BENƐ David na nɛ ta buli ɔmɛ ngɛ fo tue kɛ ma a, e da si dii nɛ e hyɛ mɛ. E na kaa ta buli ɔmɛ ngɛ fo tue ngɛ ta a nya ejakaa sawale nu mɛ. Mɛni he je nɛ a ngɛ gbeye yee ɔ? David nu nɛ a ngɛ nyumu ko biɛ tsɛe kpamisaa. Benɛ David ke e yaa hyɛ ɔ, e na jamɛ a nyumu ɔ nɛ daa si ngɛ kɔ̃ ɔ mi. Eko ɔ David nɛ nɔ ko nɛ e je oblai kaa jã a hyɛ.

Nyumu nɛ ɔ biɛ ji Goliat. Benɛ David na lɛ ɔ, e na nɔ́ he je nɛ ta buli ɔmɛ ngɛ gbeye yee ɔ. Goliat ka nɛ e ti nɛ e je oblai nitsɛ. Ke e kpla we e ta hwumi ní ɔmɛ po ɔ, e mi jiɔ pe nihi enyɔ nɛ a kle nɛ a bla mɛ. Se e pa kpla ta hwumi ní nguahi, nɛ e ji tatsɛ kpanaa hulɔ. Goliat ngɛ ngmla kpae kɛ ngɛ Israel bi ɔmɛ ahlua bɔe. Hyɛ bɔ nɛ e gbi maa jije ngɛ yoku ɔmɛ a nɔ ha benɛ e ngɛ Israel tabo ɔ kɛ a matsɛ Saul ahlua bɔe ɔ. E de Israel bi ɔmɛ ke, a hla nyumu kake ngɛ a kpɛti nɛ e kɛ lɛ ba nɔ kunɔ, konɛ nɔ́ tsuaa nɔ́ se nɛ po!1 Samuel 17:4-10.

Sawale nu matsɛ Saul kɛ Israel bi ɔmɛ tsuo. David ná le kaa sane ɔ ngɛ nɔ yae maa pee nyɔhiɔ kake kɛ se sɔuu! Filisti tabo ɔ ngɛ a fa kake nɛ Israel tabo ɔ hu ngɛ a fa kake. Se Goliat lɛɛ e ngɛ munyu tue puu kɛ ngɛ Israel bi ɔmɛ ahlua bɔe daa ligbi. Enɛ ɔ gba David nya wawɛɛ. E pee lɛ zo kaa Israel matsɛ Saul kɛ e tabo ɔ nɛ lɛ David nitsɛ nyɛmimɛ etɛ piɛɛ he ɔ tsuo ngɛ nyumu nɛ ɔ gbeye yee! David yɔse kaa pi Israel ta buli ɔmɛ pɛ nɛ Goliat ngɛ a hɛ mi si pue, se mohu ɔ, e ngɛ Israel Mawu nɛ ji Yehowa a hu jɛe. Se mɛni nɛ niheyo wayo nɛ ɔ ma nyɛ maa pee ngɛ sane ɔ he? Mɛni wɔ hu wa ma nyɛ maa kase ngɛ hemi kɛ yemi nɛ David je kpo ɔ mi mwɔnɛ ɔ?1 Samuel 17:11-14.

‘MOO PƆ LƐ NU, EJAKAA LƐ JI NƐ Ɔ NƐ!’

Nyɛ ha nɛ wa susu ní komɛ nɛ ya nɔ nyɔhiɔ bɔɔ ko loko sane nɛ ɔ ya nɔ ɔ he. David ji niheyo nɛ he ngɛ fɛu, e ngɛ nɔmlɔ tso mi he wami, nɛ e he ngɛ bua jɔmi. Eko ɔ, e yi jeha nyingmi enyɔ lolo. E hyɛɔ e tsɛ to ɔmɛ ngɛ yoku ɔmɛ a nɔ ngɛ he ko nɛ e kɛ Betlehem kɛ we. Ke e su nyɔ mi nɛ je mi jɔ dii ɔ, e ngɔɔ jamɛ a be ɔ kɛ fiaa saku. E laa kɛ bua jɔmi kɛ jeɔ Mawu yi ngɛ níhi nɛ e bɔ ɔmɛ a he je. Nɛ akɛnɛ e pɔɔ jã peemi he je ɔ, e ba le saku fiami wawɛɛ nitsɛ. Gbɔkuɛ ko, benɛ e ngɛ to ɔmɛ hyɛe ɔ, e tsɛ tsɔ ba tsɛ lɛ ke e ba nɔuu.1 Samuel 16:12.

Benɛ e ya su we mi ɔ, e na e papaa Ishai kɛ nɔmoyo ko nɛ a ngɛ ni sɛɛe. Jamɛ a nɔmo ɔ ji gbalɔ Samuel. Yehowa tsɔ lɛ kaa e ya pɔ Ishai bi nyumu ɔmɛ a kpɛti nɔ kake nu konɛ e ba pee Israel matsɛ ngɛ matsɛ Saul se! Samuel na David nyɛmimɛ nikɔtɔmahi kpaago ɔmɛ momo, se Yehowa de Samuel ke e hlɛ a kpɛti nɔ ko. Benɛ David ba su ɔ, Yehowa de Samuel ke: ‘Moo pɔ lɛ nu, ejakaa lɛ ji nɛ ɔ nɛ!’ Kɛkɛ nɛ Samuel wo nu kɛ koli ɔ, nɛ e pɔ David nu ngɛ e nyɛminyumu ɔmɛ a hɛ mi. Benɛ a pɔ David nu se ɔ, e si himi tsake kulaa. Baiblo de ke: ‘Nɛ Yehowa mumi ɔ ba David nɔ kɛ je jamɛ a ligbi ɔ.’1 Samuel 16:1, 5-11, 13.

Akɛnɛ David baa e he si he je ɔ, benɛ e gbe lohwe awi yeli ɔmɛ ɔ, e ngɔ yi jemi ɔ kɛ ha Yehowa

Anɛ David hɛ kɔ matsɛ yemi ɔ lo? Dɛbi, mohu ɔ, e mlɛ kɛ ya su be nɛ Yehowa mumi ɔ nitsɛ  ha nɛ e le kaa be su nɛ e maa ye matsɛ. Se, loko jamɛ a be ɔ maa su ɔ, David ya nɔ nɛ e kɛ he si bami tsu ní kaa to hyɛlɔ. E tsu ní tsumi nɛ ɔ kɛ e tsui tsuo, nɛ e pee kã hulɔ. Be ko ɔ, osisiblisi ba nu to ɔ eko, nɛ be ko hu jata ko ba nu to ɔ eko. Ngɛ si fɔfɔɛ nɛ ɔmɛ a mi ɔ, David dɛ se tsitsaa nɛ e kɛ fie lohwe awi yeli nɛ ɔmɛ. Mohu ɔ, e ná ka nɛ e fia lohwe awi yeli nɛ ɔmɛ nɔ́ nɛ e kɛ po e papaa to ɔmɛ a he piɛ. Ngɛ si fɔfɔɛ enyɔ nɛ ɔ tsuo mi ɔ, e nyɛ nɛ e gbe lohwe awi yeli nɛ ɔmɛ.1 Samuel 17:34-36; Yesaya 31:4.

Pee se ɔ, a tsɔ ya tsɛ David ekohu. Jehanɛ lɛɛ Matsɛ Saul nitsɛ nu e mɔde bɔmi ɔ he. E ngɛ mi kaa loloolo ɔ matsɛ Saul ji tatsɛ kpanaa mohu lɛɛ, se akɛnɛ e tsɔ atua kɛ si blɔ tsɔmihi nɛ Yehowa kɛ ha lɛ he je ɔ, Yehowa kua lɛ. Yehowa je e mumi ɔ ke je Saul nɔ, enɛ ɔ he ɔ, mumi yayami ba hi lɛ haoe. Ke e ba jã a, e mi mi fuɔ wawɛɛ, e he we nɔ ko yi hu, nɛ e peeɔ e ní basabasa. Ke mumi yayami ɔ ngɛ lɛ haoe jã a, nɔ́ pɛ nɛ haa nɛ e he mi jɔɔ lɛ ji la. Saul tsɔli ɔmɛ a kpɛti ni komɛ ba de lɛ ke David ji nɔ ko nɛ le saku fiami wawɛɛ, nɛ e le ta hwumi hulɔ. Lɔ ɔ he ɔ, Saul tsɔ nɛ a ya tsɛ David kɛ ba. Kɛ je jamɛ a ligbi ɔ, David ba piɛɛ nihi nɛ fiaa la ngɛ matsɛ we ɔ kɛ matsɛ ɔ ta hwumi ní hɛɛli ɔmɛ a he.1 Samuel 15:26-29; 16:14-23.

Nihewi kɛ zangmawi ma nyɛ maa kase níhi fuu kɛ je David sane ɔ mi. Mo kadi kaa ke e ná deka bɔɔ ɔ, e peeɔ níhi nɛ ma ha nɛ e hɛ lɛ kɛ su Yehowa he. Jehanɛ hu, e to e tsui si kɛ kase nine nguɛnya ní tsumihi, nɛ jã nɛ e peeɔ ha nɛ e yi kaa e ma ná ní tsumi ma tsu. Nɔ́ nɛ he hia pe kulaa nɛ e pee ji kaa, e ha nɛ Yehowa mumi ɔ kudɔ lɛ. Nyɛ ha nɛ wɔ tsuo waa kase e nɔ hyɛmi nɔ́ kpakpa nɛ ɔ!Fiɛlɔ 12:1.

‘NƆ KO NƆ KO KÓ YE TSUI NGƐ E HE’

Benɛ David ngɛ Saul sɔmɔe ɔ, be komɛ ɔ, e kpale ɔ kɛ yaa we mi nɛ e ya hyɛɛ to ɔmɛ. Be komɛ ngɛ nɛ ke e je ɔ, e se ya kɛ ɔ saii. Be ko benɛ e ya we ɔ mi ɔ, e papaa tsɔ lɛ ke e ya slaa e nyɛmimɛ etɛ nɛ a piɛɛ Saul ta buli ɔmɛ a he ɔ. David bu e tsɛ ɔ tue, kɛkɛ nɛ e pue nɔ kɛ ho Ela Kɔ̃ ɔ mi ya konɛ e kɛ niye ní ya ha e nyɛmimɛ ɔmɛ. Benɛ e su lejɛ ɔ, e pee lɛ nyakpɛ wawɛɛ kaa tabo enyɔ ɔmɛ daa si nɛ a li nɔ nɛ ma tua e nyɛmi kekle kaa bɔ nɛ a wo ta kɛ sɛ hlami ɔ. Israel tabo ɔ ngɛ fa kake nɛ Filisti tabo ɔ hu ngɛ fa kake ngɛ yoku ɔ nɔ, nɛ dɔgba po a kpɛti.1 Samuel 17:1-3, 15-19.

David na kaa e sɛ nɛ a ngmɛ blɔ nɛ nɔ́ nɛ ɔ nɛ hi nɔ yae jã. Mɛni he je nɛ wɔ jalɔ nɛ ɔ ma ha nɛ Yehowa Mawu hɛ kalɔ ɔ tabo ɔ maa nu sawale jã a? David na Goliat ahlua bɔmi ɔ kaa e ji jɛmi nɛ e ngɛ Yehowa jɛe. Lɔ ɔ he ɔ, e de Israel ta buli ɔmɛ ke e ma nyɛ maa gbe Goliat. Kɛkɛ nɛ David wetsɛ Eliab nu nɔ nɛ David de ɔ. Oya nɔuu nɛ e ka David hɛ mi nɛ e po e nya ke, ta hwumi ɔ he je nɛ e ba ngɛ. Se David de lɛ ke: “Mɛni i pee? Pi munyu kɛkɛ nɛ i bi lo?” Kɛkɛ nɛ e ya nɔ nɛ e kɛ kã de ke e ma nyɛ maa gbe Goliat. Matsɛ Saul nu David sane ɔ he, kɛkɛ nɛ e tsɔ ke a ya tsɛ lɛ kɛ ba.1 Samuel 17:23-31.

David kɛ kã de matsɛ ɔ ke: “Nɔ ko nɔ ko kó ye tsui ngɛ Filisti no nɛ ɔ he.” Ngɛ anɔkuale mi ɔ, Goliat he gbeye pue matsɛ Saul kɛ e tabo ɔ tsuo nɔ nɛ a tsui po wawɛɛ. Eko ɔ, a ngɔ a he kɛ to  oblai nɛ ɔ he nɛ a na kaa a pee tsɔwitsɔwi ngɛ e hɛ mi. A susu kaa oblai nɛ mia kɛ ta hwumi ní ngua nɛ ɔmɛ ɔ maa gbe mɛ ngɛ hɛngmɛfia kake pɛ mi. Se David lɛɛ e susu we ja. David susu sane ɔ he ngɛ blɔ kpa ko nɔ kulaa. Lɔ ɔ he ɔ, e bi konɛ a ha lɛ he blɔ nɛ e kɛ Goliat nɛ e ya kpe.1 Samuel 17:32.

Se Saul de David ke: “O be Filisti no nɛ ɔ nyɛe, ejakaa niheyo kɛkɛ ji mo; lɛɛ ta hwulɔ ji lɛ kɛ je e nihe mi.” Se, anɛ David ji niheyo kɛkɛ lo? Dɛbi. Sane ɔ ji, e wɛ nɛ e maa ya ta, nɛ eko ɔ ke o hyɛ lɛ ɔ, o maa na kaa niheyo kɛkɛ ji lɛ. Eko ɔ, e piɛ bɔɔ nɛ David maa ye jeha nyingmi enyɔ, se a le lɛ kaa e ji ta hwulɔ ko nɛ e ngɛ kã.1 Samuel 16:18; 17:33.

David de Saul nɔ́ nɛ e pee jata kɛ osisiblisi nɛ a ba tua e to ɔmɛ ɔ nɛ e kɛ ma nɔ mi kaa e yi gbeye. Anɛ David ngɛ fĩae lo? Dɛbi. David le kaa pi lɛ nitsɛ e he wami nya nɛ e ye jamɛ a kunimi ɔmɛ. Lɔ ɔ he ɔ, e de ke: ‘Yehowa nɛ́ je mi kɛ je jatahi kɛ osisiblisihi a dɛ mi ɔ ma je mi kɛ je Filisti no nɛ ɔ dɛ mi.’ Saul bua jɔ nɔ́ nɛ David de ɔ he nɛ e de lɛ ke: ‘Yaa, Yehowa maa piɛ o he.’1 Samuel 17:37.

Anɛ o suɔ nɛ o ná hemi kɛ yemi kaa David lo? Mo kadi kaa nɔ́ ko lɛ e ye bua David nɛ e ha nɛ e hemi kɛ yemi mi wa. Nile kɛ níhi a si kpami nɛ e ngɛ ɔ lɛ ye bua lɛ nɛ e ná Mawu mi hemi kɛ yemi. E le kaa Yehowa suɔ e we bi, e poɔ a he piɛ, nɛ e yeɔ e si womihi tsuo a nɔ. Ke wa suɔ nɛ wa ná hemi kɛ yemi kaa jã a, lɛɛ e sa nɛ waa ya nɔ nɛ waa kase Mawu he ní ngɛ Baiblo ɔ mi. Nɛ ke waa kɛ níhi nɛ wa kase ɔ tsu ní ɔ, e ma ha nɛ wa hemi kɛ yemi mi maa wa.Hebri Bi 11:1.

‘YEHOWA MA JE MO NGƆ WO YE DƐ MI’

Sisije ɔ, Saul kɛ e ta hwumi ní ɔmɛ kpla David. Ta hwumi ní nɛ ɔmɛ ngɛ kaa Goliat nɔ́ ɔ. A kɛ akɔblee lɛ pee mɛ, nɛ e mi jiɔ hulɔ. Benɛ David kpla ta hwumi ní ngua nɛ ɔmɛ nɛ e ka nyɛɛmi ɔ, e nyɛ we. Akɛnɛ Matsɛ Saul ka pe Israel bi ɔmɛ tsuo he je ɔ, e ta hwumi ní ɔmɛ kle tsɔ ha David. Jehanɛ hu a tsɔse we David kaa ta bulɔ, lɔ ɔ he ɔ, e kpla we jamɛ a ní ɔmɛ eko hyɛ. (1 Samuel 9:2) Enɛ ɔ he ɔ, e je ta hwumi ní ɔmɛ pue si nɛ e wo tade nɛ e pɔɔ womi ke e ngɛ to ɔmɛ hyɛe ngɛ nga a nɔ ɔ ejakaa lɔ ɔ da lɛ.1 Samuel 17:38-40.

David hɛɛ tso nɛ e kɛ kpakaa to ɔmɛ ɔ ngɛ e dɛ. E kpla e to hyɛlɔ kotoku ɔ nɛ e hɛɛ e we amlami ɔ hulɔ. Eko ɔ, e maa pee kaa nɔ́ nɛ amlami kɛkɛ nɛ e hɛɛ ɔ be nɔ́ ko tsue, se e ji ta hwumi dade nɛ yeɔ awi wawɛɛ. Amlami yeɔ bua to hyɛli wawɛɛ. Ke nɔ ko suɔ nɛ e kɛ amlami nɛ tsu ní ɔ, e kɛ tɛ maa wo mi nɛ e maa nu fa enyɔ ɔmɛ, nɛ e kɛ e he wami tsuo maa fɔ e nine kɛ bɔle e yi, kɛkɛ e ngmɛɛ fa kake he, kɛkɛ tɛ ɔ je mi kɛ fo kɛ ya he nɛ o suɔ nɛ e ya a. Ta hwumi nɔ́ nɛ ɔ tsuɔ ní saminya. Enɛ ɔ he ɔ, ta buli fuu kɛ amlami tsuɔ ní ngɛ ta mi.

Benɛ David dla e he ta a, e ho konɛ e kɛ he nyɛlɔ ɔ ya kpe. Benɛ e su dɔgba a mi he nɛ pa a mi nyu ɔ gbli ngɛ ɔ, e kukuɔ dongo tɛ enuɔ. Kɛkɛ nɛ e kɛ fo ho ta gbami he ɔ ya!

Benɛ Goliat na David ɔ, mɛni lɛ e susu? Baiblo ɔ de ke, ‘E bui lɛ fɛɛ, ejakaa niheyo tsutsuutsu papaapa nɛ he ngɛ fɛu kɛkɛ ji lɛ.’ Goliat bi David kɛ ngmlaa ke: “Anɛ gbe ji mi nɛ o ma ye ngɔ kɛ tso ɔ?” Goliat na to kpaka mi tso ɔ ngɛ David dɛ, se e tui he hɛ kaa e hɛɛ amlami hulɔ. Goliat kã Filisti mawu ɔmɛ kita kɛ gbiɛ David nɛ e de lɛ ke, ke e gbe lɛ ta a, e maa ngɔ e he lo ɔ ngɔ ha lohwe pɛlitsɛmɛ kɛ pu mi lohwehi.1 Samuel 17:41-44.

Kɛ ba si mwɔnɛ ɔ, heto nɛ David ha a tsɔɔ kaa e hemi kɛ yemi mi wa saminya. Moo lɛɛ mo susu he nɛ o hyɛ benɛ niheyo wayo nɛ ɔ ngɛ Goliat dee ke: ‘Moo lɛɛ o kɛ klaate, akplɔ, kɛ kɛ̃ɛ̃ ma ye ngɔ; se imi lɛɛ i ma ngɛ Yehowa Tabohiatsɛ, Israel tabo ɔmɛ a Mawu ɔ nɛ o ngɛ lɛ ahlua bɔe ɔ biɛ mi.’ David le kaa he wami nɛ adesa ko ngɛ, kɛ ta hwumi ní nguahi nɛ e ma kpla a he hia we tsɔ. Goliat tsɔɔ kaa e bui Yehowa Mawu fɛɛ. Nɛ Yehowa hu tsɔɔ lɛ kaa e ngɛ he wami. Kaa bɔ nɛ David de ɔ, ‘Yehowa nɔ́ ji ta a nɛ.’1 Samuel 17:45-47.

David na bɔ nɛ Goliat je oblai ha, kɛ ta hwumi níhi nɛ e kpla a hulɔ. Se David ha we nɛ lɔ ɔ nɛ wo e he gbeye. E pee we e ni kaa bɔ nɛ Saul kɛ e ta buli ɔmɛ pee ɔ. David kɛ e he tui Goliat he. Mohu ɔ, e ngɔ Goliat kɛ to Yehowa he. Goliat kami ji nine mi blimi nyɔngma kɛ etɛ, e ka pe nɔ  tsuaa nɔ ngɛ lejɛ ɔ. Se ke a ngɔ lɛ kɛ to je mluku ɔ tsuo Nɔ Yelɔ ɔ he ɔ, kɛ e klemi maa hi kɛɛ? Ngɛ anɔkuale mi ɔ, kaa bɔ nɛ adesahi tsuo ngɛ ngɛ Yehowa hɛ mi ɔ, e klemi sui tatu po. Nɛ Yehowa pee klaalo kaa e ma kpata e hɛ mi!

David sa fo konɛ e kɛ e he nyɛlɔ ɔ nɛ ya kpe. Benɛ e yaa, e ngɔ e nine kɛ wo kotoku nɛ e kpla a mi, nɛ e je tɛ kake. E ngɔ tɛ ɔ kɛ wo amlami ɔ mi nɛ e fɔ e nine kɛ bɔle e yi. Goliat bɔni nyɛɛmi kɛ yaa David ngɔ, eko ɔ, nɔ nɛ hɛɛ e tsɛ̃i ɔ ngɛ e hɛmi haa. Bɔ nɛ Goliat ka ha he je ɔ, nɔ nɛ hɛɛ e tsɛ̃i ɔ be nyɛe ma wo tsɛ̃i ɔ nɔ konɛ e kɛ po Goliat yi he piɛ. Se David hu to kaa e maa fɔ tɛ ɔ kɛ ya ná Goliat yi.1 Samuel 17:41.

David yɔse kaa ke a ngɔ nɔ ko nɛ e je oblai kɛ to Yehowa Mawu he ɔ, jamɛ a oblai ɔ ngɛ kaa tatu kɛkɛ

Kɛkɛ nɛ David fɔ tɛ ɔ. Hyɛ bɔ nɛ lejɛ ɔ maa jɔ dii ha benɛ a ngɛ hyɛe kaa mɛni maa ya nɔ ɔ. Atsinyɛ jemi ko be he kaa, Yehowa fĩ David se bɔ nɛ pee nɛ tɛ kake kɛkɛ nɛ e maa fɔ ɔ nɛ gbe Goliat. Tɛ ɔ ya ná Goliat hɛ nya, nɛ e sɛ lo ɔ mi. Kɛkɛ nɛ oblai nɛ ɔ nɔ si, nɛ ngɔ e hɛ mi ya bu zugba! Eko ɔ, e tsɛ̃i hɛɛlɔ ɔ tsui po nɛ e tu fo. David hɛ lɛ kɛ su he nɛ Goliat nɔ si ngɛ ɔ, nɛ e ngɔ Goliat nitsɛ klaate kɛ po e yi.1 Samuel 17:48-51.

Jehanɛ ɔ lɛɛ, Saul kɛ e ta buli ɔmɛ ba ná kã. Nɛ a hwɔ lele kɛ nyɛɛ Filisti bi ɔmɛ a se. Kaa bɔ nɛ David de Goliat ɔ, jã pɛpɛɛpɛ lɛ e ba mi. David de lɛ ke: ‘Yehowa ma je nyɛ kɛ wo wa dɛ.’1 Samuel 17:47, 52, 53.

Mwɔnɛ ɔ, Mawu sɔmɔli kɛ a he wui ta hwumi mi. Jamɛ a be ɔ be. (Mateo 26:52) Se kɛ̃ ɔ, e he hia nɛ waa kase David hemi kɛ yemi ɔ. Kaa bɔ nɛ David pee ɔ, e sa nɛ wɔ hu waa na Yehowa kaa e ji nɔ ko nɛ e ngɛ nitsɛ, nɛ wa sɔmɔ lɛ pɛ kɛ tsɔɔ kaa wa buɔ lɛ. Be komɛ ngɛ nɛ eko ɔ, wa ma susu kaa wa be nyɛe maa da haomihi nɛ waa kɛ kpeeɔ ngɛ wa si himi mi ɔ a nya. Se, ke wa ngɔ jamɛ a haomi ɔmɛ kɛ to he wami nɛ Yehowa ngɛ ɔ he ɔ, haomi ɔmɛ pi nɔ́ ko saasaa. Ke wa ngɔ Yehowa kɛ pee wa Mawu nɛ wa ngɔ wa hɛ kɛ fɔ e nɔ kaa bɔ nɛ David pee ɔ, haomi loo nyagba ko be nɛ ma nyɛ maa wo wa he gbeye. Yehowa ngɛ he wami nɛ e ma nyɛ kɛ tsu nɔ́ tsuaa nɔ́!