Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  No. 6 2017

Kpɔmi nɔ́ ɔ nɛ Mawu ha wɔ ɔ ji nike ní nɛ hi pe kulaa, ejakaa e ma ha nɛ wa ná neneene wami

 MUNYUHI NƐ KƆƆ HƐ MI MUNYU Ɔ HE | MƐNI JI NIKE NÍ NƐ PE KULAA?

Mɛni Ji Nike Ní Nɛ Pe Kulaa a?

Mɛni Ji Nike Ní Nɛ Pe Kulaa a?

“Nike ní kpakpa, kɛ níhi nɛ hi kɛ pi si nɛ wa naa yaka a, lɛ tsuo Mawu lɛ haa wɔ.” (Yakobo 1:17) Ngɛ anɔkuale mi ɔ, ngmami nɛ ɔ tuɔ wa hiɔwe Tsɛ Yehowa Mawu kpakpa peemi ɔ he munyu. Se ngɛ nike níhi fuu nɛ Mawu ha adesahi a kpɛti ɔ, kake ngɛ nɛ lɛɛ e kle pe kulaa. Mɛni ji nike ní nɛ ɔ? Munyu nɛ Yesu tu ngɛ Yohane 3:16 nɛ nihi fuu le ɔ de ke: “Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e na neneene wami.”

Mawu Bi kake ɔ nɛ e ngɔ lɛ kɛ ha kaa nike ní ɔ ba peeɔ nike ní nɛ pe kulaa nɛ wa ti nɔ ko ná, ejakaa kɛ gu nike ní nɛ ɔ nɔ ɔ, a ma nyɛ ma kpɔ̃ wɔ kɛ je yayami, bwɔmi kɛ gbenɔ nyɔguɛ yemi mi. (La 51:5; Yohane 8:34) Akɛnɛ adesahi ji wɔ he je ɔ, nɔ́ ko be nɛ wa ma nyɛ maa pee kɛ kpɔ̃ wa he kɛ je nyɔguɛ yemi nɛ ɔ mi. Se Mawu je suɔmi mi nɛ e ha wɔ nɔ́ nɛ maa ye bua kɛ kpɔ̃ wɔ kɛ je jamɛ a si himi ɔ mi. Kɛ gu Yehowa Mawu Bi kake nɛ ji Yesu Kristo nɛ e ngɔ lɛ kɛ ha kaa kpɔmi nɔ́ ɔ nɔ ɔ, Yehowa Mawu ma ha nɛ adesahi nɛ a buɔ lɛ tue ɔ maa hi si kɛ ya neneene. Se mɛni tutuutu ji kpɔmi nɔ́ ɔ? Mɛni he je nɛ e he hia? Nɛ mɛni blɔ nɔ waa maa gu kɛ ná he se?

Kpɔmi nɔ́ ji hiɔ nɛ a woɔ konɛ nɔ ko nine nɛ su nɔ́ ko nɛ laa nɔ ekohu, aloo konɛ a ngmɛɛ nɔ ko he. Baiblo ɔ tsɔɔ kaa, benɛ abɔ wa kekleekle fɔli nɛ ji Adam kɛ Hawa a, yayami ko be a he, nɛ a ngɛ hɛ nɔ kami kaa a kɛ bimɛ tsuo nɛ a ma fɔ ɔ maa hi si kɛ maa ya neneene ngɛ paradeiso zugba a nɔ. (1 Mose 1:26-28) Aywilɛho sane ji kaa, a gbo Mawu nɔ tue, nɛ si himi nɛ ɔ bɔ mɛ. Enɛ ɔ ha nɛ a ba plɛ yayami peeli. Mɛni je mi kɛ ba? Baiblo ɔ ha heto ke: “Nɔ kake lɛ pee yayami, nɛ yayami kɛ gbenɔ ba. Enɛ ɔ ha gbenɔ sã nimli tsuo, ejakaa nɔ tsuaa nɔ pee yayami.” (Roma Bi 5:12) Jinɛ e sa nɛ Adam bimɛ ko ná wami nɛ ye mluku kɛ gu e nɔ, se mohu, Adam ngɔ yayami kɛ sã mɛ nɛ lɔ ɔ ha nɛ a ngɛ gboe.

E sa kaa hiɔ nɛ a woɔ kaa kpɔmi nɔ́ ɔ kɛ nɔ́ nɛ laa a nɛ e sɔ. Adam pee yayami benɛ e je blɔ nɛ e gbo Mawu nɔ tue ɔ, nɛ nɔ́ nɛ je mi kɛ ba ji kaa e wami nɛ ye mluku ɔ bɔ lɛ. Kaa bɔ nɛ Baiblo ɔ tsɔɔ, nɔ́ nɛ Adam pee ɔ ha nɛ e bimɛ ya je yayami kɛ gbenɔ nyɔguɛ yemi mi. Enɛ ɔ he ɔ, a ngɔ adesa wami kpa nɛ ye mluku nɛ ji Yesu wami kɛ sã afɔle konɛ a kɛ kpɔ̃ Adam bimɛ kɛ je nyɔguɛ yemi nɛ ɔ mi. (Roma Bi 5:19; Efeso Bi 1:7) Suɔmi mi nɛ Mawu je kɛ ha kpɔmi nɔ́ ɔ lɛ ha nɛ adesahi ná hɛ nɔ kami kaa a maa hi si kɛ maa ya neneene ngɛ paradeiso zugba a nɔ ɔ nɛ. Si himi nɛ ɔ ji nɔ́ Adam kɛ Hawa.​—Kpojemi 21:3-5.

Akɛnɛ kpɔmi nɔ́ ɔ nɛ Mawu ha wɔ ɔ ma ha nɛ wa ma ná neneene wami he je ɔ, wa ma nyɛ ma de ke Mawu nike ní ɔ ji nike ní nɛ pe kulaa. Wa ma nyɛ ma je hɛ sa kpo ke wa nine su nike ní ko “nɛ hi kɛ pi si” ɔ nɔ. A gu otihi nɛ a wo a ta ngɛ munyu nɛ sɛ enɛ ɔ hlami ɔ nɔ kɛ ha nike ní nɛ ɔ. Ha nɛ waa hyɛ.

E tsuɔ níhi nɛ wa bua jɔɔ a he ɔ he ní. Adesahi suɔ kaa a maa hi si kɛ ya daa. (Fiɛlɔ 3:11, NW) E ngɛ mi kaa wɔ nitsɛmɛ wa be nyɛe ma tsu he ní, se kpɔmi nɔ́ ɔ ma ha nɛ wa nine maa su si himi nɛ  wa suɔ nɛ ɔ nɔ. Baiblo ɔ de ke: “Ejakaa yayami he hiɔwo ji gbenɔ; se Mawu nɔke nɔ́ ɔ ji neneene wami nɛ wa naa ngɛ wa Nyɔmtsɛ Yesu Kristo mi.”​—Roma Bi 6:23.

E tsuɔ wa hiami níhi a he ní. Adesahi be nyɛe ma ha kpɔmi nɔ́ ɔ. Baiblo ɔ tsɔɔ nya kaa: “Nɔmlɔ adesa wami he jua wa saminya, nɛ nɔ ko nɔ ko be Mawu hiɔ nyɛe maa wo nɛ maa su nya.” (La 49:8) Enɛ ɔ he ɔ, wa hia Mawu yemi kɛ buami wawɛɛ bɔ nɛ pee nɛ wa nyɛ nɛ waa ye wa he kɛ je yayami kɛ gbenɔ a nyɔguɛ yemi ɔ mi. Se Mawu to nɔ́ nɛ he hia adesahi ɔ he blɔ nya “kɛ gu Kristo Yesu nɛ ha a ye a he ɔ nɔ.”​—Roma Bi 3:23, 24.

A kɛ ha ngɛ be nɛ sa mi. Baiblo ɔ de ke: “Be nɛ wa ji yayami peeli ɔ, jamɛ a be ɔ Kristo ba gbo ngɛ wa he.” (Roma Bi 5:8) E ngɛ mi kaa wa ji yayami peeli mohu lɛɛ, se Mawu ha kpɔmi nɔ́ ɔ “be nɛ wa ji yayami peeli,” enɛ ɔ ha nɛ wa na kaa suɔmi nɛ e ngɛ ha wɔ ɔ mi kuɔ. Jehanɛ hu ɔ, e ngɛ mi kaa waa kɛ nyagbahi nɛ jeɔ yayami mi kɛ baa a kpeeɔ lɛɛ, se kpɔmi nɔ́ ɔ haa wɔ hɛ nɔ kami nɛ mi wa.

Yi mi tomi kpakpa he je nɛ a kɛ ha. Baiblo ɔ tsɔɔ nɔ́ he je nɛ Mawu ngɔ e Bi kake ɔ kɛ ha kaa kpɔmi nɔ́ ɔ. E de ke: “Blɔ nɔ nɛ Mawu gu kɛ je e suɔmi ɔ kpo kɛ tsɔɔ wɔ ji nɛ ɔ nɛ; e tsɔ e Bi kake too ɔ kɛ ba je ɔ mi, konɛ kɛ gu e Bi ɔ nɔ ɔ, wa ná wami. Bɔ nɛ suɔmi ngɛ ji nɛ ɔ nɛ; pi wɔ nɛ wa sɛ hlami kɛ suɔ Mawu; Mawu mohu lɛ suɔ wɔ.”​—1 Yohane 4:9, 10.

Mɛni o ma nyɛ maa pee kɛ tsɔɔ kaa o bua jɔ nike ní nɛ pe kulaa a he? Mo kai kaa munyu nɛ Yesu tu ngɛ Yohane 3:16 tsɔɔ kaa nihi nɛ “heɔ lɛ yeɔ ɔ” pɛ nɛ a ma he a yi wami. Kaa bɔ nɛ Baiblo ɔ tsɔɔ ɔ, hemi kɛ yemi ji “níhi nɛ wa ngɛ blɔ hyɛe ɔ a nɔ mi mami.” (Hebri Bi 11:1) Bɔ nɛ pee nɛ wa ná nɔ mi mami nɛ ɔ, e sa nɛ wa ná anɔkuale nile. Enɛ ɔ he ɔ, wa ngɛ mo he wami woe nɛ o kase Yehowa Mawu nɛ ji nike ní “nɛ hi kɛ pi si” nɛ ɔ halɔ ɔ he ní, nɛ o hyɛ kaa mɛni o maa pee konɛ o ná neneene wami nɛ Yesu kpɔmi afɔle sami ɔ ma ha nɛ o ná a he se.

O ma nyɛ maa kase nɔ́ nɛ Ngmami ɔ tsɔɔ ngɛ ní nɛ ɔmɛ tsuo a he ɔ he ní ngɛ Intanɛti ɔ nɔ. Moo ya www.jw.org/ada konɛ o pee jã. Yehowa Odasefohi a bua maa jɔ kaa a maa ye bua mo. Wa he ye kaa ke o ngɛ nike ní nɛ pe kulaa nɛ ɔ he ní kasee nɛ o ngɛ he se náe ɔ, o kɛ bua jɔmi ma de ke: “Sina ha Mawu kaa e he wa yi wami kɛ gu wa Nyɔmtsɛ Yesu Kristo nɔ!”​—Roma Bi 7:25.