Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  No. 2 2017

 MUNYUHI NƐ KƆƆ HƐ MI MUNYU Ɔ HE | ANƐ O BUA JƆ MAWU NIKE NÍ NƐ PE KULAA A HE LO?

Mawu Nike Ní Nɛ Pe Kulaa a—Mɛni He Je Nɛ E He Hia Wawɛɛ ɔ?

Mawu Nike Ní Nɛ Pe Kulaa a—Mɛni He Je Nɛ E He Hia Wawɛɛ ɔ?

Mɛni lɛ haa nɛ o bua jɔɔ nike ní ko he wawɛɛ? Eko ɔ, ngɛ níhi eywiɛ nɛ nyɛɛ se nɛ ɔmɛ a he je: (1) nɛ ke mo nɔ́ ɔ, (2) nɔ́ he je nɛ e ke mo nɔ́ ɔ, (3) bɔ nɛ nike ní ɔ he jua wa ha nɔ ɔ ha loko e kɛ ha mo, kɛ (4) bɔ nɛ o ná nike ní ɔ he se ha. Ke wa susu níhi eywiɛ nɛ ɔmɛ a he ɔ, e maa ye bua wɔ nɛ wa bua maa jɔ kpɔmi nɔ́ ɔ nɛ ji Mawu nike ní nɛ pe kulaa a he saminya.

MƐNƆ LƐ HA NIKE NÍ Ɔ?

Eko ɔ o bua jɔ nike ní ko he wawɛɛ ejakaa nɔ ko nɛ o buu lɛ aloo e ngɛ blɔ nya ngua ko lɛ ke mo nɔ́ ɔ. Nike ní komɛ hu ngɛ nɛ a he jua wɛ tsɔ, se wa bua jɔ a he saminya ejakaa wa weku no ko nɛ wa suɔ lɛ loo wa huɛ kpakpa ko lɛ ha wɔ. Ja nɛ e ba ngɛ Jordan kɛ Russell nɛ wa tu a he munyu kɛ sɛ hlami ɔ a blɔ fami. Kɛ sane nɛ ɔ kɔ nike ní nɛ ji kpɔmi nɔ́ ɔ he ha kɛɛ?

Kekleekle ɔ, Baiblo ɔ de ke, ‘Mawu tsɔ e Bi kake too ɔ kɛ ba je ɔ mi, konɛ kɛ gu e Bi ɔ nɔ ɔ, wa ná wami.’ (1 Yohane 4:9) Anɔkuale munyu nɛ ɔ haa nɛ wa bua jɔɔ nike ní ɔ he saminya. Nɔ ko be nɛ e nɔ kuɔ pe Mawu. La polɔ ɔ tu Mawu he munyu ke: “Mo nɛ o biɛ ji Yehowa a, mo pɛ lɛ o Nɔ Kuɔ Pe Kulaa ngɛ zugba a nɔ tsuo.” (La 83:18, NW) Nɔ ko nɔ ko be nɛ e nɔ kuɔ pe jã.

Enyɔne ɔ, Mawu ji “wa Tsɛ.” (Yesaya 63:16) Ngɛ mɛni blɔ nɔ? Lɛ ji nɔ nɛ ha wɔ wami. Jehanɛ hu, e hyɛɛ wa nɔ kaa bɔ nɛ tsɛ nɛ ngɛ suɔmi hyɛɛ e bimɛ a nɔ ɔ. Benɛ Mawu ngɛ e we bi nɛ a hi si blema a a he munyu tue ɔ, e de ke: “Israel, mo ji ye bi nɛ i suɔ saminya; mo ji bi nɛ i suɔ pe bimɛ ɔmɛ tsuo. . . . Ye hɛ ja a ngɛ o he, lɔ ɔ he ɔ, ma na mo mɔbɔ kɛ̃.” (Yeremia 31:20) Mwɔnɛ ɔ hu, Mawu susuɔ e sɔmɔli a he jã nɔuu. Lɛ nɛ e Bɔ wɔ, jehanɛ ɔ hu, e ji wa Tsɛ nɛ yeɔ anɔkuale kɛ wa Huɛ hulɔ. Ke nɔ ko kaa jã ke mo nɔ́ ko ɔ, anɛ o bua be nike ní ɔ he jɔe lo?

 MƐNI HE JE NƐ E KƐ NIKE NÍ Ɔ HA?

Ke nɔ ko je e tsui mi kɛ ke wɔ nɔ́ ko ɔ, wa bua jɔɔ nike ní ɔ he wawɛɛ pe nɛ e kɛ mi mi gbigblimi maa pee jã. Nɔ nɛ haa nɔ nɔ́ faa a hyɛ we blɔ kaa nihi maa ke lɛ nɔ́ kɛ to nane mi.

Mawu ngɔ e Bi ɔ kɛ ha ngɛ wa he ejakaa e suɔ wɔ. Baiblo ɔ de ke: “Blɔ nɔ nɛ Mawu gu kɛ je e suɔmi ɔ kpo kɛ tsɔɔ wɔ ji nɛ ɔ nɛ; e tsɔ e Bi kake too ɔ kɛ ba je ɔ mi.” Mɛni he je? “Konɛ kɛ gu e Bi ɔ nɔ ɔ, wa ná wami.” (1 Yohane 4:9) Anɛ e ji Mawu blɔ nya ní tsumi kaa doo ɔ, e pee jã lo? Dɛbi! ‘Kpɔmi nɔ́ ɔ nɛ Kristo Yesu ha’ a ji Mawu “dloomi” ɔ he odase.Roma Bi 3:24.

Mɛni he je nɛ Mawu nike ní nɛ ɔ ji “dloomi” ɔ? Baiblo ɔ de ke: “Suɔmi kpetekpleenyɛ nɛ Mawu je kpo ji nɛ ɔ nɛ, kaa be nɛ wa ji yayami peeli ɔ, jamɛ a be ɔ Kristo ba gbo ngɛ wa he.” (Roma Bi 5:8) Mawu je suɔmi kpetekpleenyɛ kpo kɛ tsɔɔ wɔ nɛ wa ji yayami peeli nɛ wa ní ngɛ mɔbɔ ɔ. Jinɛ wa sɛ nihi nɛ a ko kpɔ mɛ, pohu wa be nyɛe maa to Mawu nane mi hulɔ. Mawu nike ní nɛ ɔ ji suɔmi nɛ se be nɛ e je kpo kɛ tsɔɔ wɔ.

BƆ NƐ NIKE NÍ Ɔ HE JUA WA HA NƆ Ɔ HA LOKO E KƐ HA

Ke nɔ ko ke mo nɔ́ ko, nɛ o yɔse kaa jamɛ a nɔ́ ɔ he hia nɔ ɔ wawɛɛ loko e kɛ ha mo ɔ, e haa nɛ o bua jɔɔ nike ní ɔ he saminya. Jehanɛ hu, ke nɔ́ ko he jua wa ha nɔ ko se e je e tsui mi nɛ e kɛ ke mo ɔ, o fiɛ we he kulaa.

Mawu “ngɔ e Bi kake ɔ ngɔ ha.” (Yohane 3:16) Lɛ ji e bi nɛ e kplɛɛ we e he nɔ kulaa. Yesu piɛɛ Mawu he kɛ tsu ní jeha babauu kɛ bɔ je ɔ, nɛ Mawu ‘bua jɔ e he wawɛɛ.’ (Abɛ 8:30) Yesu ji Mawu “bi nɛ e suɔ lɛ saminya” kɛ “Mawu nɛ a nɛ́ lɛ ɔ subai nɛ a naa.” (Kolose Bi 1:13-15) Ngɛ anɔkuale mi ɔ, kake peemi nɛ ngɛ Mawu kɛ Yesu a kpɛti ɔ mi wa wawɛɛ.

Se ngɛ lɔ ɔ tsuo se ɔ, Mawu ‘nɛ lɛ nitsɛ e Bi ɔ po mɔbɔ.’ (Roma Bi 8:32) Yehowa ngɔ nɔ́ nɛ e he hia lɛ pe kulaa kɛ ke wɔ. Nike ní nɛ ɔ he jua wa ha Yehowa pe nike ní kpahi tsuo nɛ e kɛ ha wɔ.

BƆ NƐ O NÁ HE SE HA

Wa naa nike ní komɛ kaa a he jua wa wawɛɛ ke a tsu wa hiami níhi a he ní ha wɔ. Kaa nɔ hyɛmi nɔ́ ɔ, ngɔɔ lɛ kaa o be he wami nɛ o miɔ nɛ o ma gbo. O be sika nɛ o kɛ maa wo hiɔ tsami ɔ he hiɔ hulɔ. Kɛkɛ nɛ nɔ ko je e tsui mi nɛ e wo hiɔ ɔ ha mo nɛ o ná tsami. Anɛ o bua be jɔe lo? Niinɛ, enɛ ɔ ji nike ní nɛ e he jua wa saminya!

‘Kaa bɔ nɛ nihi tsuo ngɛ Adam mi gboɔ ɔ, jã nɔuu kɛ̃ a ma ha nɛ nihi tsuo maa hi wami mi ngɛ Kristo mi.’ (1 Korinto Bi 15:22) Wa ji Adam sisi bimɛ, lɔ ɔ he ɔ, wɔ tsuo wa “gboɔ.” Wa be nyɛe maa tu hiɔ kɛ gbenɔ nya fo. Wa ji yayami peeli, lɔ ɔ he ɔ, wa nyɛ we nɛ wa dla waa kɛ Mawu wa kpɛti. Jehanɛ hu, akɛnɛ wa ji adesahi kɛkɛ he je ɔ, wa be nyɛe ma he wɔ nitsɛmɛ aloo nɔ kpa ko yi “wami.” Baiblo ɔ tsɔɔ kaa: ‘Nɔ ko nɔ ko be nyɛe ma kpɔ e nyɛmi; nɔ ko nɔ ko be nyɛe maa wo Mawu hiɔ nɛ maa su e wami nya.’ (La 49:7, 8) Wa hia yemi kɛ buami wawɛɛ nitsɛ ejakaa wa be nyɛe maa wo kpɔmi nɔ́ ɔ he hiɔ. Ke pi jã a, wa ni maa pee mɔbɔ.

Yehowa je suɔmi mi kɛ wo “hiɔ tsami” nɛ ma ha nɛ wa ná wami ɔ he hiɔ, bɔ nɛ pee nɛ kɛ gu Yesu nɔ ɔ ‘nihi tsuo nɛ a hi wami mi.’ Mɛni blɔ nɔ nɛ kpɔmi nɔ́ ɔ nyɛ tsu nɔ́ nɛ ɔ? ‘E Bi Yesu Kristo muɔ ɔ  tsuɔ wa he kɛ jeɔ yayamihi tsuo a he.’ Niinɛ, Yesu muɔ nɛ e kɛ sã afɔle ɔ mi hemi kɛ yemi nɛ wa ma ná a ma ha nɛ a ngɔ wa he yayami kɛ pa wɔ nɛ wa ná neneene wami. (1 Yohane 1:7; 5:13) Kɛ wa suɔli nɛ a gbo ɔ hu ma plɛ kɛ ná kpɔmi nɔ́ ɔ he se ha kɛɛ? ‘Kaa bɔ nɛ gbenɔ gu adesa nɔ kɛ ba a, jã nɔuu kɛ̃ adesa [Yesu] nɔ gbogboehi a si temi ɔ maa gu kɛ ba.’1 Korinto Bi 15:21. *

Yesu gbenɔ afɔle sami ɔ ji nike ní nɛ se be nɛ je Mawu ngɔ. E tsɔɔ suɔmi nitsɛnitsɛ nɛ e ngɛ kɛ ha wɔ. Nɔ ko be nɛ e ha wɔ nɔ́ ko nɛ he jua wa kaa kikɛ hyɛ kaa ja Yehowa Mawu pɛ. Nike ní ko be nɛ ma nyɛ ma kpɔ wɔ kɛ je yayami kɛ gbenɔ dɛ mi kaa ja afɔle sami nɛ ɔ pɛ. Niinɛ, nike ní ko be nɛ e kɛ kpɔmi nɔ́ nɛ se be nɛ ɔ sɔ.

 

^ kk. 19 Ke o ngɛ hlae nɛ o le níhi fuu kɛ kɔ Mawu yi mi tomi ngɛ gbogboehi a si temi he ɔ, moo hyɛ womi nɛ ji, Mɛni Baiblo ɔ Ma Nyɛ Maa Tsɔɔ Wɔ? nɛ Yehowa Odasefohi pee ɔ yi 7. O ma nyɛ maa gbla ngɛ www.jw.org/ada.