Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  No. 2 2017

 MUNYUHI NƐ KƆƆ HƐ MI MUNYU Ɔ HE | ANƐ O BUA JƆ MAWU NIKE NÍ NƐ PE KULAA A HE LO?

Nike Ní Ko Nɛ Se Be

Nike Ní Ko Nɛ Se Be

MELE Ɔ nɛ a kɛ ngɛ Jordan hae ɔ ji pɛnsle nya hlɔmi nɔ́. Eko ɔ, o naa nike ní nɛ ɔ kaa nɔ́ ko nɛ e he jua wɛ tsɔ. Se Jordan bua jɔ nike ní nɛ ɔ he wawɛɛ. Jordan de ke: “Nyumu nɔkɔtɔma ko nɛ wa weku ɔ le lɛ nɛ a tsɛɛ lɛ ke Russell lɛ ke mi nɔ́ nɛ ɔ benɛ i ji jokuɛyo ɔ.” Benɛ Russell gbo se ɔ, Jordan ná le kaa Russell ye bua e nɛnɛ kɛ e fɔli ɔmɛ wawɛɛ benɛ a ya je si himi ko nɛ mi wa mi ɔ. Jordan de hu ke: “Amlɔ nɛ ɔ nɛ i ba le Russell he ní fuu ɔ, ye bua jɔ nike ní ɔ he wawɛɛ pe sa a.”

Jordan níhi a si kpami ɔ tsɔɔ kaa eko ɔ, ni komɛ maa na nike ní ko kaa e he hia we loo e he jua wɛ tsɔ. Se nɔ nɛ e bua jɔ jamɛ a nike ní ɔ he ɔ maa na lɛ kaa e se be. Baiblo ɔ tu nike ní ko nɛ e he jua wa pe kulaa he munyu ke: “Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e na neneene wami.”Yohane 3:16.

Nɔ nɛ e nine maa su nike ní nɛ ɔ nɔ ɔ ma nyɛ ma ná neneene wami! Anɛ nike ní kpa ko kɛ enɛ ɔ sɔ lo? E ngɛ mi kaa ni komɛ li bɔ nɛ nike ní nɛ ɔ he jua wa ha, se anɔkuale Kristofohi lɛɛ a naa lɛ kaa e “he jua wa saminya.” (La 49:8; 1 Petro 1:18, 19) Mɛni he je nɛ Mawu ngɔ e Biɔ wami kɛ ha je ɔ kaa nike ní ɔ?

Bɔfo Paulo tsɔɔ nɔ́ he jɛ nɛ Mawu pee jã. E de ke: “Nɔ kake lɛ pee yayami, nɛ yayami kɛ gbenɔ ba. Enɛ ɔ ha gbenɔ sã nimli tsuo.” (Roma Bi 5:12) Kekleekle nyumu nɛ ji Adam lɛ pee yayami. E je blɔ nɛ e gbo Mawu tue, nɛ lɔ ɔ ha nɛ a bu lɛ gbenɔ fɔ. Gbenɔ fɔ nɛ a bu Adam ɔ sã e ninahi tsuo.

“Yayami he hiɔwo ji gbenɔ; se Mawu nɔke nɔ́ ɔ ji neneene wami nɛ wa naa ngɛ wa Nyɔmtsɛ Yesu  Kristo mi.” (Roma Bi 6:23) Mawu tsɔ e Bi nɛ ji Yesu Kristo kɛ ba zugba a nɔ nɛ e kɛ e wami nɛ ye mluku ɔ ba sã afɔle konɛ e kɛ kpɔ adesahi kɛ je gbenɔ fɔ bumi ɔ sisi. Kɛ gu afɔle sami nɛ ɔ nɛ ji “kpɔmi nɔ́ ɔ” nɔ ɔ, nihi tsuo nɛ ma he ye ngɛ Yesu mi ɔ ma ná neneene wami.Roma Bi 3:24, NW.

Paulo de ngɛ jɔɔmihi tsuo nɛ Mawu to kaa e kɛ ma ha e sɔmɔli kɛ gu Yesu Kristo nɔ ɔ he ke: “Nyɛ ha waa na Mawu si ngɛ e nike ní nɛ nɔ ko be nyɛe maa kale ɔ he.” (2 Korinto Bi 9:15) Ngɛ anɔkuale mi ɔ, wa be nyɛe maa kale bɔ nɛ kpɔmi nɔ́ ɔ he jua wa haa tutuutu. Mawu ha adesahi dloomi nike ní fuu, se mɛni he je nɛ kpɔmi nɔ́ ɔ ji nike ní nɛ e he jua wa pe kulaa a? Mɛni blɔ nɔ nɛ e je ekpa kulaa ngɛ nike ní kpahi nɛ Mawu kɛ dloo wɔ ɔmɛ a he? * Nɛ mɛni e sa kaa o pee kɛ tsɔɔ kaa o bua jɔ nike ní ɔ he? Wa ngɛ mo he wami woe nɛ o kane hetohi nɛ Baiblo ɔ kɛ ha ngɛ sane bimi nɛ ɔmɛ a he ngɛ munyuhi nɛ nyɛɛ se ɔ mi.

^ kk. 8 Yesu je suɔmi mi nɛ e “ngɔ e wami ngɔ ha ngɛ wa he.” (1 Yohane 3:16) Akɛnɛ afɔle sami nɛ ɔ piɛɛ Mawu yi mi tomihi a he he je ɔ, Hwɔɔmi Mɔ nɛ ɔ tu Mawu he munyu kaa kpɔmi nɔ́ ɔ he Blɔ Nya Tolɔ.