Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  No. 2 2017

Se Nami Ngɛ Nɔ́ Hami Mi

Se Nami Ngɛ Nɔ́ Hami Mi

LIGBI ko ɔ, yiheyo ko nɛ a tsɛɛ lɛ ke Alexandra hi bɔɔsu mi kɛ je South Amerika ma ko mi kɛ ya South Amerika ma kpa ko mi. Benɛ a su ma enyɔ ɔmɛ a huzu ɔ nɔ nɛ e ngɛ mlɛe konɛ a ngmɛ mɛ blɔ nɛ a tsa a blɔ a hiami ɔ nɔ ɔ, e nu munyu nɛ nyɛɛ se nɛ ɔ: “Bɔɔsu ɔ ma nyɛ maa je, se China no ɔ lɛɛ e maa tlɔ hiɛ ɔ.” Oya nɔuu nɛ e kple si konɛ e ya hyɛ nɔ́ nɛ ngɛ nɔ yae ɔ. Kɛkɛ nɛ e na China no ko nɛ nui Spania gbi ɔ saminya nɛ e ngɛ mɔde bɔe kaa e maa tsɔɔ bulɔ ɔ nɛ ngɛ lejɛ ɔ níhi a nya ngɛ Spania gbi mi. Akɛnɛ Alexandra yaa Yehowa Odasefohi asafo mi kpe nɛ a peeɔ ngɛ China gbi mi he je ɔ, e de ke e maa suɔ nɛ e ye bua kɛ tsɔɔ China gbi ɔ sisi kɛ ba Spania gbi mi.

China no ɔ tsɔɔ kaa juli ba ju womihi nɛ tsɔɔ kaa mlaa ngmɛ lɛ blɔ kaa e hi ma a mi ɔ, kɛ e sika tsuo. Sisije ɔ, bulɔ ɔ he we nɔ́ nɛ China no ɔ ngɛ de ɔ yi, nɛ e susu po kaa Alexandra ngɔ nyumu ɔ kɛ yaa nɛ e ya jua lɛ kaa nyɔguɛ. Nyagbenyagbe ɔ, bulɔ ɔ ba kplɛɛ nɔ́ nɛ a de ɔ nɔ, se akɛnɛ China no ɔ blɔ hiami womi ɔmɛ sui he je ɔ, a bɔ lɛ hiɔ. E be sika hulɔ, enɛ ɔ he ɔ, Alexandra pa lɛ sika dɔla 20. Alexandra tsɔɔ kaa e hyɛ we blɔ kaa e ma ná nɔ́ nɛ e pee ɔ he se. E bua jɔ kaa e ye bua, ejakaa jã nɛ e sa kaa e pee. Alexandra ha China no ɔ Baiblo kasemi womi komɛ nɛ e wo lɛ he wami kaa e kɛ Yehowa Odasefohi nɛ kase Baiblo ɔ.

Wa bua jɔɔ ke wa nu nɛ a je mi mi jɔmi kpo kɛ tsɔɔ nibwɔhi. Ngɛ anɔkuale mi ɔ, nihi nɛ ngɛ jami ko mi kɛ nihi nɛ a be jami ko mi ɔ jeɔ su nɛ ɔ kpo. Anɛ ke mo ɔ, o maa je o tsui mi kɛ ye bua jã lo? Sane bimi nɛ ɔ he hia wawɛɛ ejakaa Yesu de ke: ‘Bua jɔmi babauu ngɛ nɔ́ hami mi pe nɔ́ ngɔmi.’ (Bɔfo Ɔmɛ A Ní Tsumi 20:35) Níhi a mi hlali hu tsɔɔ kaa nɔ nɔ́ hami yeɔ bua nɔmlɔ tso ɔ. Ha nɛ waa hyɛ blɔhi a nɔ nɛ nɔ́ hami yeɔ bua nɔmlɔ tso ɔ ngɛ.

‘NƆ NƐ E HAA NƆ́ KƐ BUA JƆMI’

Níhi a si kpami tsɔɔ kaa nɔ́ hami kɛ bua jɔmi lɛ nyɛɛɔ. Bɔfo Paulo ngma ke, ‘Mawu suɔ nɔ nɛ e haa nɔ́ kɛ bua jɔmi.’ Benɛ Paulo ngma munyu nɛ ɔ, jamɛ a be ɔ, Kristofohi nɛ a jeɔ a tsui mi kɛ haa yemi kɛ buamihi kɛ yeɔ bua a nyɛmimɛ nɛ e fi mɛ ɔ a he munyu e ngɛ tue ɔ nɛ. (2 Korinto Bi 8:4; 9:7) Paulo tsɔɔ we kaa akɛnɛ a bua jɔ he je nɛ a ke nɔ́ ɔ. Ngɛ anɔkuale mi ɔ, a bua jɔ akɛnɛ a nyɛ nɛ a ke nɔ́ ɔ he je.

Níhi a mi hlami ko tsɔɔ kaa nɔ́ hami “haa nɛ juɛmi ɔ fa nɛ haa nɛ nɔmlɔ tso ɔ náa bua jɔmi, nɛ haa nɛ tue mi jɔmi hii nihi a kpɛti, nɛ haa nɛ nihi heɔ a sibi yeɔ ɔ tsuɔ ní saminya.” Níhi a mi hlami ko hu tsɔɔ kaa “ke o ke nɔ ko sika a, lɔ ɔ haa nɛ o naa bua jɔmi nitsɛ pe ke o kɛ he mo nitsɛ o he níhi.”

Anɛ o naa lɛ kaa si fɔfɔɛ mi nɛ o ngɛ he je ɔ o be nyɛe maa pee nɔ́ ko tsɔ kɛ ye bua nɔ ko lo? Anɔkuale sane ji kaa nɔ fɛɛ nɔ nɛ ‘haa nɔ́ kɛ bua jɔmi’ ɔ ma ná bua jɔmi. Nɔ́ nɛ hia ji kaa o maa je o tsui mi kɛ ha nɔ́ ɔ, se pi nɔ́ ɔ klemi loo nɔ́ ɔ he jua ji sane ɔ. Yehowa Odasefo no ko ngma munyu nɛ nyɛɛ se nɛ ɔ nɛ e kɛ sika bɔɔ piɛɛ he kɛ mane womi tɛtlɛɛ nɛ ɔ peeli ɔmɛ. E de ke: “Ngɛ  jehahi nɛ be nɛ ɔmɛ tsuo a mi ɔ, ke i ya Matsɛ Yemi Asa a nɔ ɔ, sika bɔɔ pɛ nɛ i kɛ haa yemi kɛ buami. Se Yehowa Mawu ye bua mi wawɛɛ pe nɔ́ nɛ i kɛ ha a. . . . I naa nyɛ si kaa nyɛ to blɔ nya nɛ e ye bua nɛ i nyɛ ngɔ nike ní nɛ ɔ kɛ ha—e ha nɛ ye tsui nɔ ye mi.”

Se tsa pi sika pɛ nɛ o ma nyɛ kɛ ma ha nɔ ko kaa nike ní. Blɔhi fuu ngɛ nɛ o ma nyɛ maa gu nɔ kɛ pee jã.

NƆ́ HAMI HI HA NƆMLƆ TSO Ɔ

Nɔ́ hami yeɔ bua wɔ nitsɛmɛ kɛ ni kpahi

Baiblo ɔ de ke: “Nɔ nɛ naa mɔbɔ ɔ, lɛ nitsɛ e he kpakpa lɛ e ngɛ pee. Se nɔ nɛ yi mi wa a, e ngɛ lɛ nitsɛ e he plaae.” (Abɛ 11:17) Nihi nɛ a mi mi jɔ ɔ haa nɔ nɔ́. A suɔ kaa a kɛ a be, a he wami, a nyɛmi kɛ níhi nɛ a ngɛ ɔ nɛ ye bua ni kpahi. Su nɛ ɔ yeɔ bua mɛ ngɛ blɔhi fuu a nɔ. Ke e hí kulaa a, e yeɔ bua a nɔmlɔ tso ɔ.

Níhi a mi hlami tsɔɔ kaa nihi nɛ jeɔ a tsui mi kɛ yeɔ bua ni kpahi ɔ pɔɛ yeyeeye peemi, nɛ a pɔɛ hiɔ numi. Oti ɔ ji, a náa nɔmlɔ tso mi he wami kpakpa. Nɔ́ hami haa nɛ hiɔ komɛ nɛ a tsami yee kaa multiple sclerosis (Hiɔ ko nɛ ha we nɛ juɛmi ɔ kɛ se mi wu ɔ nɛ tsu ní saminya) aloo HIV nya baa si. A tsɔɔ hu kaa nɔ́ hami yeɔ bua dã deli nɛ a suɔ kaa a ma kpa dã numi ɔ nɛ a nyɛɔ peeɔ jã nɛ a hɛwi tsɔ. Jehanɛ, e yeɔ bua mɛ nɛ a kpale we ya wo su yaya nɛ ɔ hu.

Nɔ́ he je nɛ e ngɛ jã ji kaa, a tsɔɔ kaa ke nɔ ko “susuɔ nihi a he, e haa nɔ nɔ́ nɛ e mi mi jɔ ɔ, e ha we nɛ nɔ ɔ nɛ ná juɛmi yaya.” Nɔ́ hami hu ma nyɛ ma ha nɛ nɔ ko be yeyeeye pee tsɔ, nɛ muɔ nɔ bemi hiɔ hu be e nya gbae tsɔ. Nihi nɛ a yihi loo a hunomɛ gbo nɛ a hao ɔ hu ke a yeɔ bua ni kpahi ɔ, e ha we nɛ a pee yeyeeye tsɔ.

E ngɛ heii kaa nɔ́ hami yeɔ bua nɔ wawɛɛ.

KE WA HAA NƆ NƆ́ Ɔ, NI KPAHI KASEƆ

Yesu wo e kaseli ɔmɛ he wami nɛ e de ke: ‘Nyɛɛ ya nɔ nɛ nyɛ ha, nɛ nihi ma ha nyɛ. A maa ngɔ nɔ́ nɛ a susu saminya, nɛ́ a nyɛ nɔ, nɛ a mimiɛ lɛ, nɛ e hyi kɛ be nɔ ɔ kɛ pue nyɛ tɛ nɔ. Ejakaa susumi nɔ́ nɛ nyɛɛ kɛ ma susu nɔ ha ni kpahi ɔ, lɔ nɔuu a kɛ ma susu ha nyɛ.’ (Luka 6:38) Ke o haa nɔ nɔ́ ɔ, behi fuu ɔ nihi jeɔ hɛsa kpo nɛ mɛ nitsɛmɛ po a kaseɔ bɔ nɛ a haa nɔ nɔ́ ha. Nɔ́ hami haa nɛ huɛ bɔmi kɛ kake peemi hiɔ nihi a kpɛti.

Nɔ́ hami haa nɛ huɛ bɔmi kɛ kake peemi hiɔ nihi a kpɛti

Níhi a mi hlali nɛ kaseɔ bɔ nɛ adesahi kɛ a he hiɔ si ha a tsɔɔ kaa “nihi nɛ a pɔɔ nɔ nɔ́ hami ɔ a ní peepee woɔ ni kpahi he wami konɛ mɛ hu a pee jã.” Ngɛ anɔkuale mi ɔ, “ke nihi kane kpakpa peemi nɛ sa kadimi he munyu ngɛ womihi a mi ɔ, e haa nɛ mɛ hu a haa nɔ nɔ́.” Níhi a mi hlami ko hu tsɔɔ kaa, “nɔ kake kpakpa peemi ma nyɛ ma ná nihi fuu a nɔ he wami. Nihi nɛ e li mɛ po, e ma nyɛ ma ná a nɔ he wami.” Ngɔɔ lɛ kaa o ngɛ kpɔ ko mi nɛ nɔ kake je mi mi jɔmi kpo kɛ tsɔɔ nɔ ko nɛ nɔ ɔ hu kase nɛ e pee nɔ kpa ko hu kpakpa nɛ e tsa nɔ jã ngɛ kpɔ ɔ mi. Anɛ o bua be jɔe lo? Niinɛ, ke nihi fuu jeɔ mi mi jɔmi kpo nɛ a haa nɔ nɔ́ ɔ, se nami nitsɛ jeɔ mi kɛ baa.

 Sane ko nɛ ya nɔ ngɛ Florida nɛ ngɛ U.S.A ɔ maa oti nɛ ɔ nɔ mi. Be ko ɔ, kɔɔhiɔ nɛ nya wa ko fia nɛ e puɛ ní ngɛ Florida. Benɛ oslaa nɛ ɔ ba a, Yehowa Odasefohi komɛ ngɔ a he kɛ ha konɛ a ya ye bua. A nine sui níhi nɛ a kɛ ma dla we ko nɛ kɔɔhiɔ ɔ puɛ lɛ ɔ nɔ mla, lɔ ɔ he ɔ, a mlɛ saii. Benɛ a ngɛ mlɛe ɔ, a na kaa piɛ nɛ a po kɛ wo we ko he ngɛ a kasa mi ɔ puɛ. Oya nɔuu nɛ a ya dla piɛ ɔ kɛ ha we tsɛ ɔ. Pee se ɔ, we tsɛ ɔ ngma womi kɛ mane Yehowa Odasefohi a ní tsumi yi ɔ nɛ e de ke, “Ye hɛ be kpakpa nɛ nyɛ pee mi nɛ ɔ nɔ jee kɔkɔɔkɔ. I kɛ nihi nɛ a mi mi jɔ kaa kikɛ kpi hyɛ.” E bua jɔ nɔ́ nɛ a pee ha lɛ ɔ he wawɛɛ, lɔ ɔ he ɔ, e ha yemi kɛ buami konɛ a kɛ ye bua ni kpahi. E kale nɔ́ nɛ a pee ha lɛ ɔ kaa, Odasefohi a ní tsumi nɛ se be.

KASE NƆ́ HAMI HE NƆ HYƐMI NƆ́ NƐ PE KULAA A

Níhi a mi hlami ko nɛ jemi si kpali pee tsɔɔ kaa “su ko ngɛ adesahi a mi nɛ haa nɛ a náa suɔmi kaa a maa ye bua ni kpahi. Jokuɛwi hu jeɔ mi mi jɔmi su nɛ ɔ kpo loko a kase ɔ munyu tumi.” Mɛni he je? Baiblo ɔ tsɔɔ kaa, a bɔ adesahi ‘ngɛ Mawu subai nɔ,’ nɛ tsɔɔ kaa, adesahi ngɛ suhi nɛ Mawu ngɛ ɔ eko.1 Mose 1:27.

Su kpakpahi nɛ wa Bɔlɔ, Yehowa Mawu ngɛ ɔ eko ji mi mi jɔmi. E ha wɔ wami kɛ níhi tsuo nɛ ma ha nɛ wa ná bua jɔmi. (Bɔfo Ɔmɛ A Ní Tsumi 14:17; 17:26-28) Ke wa kase Baiblo ɔ, e maa ye bua wɔ nɛ waa le wa hiɔwe Tsɛ ɔ kɛ yi mi tomi kpakpahi nɛ e ngɛ kɛ ha wɔ ɔ. Baiblo ɔ tsɔɔ hu kaa Mawu to blɔ nya konɛ wa ná bua jɔmi hwɔɔ se. * (1 Yohane 4:9, 10) Akɛnɛ Yehowa Mawu ji nɔ́ halɔ nɛ pee kulaa nɛ e bɔ mo ngɛ e subai nɔ he je ɔ, e be nyakpɛ kaa ke wa haa nɔ nɔ́ ɔ e tsɔɔ kaa wa ngɛ Mawu kasee. Mo nitsɛ o ma ná he se, nɛ Mawu bua maa jɔ o he.Hebri Bi 13:16.

Anɛ o kai Alexandra nɛ wa tu e he munyu kɛ sɛ hlami ɔ lo? Kɛ e sane ɔ ba nyagbe ha kɛɛ? Blɔ hiali ɔmɛ a kpɛti nɔ kake ngɛ bɔɔsu ɔ mi ɔ de lɛ ke e puɛ e sika. Se benɛ a ya su he nɛ a yaa a, nyumu ɔ nɛ Alexandra ye bua lɛ ɔ na e huɛmɛ nɛ a wo dɔla 20 nɛ ji hiɔ nɛ e ye Alexandra a. Jehanɛ hu, nyumu ɔ kɛ nɔ́ nɛ Alexandra de lɛ ɔ tsu ní nɛ e ya je Baiblo ɔ kasemi sisi. Nyɔhiɔ etɛ se ɔ, Alexandra kɛ nyumu nɛ ɔ kpe ekohu ngɛ Yehowa Odasefohi a kpokpa nɔ kpe ko nɛ a pee ngɛ Peru ngɛ China gbi mi ɔ sisi. Enɛ ɔ ha nɛ Alexandra bua jɔ wawɛɛ. Nyumu ɔ fɔ Alexandra kɛ nihi nɛ a piɛɛ e he ɔ nine kɛ ya ní yemi he ko nɛ a ya je a hɛja bɔɔ. E pee enɛ ɔ kɛ tsɔɔ bɔ nɛ e hɛ sa nɔ́ nɛ Alexandra pee ha lɛ be ko nɛ be ɔ.

Ke wa haa nɔ nɔ́ nɛ wa yeɔ bua ni kpahi ɔ, wa bua jɔɔ nitsɛ. Nɛ ke kɛ gu jã peemi nɔ o ye bua nihi nɛ a ba le Yehowa Mawu, nɔ nɛ ní kpakpahi tsuo jee e ngɔ ɔ, o ma ná bua jɔmi nitsɛnitsɛ! (Yakobo 1:17) Anɛ o ngɛ se nami nɛ ngɛ nɔ́ hami mi ɔ náe lo?

^ kk. 21 Ke o ngɛ hlae nɛ o le babauu ɔ, hyɛ womi nɛ Yehowa Odasefohi pee nɛ ji, Mɛni Baiblo ɔ Ma Nyɛ Maa Tsɔɔ Wɔ? O ma nyɛ maa gbla ngɛ www.jw.org/ada. Yaa BAIBLO KASEMI NÍHI > WOMIHI & WOMIYOHI.