Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  No. 4 2017

Ke nyɛ sɛ hlami susu níhi a he ɔ, e yeɔ bua wawɛɛ

Ke O Suɔlɔ Ko Nu Hiɔ Nɛ Be Tsaba

Ke O Suɔlɔ Ko Nu Hiɔ Nɛ Be Tsaba

YO KO nɛ a tsɛɛ lɛ ke Doreen tsɔɔ kaa, benɛ juɛmi mi hiɔ ko nɛ a tsɛɛ ke brain tumor fia e huno Wesley nɛ e ye jeha 54 pɛ ɔ, e he mi po. * Dɔkitahi tsɔɔ kaa nyɔhiɔhi bɔɔ kɛkɛ nɛ piɛ nɛ e kɛ maa hi je mi. Doreen de ke, “Benɛ i nu sane ɔ, i he we yi. Ye juɛmi gbɛ, nɛ otsi kɛ se sɔuu nɛ i li bɔ nɛ maa pee ye ní ha. E pee mi kaa nɔ kpa ko mohu nɛ nɔ́ nɛ ɔ ba e nɔ, se pi wɔ. I hyɛ we nɔ́ nɛ ɔ blɔ.”

Bɔ nɛ Doreen pee e ní ha a be nyakpɛ. Hiɔ nɛ be tsaba ma nyɛ maa fia nɔ fɛɛ nɔ ngɛ be saisaa ko mi. Nihi fuu jee a suɔmi mi kɛ hyɛɛ a suɔlɔ nɛ nu hiɔ nɛ be tsaba a nɔ. Nihi kaa jã a sa yi jemi wawɛɛ. Se ngɛ anɔkuale mi ɔ, hiɔtsɛ nɔ hyɛmi yee wawɛɛ nitsɛ. Mɛni weku li ma nyɛ maa pee kɛ wo a suɔlɔ nɛ hiɔ nɛ be tsaba fia lɛ ɔ bua? Mɛni nɛ nihi nɛ a ngɛ hiɔtsɛ ɔ nɔ hyɛe ɔ ma nyɛ maa pee kɛ da nyagbahi nɛ a kɛ maa kpe ɔmɛ a nya? Ke nɔ ɔ kɛ gbenɔ he kɛ we ɔ, mɛni ji níhi nɛ e sa kaa a hyɛ blɔ? Kekleekle ɔ, ha nɛ waa hyɛ nɔ́ he je nɛ nihi nɛ hiɔ nɛ be tsaba fia mɛ ɔ a nɔ hyɛmi yee wawɛɛ mwɔnɛ ɔ.

NYAGBA KO NƐ NGƐ MWƆNƐ Ɔ

Mwɔnɛ ɔ, adesahi ya hɛ mi wawɛɛ ngɛ hiɔ tsami mi. Maa pee jeha lafa nɛ be ɔ, nihi nɛ a ngɛ mahi nɛ a ya hɛ mi wawɛɛ ɔ mi po a wami se kɛ we kaa piɔ. Hiɔhi nɛ sãa nɔ, loo oslaa gbeɔ nihi mla. Hiɔ tsami hehi pɔɛ he, nɛ ke nihi nu hiɔ ɔ, a weku li nɛ a hyɛɛ a nɔ nɛ a gboɔ ngɛ we mi.

Mwɔnɛ ɔ, adesahi ya a hɛ mi ngɛ hiɔ tsami mi. Dɔkitahi nyɛɔ nɛ a tsaa hiɔ slɔɔtohi konɛ nihi a wami se nɛ kɛ. Be ko nɛ be ɔ, hiɔ komɛ gbeɔ nihi mla. Se ke jamɛ a hiɔ ɔmɛ nɔuu fia nihi mwɔnɛ ɔ, e nyɛ we mɛ gbemi mla. Se lɔ ɔ tsɔɔ we kaa nɔ ɔ ná tsami. Behi fuu ɔ, nihi nɛ hiɔ ɔ fia mɛ ɔ nyɛ we mɛ nitsɛmɛ a he hyɛmi. Ke o ngɛ nihi kaa jã a nɔ hyɛe ɔ, e yee wawɛɛ nɛ deka hu be mi.

Enɛ ɔ he ɔ, nihi babauu gboɔ ngɛ hiɔ tsami hehi mohu pe we mi. Mwɔnɛ ɔ, ke nɔ ko ngɛ gboe ɔ, nihi fuu li bɔ nɛ nɔ ɔ peeɔ e ní ha, nɛ nihi bɔɔ pɛ nɛ a na nɔ ko nɛ e ngɛ gboe hyɛ. Akɛnɛ nihi nɛ a ngɛ hiɔtsɛ ɔ nɔ hyɛe ɔ li bɔ nɛ níhi ma ji ha pee se he je ɔ, a kɔni mi ma nyɛ ma jɔ̃. Mɛni ma nyɛ maa ye bua?

 MO DLA O HE KƐ TO

Kaa bɔ nɛ wa na ngɛ Doreen nɔ hyɛmi nɔ́ ɔ mi ɔ, nihi fuu haoɔ wawɛɛ ke gbenɔ hiɔ fia a suɔlɔ ko. Ngɛ behi kaa kikɛ mi ɔ, nihi peeɔ yeyeeye, a yee gbeye, nɛ a yeɔ aywilɛho hulɔ. Se mɛni maa ye bua mo konɛ o dla o he kɛ ha níhi nɛ maa nyɛɛ se ɔ? Mawu sɔmɔlɔ anɔkualetsɛ ko sɔle ke: ‘Ha nɛ waa le wa ligbi kanemi, konɛ wa ná nile tsui.’ (La 90:12) Moo sɔle kɛ bi Yehowa Mawu nɛ e ye bua mo konɛ o le bɔ nɛ o maa ‘kane o ligbi’ ha. Jã peemi maa ye bua mo konɛ o nyɛ nɛ o je suɔmi kpo kɛ tsɔɔ o suɔlɔ ɔ ngɛ be bɔɔ nɛ e piɛ nɛ e kɛ maa hi je mi ɔ mi.

Enɛ ɔ bi ɔ blɔ nya tomi kpakpa. Ke o suɔlɔ nɛ hiɔ fia lɛ ɔ ma nyɛ maa tu munyu nɛ e suɔ nɛ nyɛ susu sane ɔ he ɔ, e he maa hia nɛ nyɛ bi lɛ nɔ nɛ e suɔ kaa e mwɔ yi mi kpɔ kɛ ha lɛ ke hiɔ ɔ mi ba wa nɛ lɛ nitsɛ e be nyɛe maa pee jã. Nyɛ ma nyɛ nɛ nyɛɛ kɛ lɛ nɛ susu ní komɛ a he kaa eko ɔ, ke e hɛli ɔ, e maa suɔ nɛ a tsɛ̃ɛ lɛ lo, ke hiɔ ɔ mi ba wa a, e maa suɔ nɛ a tsi e nya ngɛ hiɔ tsami he lo, aloo e maa suɔ nɛ a ngɔ hiɔ tsami blɔ nɔ tomi pɔtɛɛ ko kɛ tsa lɛ. Jã peemi ma ha nɛ nyɛ maa nu níhi a sisi saminya, nɛ weku mi bi ɔmɛ be a he piae ngɛ yi mi kpɔhi nɛ a maa mwɔ kɛ ha hiɔtsɛ ɔ he. Ke nyɛ sɛ hlami kɛ susu níhi a he ɔ, e ma ha nɛ weku ɔ maa le bɔ nɛ a maa pee ha kɛ hyɛ hiɔtsɛ ɔ nɔ. Baiblo ɔ de ke: “He nɛ ga womi be ɔ, yi mi tomi peeɔ yaka.”​—Abɛ 15:22.

NƆ́ NƐ O MAA PEE KƐ YE BUA

Nɔ́ titli nɛ e sa kaa nɔ nɛ e ngɛ hiɔtsɛ ɔ nɔ hyɛe ɔ nɛ pee ji kaa e wo hiɔtsɛ ɔ bua. Ke nɔ ko ngɛ gbenɔ muɔ nya a, e sa nɛ a ha nɛ e le kaa a suɔ lɛ nɛ a susuɔ e he. Mɛni blɔ nɔ o maa gu kɛ pee jã? O ma nyɛ maa kane womi ko aloo o la kɛ ha lɛ. E sa nɛ e pee womi aloo la nɛ e bua jɔ he nɛ maa wo lɛ he wami. Hiɔtsɛmɛ fuu a bua jɔɔ ke a weku no ko pɛtɛ a nine he nɛ e kɛ mɛ ngɛ ní sɛɛe.

Ke nɔ ko ba slaa lɛ ɔ, ha nɛ e le nɔ ɔ mi tso. Amaniɛ bɔmi ko tsɔɔ kaa: “Loko nɔ ko ma gbo ɔ, e nɔmlɔ tso ɔ he níhi enuɔ komɛ kpaa ní tsumi. Ngɛ níhi enuɔ nɛ ɔmɛ a mi ɔ, tue ji nyagbe nɔ́ nɛ kpaa ní tsumi. Enɛ ɔ he ɔ, ke e ba kaa hiɔtsɛ ɔ hwɔɔ si po ɔ, e sɛ nɛ a de ní komɛ nɛ a be nyɛɛ ma de ngɛ nɔ ɔ hɛ mi.”

Ke e maa hi ɔ, o kɛ lɛ nɛ sɔle kɛ bla. Baiblo ɔ tsɔɔ kaa be ko ɔ, bɔfo Paulo kɛ nihi nɛ piɛɛ e he ɔ ya je si himi ko nɛ mi wa mi nɛ a susu kaa a gbo ta. Mɛni yemi kɛ buami nɛ a hla? Paulo de e huɛmɛ ɔmɛ ke:  “Nyɛ hu nyɛɛ piɛ wa he kɛ kpa pɛɛ,” aloo kɛ sɔle. (2 Korinto Bi 1:8-11) Ke wa je wa tsui mi kɛ sɔle be mi nɛ wa ya je si himi nɛ mi wa mi aloo hiɔ nɛ mi wa ko fia wɔ ɔ, se nami ngɛ he wawɛɛ.

MOO HYƐ NÍHI NƐ MAA BA A BLƆ

Ke wa ná le kaa wa suɔlɔ ko ma gbo ɔ, e ngɛ dɔmi wawɛɛ. Enɛ ɔ be nyakpɛ, ejakaa a buɛ wɔ kaa wa gbo. Akɛnɛ a buɛ gbenɔ kɛ piɛɛ wa he he je ɔ, ke wa nɔ ko gbo ɔ, wa haoɔ nitsɛ. (Roma Bi 5:12) Mawu Munyu ɔ tsɛɛ gbenɔ ke “he nyɛlɔ.” (1 Korinto Bi 15:26) Lɔ ɔ he ɔ, ke e yee ha wɔ kaa wa ma susu gbomi nɛ wa suɔlɔ ko ma gbo ɔ he ɔ, sisi numi ngɛ he.

Se ke weku ɔ mi bimɛ hyɛ níhi nɛ ma nyɛ maa ba a blɔ ɔ, e maa ye bua mɛ konɛ gbeye ko nu mɛ tsɔ, se mohu a nyɛ nɛ a to nɔ́ fɛɛ nɔ́ he blɔ nya saminya. A tsɔɔ si fɔfɔɛ komɛ nɛ eko ɔ hiɔtsɛ ɔ kɛ maa kpe ɔ ngɛ daka nɛ yi ji, “ Ke E Piɛɛ Bɔɔ Nɛ Hiɔtsɛ ɔ Ma Gbo” ɔ mi. Pi hiɔtsɛ fɛɛ hiɔtsɛ nɛ maa gu si fɔfɔɛ nɛ ɔ tsuo mi, nɛ pi doo kaa si fɔfɔɛ ɔmɛ ma tsa nɔ nɔtonɔto kaa bɔ nɛ a to nya a. Se kɛ̃ ɔ, hiɔtsɛmɛ fuu kɛ si fɔfɔɛ nɛ ɔ ekomɛ kpeeɔ.

Ke o suɔlɔ ko gbo ɔ, e maa hi wawɛɛ kaa o maa bɔ o huɛ ko nɛ e suɔ nɛ e ye bua mo ɔ amaniɛ. E sa nɛ a ha nɛ nihi nɛ a hyɛ hiɔtsɛ ɔ nɔ, kɛ weku ɔ tsuo nɛ a le kaa si himi nɛ mi wa nɛ a suɔlɔ ɔ kɛ kpe ɔ ba nyagbe, nɛ e nɔ́ nami ɔ tsuo se po. Wa Bɔlɔ ɔ je suɔmi mi kɛ wo wɔ he wami kaa “ni gbogboe ɔmɛ lɛɛ a li nɔ́ ko nɔ́ ko.”​—Fiɛlɔ 9:5.

WA NƆ HYƐLƆ NƐ PE KULAA

E sa nɛ waa kplɛɛ yemi kɛ buami nɛ nihi kɛ ma ha wɔ ɔ nɔ

E sa nɛ o ngɔ o hɛ kɛ fɔ Mawu nɔ. Pi be mi nɛ hiɔ nɛ be tsaba fia o weku no ɔ pɛ, se mohu ngɛ e gbenɔ se nɛ nyɛ ngɛ aywilɛho yee ɔ tsuo. Mawu ma nyɛ maa ye bua mo kɛ gu he wami womi munyuhi kɛ níhi nɛ ni kpahi maa pee kɛ ye bua mo ɔ nɔ. Doreen de ke: “I yɔse kaa e sɛ nɛ ma kua yemi kɛ buami nɛ nihi kɛ ma ha mi ɔ. Ngɛ anɔkuale mi ɔ, nihi ye bua wɔ saminya. E ngɛ kaa nɔ́ nɛ Yehowa ngɛ i kɛ ye huno ɔ tsuo dee ke, ‘I ngɛ nyɛ kasa nya haa, ma ye bua nyɛ ngɛ si himi nɛ ɔ mi.’ Ye hɛ be nɔ jee gblegbleegble.”

Niinɛ, Yehowa Mawu ji wa Nɔ Hyɛlɔ nɛ pe kulaa. Lɛ ji wa Bɔlɔ, e le bɔ nɛ e peeɔ wɔ ha ke wa ngɛ nɔ́ nae nɛ wa ngɛ aywilɛho yee. E suɔ kaa e maa ye bua wɔ, nɛ e wo wɔ he wami konɛ wa nyɛ nɛ waa da nya. Nɛ e ngɛ nyɛmi nɛ e kɛ maa pee jã hulɔ. Jehanɛ se hu ɔ, e wo wɔ si kaa e be kɛe nɛ e maa po gbenɔ se, nɛ e ma tle nihi babauu nɛ a gbo nɛ a ngɛ e kaimi mi ɔ si. (Yohane 5:28, 29; Kpojemi 21:3, 4) Jamɛ a be ɔ, adesahi tsuo ma nyɛ maa tu munyu nɛ bɔfo Paulo tu ɔ eko. E de ke: “Mo gbenɔ, jije o kɛɛ ɔ ngɛ? Mo gbeje, jije o kunimi yemi ɔ ngɛ?”​—1 Korinto Bi 15:55.

^ kk. 2 A tsake biɛ ɔmɛ.