Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  No. 4 2016

 BAIBLO Ɔ TSAKEƆ NIHI A SI HIMI

Níhi Gbaa Ye Nya, Nɛ I Yeɔ Awi

Níhi Gbaa Ye Nya, Nɛ I Yeɔ Awi
  • JEHA NƐ A FƆ LƐ: 1974

  • HE NƐ E JE: MEXICO

  • BƆ NƐ E NGƐ HA BE KO NƐ BE: NIHEYO NƐ YEƆ AWI, NƐ E SUƆ KUNƆ

BƆ NƐ I NGƐ HA BE KO NƐ BE:

A fɔ mi ngɛ Ciudad Mante. E ji ma wayo nɛ e mi ngɛ fɛu saminya ngɛ Tamaulipas ma ngua a mi ngɛ Mexico. Ma bi ɔmɛ tsuo a mi mi jɔ nɛ a haa nɔ nɔ́ faa. Se aywilɛho sane ji kaa, awi yemi pɔ he wawɛɛ ngɛ lejɛ ɔ, nɛ e ha nɛ ma a mi ngɛ gbeye.

A fɔ wɔ nyumuhi sɔuu eywiɛ, nɛ imi ji nɔ nɛ to nɔ enyɔne. Ye fɔli ha nɛ a baptisi mi ngɛ Katoliki Jami ɔ mi, nɛ pee se ɔ, i ya piɛɛ nihi nɛ a la a haa sɔlemi ɔ a he. I suɔ nɛ maa pee nɔ́ nɛ maa sa Mawu hɛ mi be tsuaa be, ejakaa i yeɔ gbeye kaa ke i pee we jã a e maa kojo mi nɛ e maa sã mi ngɛ hɛl la mi kɛ ya neneene.

Benɛ i ye jeha enuɔ ɔ, ye papaa je wa he. Enɛ ɔ ha nɛ i ye aywilɛho wawɛɛ nɛ i hao. I nui sisi nɔ he je nɛ e sa kaa e si wɔ, ejakaa wa suɔ e sane wawɛɛ. Enɛ ɔ ha nɛ ye yayo kɛ be babauu tsuɔ ní konɛ e nyɛ nɛ e hyɛ wa nɔ.

Akɛnɛ wa yayo be wa he deka tsɔ he je ɔ, i poɔ sukuu mi nɛ i kɛ jokuɛwi kpahi nɛ a wa pe mi ya fiɛɔ. A tsɔɔ mi nɔ jɛmi, sigaleti numi, jumi kɛ kunɔ nɔmi. Akɛnɛ i sume nɛ nihi yeɔ ye nɔ he je ɔ, i ya kase kɔ fiami, atlibo fiami, kɛ bɔ nɛ i kɛ klaate kɛ tu maa nɔ kunɔ. I ngɔ ye he kɛ wo basabasa peemi mi wawɛɛ. Be komɛ i kɛ tu nɔɔ kunɔ, nɛ benɛ wa ke wa gbeɔ nya a, i plaa kɛ ye he muɔ, kɛkɛ a je ye he ngɛ blɔ he konɛ ma gbo. Ke ye yayo ba wo mi kɛ ye he muɔ jã a, e hao ɔ wawɛɛ, kɛkɛ e kɛ mi ho hiɔ tsami he ya.

Benɛ i ye jeha 16 a, ye huɛ ko nɛ a tsɛɛ lɛ Jorge nɛ i kɛ lɛ pɔɔ nyɛɛmi ngɛ wa jokuɛwi a si ɔ ba slaa wɔ. E de wɔ ke e ji Yehowa Odasefo no, nɛ e hɛɛ sɛ gbi ko nɛ he hia kɛ ha wɔ. E da Baiblo ɔ nɔ kɛ tu e hemi kɛ yemi ɔ he munyu kɛ tsɔɔ wɔ. Ye bua jɔ kaa i kase Mawu biɛ ɔ kɛ e yi mi tomihi a he ní, ejakaa i kane we jamɛ a munyu ɔ hyɛ. Jorge de wɔ ke e suɔ nɛ e kɛ wɔ maa kase Baiblo ɔ, nɛ wa kplɛɛ nɔ.

BƆ NƐ BAIBLO Ɔ TSAKE YE SI HIMI HA:

Benɛ i kase hɛl la he ní, nɛ i na kaa pi Baiblo tsɔɔmi ɔ, ye tsui nɔ ye mi wawɛɛ. (La 146:4; Fiɛlɔ 9:5) Jehanɛ lɛɛ ke i nu Mawu biɛ ɔ, i yi gbeye hu.  Mo hu ɔ, i ba le kaa e ji Tsɛ nɛ e ngɛ suɔmi nɛ e susuɔ e bimɛ a he.

Benɛ i ngɛ Baiblo ɔ kasee ɔ, i ba na kaa e he hia nɛ ma pee tsakemihi ngɛ ye si himi mi. E sa nɛ ma ba ye he si, nɛ ma kpa awi yemi. Ga womi nɛ ngɛ 1 Korinto Bi 15:33 ɔ ye bua mi wawɛɛ. Jamɛ a ngmami ɔ de ke: “Huɛ yaya bɔmi puɛɔ je mi bami kpakpa.” I yɔse kaa loko ma nyɛ ma pee tsakemi ngɛ ye si himi mi ɔ, ja i kɛ nihi nɛ a jemi bami puɛ ɔ kpa bɔmi. Enɛ ɔ he ɔ, i kɛ nihi nɛ i kɛ mɛ bɔ sa a kpa bɔmi, nɛ i kɛ nyɛmimɛ ngɛ anɔkuale Kristofohi a we asafo mi ɔ bɔni bɔmi. Nimli nɛ ɔmɛ kɛ Baiblo sisi tomi mlaahi lɛ hlaa sanehi a nya se pi kɛ kɔ loo basabasa peemi.

Ngmami kpa ko hu nɛ ye bua mi ji Roma Bi 12:17-19. Ngmami ɔ de ke: “Nyɛ ko pee nɔ ko yayami kɛ to yayami nane mi. . . . Ke e maa hi ɔ, nyɛɛ bɔ mɔde nɛ nyɛɛ kɛ nɔ tsuaa nɔ nɛ hi si ngɛ he jɔmi mi. Ye huɛmɛ, nyɛ ko ye nyɛ nitsɛmɛ nyɛ he lue, . . . Ejakaa ngmami ɔ deɔ ke: ‘“Ye nɔ ji lue yemi; Imi ma pee kɛ to nane mi.” Nyɔmtsɛ ɔ lɛ de.’” I ba na kaa Yehowa nitsɛ maa po awi yemi se ngɛ be nɛ sa mi. Bɔɔbɔɔbɔɔ, i ba kpa awi yemi.

Gbɔkuɛ ko benɛ i yaa we mi ɔ, nɔ́ ko ya nɔ ngɛ blɔ ɔ nɔ nɛ ye hɛ be nɔ jee gblegbleegble. Nihewi komɛ nɛ be ko nɛ be ɔ, i kɛ mɛ yi kulaa ba tua mi. A hɛ mi nyɛɛlɔ ɔ fia ye se mi kɔ nɛ e kpa ngmlaa kɛ de ke, “Ke nyumu ji mo ɔ, moo fia mi eko!” Oya nɔuu nɛ i sɔle kpiti ngɛ ye mi kɛ de Yehowa ke e ye bua mi nɛ ma nyɛ ma da nya. Jinɛ i suɔ nɛ ma fia lɛ eko, se i bɔ mɔde nɛ i ye ye he nɔ nɛ i je lejɛ ɔ. E nɔ je na a i kɛ kuu ɔ nya da lɔ ɔ kpe. Ye muklii fu wawɛɛ nɛ e pee mi kaa ma pee lɛ eko kɛ to nane mi, se i sɔle ngɛ ye yi mi kɛ bi Yehowa yemi kɛ buami. E pee mi nyakpɛ kaa niheyo ɔ hɛ kɛ su ye he nɛ e de mi ke: “I ye pɔpu, kɛ ke mi. Anɔkuale sane ji kaa, i suɔ nɛ ma kase Baiblo ɔ, nɛ ma pee kaa mo.” Ye bua jɔ wawɛɛ kaa i nyɛ nɛ i ye ye he nɔ! Enɛ ɔ ha nɛ i kɛ lɛ bɔni Baiblo ɔ kasemi.

Aywilɛho sane ji kaa, ye weku li ɔmɛ kpa Baiblo ɔ kasemi. Se imi lɛɛ i fia ye pɛɛ si kaa i be hae nɛ nɔ́ ko nɛ jɔ ye kɔni mi, lɔ ɔ he ɔ, i ya nɔ nɛ i kase Baiblo ɔ. I le kaa ke i ya nɔ nɛ i kɛ Mawu we bi bɔ ɔ, ye bua maa jɔ, nɛ ma ná weku ehe. I ya nɔ nɛ i pee tsakemihi ngɛ ye si himi mi nɛ ngɛ jeha 1991 mi ɔ, a baptisi mi nɛ i ba pee Yehowa Odasefo no.

BƆNƐ E YE BUA MI HA:

Be ko nɛ be ɔ, níhi gbaa ye nya wawɛɛ, i suɔ nɛ ma ye nihi a nɔ, nɛ i yeɔ awi hulɔ. Se Mawu Munyu ɔ tsake ye si himi kulaa. Amlɔ nɛ ɔ, i fiɛɛɔ tue mi jɔmi he munyu nɛ ngɛ Baiblo ɔ mi ɔ kɛ tsɔɔ nɔ tsuaa nɔ nɛ suɔ nɛ e bu tue. Jeha 23 ji nɛ ɔ nɛ i kɛ ye be tsuo ngɛ sane kpakpa nɛ ɔ fiɛɛe.

I kɛ ye he ha nɛ i ya tsu ní bɔɔ ngɛ Yehowa Odasefohi a ní tsumi kɔni nɛ e ngɛ Mexico ɔ. Benɛ i ngɛ ní tsue ngɛ lejɛ ɔ, i kɛ yiheyo ko nɛ a tsɛɛ lɛ ke Claudia kpe. E ji Kristofo no nɛ bɔɔ mɔde wawɛɛ. Wa sɛ gba si himi mi ngɛ jeha 1999 ɔ mi. I naa Yehowa si kaa e ha mi he piɛɛlɔ kpakpa!

Wa ya sɔmɔ ngɛ asafo ko nɛ a tuɔ Mexico Mumuihi a Gbi ngɛ mi, nɛ wa ye kɛ bua mɛ nɛ a kase Yehowa he ní fuu. Pee se ɔ, a fɔ wɔ nine kɛ ho Belize ya konɛ waa kɛ nihi nɛ a ngɛ lejɛ ɔ nɛ ya kase Baiblo ɔ. E ngɛ mi kaa wa pee wa si himi kpokploo mohu lɛɛ, se nɔ́ ko nɔ́ ko hia we wɔ. Wa ngɛ bua jɔmi be fɛɛ be. Nɔ́ kpa ko be nɛ e ma nyɛ ma ha wɔ bua jɔmi kaa kikɛ ɔ.

Pee se ɔ, ye mami kpale bɔni Baiblo ɔ kasemi ekohu, nɛ a baptisi lɛ. Jehanɛ hu, ye nyɛminyumu nɔkɔtɔma kɛ e yo kɛ a bimɛ ba pee Yehowa Odasefohi. Ye huɛmɛ nɛ i kɛ mɛ kase Baiblo ɔ be ko nɛ be ɔ hu ba ngɛ Yehowa sɔmɔe.

Aywilɛho sane ji kaa, ye weku li komɛ a wami je a dɛ, ejakaa a kpa we ní yayahi peemi. E hi wawɛɛ kaa i tsake, ke pi jã a jinɛ eko ɔ, imi hu i gbo. I naa Yehowa si wawɛɛ kaa e hɛ lɛ kɛ su ye he, nɛ i ba piɛɛ e sɔmɔli a he. Yehowa sɔmɔli ná ye he tsui, nɛ a ye bua mi nɛ i nyɛ nɛ i kɛ Baiblo sisi tomi mlaahi tsu ní ngɛ ye si himi mi.