Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ  |  No. 2 2016

 HƐ MI MUNYU | MƐNI HE JE NƐ YESU NA NƆ́ NƐ E GBO Ɔ?

Anɛ Sane Nɛ ɔ Ya Nɔ Niinɛ Lo?

Anɛ Sane Nɛ ɔ Ya Nɔ Niinɛ Lo?

A gbe Yesu, Nazaret no ɔ ngɛ jeha 33 mi ngɛ gbiɛ be mi. A po sane ngɔ fɔ e nɔ kaa e te si kɛ wo ma mlaa, a kongo lɛ nɛ a sɛu lɛ. Yesu na nɔ́ wawɛɛ loko e gbo. Se Mawu tle lɛ si kɛ ba wami mi ekohu, nɛ ligbi 40 se ɔ, e ho hiɔwe ya.

Wa naa munyu nɛ ɔmɛ ngɛ Sane Kpakpa eywiɛ nɛ ngɛ Kristofohi A Hela Ngmami nɛ a pɔɔ lɛ tsɛmi ke Somi He ɔ mi. Anɛ sane nɛ ɔmɛ ya nɔ niinɛ lo? E ji sane bimi nɛ he hia wawɛɛ. Ke ní nɛ ɔmɛ yɛ nɔ niinɛ ɔ, lɛɛ hemi kɛ yemi nɛ anɔkuale Kristofohi ngɛ kaa a maa hi si ngɛ Paradeiso kɛ ya neneene ɔ ji nlami. (1 Korinto Bi 15:14) Se ke ní nɛ ɔmɛ ya nɔ niinɛ ɔ, lɛɛ adesahi tsuo ngɛ hwɔɔ se he hɛ nɔ kami kpakpa, nɛ mo hu o ma nyɛ ma ná eko. Lɔ ɔ he ɔ, anɛ Sane Kpakpa amɛ a mi munyu ɔmɛ ji anɔkuale aloo nyazia?

ODASE NƐ NGƐ

Sane Kpakpa a mi munyu ɔmɛ pí nyazia, mohu ɔ, a ji níhi nɛ ya nɔ nitsɛnitsɛ nɛ́ nihi to a tsui si kɛ ngma fitsofitso. Kaa nɔ hyɛmi nɔ́ ɔ, a tu ma slɔɔtohi a he munyu. Mwɔnɛ ɔ po ɔ, wa ma nyɛ ma ya slaa si ngɛ ma nɛ ɔmɛ ekomɛ a nɔ. Yi nɔ sane ngmali ma nɔ mi kaa nihi nɛ a ngma Sane Kpakpa a ji nihi nɛ a hi si nitsɛnitsɛ.Luka 3:1, 2, 23.

 Yi nɔ sane ngmali nɛ a hi si ngɛ Yesu be ɔ mi, kɛ nihi nɛ a hi si ngɛ e gbenɔ se ɔ po ngma Yesu he sane. * Kaa bɔ nɛ Sane Kpakpa ngmali ɔmɛ tsɔɔ mi ɔ, blɔ nɔ nɛ Roma bi ɔmɛ gblaa nihi a tue ɔ kɛ bɔ nɛ a pee Yesu ɔ kɔ. Jehanɛ hu ɔ, a ngma níhi nɛ ya nɔ ɔ pɛpɛɛpɛ. A tu Yesu kaseli ɔmɛ a gbɔjɔmi komɛ po he munyu. (Mateo 26:56; Luka 22:24-26; Yohane 18:10, 11) Oti nɛ ɔmɛ tsuo tsɔɔ kaa níhi nɛ Sane Kpakpa ngmali ɔmɛ ngma ngɛ Yesu he ɔ ji anɔkuale.

NƐ YESU SI TEMI Ɔ HU NƐƐ?

Nihi fuu kplɛɛ nɔ kaa Yesu ba hi si kaa adesa nɛ e gbo, se ni komɛ he we yi kaa a tle Yesu si. Benɛ Yesu kaseli ɔmɛ nu kaa Yesu te si ɔ, sisije ɔ, a he we yi. (Luka 24:11) Se benɛ Yesu je e he kpo kɛ tsɔɔ mɛ ngɛ si fɔfɔɛ slɔɔtohi a mi ɔ, a he ye. Be ko po ɔ, nihi 500 kɛ a hɛngmɛ na Yesu nɛ a tle lɛ si ɔ.1 Korinto Bi 15:6.

Yesu kaseli ɔmɛ kɛ kã tu Yesu si temi ɔ he munyu kɛ tsɔɔ nihi fuu. A tu Yesu he munyu kɛ tsɔɔ nihi nɛ a gbe lɛ ɔ po. (Bɔfo Ɔmɛ A Ní Tsumi 4:1-3, 10, 19, 20; 5:27-32) Yesu kaseli fuu kɛ kã tu Yesu he munyu kɛ tsɔɔ ni kpahi. Ke kaseli nɛ ɔmɛ be nɔ mi mami kaa a tle Yesu si niinɛ ɔ, jinɛ a ma nyɛ maa fiɛɛ kaa a tle Yesu si lo? Ngɛ anɔkuale mi ɔ, Yesu si temi ɔ ji nɔ́ titli nɛ ha nɛ Kristofohi a jami ɔ he si ngɛ je ɔ mi tsuo.

Yesu gbenɔ kɛ e si temi ɔ nɛ a ngma ngɛ Sane Kpakpa amɛ a mi ɔ ji odase nɛ tsɔɔ kaa munyu nɛ ɔ ji anɔkuale. Ke o to o tsui si kɛ kane munyu nɛ ɔmɛ ɔ, e ma ha nɛ o ma he ye kaa ní nɛ ɔmɛ ya nɔ niinɛ. Ke o le nɔ́ he je nɛ ní nɛ ɔmɛ ya nɔ ɔ, e ma ha nɛ o hemi kɛ yemi ɔ mi maa wa. Munyu nɛ nyɛɛ se ɔ maa tsɔɔ mi.

^ kk. 7 Tacitus nɛ a fɔ lɛ maa pee jeha 55 ɔ ngma ke: “Kristo nɛ ji nɔ nɛ je [Kristofohi] a jami ɔ sisi ɔ na nɔ́ wawɛɛ nɛ e gbo ngɛ wa amlaalo Pontio Pilato dɛ mi ngɛ Tiberio nɔ yemi sisi.” Nihi nɛ a tu Yesu he munyu ɔ ekomɛ ji Suetonius (e hi si ngɛ kaseli ɔmɛ a be ɔ mi); Yuda no Josephus nɛ e ji yi nɔ sane ngmalɔ (e hi si ngɛ kaseli ɔmɛ a be ɔ mi); kɛ Pliny Wayo, nɛ ji Bitinia amlaalo ɔ (e hi si ngɛ jeha lafa enyɔ jeha amɛ a mi).