Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  July 2017

O Juɛmi ɔ, Poo He Piɛ

O Juɛmi ɔ, Poo He Piɛ

NƆ KO ma mo tuami! O he nyɛlɔ ngua nɛ ji Satan ɔ kɛ ta hwumi nɔ́ ko nɛ yeɔ nɔ awi wawɛɛ ma mo tuami. Mɛni ji jamɛ a ta hwumi nɔ́ ɔ? Lakpa munyuhi! Enɛ ɔ ji ta hwumi nɔ́ ko nɛ a je blɔ pee konɛ a kɛ tua o juɛmi ɔ, se pi o nɔmlɔ tso ɔ.

Bɔfo Paulo le kaa Satan lakpa munyu ɔmɛ ma nyɛ maa ye nɔ awi, se pi e nyɛmimɛ Kristofohi tsuo nɛ a le jã. Kaa nɔ hyɛmi nɔ́ ɔ, e ngɛ kaa nɔ́ nɛ nyɛmimɛ komɛ nɛ a ngɛ Korinto ɔ he a he ye tsɔ. A susu kaa a nane pi si ngɛ anɔkuale ɔ mi, nɛ a be si nɔe gblee. (1 Kor. 10:12) Enɛ ɔ he je nɛ Paulo wo mɛ ga ke: ‘I ngɛ gbeye yee kaa nɔ́ nɛ ba Hawa nɔ be ko ɔ maa ba nyɛ hu nyɛ nɔ. Sinɔ ya sisi Hawa, nɛ Hawa pee yayami. Jã kɛ lɛ a ma puɛ nyɛ tue [“nyɛ juɛmi,” NW], nɛ nyɛ be Kristo anɔkuale yee kɛ pi si hu.’​—2 Kor. 11:3.

Paulo munyu ɔ tsɔɔ kaa e sɛ kulaa kaa wa he wa he nɛ waa ye tsɔ. Ke o ma nyɛ maa po o juɛmi ɔ he piɛ ɔ, e sa nɛ o le oslaa nɛ ngɛ lakpa munyuhi a he, nɛ o yu o he ngɛ he.

LAKPA MUNYUHI​—KƐ A YEƆ NƆ AWI HA KƐƐ?

Mɛni ji lakpa munyuhi? Ngɛ munyu nɛ ɔ mi ɔ, a daa si kɛ ha munyuhi nɛ a be mi, aloo munyuhi nɛ a kɛ sisiɔ nɔ konɛ nɔ ɔ nɛ e tsake e juɛmi aloo bɔ nɛ e peeɔ e ní ha a. Ni komɛ tsɔɔ kaa a ji ‘nya ngɔmi, sisimi, munyuhi nɛ a plɛ mi, kɛ munyuhi nɛ a kɛ puɛɔ nɔ juɛmi.’ A kɛ “gui blɔ kpakpa nɔ, e yeɔ nɔ awi, nɛ e dɛ.”​—Propaganda and Persuasion.

Kɛ lakpa munyuhi yeɔ nɔ awi ha kɛɛ? E ngɛ kaa kɔɔhiɔ ko nɛ gbeɔ nɔ nɛ a nɛ aloo a nui he fu, nɛ e ma nyɛ maa sɛ wa juɛmi ɔ mi be mi nɛ wa hɛ be wa he nɔ. Akɛnɛ eko ɔ, wa be nyɛe ma yɔse kaa a ji lakpa munyuhi he je ɔ, nyumu ko nɛ a tsɛɛ lɛ ke Vance Packard nɛ e kase bɔ nɛ adesahi peeɔ a ní ha a de ke: ‘Wa kpɛti nihi fuu ngɛ  nɛ a sisi wɔ pe bɔ nɛ wa susuɔ ɔ.’ Ní lelɔ ko hu de ke, ‘a sisi nyumuhi kɛ yihi fuu, nɛ enɛ ɔ ha nɛ a peeɔ níhi nɛ yeɔ nɔ awi, aloo níhi nɛ juɛmi be mi.’ Lɔ ɔ ngɔ ‘wɛtso sisi gumi, ta, nɔ hɛ mi hyɛmi, jamihi nɛ a teɔ si kɛ woɔ, kɛ su yayahi fuu’ kɛ ba.​—Easily Led​—A History of Propaganda.

Ke adesa po ma nyɛ maa ngɔ lakpa munyuhi kɛ sisi wɔ ɔ, lɛɛ Satan nɛɛ? Satan bɔni bɔ nɛ adesa peeɔ e ní ha a he hɛ tomi kɛ je be nɛ a bɔ adesa a tɔɔ. Amlɔ nɛ ɔ, Satan lɛ ngɛ “je ɔ” nɔ yee. E ma nyɛ maa gu nɔ́ tsuaa nɔ́ nɛ ngɛ je ɔ mi ɔ nɔ kɛ gbɛ lakpa munyuhi kɛ fia. (1 Yoh. 5:19; Yoh. 8:44) Satan bɔ mɔde wawɛɛ nɛ e ‘yu nihi a hɛ ngmɛ,’ nɛ amlɔ nɛ ɔ, e ngɛ ‘nihi tsuo ngɛ je ɔ mi ɔ sisie.’ (2 Kor. 4:4; Kpoj. 12:9) Mɛni blɔ nɔ o ma nyɛ maa gu kɛ yu o he ngɛ lakpa munyuhi a he?

MO HA NƐ O HEMI KƐ YEMI Ɔ MI NƐ WA

Yesu tsɔɔ blɔ kpiti ko nɛ wa ma nyɛ maa gu nɔ kɛ tsi lakpa munyuhi a nya. E de ke: ‘Nyɛɛ le anɔkuale ɔ; nɛ anɔkuale ɔ ma ha nyɛɛ ye nyɛ he.’ (Yoh. 8:31, 32) Ke ta buli ngɛ ta hwue ɔ, e sa nɛ a le he nɛ a nine maa su amaniɛ bɔmi nɛ ji anɔkuale nɔ ngɛ, ejakaa a he nyɛli maa bɔ mɔde kaa a maa ngɔ lakpa munyuhi kɛ sisi mɛ. Jã kɛ̃ nɛ e sa nɛ waa le he nɛ wa maa na anɔkuale ngɛ konɛ a ko sisi wɔ. Wa maa na anɔkuale nɛ ɔ ngɛ Yehowa ngɔ. O ma nyɛ maa na nɔ́ tsuaa nɔ́ nɛ o hia konɛ o nyɛ nɛ o yu o he ngɛ Satan lakpa munyu ɔmɛ a he ɔ ngɛ Baiblo ɔ mi.​—2 Tim. 3:16, 17.

Ngɛ anɔkuale mi ɔ, Satan nɛ ji lakpatsɛ kpanaku ɔ le enɛ ɔ. Enɛ ɔ he ɔ, e ngɔɔ e je ɔ kɛ jeɔ wa juɛmi kɛ jeɔ Baiblo ɔ kanemi kɛ e kasemi nɔ. Ko ha nɛ e ga tsɔmi ɔmɛ nɛ a du mo! (Efe. 6:11) E sa nɛ o “yɔse” aloo o nu bɔ nɛ anɔkuale ɔ mi kuɔ ha a sisi saminya. (Efe. 3:18) Enɛ ɔ ma bi mɔde bɔmi wawɛɛ. Se mo kai anɔkuale munyu ko nɛ womi ngmalɔ Noam Chomsky tu ɔ. E de ke: “Nɔ ko be nyɛe maa ngɔ anɔkuale kɛ wo o juɛmi mi. E sa nɛ mo nitsɛ o hla konɛ o na anɔkuale ɔ ha o he.” Enɛ ɔ he ɔ, moo ‘kpa ngmami ɔmɛ a mi saminya daa ligbi,’ konɛ “o na anɔkuale ɔ ha o he.”​—Níts. 17:11.

Ke o ma nyɛ maa po o juɛmi ɔ he piɛ ɔ, lɛɛ e sa nɛ o yɔse oslaahi nɛ ngɛ lakpa munyuhi a he, nɛ o yu o he ngɛ he

Mo kai kaa Satan sume nɛ o susu níhi a he saminya, aloo o nu níhi a sisi saminya. Mɛni he je? Ejakaa womi ko tsɔɔ kaa ‘e he wɛ kulaa kaa a maa ngɔ lakpa munyuhi kɛ sisi nihi ke a ha we nɛ a susu níhi a he saminya a.’ (Media  and Society in the Twentieth Century) Lɔ ɔ he ɔ, e sɛ nɛ o kplɛɛ nɔ́ tsuaa nɔ́ nɛ a deɔ mo ɔ nɔ kɛkɛ, be mi nɛ o susuu we he saminya. (Abɛ 14:15) Moo ngɔ nyɛmi nɛ Mawu ha mo ɔ, kɛ o juɛmi kɛ to níhi a he konɛ mo nitsɛ o na anɔkuale ɔ.​—Abɛ 2:10-15; Rom. 12:1, 2.

MOO LE NÍHI NƐ MA NYƐ MAA NGƆ MI GBAMI KƐ BA NƐ O TSI NYA

Ta buli ma nyɛ maa ngɔ lakpa munyuhi kɛ wo a he nyɛli a he gbeye konɛ a kɔni mi nɛ jɔ̃. A ma nyɛ ma ha nɛ pɛ nɛ sɛ a he nyɛli ɔmɛ a kpɛti, aloo a maa sisi mɛ konɛ a kpɛti ni komɛ nɛ a yu a he ngɛ ta buli a kuu ɔ he. Tatsɛ ko nɛ e je Germany ɔ tsɔɔ kaa nɔ́ kake nɛ ha we nɛ a ye kunimi ngɛ kekleekle je mi ta a mi ji kaa he nyɛli ngɔ lakpa munyuhi kɛ sisi ni ɔmɛ nɛ a pee basaa. Satan bɔɔ mɔde kaa e maa gu jamɛ a blɔ ɔ nɔ kɛ gba wa mi, e ye wa nɔ, nɛ e ha nɛ wa kɔni mi nɛ jɔ̃. Kaa nɔ hyɛmi nɔ́ ɔ, e ma nyɛ ma ha nɛ pɛ nɛ ba nyɛmimɛ sɔuu a kpɛti, aloo e ma nyɛ ma ha nɛ ni komɛ nɛ a yu a he ngɛ Yehowa asafo ɔ he, akɛnɛ e ngɛ kaa nɔ́ nɛ a yi mɛ dami sane, aloo a nui nɔ́ ko sisi ɔ he je.

Ko ha nɛ a sisi mo! Ha Mawu Munyu ɔ nɛ tsɔɔ mo blɔ. Kaa nɔ hyɛmi nɔ́ ɔ, Baiblo ɔ woɔ wɔ he wami kaa waa ngɔ yayami ‘kɛ pa wa sibi,’ nɛ wa dla pɛhi amlɔ nɔuu, konɛ tue mi jɔmi nɛ hi waa kɛ wa nyɛmimɛ wa kpɛti daa. (Kol. 3:13, 14; Mat. 5:23, 24) Baiblo ɔ bɔɔ wɔ kɔkɔ kaa e sɛ nɛ wa tsɔ wa he kɛ je asafo ɔ he. (Abɛ 18:1) Moo hyɛ kaa o hemi kɛ yemi ɔ mi wa bɔ nɛ o ma nyɛ maa da Satan lakpa munyu ɔmɛ a nya lo. Mo bi o he ke: ‘Be ko nɛ ye nyɛmi ko tɔ̃ ye nɔ ɔ, anɛ je ɔ mumi ɔ lɛ tsɔɔ mi nɔ́ nɛ ma pee aloo Mawu mumi ɔ?’​—Gal. 5:16-26; Efe. 2:2, 3.

KO HA NƐ O HƐ KƐ NƆ FƆMI Ɔ NƐ MIMIƐ

Ke suɔmi nɛ ta bulɔ ko ngɛ kaa e maa ye e hɛ mi nyɛɛlɔ anɔkuale ɔ ba si ɔ, e be ta a hwue saminya. Enɛ ɔ he ɔ, nihi nɛ a gbɛɔ lakpa munyuhi kɛ fĩaa a bɔɔ mɔde kaa a ma ha nɛ hɛ kɛ nɔ fɔmi kɛ hemi kɛ yemi nɛ ta bulɔ ko ngɛ ngɛ e tatsɛ mi ɔ mi nɛ gbɔjɔ. Eko ɔ, a ma de ke: “Koo ngɔ o hɛ kɛ fɔ o hɛ mi nyɛɛli ɔmɛ a nɔ!” aloo “Koo di o hɛ mi nyɛɛli ɔmɛ a se nɛ o hɛ mi ba kpata!” Eko ɔ, a maa gu ga blɔhi a nɔ nɛ a ha nɛ o le o hɛ mi nyɛɛli ɔmɛ a fã tɔmi ɔmɛ konɛ lɔ ɔ nɛ ha nɛ o he a munyu ɔmɛ ye. Satan hu peeɔ jã. Lɛ  hu e bɔɔ mɔde kaa e ma ha nɛ hɛ kɛ nɔ fɔmi nɛ o ngɛ ngɛ hɛ mi nyɛɛli nɛ Yehowa kɛ mɛ ngɛ ní tsue ɔ a mi ɔ nɛ ba si.

Mɛni o ma nyɛ maa pee kɛ po o he piɛ? Moo fia o pɛɛ si kaa o kɛ Yehowa asafo ɔ maa bɔ gbagbanii, nɛ o kɛ anɔkuale yemi nɛ fĩ hɛ mi nyɛɛli nɛ e ha wɔ ɔ a se, ke ji o yɔse a gbɔjɔmihi po. (1 Tes. 5:12, 13) Ko ha nɛ ‘o juɛmi nɛ pee mo enyɔɔnyɔ’ ke hemi kɛ yemi kuali aloo nihi nɛ a puɛɔ nɔ juɛmi ɔ tu lakpa munyuhi kɛ si asafo ɔ. (2 Tes. 2:2; Tito 1:10) Moo ngɔ ga womi nɛ a kɛ ha niheyo Timoteo ɔ kɛ tsu ní. Yaa nɔ nɛ o pɛtɛ anɔkuale ɔ nɛ o kase ɔ he, nɛ o kai nihi nɛ a tsɔɔ mo anɔkuale ɔ. (2 Tim. 3:14, 15) Ngɛ anɔkuale mi ɔ, odasehi fuu ngɛ nɛ tsɔɔ kaa o ma nyɛ ma ná hɛ kɛ nɔ fɔmi ngɛ hɛ mi nyɛɛli nɛ Yehowa guɔ a nɔ kɛ tsɔɔ wɔ anɔkuale ɔ maa pee jeha lafa ji nɛ ɔ a mi.​—Mat. 24:45-47; Heb. 13:7, 17.

KO HA NƐ A GA TOMI ƆMƐ NƐ WO O HE GBEYE

Mo kai kaa pi be tsuaa be nɛ Satan guɔ blɔ nigii nɔ kɛ sisiɔ nɔ. Be komɛ ɔ, e toɔ gahi kɛ woɔ nɔ he gbeye. Nɔ he gbeye womi ji “blɔ kake nɛ a guɔ nɔ kɛ sisiɔ nihi kɛ je blema.” (Easily Led​—A History of Propaganda) Kaa nɔ hyɛmi nɔ́ ɔ, ní lelɔ kpanaa ko nɛ e ngɛ Britain nɛ a tsɛɛ lɛ ke Philip M. Taylor a tsɔɔ kaa Asiria bi ɔmɛ ‘ngɔ lakpa munyuhi kɛ nɔ he gbeye womi’ kɛ ye a he nyɛli a nɔ kunimi. Satan maa ngɔ adesa hɛ mi gbeye yemi, yi mi wami, gbenɔ, kɛ ní kpahi kɛ wo o he gbeye konɛ e kɛ ye o nɔ, nɛ o kpa Yehowa sɔmɔmi.​—Yes. 8:12; Yer. 42:11; Heb. 2:15.

Ko ha nɛ Satan nɛ ngɔ gbeye yemi kɛ sisi mo konɛ kã nɛ o ngɛ ɔ nɛ ba si, aloo o kpa anɔkuale yemi. Yesu de ke: “Nihi nɛ gbeɔ nɔmlɔ tso ɔ, nɛ lɔ ɔ se ɔ, a nyɛ we nɛ a peeɔ nɔ́ ko hu ɔ, nyɛ ko ye mɛ gbeye.” (Luka 12:4) Mo ná hɛ kɛ nɔ fɔmi nɛ mi wa kaa Yehowa maa ye si nɛ e wo kaa e maa hyɛ o nɔ ɔ, e ma ha mo “he wami kpetekpleenyɛ,” nɛ e maa ye bua mo konɛ o da Satan ka a mɛ a nya a nɔ.​—2 Kor. 4:7-9; 1 Pet. 3:14.

Ngɛ anɔkuale mi ɔ, eko ɔ, o kɛ si fɔfɔɛ ko nɛ woɔ nɔ he gbeye loo nɔ kɔni mi nyu ɔ maa kpe. Se ha nɛ o hɛ nɛ hi Yehowa munyu nɛ e kɛ wo Yoshua he wami ɔ nɔ. E de Yoshua ke: ‘O pee kã. Koo nu sawale, nɛ o nine mi ko je wu. He tsuaa he nɛ o maa ya a, imi, Yehowa, o Mawu ɔ, ma piɛ o he kɛ ya.’ (Yosh. 1:9) Ke o pee yeyeeye ɔ, moo sɔle ha Yehowa amlɔ nɔuu, nɛ o de lɛ níhi nɛ ngɛ mo haoe ɔ. O ma nyɛ ma ná nɔ mi mami kaa ‘Mawu he jɔmi ɔ maa bu o tsui, kɛ o juɛmi he’ konɛ o ná he wami nɛ o kɛ maa da Satan lakpa munyu ɔmɛ a nya.​—Filip. 4:6, 7, 13.

Anɛ o kai lakpa munyu nɛ Asiria tsɔlɔ Rabshake kɛ tsu ní konɛ e kɛ wo Mawu we bi a he gbeye ɔ lo? Ngɛ blɔ ko nɔ ɔ, nɔ́ nɛ e ngɛ dee ji, ‘Nɔ ko nɔ ko be nyɛe ma kpɔ̃ nyɛ ngɛ Asiria dɛ mi. Yehowa nyɛ Mawu ɔ po be nyɛe nɛ e pee nɔ́ ko.’ E kɛ kã de ke: ‘Yehowa nitsɛ lɛ e de wɔ ke wa ba kpata ma nɛ ɔ hɛ mi.’ Mɛni Yehowa hu de? E de ke: ‘Ko ha nɛ munyu ɔ nɛ Asiria matsɛ ɔ tsɔli ɔmɛ ba tu kɛ si mi ɔ nɛ wo o he gbeye.’ (2 Ma. 18:22-25; 19:6) Lɔ ɔ se ɔ, Yehowa tsɔ e bɔfo ko nɛ e ba kpata Asiria bi 185,000 a hɛ mi ngɛ nyɔ kake mi!​—2 Ma. 19:35.

PEE O HE NÍ LELƆ​—MOO BU YEHOWA TUE BE FƐƐ BE

Anɛ o kɛ nihi hyɛ sini ko hyɛ nɛ o yɔse kaa sini ɔ sisi nɔ ko lo? Eko ɔ, e pee mo kaa o de nɔ ɔ ke: ‘Ko he ye! A ngɛ mo sisie!’ Ke jã a, lɛɛ mo susu nɔ́ nɛ bɔfo ɔmɛ ngɛ mo hu dee ɔ he nɛ o hyɛ. A ngɛ dee ke: “Ko ha nɛ Satan nɛ ngɔ e lakpa munyu ɔmɛ kɛ sisi mo!”

Lɔ ɔ he ɔ, koo bu Satan lakpa munyu ɔmɛ tue. (Abɛ 26:24, 25) Moo bu Yehowa tue, nɛ nɔ́ fɛɛ nɔ́ nɛ o ngɛ pee ɔ, ngɔɔ o hɛ kɛ fɔ e nɔ. (Abɛ 3:5-7) Yehowa je suɔmi mi nɛ e ngɛ mo dee ke: “Ye bi, pee o he ní lelɔ, nɛ ma na bua jɔmi.” (Abɛ 27:11) Ke o pee jã a, o ma nyɛ maa po o juɛmi ɔ he piɛ!