a nyɛ we nɛ a poɔ se, e ngɛ mi kaa a le kaa nɔ́ nɛ a ngɛ pee ɔ dɛ.Abɛ 7:21, 22.

7 Akɔnɔ yaya nɛ a ná a, kɛ ní nɛ a sɛɛɔ ɔ haa nɛ a hɛ jeɔ Yehowa je mi bami he mlaahi a nɔ kulaa. Enɛ ɔ haa nɛ a pɛtɛɔ a sibi a nine si, a fĩɔ a sibi a nya he, nɛ a fiɛɔ a sibi a he. Aywilɛho sane ji kaa a ngɔɔ a he kɛ woɔ ní peepeehi nɛ e sa kaa e ya nɔ ngɛ a kɛ a yihi aloo a hunomɛ pɛ a kpɛti ɔ mi. ‘Mɛ nitsɛmɛ a we akɔnɔ nɛ gblaa mɛ ɔ lɛ kaa mɛ.’ Nyagbenyagbe ɔ, ke akɔnɔ ɔ mi ba wa wawɛɛ ɔ, kɛkɛ a kɛ a he  wo ajuama bɔmi mi. (Yakobo 1:14, 15) Hyɛ bɔ nɛ enɛ ɔ maa pee aywilɛho ha! Kaa a ngmɛ blɔ nɛ Yehowa ha nɛ bumi nɛ a ngɛ kɛ ha gba si himi ɔ mi wa a, jinɛ a ko tɔ̃ we e nɔ. Mɛni blɔ nɔ nɔ ko maa gu kɛ ná bumi kɛ ha gba si himi?

NYƐƐ YA NƆ NƐ NYƐƐ HƐ NYƐ KƐ SU MAWU HE

8. Mɛni blɔ nɔ huɛ bɔmi kpakpa nɛ maa hi waa kɛ Yehowa wa kpɛti ɔ maa po wa he piɛ ngɛ ajuama bɔmi ní peepeehi a he ngɛ?

8 Kane La 97:10. Ke huɛ bɔmi kpakpa ngɛ waa kɛ Yehowa wa kpɛti ɔ, lɔ ɔ maa po wa he piɛ kɛ je ajuama bɔmi ní peepeehi a he. Ke wa kase Yehowa su kpakpa amɛ ɔ, wa bɔɔ mɔde nɛ wa ba peeɔ ‘Mawu bimɛ nɛ e suɔ, nɛ wa kaseɔ lɛ, nɛ wa jeɔ suɔmi kpo kɛ tsɔɔ wa sibi.’ Enɛ ɔ ma ha nɛ wa ma ná kã, nɛ wa maa yu wa he ngɛ “yo kɛ nyumu a yakayaka fiɛmi, loo mu ní tsumi” he. (Efeso Bi 5:1-4) Hunomɛ kɛ yigbayihi nɛ a le kaa “Mawu maa kojo yaholi, kɛ gba puɛli” ɔ bɔɔ mɔde wawɛɛ nɛ a yeɔ a sibi anɔkuale.Hebri Bi 13:4.

9. (a) Mɛni ye bua Yosef nɛ e nyɛ da ka nɛ e nitsumitsɛ ɔ yo ɔ kɛ ba e nɔ ɔ nya? (b) Mɛni wa ma nyɛ maa kase ngɛ Yosef nɔ hyɛmi nɔ́ ɔ mi?

9 Kristo se nyɛɛli komɛ hyɛ we a he nɔ saminya, nɛ a kɛ nihi nɛ a kɛ mɛ tsuɔ ní nɛ a pi Odasefohi ɔ bɔɔ ke a kpa ní tsumi. Ni komɛ hu kɛ ka kpeɔ ngɛ ní tsumi he. Niheyo wayoo ko nɛ a tsɛɛ lɛ ke Yosef ɔ kɛ si himi nɛ ɔ eko kpe. Benɛ e ngɛ e ní tsumi he ɔ, e nitsumitsɛ ɔ yo ɔ ná e he bua jɔmi wawɛɛ. Enɛ ɔ he ɔ, daa ligbi ɔ, e bɔɔ mɔde kaa e maa ka Yosef konɛ e kɛ lɛ nɛ ná bɔmi. Nyagbenyagbe ɔ, e “nu Yosef tade ɔ, nɛ e de lɛ ke, ‘Ba nɛ o kɛ mi ba hwɔ si.’” Se Yosef kplɛɛ we, nɛ e ma fo. Mɛni wo Yosef he wami nɛ e ya nɔ ye anɔkuale ɔ? E fia e pɛɛ si kaa e maa po huɛ bɔmi nɛ ngɛ e kɛ Mawu a kpɛti ɔ he piɛ. Yosef ní tsumi puɛ nɛ a wo lɛ tsu mohu lɛɛ, se Yehowa jɔɔ lɛ. (1 Mose 39:1-12; 41:38-43) Ke wa ngɛ ní tsumi he jio, wa ngɛ he kpa ko jio, e sa nɛ waa yu wa he ngɛ si himihi nɛ ma nyɛ maa ka wɔ ɔ a he.

NYƐƐ WO NƆMLƆ SU EHE Ɔ

10. Mɛni blɔ nɔ nɔmlɔ su ehe ɔ poɔ gba si himi he piɛ ngɛ?

10 Nɔmlɔ su ehe ɔ nɛ “Mawu bɔ ngɛ e suɔmi nya ngɛ anɔkuale dami kɛ he tsɔmi mi” ɔ maa ye bua nihi kɛ a yihi konɛ a yu a he ngɛ ajuama bɔmi ní peepeehi a he. (Efeso Bi 4:24, NW) Ke wa wo nɔmlɔ su ehe ɔ, e haa nɛ wa ‘gbeɔ’ akɔnɔ nɛ ngɛ wa mi ɔ, nɛ wa jeɔ wa he ngɛ “yo kɛ nyumu yakayaka fiɛmi, mu ní tsumi, mi mi la, akɔnɔ yaya, kɛ hɛ tsumi” he. (Kane Kolose Bi 3:5, 6.) Munyu nɛ ji “nyɛɛ gbe” nɛ a kɛ tsu ní ngɛ munyu nɛ ɔ mi ɔ tsɔɔ kaa e sa nɛ waa bɔ mɔde wawɛɛ nɛ waa yu wa he ngɛ akɔnɔ yayahi a he. E sa nɛ waa yu wa he ngɛ nɔ́ tsuaa nɔ́ nɛ ma nyɛ ma tle bɔmi nami akɔnɔ yaya si ngɛ wa mi ɔ he. (Hiob 31:1) Ke wa yeɔ Mawu mlaa amɛ a nɔ ɔ, wa nyɛɔ “yayami kulaa,” nɛ wa pɛtɛɔ “nɔ́ kpakpa” he wawɛɛ.Roma Bi 12:2, 9.

E he hia nɛ nɔ kɛ e yo nɛ a wo a gba si himi ɔ mi he wami kɛ gu munyu nɛ a kɛ a sibi maa tu ngɛ mi mi himi, mi mi jɔmi, kɛ mi mi sami mi ɔ nɔ

11. Ngɛ mɛni blɔ nɔ nɛ nɔmlɔ su ehe ɔ woɔ gba si himi mi he wami?

11 Ke wa woɔ nɔmlɔ su ehe ɔ, wa kaseɔ Yehowa su ɔmɛ. (Kolose Bi 3:10) Ke nɔ kɛ e yo jeɔ “mi mi jɔmi, mɔbɔ nami, he si bami, kpoo peemi, kɛ tsui si tomi” kpo ɔ, lɔ ɔ ma ha suɔmi nɛ  ngɛ a kpɛti ɔ mi maa wa, nɛ Yehowa hu maa jɔɔ mɛ. (Kolose Bi 3:12) Jehanɛ hu ɔ, ke a ‘ha nɛ he jɔmi nɛ Kristo haa a tsuɔ ní ngɛ a tsui mi’ ɔ, lɔ ɔ hu ma ha nɛ kake peemi maa hi a kpɛti. (Kolose Bi 3:15) Ke nɔ kɛ e yo ‘suɔ a he saminya’ a, lɔ ɔ ma ha nɛ a ma ná deka kɛ ha a he, nɛ a maa ‘bu a sibi pe mɛ nitsɛmɛ a he.’Roma Bi 12:10.

12. Mɛni suhi nɛ o susu kaa a ma ha nɛ bua jɔmi nɛ hi gba si himi mi?

12 Benɛ a bi Sid kɛ e yo Sonja konɛ a tsɔɔ suhi nɛ ye bua mɛ nɛ a ngɛ bua jɔmi ɔ, Sid de ke: “Suɔmi ji su titli nɛ wa pɔɔ kpo jemi. Wa na hu kaa e he hia wawɛɛ nɛ waa pee wa he nihi nɛ a he jɔ.” Sonja kplɛɛ nɔ́ nɛ e huno ɔ de ɔ nɔ. E de ke: “Ngɛ anɔkuale mi ɔ, mi mi himi hu ji su ko nɛ he hia wawɛɛ. Wa bɔɔ mɔde nɛ wa jeɔ he si bami hu kpo, e ngɛ mi kaa tsa pi be tsuaa be nɛ jã peemi ngɛ gbɔjɔɔ.”

NYƐƐ JE NYƐ TSUI MI KƐ SƐƐ NÍ

13. Mɛni lɛ e he hia nɛ nihi kɛ a yihi nɛ a pee kɛ wo a gba si himi ɔ mi he wami, nɛ mɛni he je?

13 Blɔ nɛ hi pe kulaa nɛ wa maa gu nɔ kɛ wo wa gba si himi ɔ mi he wami ɔ a kpɛti kake ji, nɛ waa kɛ wa yihi aloo wa hunomɛ maa tu munyu ngɛ mi mi jɔmi mi. E ngɛ dɔmi kaa ni komɛ kɛ ni kpahi tuɔ munyu ngɛ bumi mi pe bɔ nɛ a kɛ mɛ nitsɛmɛ a hunomɛ aloo a yihi tuɔ munyu ɔ! Ke “mi mi doomi, mi mi la, muklii mi fumi, pɛ, kɛ nɔ jɛmi basabasa” yaa nɔ ngɛ nɔ ko kɛ e yo a kpɛti ɔ, bɔbɔɔbɔɔ ɔ, suɔmi nɛ ngɛ a kpɛti ɔ mi gbɔjɔɔ. (Efeso Bi 4:31) Ke huno ko tuɔ munyu kɛ siɔ e yo nɛ e peeɔ lɛ nɔ́ dɔ nɔ́, aloo yogbayo ko hu peeɔ jã a, a gba a be ngɔe. Enɛ ɔ he ɔ, e he hia nɛ nɔ kɛ e yo nɛ a wo a gba si himi ɔ mi he wami kɛ gu munyu nɛ a kɛ a sibi maa tu ngɛ mi mi himi, mi mi jɔmi, kɛ mi mi sami mi ɔ nɔ.Efeso Bi 4:32.

14. Mɛni e sɛ kaa waa pee?

14 Baiblo ɔ tsɔɔ kaa “dii peemi be ngɛ.” (Fiɛlɔ 3:7) Se enɛ ɔ tsɔɔ we kaa waa kɛ wa hunomɛ loo wa yihi nɛ ko sɛɛ ní, ejakaa ní sɛɛmi haa nɛ gba si himi peeɔ kpakpa. Yogbayo ko nɛ e ngɛ Germany ɔ de ke: “Ke ní sɛɛmi be nɔ ko kɛ e yo a kpɛti ɔ, e yeɔ mɛ awi.” E de hu ke: “E ngɛ mi kaa tsa pi be tsuaa be nɛ e ngɛ gbɔjɔɔ kaa ke nɔ́ ko gba o nya a, o maa nu o tsui mohu lɛɛ, se e sɛ nɛ o kɛ abofu nɛ kple nɔ ɔ nɔ. Ke e ba jã a, o ma de o yo ɔ loo o huno ɔ nɔ́ ko nɛ o susuu we he, nɛ lɔ ɔ ma puɛ sane ɔ kulaa.” Ke nyagba ko ba nihi kɛ yihi a kpɛti ɔ, e sɛ nɛ a kpa ngmlaa kɛ wo a sibi a yi, aloo hiɔ a sibi nya. Mohu ɔ, ke nyagba ko ba nɛ a tsu he ní mla, nɛ e pee we pɛ ɔ, lɔ ɔ woɔ a gba si himi ɔ mi he wami.

15. Mɛni blɔ nɔ ní sɛɛmi kpakpa ma nyɛ maa wo gba si himi mi he wami ngɛ?

 15 Nyɛ ma nyɛ maa wo nyɛ gba si himi ɔ mi he wami ke nyɛ ná tsui nɛ nyɛ susu níhi a he nɛ nyɛ nu nyɛ sibi sisi. Tsa pi nɔ́ nɛ o ma de ɔ pɛ nɛ he hia, se bɔ nɛ o ma plɛ kɛ de nɔ́ ɔ ha a hu he hia. Enɛ ɔ he ɔ, ke haomi ko ba po ɔ, moo bɔ mɔde nɛ o tu munyu ngɛ mi mi jɔmi mi. Ke o pee jã a, e be yee ha o yo ɔ aloo o huno ɔ kaa e maa bu mo tue. (Kane Kolose Bi 4:6.) Ní sɛɛmi kpakpa ma nyɛ ma ha nɛ nɔ kɛ e yo maa wo a gba si himi ɔ mi he wami ke a nya mi munyu jeɔ via nɛ e woɔ a sibi he wami.Efeso Bi 4:29.

Ní sɛɛmi kpakpa ma nyɛ ma ha nɛ nɔ kɛ e yo maa wo a gba si himi ɔ mi he wami (Hyɛ kuku 15)

NYƐ HA NYƐ SIBI GBA SI HIMI BLƆ NYA NƆ́ Ɔ

16, 17. Mɛni he je nɛ e he hia kaa nihi nɛ a ha nɛ a hunomɛ aloo a yihi a bua nɛ jɔ, nɛ a kó tsi a he nya kaa a kɛ a sibi be bɔmi náe ɔ?

16 Nihi nɛ a sɛ gba si himi mi ɔ ma nyɛ maa wo a gba si himi ɔ mi he wami ke a tsuɔ a sibi a hiami níhi a he ní kɛ haa mɛ, nɛ a fo we mɛ pɛ a nɔ́ mi. (Filipi Bi 2:3, 4) E sa nɛ hunomɛ kɛ yigbayihi tsuo nɛ a susu níhi nɛ ma ha nɛ a he piɛɛli ɔmɛ ma ná bua jɔmi ɔ he, konɛ a tsu a bɔmi nami mi hiami níhi hu a he ní ha mɛ.Kane 1 Korinto Bi 7:3, 4.

17 Aywilɛho sane ji kaa ni komɛ je we suɔmi kpo kɛ ha a hunomɛ aloo a yihi, nɛ a tsiɔ a he nya kaa a kɛ a sibi be bɔmi náe. Nyumu komɛ hu susuɔ kaa ke a hɛɛ a yihi dɔdɔɔdɔ ɔ, lɔ ɔ tsɔɔ kaa pi nyumuhi ji mɛ. Se Baiblo ɔ de ke: “Nyɛ hunomɛ ɔmɛ hu, ke nyɛɛ kɛ nyɛ yi ɔmɛ ngɛ ɔ, nyɛɛ na nya ha mɛ saminya.” (1 Petro 3:7) E sa nɛ huno ɔ nɛ nu sisi kaa gba si himi blɔ nya nɔ́ ɔ kɔ we bɔmi nami pɛ he. E sa nɛ e je suɔmi kpo kɛ ha e yo ɔ be tsuaa be. Lɔ ɔ ma nyɛ ma ha nɛ e yo ɔ bua maa jɔ bɔmi nami he. Ke huno ɔ kɛ yo ɔ tsuo jeɔ suɔmi kpo kɛ haa a sibi ɔ, e be  yee ha mɛ kaa a ma tsu a sibi a hiami níhi a he ní kɛ ha mɛ.

18. Mɛni hunomɛ kɛ yigbayihi ma nyɛ maa pee kɛ wo a gba si himi ɔ mi he wami?

18 E ngɛ mi kaa ke nɔ ko je e huno aloo e yo se ɔ, nɔ́ ko be nɛ e kɛ ma je e nya mohu lɛɛ, se ke nɔ kɛ e yo je we suɔmi kpo kɛ ha we a sibi ɔ, lɔ ɔ ma nyɛ ma ha nɛ nyumu ɔ loo yo ɔ ma ná nɔ kpa he suɔmi. (Abɛ 5:18; Fiɛlɔ 9:9) Enɛ ɔ he nɛ Baiblo ɔ wo nihi nɛ a sɛ gba si himi ɔ ga kaa a ko “tsi a he nya kaa a kɛ a sibi be bɔmi náe” ja eko ɔ, mɛ ni enyɔ ɔmɛ tsuo kplɛɛ kaa a maa pee jã be kpiti kɛkɛ. Mɛni he je? ‘Ke pi jã a, a be a he nɔ nyɛe maa ye, nɛ Satan maa ka mɛ.’ (1 Korinto Bi 7:5) E maa pee mɔbɔ kaa nɔ kɛ e yo maa ngmɛ Satan blɔ nɛ e da a ‘he nɔ nɛ a nyɛ we nɛ a ye’ ɔ nɔ kɛ ka mɛ konɛ a puɛ gba! Ke nɔ ko kɛ e yo haa a sibi gba si himi blɔ nya nɔ́ ɔ, lɔ ɔ tsɔɔ kaa a ti ‘nɔ ko nɔ ko hla we kaa e hi ha lɛ nɔ kake too, nɛ nɔ tsuaa nɔ susuɔ e nyɛmi hu he.’ A peeɔ jã ejakaa a suɔ a sibi, se pi kaa e sa kaa a pee jã kɛkɛ he je nɛ a ngɛ pee. Ke nɔ kɛ e yo jeɔ suɔmi kpo kɛ tsɔɔ a sibi ɔ lɔ ɔ woɔ a gba si himi ɔ mi he wami.1 Korinto Bi 10:24.

YAA NƆ NƐ O WO O GBA SI HIMI Ɔ MI HE WAMI

19. Mɛni e sa kaa waa fia wa pɛɛ si kaa wa maa pee, nɛ mɛni he je?

19 E be kɛe kulaa nɛ wa maa sɛ je ehe ɔ mi! Hyɛ bɔ nɛ e maa pee oslaa ha kaa wa maa di akɔnɔ yaya se, nɛ wa hɛ mi ma kpata kaa bɔ nɛ e ba Israel bi 24,000 ɔ a nɔ ngɛ Moab Nga a nɔ ɔ. Benɛ Baiblo ɔ tu nɔ́ nɛ ba a he munyu ta a, e bɔ wɔ kɔkɔ ke: “Nɔ nɛ susuɔ kaa e daa si ɔ, e hyɛ e he nɛ hi, konɛ e ko nɔ si.” (1 Korinto Bi 10:12) Ja wa ye Yehowa kɛ wa hunomɛ kɛ wa yihi anɔkuale loko wa ma nyɛ maa wo wa gba si himi ɔ mi he wami. (Mateo 19:5, 6) Amlɔ nɛ ɔ ji be nɛ e he hia wawɛɛ kaa ‘wa maa bɔ mɔde konɛ Mawu nɛ ko na mu, loo piami nɔ́ ko ngɛ wa he, nɛ waa kɛ lɛ nɛ hi si ngɛ he jɔmi mi.’2 Petro 3:13, 14.