Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  October 2017

Kpakpa Kake Nɛ Kristofo No Ko Pee

Kpakpa Kake Nɛ Kristofo No Ko Pee

A BAPTISI John papaa kaa Yehowa Odasefo no ngɛ ma nyafii ko mi ngɛ Gujarat ngɛ India maa pee jeha 1957 ɔ mi. John kɛ e nyɛmimɛ nyumuhi kɛ yihi enuɔ ɔ, kɛ a yayo tsuo ji Roma Katoliki bi nɛ a kɛ Mawu jami fiɛ we. Enɛ ɔ he ɔ, a te si kɛ wo a papaa ngɛ e hemi kɛ yemi ɔ he.

Ligbi ko ɔ, John papaa tsɔ lɛ kaa e ngɔ sɛ womi ko ya ha e huɛ ko nɛ e kɛ lɛ ngɛ asafo ɔ mi ɔ. Se jamɛ a mɔtu ɔ, benɛ John ngɛ ama tɔ ngua ko nya blie ɔ, ama tɔ ɔ po e nine. Se akɛnɛ e suɔ kaa e maa bu e papaa tue he je ɔ, e ngɔ tako ko kɛ fi e nine nguɛ nɛ ngɛ muɔ jee ɔ, nɛ e ho tsɔmi ɔ ya.

Benɛ John su he nɛ a tsɔ lɛ ɔ, e papaa huɛ ɔ yo nɛ lɛ hu e ji Yehowa Odasefo no ɔ sɔle sɛ womi ɔ. E na kaa John plaa. Enɛ ɔ he ɔ, e de ke e maa tsɔɔ pa a ha lɛ. E ya ngɔ níhi kɛ ba tsɔɔ pa a, nɛ e fi e nine nguɛ ɔ ha lɛ. Lɔ ɔ se ɔ, e po tea kɛ la ha John. Jamɛ a be ɔ mi tsuo ɔ, e kɛ John ngɛ Baiblo ɔ he ní sɛɛe kaa nɔ kɛ e huɛ.

Nɔ́ nɛ yo ɔ pee ɔ ha nɛ John bɔni Yehowa Odasefohi a he juɛmi kpakpa nami. Enɛ ɔ he ɔ, John bi yo ɔ sanehi nɛ kɔɔ ní enyɔ komɛ nɛ a kɛ a tsɛ ɔ kpa we gbi ngɛ he ɔ he. E suɔ nɛ e le kaa Yesu nɔuu ji Mawu, nɛ e sa nɛ Kristofohi nɛ a sɔle ha Maria lo. Akɛnɛ yo ɔ kase Gujarati gbi nɛ John tuɔ ɔ he je ɔ, e je Baiblo ɔ mi kɛ ha lɛ e sane bimi ɔmɛ a heto, nɛ e ha lɛ womiyo nɛ ji “This Good News of the Kingdom” ɔ eko.

Pee se ɔ, benɛ John kane womi ɔ, e na kaa kpaako e na anɔkuale ɔ. E ya a we osɔfo ɔ ngɔ nɛ e ya bi lɛ sane enyɔ nɛ ɔmɛ nɔuu. Osɔfo ɔ mi mi fu amlɔ nɔuu, nɛ e fia lɛ Baiblo, nɛ e kɛ ngmlaa de ke: “O plɛ pee Satan! Moo tsɔɔ mi he nɛ a ngma ngɛ ngɛ Baiblo ɔ mi kaa tsa pi Yesu ji Mawu. Tsɔɔ mi he nɛ a de ngɛ ke e sɛ nɛ a ja Maria. Moo tsɔɔ mi!” Osɔfo ɔ ní peepee ɔ ha nɛ John nya kpɛ e he. Enɛ ɔ he ɔ, e de osɔfo ɔ ke, “Ye nane be Katoliki sɔlemi ɔ mi mae hu kɔkɔɔkɔ.” Nɛ niinɛ ɔ, e yɛ hu!

John kɛ Odasefo ɔmɛ bɔni ní kasemi, e ba pɛtɛ anɔkuale ɔ he, nɛ e bɔni Yehowa sɔmɔmi. Be komɛ a se ɔ, e weku li ɔmɛ a kpɛti ni komɛ hu bɔni Yehowa sɔmɔmi. Amlɔ nɛ ɔ, jeha 60 be, se pa doku ɔ ngɛ John hiɔ nine he kɛ ba si piɔ. E kai kpakpa kake nɛ Kristofo no ko pee nɛ lɔ ɔ ha nɛ e ba na anɔkuale jami ɔ.​—2 Kor. 6:4, 6.