Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  July 2017

Sane Bimihi Nɛ Je Ní Kaneli A Ngɔ

Sane Bimihi Nɛ Je Ní Kaneli A Ngɔ

Anɛ e da blɔ kaa Kristofo no maa ngɔ tu kɛ po e he piɛ ngɛ adesahi a he lo?

E ngɛ mi kaa Kristofohi ma nyɛ maa gu blɔ slɔɔtohi a nɔ kɛ po a he piɛ mohu lɛɛ, se a daa Baiblo sisi tomi mlaahi a nɔ kɛ peeɔ jã. Sisi tomi mlaa nɛ ɔmɛ bɔɔ wɔ kɔkɔ ngɛ ní komɛ kaa tu nyafinyafi nɛ a kɛ woɔ kotoku mi, tu nguahi, loo ní kpahi nɛ a kɛ yeɔ nɔ awi nɛ waa kɛ maa po wa he piɛ ngɛ adesahi a he ɔ he. Ha nɛ wa susu munyuhi nɛ nyɛɛ se nɛ ɔmɛ a he nɛ waa hyɛ:

Adesa wami ngɛ klɔuklɔu ha Yehowa. La polɔ David le kaa Yehowa “mi lɛ wami tsuo jeɔ kɛ baa.” (La 36:9) Enɛ ɔ he ɔ, ke Kristofo no ko suɔ kaa e gu blɔ ko nɔ kɛ po lɛ nitsɛ aloo e we to ní ko he piɛ ɔ, e sa nɛ e bɔ mɔde fɛɛ mɔde nɛ e ma nyɛ kaa e be nɔmlɔ gbee, bɔ nɛ pee nɛ e ko ye muɔ he fɔ.​—5 Mose 22:8; La 51:14.

E ngɛ mi kaa ní kpahi ngɛ nɛ nihi kɛ poɔ a he piɛ nɛ haa nɛ a yeɔ muɔ he fɔ mohu lɛɛ, se tu kɛ nɔmlɔ gbemi yí, ejakaa e ma nyɛ ma ha nɛ o gbe nɔ be mi nɛ o ji blɔ po. * Jehanɛ hu ɔ, eko ɔ, nɔ nɛ ma nɔ tuami ɔ ngɛ gbeye yee, nɛ ke e na kaa nɔ ɔ hɛɛ tu ɔ, sane ɔ ma puɛ kulaa, nɛ gbenɔ ma nyɛ maa je mi kɛ ba.

Gbɔkuɛ nɛ e nɔ jena Yesu ma gbo ɔ, e de e se nyɛɛli ɔmɛ kaa a ngɔ klaate kɛ to a he, se pi yi mi tomi ɔ ji kaa a kɛ po a he piɛ. (Luka 22:36, 38) Mohu ɔ, Yesu ha nɛ a hɛɛ klaate konɛ e kɛ tsɔɔ mɛ nɔ́ ko. E kɛ tsɔɔ mɛ kaa e sɛ́ nɛ a pee basabasa ke e ba lɛ kaa basabasa peeli hɛɛ awi yemi níhi kɛ ba tua mɛ po.  (Luka 22:36, 38) Benɛ Petro ngɔ klaate ɔ kake kɛ po osɔfo nɔkɔtɔma a nyɔguɛ ɔ tue ɔ, Yesu fã Petro ke: “Ngɔɔ o klaate ɔ ngɔ to e to he.” Kɛkɛ nɛ Yesu tu anɔkuale munyu ko nɛ e he hia wawɛɛ. Enɛ ɔ ji sisi tomi mlaa nɛ ngɛ e se nyɛɛli kudɔe kɛ ba si mwɔnɛ ɔ. E de ke: “Nihi tsuo nɛ hiaa klaate ɔ, a kɛ klaate ma kpata a hɛ mi.”​—Mat. 26:51, 52.

Kaa bɔ nɛ Mika 4:3 ɔ tsɔɔ ɔ, Mawu we bi “kɛ a klaate ɔmɛ maa sɔ̃ kpakplaahi; nɛ akplɔ ɔmɛ hu, a kɛ maa sɔ̃ tso he suami hahi.” Anɔkuale Kristofohi a kadimi nɔ́ nɛ ɔ kɛ nɔ́ nɛ mumi klɔuklɔu ɔ wo bɔfo Paulo he wami nɛ e ngma nɛ ɔ kpãa gbi. Paulo de ke: “Nyɛ ko pee nɔ ko yayami kɛ to yayami nane mi. . . . Ke e maa hi ɔ, nyɛɛ bɔ mɔde nɛ nyɛɛ kɛ nɔ tsuaa nɔ nɛ hi si ngɛ he jɔmi mi.” (Rom. 12:17, 18) E ngɛ mi kaa Paulo kɛ yi mi wami kpe si abɔ, nɛ e na nɔ́ ngɛ “ojo fiali a dɛ mi” mohu lɛɛ, se e kɛ nɔ́ nɛ e de ɔ tsu ní, nɛ e ngɔɛ lɛ nitsɛ e he piɛ nɛ e maa po ɔ kɛ tsake Baiblo sisi tomi mlaa a kɔkɔɔkɔ. (2 Kor. 11:26) Mohu ɔ, e ngɔ e hɛ kɛ fɔ Mawu, kɛ nile nɛ ngɛ Mawu Munyu ɔ mi ɔ nɔ. Nile nɛ ɔ “hi pe ta hwumi níhi.”​—Fiɛlɔ 9:18.

Kristofohi buɔ wami kaa e he hia kulaa pe he lo nya níhi. “Pi ní babauu nɛ adesa ná a mi nɛ e wami ngɛ.” (Luka 12:15) Enɛ ɔ he ɔ, ke waa kɛ juli nɛ a hɛɛ awi yemi níhi tu munyu blɛuu se a kua a, Kristofohi nɛ a ngɛ nile ɔ ngɔɔ sisi tomi mlaa nɛ ngɛ Yesu munyu nɛ ɔ mi ɔ kɛ tsuɔ ní. Yesu de ke: “Nyɛ ko te si kɛ wo yayami peelɔ.” Enɛ ɔ ma nyɛ maa tsɔɔ kaa waa ngmɛɛ nɔ́ fɛɛ nɔ́ nɛ a ngɛ hlae ɔ he kɛ ha mɛ. (Mat. 5:39, 40, NW; Luka 6:29) * Ngɛ anɔkuale mi ɔ, nɔ́ nɛ hi pe kulaa ji kaa wa be níhi nɛ ma ha nɛ awi yeli maa ngɔ a hɛ kɛ pi wɔ ɔ pee. Ke wa kua “níhi nɛ nihi fĩaa kɛ fɔɔ nɔ ɔ,” nɛ wa ha nɛ wa paka mi bi ɔmɛ le wɔ kaa Yehowa Odasefohi nɛ a suɔ tue mi jɔmi ɔ, eko ɔ, awi yeli kɛ a hɛ be wɔ piie.​—1 Yoh. 2:16; Abɛ 18:10.

Kristofohi le kaa e sɛ nɛ a tɔ̃tɔ̃ ni kpahi a nane. (Rom. 14:21) Ke nyɛmimɛ komɛ yɔse kaa nɔ ko ngɛ asafo ɔ mi nɛ e ngɔɔ tu kɛ poɔ e he piɛ ngɛ adesahi a he ɔ, eko ɔ, e maa pee mɛ nyakpɛ, nɛ e ma nyɛ maa tɔ̃tɔ̃ a nane po. Suɔmi haa nɛ wa foɔ wa nyɛmimɛ a nɔ mi kekle, ke wa le kaa mlaa ngmɛɛ wɔ blɔ kaa waa pee nɔ́ ko po.​—1 Kor. 10:32, 33; 13:4, 5.

Kristofohi bɔɔ mɔde kaa a maa pee nɔ hyɛmi nɔ́ kpakpa. (2 Kor. 4:2; 1 Pet. 5:2, 3) Ke Kristofo no ko ngɔ tu kɛ ngɛ e he piɛ poe ngɛ adesahi a he, nɛ a ngɔ Ngmami ɔ kɛ wo lɛ ga se loloolo ɔ e kpa we ɔ, wa be nyɛe maa bu lɛ kaa nɔ ko nɛ peeɔ nɔ hyɛmi nɔ́ kpakpa. Enɛ ɔ he ɔ, e he be sue kɛ ha blɔ nyahi aloo he blɔ titli ko ngɛ asafoɔ mi. Jã nɔuu nɛ e ji ngɛ Kristofo no ko nɛ e he lo nya ní tsumi biɔ nɛ e hɛɛ tu ɔ hu blɔ fa mi. E maa hi wawɛɛ kaa jamɛ a nɔ ɔ ma hla ní tsumi kpa! *

Blɔ nɔ nɛ Kristofo no ko maa gu kɛ po lɛ nitsɛ, e weku, kɛ e we to níhi a he piɛ ɔ ji lɛ nitsɛ e sane, nɛ jã kɛ̃ nɛ e ji ngɛ ní tsumi blɔ fa mi. Se kɛ̃ ɔ, Baiblo sisi tomi mlaahi haa nɛ wa naa Mawu nile, kɛ bɔ nɛ e suɔ wɔ ha a. Sisi tomi mlaa nɛ ɔmɛ a he je ɔ, Kristofohi nɛ a nane pi si ɔ ngɔɛ tu kɛ pui a he piɛ ngɛ adesahi a he. Ni nɛmɛ nɛ ngɔɔ a hɛ kɛ fɔɔ Mawu nɔ, nɛ a ngɔɔ e sisi tomi mlaahi kɛ tsuɔ ní ɔ ma ná he piɛ pomi nitsɛnitsɛ nɛ ngɛ daa.​—La 97:10; Abɛ 1:33; 2:6, 7.

Ngɛ haomi ngua a mi ɔ, Kristofohi maa ngɔ a hɛ kɛ fɔ Yehowa nɔ, a be mɔde bɔe kaa a ma fã a he

^ kk. 3 Kristofo no ma nyɛ maa ma e juɛmi nya si kaa e ma he tu nɛ e kɛ ya de, loo e kɛ po e he piɛ ngɛ lohwe awi yeli a he. Se be mi nɛ o kɛ tsu we nɔ́ ko ɔ, e maa hi wawɛɛ kaa o ma je tu tɛ ɔ ngɛ mi, aloo o maa gbɛ lɛ po, nɛ́ o ngɔ kɛ dla saminya. He komɛ ngɛ nɛ a ngmɛ́ blɔ kaa nɔ ko nɛ hɛɛ tu, nɛ he komɛ ngɛ nɛ a ngmɛɛɔ blɔ se blɔ nya tomi ngɛ he. E sa nɛ Kristofohi nɛ a ngɔ jamɛ a mlaa amɛ kɛ tsu ní.​—Rom. 13:1.

^ kk. 2 Ngɛ wa he piɛ nɛ wa maa po ngɛ abonua tuami he blɔ fa mi ɔ, moo hyɛ munyu nɛ ji “How to Prevent Rape” nɛ je kpo ngɛ March 8, 1993 Awake! ɔ mi ɔ.

^ kk. 4 Níhi a mi tsɔɔmi fuu nɛ kɔɔ sanehi nɛ nihi biɔ ngɛ ní tsumihi nɛ e biɔ kaa nɔ nɛ hɛɛ tu he ɔ ngɛ Blɛfo gbi Hwɔɔmi Mɔ nɛ je kpo November 1, 2005, bf 31; kɛ July 15, 1983, bf 25-26 a mi.