Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  No. 3 2016

Anɛ O Le Lo?

Anɛ O Le Lo?

Mɛni he je nɛ bɔ nɛ Yesu pee kpititsɛmɛ ha a ngɛ slɔɔto ɔ?

Blema a, Yuda bi ɔmɛ yeɔ kpiti hiɔ gbeye wawɛɛ. Hiɔ yaya nɛ ɔ puɛɔ nɔmlɔ tso ɔ fa komɛ loo he womi ɔ kulaa. Hiɔ nɛ ɔ be tsaba. Ke hiɔ nɛ ɔ pee nɔ ko ɔ, a haa nɛ e ya hii he ko banee, nɛ ke e ma he nɛ nihi ngɛ ɔ, e sa nɛ e ha nɛ a le kaa e he tsɔ we.3 Mose 13:45, 46.

Yuda jami hɛ mi nyɛɛli ɔmɛ wo mlaahi nɛ a mi wa pe mlaahi nɛ Mawu wo ngɛ hiɔ nɛ ɔ he ɔ. Enɛ ɔ ha nɛ si himi he wa ha nihi nɛ hiɔ nɛ ɔ ngɛ a he ɔ. Kaa nɔ hyɛmi nɔ́ ɔ, mlaa komɛ nɛ Yuda osɔfo ɔmɛ wo ɔ eko ji kaa, e sɛ nɛ nɔ ko nɛ su kpititsɛ he maa pee mita 2. Se ke kɔɔhiɔ ngɛ fiae ɔ, e sa nɛ kpititsɛ ɔ nɛ hɛ kɛ ya se maa pee mita 45. Ní leli komɛ nɛ a kase mlaa nɛ ɔmɛ saminya a tsɔɔ kaa ke Baiblo ɔ de ke e sa nɛ kpititsɛ nɛ hi “ma a sito he ɔ se” ɔ, nɔ́ nɛ e ngɛ hlae nɛ e tsɔɔ ji kaa e sɛ nɛ kpititsɛ nɛ hi ma nɛ a fia gbogbo kɛ wo he mi. Enɛ ɔ he ɔ, be ko nɛ Yuda osɔfo ko na kpititsɛ ko ngɛ ma a mi ɔ, e fiaa lɛ tɛ nɛ e de ke: “Jee hiɛ ɔ kɛ ho nɛ o ko ba wo nihi a he mu.”

Se Yesu pee we kpititsɛmɛ jã. E fiɛ mɛ tɛ nɛ e fiee we mɛ hulɔ, mohu ɔ, e pɛtɛ a he nɛ e tsa mɛ.Mateo 8:3.

Mɛni nɔ Yuda jami hɛ mi nyɛɛli ɔmɛ da kɛ po gba mi?

Gba mi pomi he womi ngɛ jeha 71/72 mi

Ngɛ kaseli ɔmɛ a be ɔ mi ɔ, jami hɛ mi nyɛɛli ɔmɛ jeɔ atsinyɛ wawɛɛ ngɛ gba mi pomi he. Enɛ ɔ he ɔ, be ko ɔ, Farisi bi ɔmɛ bi Yesu sane ko konɛ a kɛ ka lɛ. A bi lɛ ke: “Anɛ wa mlaa a ngmɛɛ blɔ kaa nyumu fieɔ e yo ngɛ nɔ́ tsuaa nɔ́ ko he lo?”Mateo 19:3.

Mose Mlaa a ngmɛ blɔ kaa ke nyumu ko na ‘nɔ́ yaya ko ngɛ e yo he’ ɔ, e ma nyɛ maa po gba a mi. (5 Mose 24:1) Ngɛ Yesu be ɔ mi ɔ, a ngɛ Rabi sukuu enyɔ nɛ tsɔɔ nihi mlaa a. Sukuu enyɔ nɛ ɔmɛ tsɔɔ mlaa a sisi ekpaekpa. Shammai sukuu ɔ tsɔɔ kaa, nɔ ko ma nyɛ maa po gba mi ke nɔ kake ya bɔ “ajuama.” Hillel sukuu ɔ hu tsɔɔ kaa ke nyumu ɔ na tɔmi nyafii po ngɛ e yo ɔ he ɔ, e ma nyɛ maa ngmɛɛ e he. Kaa nɔ hyɛmi nɔ́ ɔ, ke yo ɔ hoo ní nɛ e ngɔɛ aloo nyumu ɔ na yo ko nɛ e he ngɛ fɛu pe e yo ɔ, e ma nyɛ maa ngmɛɛ e yo ɔ he nɛ e ya ngɔ jamɛ a yo ɔ.

Se kɛ Yesu ha Farisi bi ɔmɛ a sane ɔ heto ha kɛɛ? E de ke: “Nɔ tsuaa nɔ nɛ maa ngmɛɛ e yo he, nɛ pi kaa yo ɔ ya bɔ ajuama, nɛ e ma ya ngɔ yo kpa a, e puɛ gba.”Mateo 19:6, 9.