Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  January 2017

Ngɔɔ Ní Tsumi Kɛ Wo Nihi Nɛ Yeɔ Anɔkuale ɔ A Dɛ

Ngɔɔ Ní Tsumi Kɛ Wo Nihi Nɛ Yeɔ Anɔkuale ɔ A Dɛ

‘Níhi nɛ o nu ɔ, tsɔɔ nihi nɛ yeɔ anɔkuale ɔ lɔ ɔmɛ nɔuu, konɛ mɛ hu a tsɔɔ ni kpahi.’2 TIM. 2:2.

LAHI: 42, 53

1, 2. Kɛ nihi fuu buɔ a ní tsumi ha kɛɛ?

BEHI fuu ɔ, nihi ngɔɔ ní tsumi nɛ a tsuɔ ɔ kɛ tsɔɔ nihi nɛ a ji. Nihi fuu susuɔ kaa ní tsumi nɛ a tsuɔ, aloo he blɔ ko nɛ a ngɛ lɛ tsɔɔ kaa a he ngɛ se nami. Ngɛ ni komɛ a kusumi nya a, ke o ngɛ hlae nɛ o le nɔ ko ɔ, sane nɛ o ma nyɛ ma bi lɛ kekleekle ɔ a kpɛti kake ji, “Mɛni o tsuɔ?”

2 Be komɛ ɔ, Baiblo ɔ ngɔɔ ni komɛ a ní tsumi kɛ kaleɔ mɛ. Baiblo ɔ wo “Mateo to tsulɔ ɔ,” “Simon, lohwe he womi tsopa wolɔ,” kɛ “Luka tsopatsɛ ɔ” a ta. (Mat. 10:3; Níts. 10:6; Kol. 4:14) A kɛ ní tsumi nɛ nɔ ko tsuɔ, aloo he blɔ nɛ e ngɛ ngɛ Mawu jami mi ɔ hu nyɛɔ kaleɔ lɛ. Wa kaneɔ Matsɛ David, gbalɔ Eliya, kɛ bɔfo Paulo a he munyu ngɛ Baiblo ɔ mi. Nyumu nɛ ɔmɛ na ní tsumihi nɛ Mawu kɛ wo a dɛ ɔ kaa a he jua wa. Ke a kɛ ní tsumihi wo wa dɛ ngɛ asafo ɔ mi ɔ, e sa nɛ wɔ hu waa bu lɛ kaa nɔ́ ko nɛ he jua wa.

3. Mɛni he je nɛ e he hia kaa nihi nɛ a wa ngɛ jeha mi ɔ nɛ a tsɔse nihewi ɔ? (Moo hyɛ foni nɛ ngɛ ní kasemi ɔ sisije ɔ.)

3 Wa ti nihi fuu bua jɔ ní nɛ wa ngɛ tsue ɔ he, nɛ wa suɔ kaa wa ma tsu daa. Se aywilɛho sane ji kaa, kɛ je Adam yi nɔ tɔɔ ɔ, níhi  tsakeɔ. Yi nɔhi beɔ kɛ yaa, nɛ yi nɔhi baa. (Fiɛlɔ 1:4) Ligbi etɛ nɛ ɔ, tsakemi nɛ ɔ ha nɛ anɔkuale Kristofohi kɛ haomi kpa komɛ ngɛ kpee. Ní tsumi nɛ Yehowa we bi ngɛ tsue ɔ ngɛ hɛ mi yae wawɛɛ, nɛ e yi ngɛ blie. Enɛ ɔ he ɔ, e he ba hia nɛ waa gu blɔ ehehi a nɔ kɛ tsu níhi a he ní. Behi fuu ɔ, waa kɛ klama ehehi nɛ tsuɔ ní tsumi nɛ ɔmɛ. Eko ɔ, e he maa wa ha ni komɛ nɛ a wa ngɛ jeha mi kaa a maa gu blɔ ehe nɛ ɔmɛ a nɔ kɛ tsu ní. (Luka 5:39) Ke pi jã ji sane ɔ po ɔ, behi fuu ɔ, nihewi kɛ yihewi ngɛ he wami pe nihi nɛ a wa ngɛ jeha mi ɔ. (Abɛ 20:29) Enɛ ɔ he ɔ, e da blɔ kaa nihi nɛ a wa ngɛ jeha mi ɔ ma tsɔse nihewi konɛ a kɛ ní tsumi nguahi nɛ wo a dɛ. Jã nɛ a maa pee ɔ hu tsɔɔ kaa a ngɛ suɔmi.Kane La 71:18.

4. Mɛni he je nɛ e yeɔ ha ni komɛ kaa a kɛ ní tsumi maa wo ni kpahi a dɛ ɔ? (Hyɛ daka nɛ ji “ Nɔ́ He Je Nɛ Ni Komɛ Kɛ Ní Tsumi Wui Ni Kpahi A Dɛ.”)

4 Eko ɔ, e he maa wa ha nihi nɛ a ngɛ he blɔ ngua a kaa a maa ngɔ ní tsumi kɛ wo nihewi a dɛ. A ti ni komɛ bua jɔ he blɔ nɛ a ngɛ ɔ he, nɛ a yeɔ gbeye kaa e maa je a dɛ. Ni komɛ hu yeɔ tsui kaa ke a kɛ a ní tsumi ɔ ha nihewi ɔ, nihewi ɔmɛ be nyɛe ma tsu lɛ saminya. Eko ɔ, ni komɛ ma susu kaa a be deka nɛ a kɛ ma tsɔse nɔ ko. Nɛ ngɛ nihewi hu a blɔ fami ɔ, e he hia nɛ a to a tsui si ke a kɛ ní tsumi fuu wui a dɛ ɔ.

5. Mɛni sane bimihi a he wa ma susu ngɛ munyu nɛ ɔ mi?

5 Ha nɛ wa susu sane nɛ ɔ he ngɛ blɔ enyɔ nɔ. Kekleekle ɔ, mɛni blɔ nɔ nikɔtɔmahi ma nyɛ maa gu kɛ ye bua nihewi konɛ a ngɔ ní tsumi nguahi kɛ wo a dɛ, nɛ mɛni he je nɛ e he hia a? (2 Tim. 2:2) Nɔ́ nɛ ji enyɔ ɔ, mɛni he je nɛ e he hia kaa nihewi nɛ a ya nɔ nɛ a je su kpakpa kpo be mi nɛ a ngɛ nyɛmimɛ nyumuhi nɛ a ngɛ níhi a si kpami fuu ɔ ye buae, nɛ a ngɛ mɛ kasee ɔ? Kekleekle ɔ, nyɛ ha nɛ waa hyɛ bɔ nɛ Matsɛ David plɛ kɛ tsɔse e binyumu ɔ ha konɛ e nyɛ nɛ e tsu ní tsumi ko nɛ he hia wawɛɛ ɔ.

DAVID TSƆSE SALOMO NƐ E FĨ E SE

6. Mɛni Matsɛ David to e yi mi kaa e ko pee, se mɛni Yehowa de lɛ?

6 Benɛ David wo lalaalo ngɛ nga nɔ jeha komɛ a se ɔ, e ba pee matsɛ, nɛ e hi we saminyayoo ko mi. E haoɔ David kaa “we”  aloo sɔlemi we ko be nɛ a jɔɔ nɔ ha Yehowa, enɛ ɔ he ɔ, e suɔ kaa e maa ma eko ha lɛ. Enɛ ɔ he ɔ, e de gbalɔ Natan ke: ‘Hyɛ kaa imi i ngɛ we nɛ a ma kɛ seda mi, be mi nɛ Yehowa somi daka a lɛɛ e ngɛ bo tsu mi!’ Natan ha lɛ heto ke: “Nɔ́ tsuaa nɔ́ nɛ o to kaa o maa pee ɔ, moo pee; ejakaa Mawu kɛ mo ngɛ.” Se Yehowa tsɔɔ kaa nɔ kpa mohu lɛ ma tsu jamɛ a ní tsumi ɔ. Yehowa de Natan kaa e de David ke: “Pi mo ji nɔ nɛ maa po we ha mi nɛ ma hi mi.” E ngɛ mi kaa Yehowa wo David si kaa e maa ya nɔ maa jɔɔ lɛ mohu lɛɛ, se Mawu kɛ blɔ tsɔɔmi ha kaa David bi Salomo ji nɔ nɛ maa ma sɔlemi we ɔ. Kɛ David pee e ní ha kɛɛ?1 Kron. 17:1-4, 8, 11, 12; 29:1.

7. Benɛ Yehowa kɛ blɔ tsɔɔmi ha David ɔ, kɛ David pee e ní ha kɛɛ?

7 David susuu we kaa akɛnɛ a be dee ke lɛ nɛ e ma sɔlemi we ɔ he je ɔ, e be nɔ́ ko pee kɛ ye bua. Ngɛ anɔkuale mi ɔ, a wo tsu ɔ biɛ ke Salomo sɔlemi we, se pi David sɔlemi we. Eko ɔ, e hao David kaa e nyɛ we nɛ e pee nɔ́ nɛ e suɔ kaa e maa pee ɔ, se e fĩ ní tsumi ɔ se wawɛɛ. E kɛ kã to ní tsuli a kuuhi a he blɔ nya, nɛ e bua dade, akɔblee, sika hiɔ, sika tsu, kɛ seda tsohi a nya kɛ ha ní tsumi ɔ. Lɔ ɔ se ɔ, e wo Salomo he wami ke: ‘Ye bi, Yehowa, o Mawu ɔ kɛ mo nɛ hi si. Yehowa, o Mawu ɔ nɛ ye e si womi ɔ nɔ, konɛ o nyɛ nɛ o po we ha lɛ.’1 Kron. 22:11, 14-16.

8. Mɛni he je nɛ eko ɔ, David susu kaa Salomo he sui kɛ ha ní tsumi ɔ, se mɛni e pee?

8 Kane 1 Kronika 22:5. Eko ɔ, David susu kaa Salomo he sui kaa e maa hyɛ ní tsumi agbo nɛ ɔ nɔ. Ngɛ anɔkuale mi ɔ, e sa nɛ sɔlemi we ɔ nɛ “kle agbo,” pohu ‘jokuɛ ji Salomo, nɛ e hɛ mi fã we lolo.’ Se kɛ̃ ɔ, David le kaa Yehowa maa ye bua Salomo konɛ e tsu ní tsumi nɛ a kɛ wo e dɛ ɔ. Enɛ ɔ he ɔ, David ngɔ e juɛmi kɛ ma nɔ́ nɛ e ma nyɛ maa pee kɛ ye bua lɛ ɔ nɔ, nɛ e bua níhi fuu nya konɛ a kɛ ma tsu ɔ.

MO TSƆSE NIHI KONƐ O BUA NƐ JƆ

Ke wa na kaa nihewi ngɛ ní tsumi nguahi tsue ɔ, wa bua jɔɔ wawɛɛ (Hyɛ kuku 9)

9. Mɛni ma ha nihi nɛ a wa ngɛ jeha mi ɔ a bua nɛ jɔ he kaa a kɛ ní tsumi maa wo ni kpahi a dɛ? Mo ha enɛ ɔ he nɔ́ he tomi nɔ́.

9 E sɛ nɛ nyɛmimɛ nyumuhi nɛ a wa ngɛ jeha mi ɔ nɛ a hao ke e he ba hia kaa a ngɔ a ní tsumi ɔ kɛ wo nihewi a dɛ. Mohu ɔ, ke a tsɔse nihewi nɛ a kɛ ní tsumi wo a dɛ ɔ, lɔ ɔ ma ha nɛ ní tsumi ɔ maa ya hɛ mi. Ke nihewi nɛ a tsɔse mɛ ɔ he ba su kaa a ma nyɛ ma tsu nɔ́ ko he ní ɔ, e sa nɛ asafo mi nikɔtɔmahi kɛ sɔmɔli a bua nɛ jɔ he kaa a maa ngɔ a ní tsumi ɔ kɛ wo a dɛ. Kaa nɔ hyɛmi nɔ́ ɔ, mo susu bitsɛ ko nɛ e tsɔɔ e binyumu lɔle hɛɛmi ɔ he nɛ o hyɛ. Benɛ binyumu ɔ wɛ ɔ, e hyɛɛ e papaa kɛkɛ. Ke jokuɛ ɔ wa a, bitsɛ ɔ tsɔɔ lɛ nɔ́ nɛ e ngɛ pee ɔ. Kɛkɛ ɔ, ke jokuɛ ɔ ye jeha nɛ tsɔɔ kaa e su lɔle hɛɛmi nya a, bitsɛ ɔ kɛ lɔle ɔ woɔ e bi ɔ dɛ, nɛ e tsɔɔ ɔ lɛ bɔ nɛ a kudɔɔ lɛ ha. Be komɛ ɔ, eko ɔ, ke bitsɛ ɔ hɛɛ bɔɔ ɔ, kɛkɛ e ha e bi ɔ hu hɛɛ bɔɔ. Se kɛ yaa kɛ yaa, akɛnɛ bitsɛ ɔ jeha ngɛ hɛ mi yae he je ɔ, eko ɔ, e binyumu ɔ nɛ e maa hi lɔle ɔ kudɔe behi fuu. Bitsɛ nɛ ngɛ nile nɛ ɔ bua jɔɔ kaa  e binyumu ɔ ngɛ lɔle ɔ hɛɛe amlɔ nɛ ɔ, nɛ e susuu we kaa lɛ ji nɔ nɛ e sa kaa e hɛɛ lɔle ɔ. Jã kɛ̃ nɛ nyɛmimɛ nyumuhi nɛ a wa ngɛ jeha mi ɔ bua jɔɔ ke ji a tsɔse nihewi nɛ a kɛ ní tsumi wo a dɛ ngɛ asafo ɔ mi ɔ.

10. Kɛ Mose na hɛ mi nyami kɛ he blɔ ha kɛɛ?

10 E sɛ nɛ nihi nɛ a wa ngɛ jeha mi ɔ nɛ a je hunga. Mo kai bɔ nɛ Mose pee e ní ha benɛ Israel bi ɔmɛ a kpɛti ni komɛ bɔni a ní peemi kaa gbali ɔ. (Kane 4 Mose 11:24-29.) Yoshua nɛ ji Mose se yelɔ ɔ suɔ kaa e tsi ni ɔmɛ a nya. Eko ɔ, e susu kaa a ngɛ hɛ mi nyami kɛ he blɔ nɛ Mose ngɛ ɔ he guɛ gbee. Se Mose de ke: ‘Imi lɛ o ngɛ hunga jee ha nɛ ɔ? I ná jinɛ Yehowa ngɔ e mumi ɔ ngɔ ha e ma a tsuo, nɛ mɛ tsuo a kpa ngmlaa kaa gbali!’ Mose yɔse kaa Yehowa nine ngɛ sane ɔ mi. Mose hla we hɛ mi nyami ha e he, enɛ ɔ he ɔ, e tsɔɔ kaa e suɔ kaa Yehowa sɔmɔli kpahi hu a nine nɛ su he blɔ nɛ ɔ nɔ. Kaa Mose ɔ, ke a kɛ ní tsumi nɛ wa susu kaa eko ɔ, jinɛ wɔ nɛ e sa kaa wa tsu ɔ wo ní kpahi a dɛ ɔ, anɛ wa bua jɔɛ lo?

11. Mɛni nyɛminyumu ko de ngɛ e ní tsumi nɛ e ngɔ kɛ ha nɔ kpa a he?

11 Mwɔnɛ ɔ, wa ngɛ nyɛmimɛ nyumuhi fuu nɛ a kɛ a he wami tsu ní jeha nyɔngmahi abɔ. A tsɔse ni kpahi nɛ a ngɔ ní tsumi nguahi kɛ wo a dɛ. Kaa nɔ hyɛmi nɔ́ ɔ, nyɛminyumu ko nɛ a tsɛɛ lɛ ke Peter a ngɔ jeha 74 kɛ se kɛ tsu be tsuo sɔmɔmi ní tsumi ɔ. E kɛ jeha nɛ ɔ mi 35 sɔmɔ ngɛ asafo ɔ ní tsumi kɔni ko ngɛ Yuropa. Be ko nɛ be ɔ, lɛ nɛ e hyɛɛ Ní Tsumi He Nɛ Hyɛɛ Sɔmɔmi Ní Tsumi ɔ Nɔ ɔ nɔ. Se amlɔ nɛ ɔ, a kɛ ní tsumi ɔ wo niheyo ko nɛ a tsɛɛ lɛ ke Paul nɛ e kɛ Peter tsu ní jehahi fuu ɔ dɛ. Benɛ a bi Peter ke mɛni ji e susumi ngɛ e ní tsumi nɛ a tsake ɔ he ɔ, e de ke: “Ye bua jɔ wawɛɛ kaa wa ngɛ nyɛmimɛ nyumuhi nɛ a tsɔse mɛ nɛ a kɛ ní tsumihi wo a dɛ, nɛ a ngɛ a ní tsumi ɔ tsue saminya.”

MO JE BUMI KPO KƐ TSƆƆ NIHI NƐ A WA NGƐ JEHA MI NƐ A NGƐ WA KPƐTI Ɔ

12. Mɛni e sa kaa waa kase ngɛ Rehoboam sane ɔ mi?

12 Ngɛ Salomo gbenɔ se ɔ, e binyumu Rehoboam ba ye matsɛ. Benɛ Rehoboam hia ga womi nɛ e kɛ ma tsu e ní tsumi ɔ, kekleekle ɔ, e ya bi nikɔtɔma amɛ. Se e kua a ga womi ɔ! Nɛ e ho ya bi e juã nihewi nɛ e kɛ mɛ je nɔ nɛ a ji e tsɔli ɔ mohu ga womi. Nɔ́ nɛ je mi kɛ ba a hí kulaa. (2 Kron. 10:6-11, 19) Mɛni wa kaseɔ ngɛ mi? Juɛmi ngɛ mi kaa wa ma bi ga womi kɛ je nihi nɛ a wa ngɛ jeha mi nɛ a ngɛ níhi a si kpami ɔ a ngɔ, nɛ́ wa susu a ga womi ɔ he saminya. E ngɛ mi kaa pi doo kaa e sa nɛ nihewi nɛ a ngɔ blɔhi nɛ a guɔ nɔ kɛ tsuɔ níhi a he ni blema a nɛ tsu ní mohu lɛɛ, se e sɛ nɛ a kɛ oya yemi nɛ kua nikɔtɔmahi a ga womihi.

13. Kɛ e sa kaa nihewi nɛ a kɛ nihi nɛ a wa ngɛ jeha mi ɔ nɛ hi si ha kɛɛ?

13 Nihewi komɛ kɛ nihi nɛ a wa ngɛ jeha mi lɛ ngɛ ní tsue, se eko ɔ, nihewi ɔmɛ nɛ a ngɛ ní tsumi ɔ nɔ hyɛe. E ngɛ mi kaa eko ɔ, a ha nihewi nɛ ɔmɛ he blɔ ehe mohu lɛɛ, se a bɔɔ mɔde kaa a ma bi ga womi kɛ je nihi nɛ a wa ngɛ jeha mi nɛ a ngɛ níhi a si kpami ɔ a ngɔ loko a pee juɛmi ngɛ nɔ́ ko he. Paul nɛ a tu e he munyu kɛ sɛ hlami kaa a kɛ ní tsumi ko nɛ Peter hyɛɛ nɔ ngɛ Betel ɔ wo e dɛ ɔ de ke: “I bɔ mɔde kaa ma hla ga womi ngɛ Peter dɛ, nɛ i wo nyɛmimɛ kpahi nɛ i kɛ mɛ tsuɔ ní ɔ ga kaa mɛ hu a pee jã.”

14. Mɛni wa kaseɔ ngɛ bɔ nɛ bɔfo Paulo kɛ Timoteo hi si ha a mi?

14 Niheyo Timoteo kɛ bɔfo Paulo tsu ní jehahi babauu. (Kane Filipi Bi 2:20-22.) Paulo ngma sɛ womi kɛ ya ha Korinto bi ɔmɛ. E de ke: “I ngɛ Timoteo nyɛ ngɔ tsɔe ngɛ enɛ ɔ he. E ngɛ kaa imi nitsɛ ye bi fɔfɔɛ; nɛ e yeɔ mi anɔkuale, nɛ i suɔ lɛ, ejakaa e le Kristo. Ke Timoteo ba a, e ma kai nyɛ bɔ nɛ i plɛ kɛ ngɛ Yesu Kristo se nyɛɛe  ha, kaa bɔ nɛ a naa ngɛ ye ní tsɔɔmi mi ngɛ asafo ɔmɛ a mi ngɛ he tsuaa he ɔ.” (1 Kor. 4:17) Munyu kpiti nɛ ɔ nɛ Paulo tu ɔ tsɔɔ huɛ bɔmi nɛ ngɛ e kɛ Timoteo a kpɛti. Paulo ná Timoteo he deka, nɛ e tsɔɔ lɛ ‘bɔ nɛ e plɛ kɛ ngɛ Kristo se nyɛɛe ha’ a. Timoteo kase Paulo wawɛɛ, nɛ Paulo suɔ e sane. Paulo ná nɔ mi mami kaa Timoteo ma nyɛ maa ye bua Korinto bi ɔmɛ konɛ huɛ bɔmi kpakpa nɛ hi a kɛ Mawu a kpɛti. Enɛ ɔ ji nɔ hyɛmi nɔ́ kpakpa nɛ asafo mi nikɔtɔmahi ma nyɛ maa kase mwɔnɛ ɔ, be mi nɛ a ngɛ nyɛmimɛ nyumu kpahi tsɔsee konɛ a nyɛɛ hɛ mi ngɛ asafo ɔ mi ɔ!

WƆ TSUO WA MA NYƐ MAA YE BUA

15. Ke tsakemi ko sa wa he ɔ, mɛni blɔ nɔ nɛ Paulo ga womi nɛ e kɛ ha Kristofohi nɛ a ngɛ Roma a maa ye bua wɔ ngɛ?

15 Wa ngɛ be ko nɛ sa kadimi wawɛɛ mi. Yehowa blɔ nya tomi ɔ fã nɛ ngɛ zugba a nɔ ɔ ngɛ hɛ mi yae ngɛ blɔhi fuu a nɔ, nɛ enɛ ɔ biɔ tsakemihi. Ke tsakemi ko sa wa he ɔ, e sa nɛ waa ba wa he si nɛ waa kɛ wa juɛmi nɛ ma nɔ́ nɛ Yehowa suɔ ɔ nɔ, se pi nɔ́ nɛ wɔɔ wa suɔ. Jã nɛ wa maa pee ɔ ma ha nɛ kake peemi maa ba. Paulo ngma sɛ womi kɛ ya ha Kristofohi nɛ a ngɛ Roma a. E de ke: ‘I ngɛ nyɛ tsuo dee ke, nyɛ ti nɔ ko kó bu lɛ nitsɛ e he tsɔ pe bɔ nɛ sa kaa e buu e he. Se mohu e pee e he humi kaa bɔ nɛ hemi kɛ yemi nɛ Mawu ha lɛ ɔ tsɔɔ kaa e pee ɔ. Wa ti nɔ tsuaa nɔ ngɛ nɔmlɔ tso kake kɛ e he níhi fuu, se e he ní ɔmɛ tsuo tsuɔ ní slɔɔtoslɔɔtohi ngɛ nɔmlɔ tso ɔ he. Jã kɛ̃ wɔ nimli babauu nɛ ɔ, wa peeɔ nɔmlɔ tso kake ngɛ Kristo mi, nɛ wa ti nɔ tsuaa nɔ ɔ, e nyɛmimɛ ɔmɛ a nɔ ji lɛ.’Rom. 12:3-5.

16. Mɛni nihi nɛ a wa ngɛ jeha mi kɛ a yihi, kɛ nihewi kɛ a yihi ma nyɛ maa pee konɛ tue mi jɔmi kɛ kake peemi nɛ hi Yehowa asafo ɔ mi?

16 Bɔ tsuaa bɔ nɛ wa si himi ngɛ ɔ, nyɛ ha nɛ wɔ tsuo waa bɔ wa he mɔde wawɛɛ konɛ wa ha nɛ Yehowa Matsɛ Yemi ɔ ní tsumi nɛ pe kulaa a nɛ ya hɛ mi. Nyɛ nihi nɛ nyɛ wa ngɛ jeha mi, nyɛ tsɔse nihewi konɛ a tsu ní tsumi nɛ nyɛ tsuɔ ɔ. Nyɛ nihewi hu, ke a kɛ ní tsumi wo nyɛ dɛ ɔ, nyɛɛ pɛtɛ he, nyɛɛ ba nyɛ he si, nɛ nyɛ je bumi kpo kɛ tsɔɔ nihi nɛ a wa ngɛ jeha mi ɔ. Nɛ nyɛ yigbayi, nyɛɛ kase Akuila yo Priskila. Priskila kɛ anɔkuale yemi fĩ e huno ɔ se ngɛ si fɔfɔɛ fɛɛ si fɔfɔɛ mi.Níts. 18:2.

17. Mɛni hɛ kɛ nɔ fɔmi Yesu ná ngɛ e kaseli ɔmɛ a mi, nɛ mɛni tsɔsemi e kɛ ha mɛ?

17 Ke e ba lɛ tsɔsemi nɛ a ma tsɔse nihi konɛ a kɛ ní tsumi nɛ wo a dɛ blɔ fa mi ɔ, Yesu ji nɔ nɛ pee nɔ hyɛmi nɔ́ nɛ pe kulaa ha wɔ. E le kaa e be kɛe nɛ e sɔmɔmi ní tsumi ngɛ zugba a nɔ ɔ maa ba nyagbe, nɛ e he maa hia nɛ ni kpahi nɛ a tsa nɔ. E ngɛ mi kaa e kaseli ɔmɛ yi mluku mohu lɛɛ, se e ngɛ hɛ kɛ nɔ fɔmi ngɛ a mi, nɛ e de mɛ kaa a ma tsu ní tsumi nɛ kle pe e nɔ́ ɔ po. (Yoh. 14:12) E tsɔse mɛ saminya, nɛ a fiɛɛ sane kpakpa a kɛ kpa je ɔ mi tsuo ngɛ jamɛ a be ɔ mi.Kol. 1:23.

18. Mɛni jɔɔmihi nɛ wa ngɛ blɔ hyɛe, nɛ mɛni wa ma nyɛ maa pee amlɔ nɛ ɔ?

18 Benɛ Yesu ba gbo nɛ e ngɔ e wami kɛ sã afɔle ɔ se ɔ, Yehowa tle lɛ si kɛ ho hiɔwe ya, nɛ e kɛ ní tsumi fuu wo e dɛ. A ha lɛ ‘he wami kpetekpleenyɛ nɛ pã nihi tsuo nɛ ngɛ tsɛ yee a he wami.’ (Efe. 1:19-21) Ke wa ya nɔ nɛ wa ye anɔkuale nɛ wa gbo loko Harmagedon ta a fɛ po ɔ, a ma tle wɔ si, nɛ wa maa hi si ngɛ je ehe nɛ a peeɔ nɔ́ nɛ da ngɛ mi ɔ mi. Wa ma ná ní tsumi fuu nɛ ngɛ bua jɔmi nɛ wa ma tsu. Se amlɔ nɛ ɔ, ní tsumi ko ngɛ nɛ he hia wawɛɛ nɛ wɔ tsuo wa ma nyɛ ma tsu. Ní tsumi nɛ ɔ ji sane kpakpa fiɛɛmi kɛ kaselɔ peemi ní tsumi ɔ. Niheyo jio, nɔ nɛ wa ngɛ jeha mi jio, nyɛ ha nɛ wɔ tsuo waa ya nɔ nɛ ‘ní tsumi nɛ wa ngɛ tsue ha Nyɔmtsɛ ɔ, wa tsu nɛ e ya nɔ saminya be tsuaa be.’—1 Kor. 15:58.